Read Phom Naga SHAHPHENBÜTHÜ 20 Bible Online

SHAHPHENBÜTHÜ 20 - Phom Naga bible

SHAHPHENBÜTHÜ 20

¹Hahepak kü Israel am peü Dan kübü Beer-sheba hatü Gilead kahdok kübüao omshi büm hük kei shepei shatü Mizpahlei SHEMBÜPA touei thaiteke.

²Halei Israel jatthü kübü mübüthü peü Kahvangei nanglakthü thaipülei om, hatü lahhilaong changshi temtükpü veshan 400, 000 nyuteke.

³Hahepak kü lebü Israel am kemei Mizpahlei thaiyei nyükeja shei Benjamin ami dan. Israel ami, “Hapa vongshüh mekei vampa ham kü eshih” shei phe.

⁴Levi am üpalei yiükphü jütükpa, büpai jangei, “Ngelei yiükphü henji Benjamin amei kahdok Gibeah chingei paümhen peipeih.

⁵Yanüng Gibeah ami ngei jününg shei yemei peiyei shem shümpeih. Jomphongi ngelei yiükphü shüei ngaiyei douten dükei jütükpeih.

⁶Hanangkü ngei pinnyülei mahng yah-ei leiyei phuo mü phuo mü dehtü Israel jatthü peü touei shompeih; mehenangkü jomi Israel am kü hapa keipü nebahnevaipü dou dükpeih.

⁷Hanangkü hatouei nyupü jen Israel am, jeni hapa kü mehe dükhen chudeih nyüpa, ekütuh” shei eteke.

⁸Nanglakthü peü chemi yaongei, “Jenphong üpayao baümtapei nevaijü shemei neleihen.

⁹Shejao shaang jenphongi Gibeah am kü hapa dükhen hih: Jenphongi shaang phongyomhen hatü phong kü hetpü aimü Gibeah am chinghah aonghen.

¹⁰Jenphongi Israel jatthü peü kübü shennyak kho hük kübü shennyak an, haja khong kübü shennyak kho hük, hatü haja an khong kübü haja hük jehen; jomphongi veshanthü kü hahying shomhen, hatü aopüthü kemei Israel kü hapa keipü nebahnevaipü douten dükpü nangkü Gibeah ching hahnüng aonghen” shei eteiteke.

¹¹Hanangkü Israel am shennyakthü kemei mongjemtü hapa ching hahnüng thaiteke.

¹²Israel jatthüi Benjamin jat kemeilei shennyak shomei, “Amphongi mehekei hapakei hangkuli sho mahhüei douten dükpa?

¹³Israel kübü nemeipü mang shaptükhen shingvaishi Gibeah kü nemeipü shennyakthü shakei ngaishih hatü hamphongi jomphong jütükhen” shei e. Shejao Benjamin ami jempü jeihinaü Israel jatthüi epü kü dhaong neno.

¹⁴Benjamin ami Israel am mü hokhen shingvaishi ching leipü layaongei Gibeahlei chemi thai.

¹⁵Benjamin ami ha nyih jomei veshanthü haja hapü vok nyükei thai; ha mü lenei Gibeahlei nyupü shennyak kho nyet jeteke.

¹⁶Jom shennyak kho nyet jepü kemei laknyongi dükpüthü, hatü jomphong sholah hükao neshai-i phuo jiüpü shennyakthü nyuteke.

¹⁷Israel ami Benjamin am neomi veshan 400, 000 nyükei thaiteke.

¹⁸Israel ami layaongei Bethelei aongei, “Benjamin am khüei hokhen üam shong daihenang?” shei SHEMBÜPA kü phe. SHEMBÜPAi, “Judah am shong aongtuh” shei e.

¹⁹Nepphei Israel am aongei Gibeah yopailei baümtap veteke.

²⁰Israel ami Benjamin am khüei hokhen Gibeahlei show lingei tapteke.

²¹Gibeah leipü Benjamin am vamei Israel am haja hapü nyi hapa nyihcha kü jü.

²²Shejao Israel am hüki hük mü monglong shah eteitü shongpü nyih showpü shing kü shao show ling,

²³hatü Israel am aongei om dhüshi SHEMBÜPA kü thep, hatü SHEMBÜPA kü, “Hamei jeihinaü Benjamin am mü khüei hokhen ham aongüla?” shei pheyei e. SHEMBÜPAi, “Aongei hoktuh” shei e.

²⁴Hanangkü Israel ami neppheiyao Benjamin am khüei hokhen aong,

²⁵hatü Benjamin amao nyih nyipabü kü hokhen Gibeah leipü vam, hatü ha nyih jomi Israel am veshanthü haja anpüshet thahshi jü.

