Read Phom Naga SHAHPHENBÜTHÜ 4 Bible Online

SHAHPHENBÜTHÜ 4 - Phom Naga bible

SHAHPHENBÜTHÜ 4

¹Ehud didaipheikü Israel ami shao SHEMBÜPA touei mehe mang nyu, ha dükteke.

²Hanangkü SHEMBÜPAi jom Hazorlei vanglem lempü Kanan amei Jabin ongpalei lak kü shuoh. Büpalei veshan mübüyü Harosheth Haggoyimei nyupü Sisera nyuteke.

³Mehenangkü Jabinü nyiam khari kho shü angteke, hatü büpai Israel nanglakthü shangkü longi mangshi hatü nemei-i vangbong kukha thahshi vanglem lem. Hahepak kü Israel ami SHEMBÜPA kü sheühshih shei len.

⁴Hahepak kü Lappidothlei chenyüha Deborahyü thibü nyuteke, hatü pinnyüi Israel amei shahphenteke.

⁵Pinnyüi Ephraim amei phaüshang kahmük Ramah hatü Bethel nyi aa kübü Deborah amei palm pü phangei uoteihamteke, hatü Israel ami shahphenhahhen shingvaishi pinnyü touei peihamteke.

⁶Nyih hük pinnyüi Naphtali kü nyupü Kadesh chingnyü leipü Abinoamei cheha Barak kü nyükei büpa kü, “SHEMBÜPA, Israel amei Kahvangi nüng kü, ‘Daituh, hatü Naphtali hatü Zebulun jat nyi kübü shennyak haja an mütuh, hatü Tabor Kahshang lemei aongei show lingtuh’ shei SHEMBÜPAi enyüke shei eteke.”

⁷Jabinei veshan mübü Sisera, am khüei hokhen shingvaishi Kishon yungyenei büpalei koyei khari hatü veshanthü müei deiphahen, hatü ngei ammei lak kü büpa shuohhen.

⁸Hahepak kü Baraki pinnyü kü, “Nüng ngei mü daiküjü mon ngei daihen hih, nüng ngei mü nedaiküjema, ngei nedaipih” shei e.

⁹Deborah-i, “Meiteke” shei e. “Ngei nüng mü daishahma, shejao vehok aokpü menmeiyü nüngei nevaikahen; mehenangkü SHEMBÜPAi Siserayü nyüha hükei lak kü shuohhen.” Hanangkü Barak mü Deborah layaongei Kedeshlei dai.

¹⁰Baraki Naphtali hatü Zebulun jat nyi kübü shennyak haja an nyük, hatü jom büpa phei müei dai, hatü Deborah-ao büpa mü dai.

¹¹Shaang, Ken am Heber, lebü Ken am, Mosalei cheshongpa Hobabei hühihathü mü yanei Kedesh yopailei Zaanannim püyingei ashakshem veteke.

¹²Mechem Abinoamei cheha Barak Tabor Kahshangei aongteke shei Sisera-i danpa,

¹³Sisera-i nyiam khari kho shü hatü büpa mü nyupü veshanthü peü nyükei Harosheth-Haggoyim kübü Kishon yungyen thahshi shom.

¹⁴Hahepak kü Deborah-i Barak kü, “Daituh, SHEMBÜPAi nüng kü lem münyüke. Shinnyih büpai nüngei lak kü Sisera shuohteke” shei e. Hanangkü Baraki shennyak haja an mütü Tabor Kahshang leipü dai.

¹⁵Mechem Baraki büpalei veshanthü mütü thepju kü heihpa, SHEMBÜPAi Sisera hatü büpalei nyiam khari hatü büpalei veshanthü peü Barak kü nyemhü, hatü Sisera-i khari leipü shüh-ei la mü mok.

¹⁶Baraki kharithü hatü veshanthü Harosheth Haggoyim thahshi changtük. Siseralei veshanthü hükao ne-ao-i jütükkem.

¹⁷Sisera nyemei daiyei Ken am Heberlei chenyüha Jaelei shemei peijateke; mehenangkü Hazor amei ong Jabin hatü Ken am Heber phang nyi aa kü chingmei nyu.

¹⁸Jaeli Sisera mü pongteinüng heih, hatü büpa kü, “Longpüba, shem mongei shüdaikei, tenyem” shei e. Hanangkü büpa shem mongei shü hatü pinnyüi büpa kü ashaki jümtü jophong.

¹⁹Hahepak kü büpai pinnyü kü, “Ngei yung leangke, yinghen yung yahshih” shei e. Pinnyüi amma shihpü phaishuw khong apei yinghen yung shuoh, hatü shao jotük.

²⁰Hahepak kü büpai pinnyü kü, “Shadenei yaongtuh, hatü shennyak hanei peiyei üpayao nyüla shei phephüjü neshiü shei etuh” shei eteke.

²¹Sisera longi nyiupü nangkü shidai. Hahepak kü Jaeli kaoklak hatü pü noei nenmü shüei büpalei shangba kü hattü kahmongei dungtük hatü büpa didai.

²²Mechem Baraki Sisera yemei peijapa, Jael vamei büpa mü pongei, “Shükühümao, nüngi yempü shennyak huphüshah” shei e. Hanangkü büpa pinnyülei shemei shüei veishingkü shangba kü püi hattü Sisera jüei chongjateke.

²³Hanangkü ha nyih SHEMBÜPAi Kanan ong Jabin kü Israel ami neühüteke.

²⁴Kanan ong Jabin mangjü thahshi Israel am wong kohpüba leiteke.