²⁶Hahepak kü Israel shennyakthü hatü veshanthü kemei Bethelei aongei SHEMBÜPA touei thepei uo, hatü om dhüshi jomphongi shüaeiyungleyei SHEMBÜPA kü lanei jakpü moila hatü mongjempü moila shuoh,

²⁷hatü Israel ami SHEMBÜPA kü pheteke. (Hathü nyih kü Vangpüshuwpü Pelayü Bethelei nyu,

²⁸hatü Eleazarlei cheha Phinehas, Aaronei chehüi hapa chongphoei nyuteke.) Jomphongi, “Hamphongi hamei jeihinaü Benjamin am mü hoknüng aonghen hi hajük kü dohdaihenang?” shei phe. SHEMBÜPAi, “Aongtuh, hatü ngenyih ammei lak kü jomphong shuohhen” shei e.

²⁹Hanangkü Israel ami Gibeah shinei tapteke.

³⁰Jomi nyih jempabü kao Benjamin am khüei hokhen sheleipü kei Gibeahlei aongei show ling.

³¹Benjamin ami hokhen shingvaishi vamei jomei ching kübü laoei dai. Sheleipü kei-üng jomi Israel am Bethelei hatü Gibeahlei heihpü lem hatü koshoya kü shennyak hapüan hükshing jü.

³²Benjamin ami, “Sheleipü kei-üng jeni jom neünyu khih” shei etei, shejao Israel ami, “Jen dok lepdaishuohshah, shejüang jom ching kübü laoei lemnyülei vamkahen hih” shei etei.

³³Hanangkü Israel am khongnyü shinei leitü Baal Tamarlei show lingteke, hatü Gibeahlei show kü uopüthü show kübü vamei heshüphi Gibeahlei heih-ei ching shonlang.

³⁴Hahepak kü Israel am veshan haja an thepju kü yaongshi Gibeah am khüei hok, hatü vehokü mangshi shiüteke. Shejao Benjamin ami jom mahhen nenyingi nyu.

³⁵SHEMBÜPAi ha nyih Benjamin am kü Israel ami neühü. Israel ami ha nyih Benjamin am veshan 25, 100 jü.

³⁶Hahepak küang Benjamin ami jom mahnyu khih shei nying. Israel am khongnyü Benjamin am kü dok leppeyü jomphongi Gibeahlei show kü uopüthü kü monglemteke.

³⁷Show kü uopü shennyakthü shülangi Gibeah ching mongei shüei ching yanei halei nyupüthü peü jüteke.

³⁸Israel am khongnyü hatü show kü uopüthüi eteipeyü, mechem jomi aw hapei ching kü awshit anshihhen,

³⁹Israel khongnyüi jüyaki heihhen shei eteiteke. Shejao mechem Benjamin ami Israel am hapüan hükshing jüpa, jomphongi, “Sheleipü kei-üng jeni jom neünyu khih” shei etei.

⁴⁰Shejao mechem ching kübü awshit vampa, Benjamin ami yaakei veishuohshingkü ching kü aw aongpü vang mü dhaüshi eeteke.

⁴¹Hahepak kü Israel am khongnyü yaakei lei, hatü Benjamin amü nyemdai.

⁴²Hanangkü jomi Israel am kü nyemei yingnyü lemei nyai, shejao jomi show kübü neyangaok, hatü Israel am chingei tappüthü vamei khongnyü hi jom aa kübü jükemteke.

⁴³Jomi Benjamin am shümei yahtü heongphi Gibeah thahshi changei shanei jüteke.

⁴⁴Ha nyih Benjamin am veshan haja anpüshet thahshi jü.

⁴⁵Jom nyokei leitü yingnyü philei Rimmon yaongvak lemei nyaiyei daishingkü Israel ami lemyang kü shennyak haja nga jü. Jomi nedoh-i Gidom thahshi changei shanei shao haja nyi thahshi jüteke.

⁴⁶Ha nyih Benjamin am veshanthü, jom peü monglongpü hampathü haja hapü nga thahshi jü.

⁴⁷Shejao shennyak kho vok nyokei leitü yingnyülei nyaiyei daiyei Rimmon yaongvakei lenyang ali thahshi nyu.

⁴⁸Israel ami aopü Benjamin am mü hokhen yaakei lei, hatü baha, nyüha hashihthü hatü yemhimakthü kemei jü. Hapa moidoi kü nyupü chingthü kemei jomi awi haptük.