Read Phom Naga SHAHPHENBÜTHÜ 5 Bible Online

SHAHPHENBÜTHÜ 5 - Phom Naga bible

SHAHPHENBÜTHÜ 5

¹Hapa nyih Deborah hatü Abinoamei cheha Barak nyi-i hapa kesho lokteke:

²“Mechem Israel am hokhen tempa, nanglakthüi lanei shuohpeih; SHEMBÜPA men longtuh.

³Bangtuh, Oh ongpathü, kenhingei bangtuh, Oh vanglem lempüthü! SHEMBÜPA, Israel amei Kahvang kü ngei ünghinyah, hatü ngeü meipai kesho lokhen.

⁴SHEMBÜPA, mechem Seir kahshangthü hatü Edom kahdok kübü vamei nüng daipa, kahdoknyü jenteke, hatü kahdoknyü nyaüdai, hatü phumi vang keihüteke.

⁵Sinailei vamei hupü SHEMBÜPA touei, SHEMBÜPA, Israel Kahvang touei kahshangthüao jennyüke.

⁶Anathlei cheha Shamgar hatü Jaelei nyihthü kü, koyeithü kahdok homei nepeih, yendaiouhampüthüi keülem kü daihampeih.

⁷Israel amei jilathü vüngmaki leidaipeih, Oh Deborah, nüng mangvam shekü; Nüng Israel amei hümlungnyü vaishi vampeih.

⁸Mechem Israel ami kahvang jathü jehahpa, kahmük kü vehoki maei nyuteke, Israel am shennyak haja pinyi khongkü vehok phunglang nohen neshiüi leidai.

⁹Ngelei mongdangü Israel am haüpü wongpüthü mü, hatü lanei shuohpü nanglakthü mü nyuhampeih, SHEMBÜPA men longtuh!

¹⁰Hapa jung etuh, amphong gadu shola kü, hatü ashak chetlüpü kü uopüthü, hatü lem kü kampüthü.

¹¹Bangtuh! nyahhinyiu ngeü mü yungkuk shinei SHEMBÜPAi aokpü dangpü, hatü Israel hampathüi vehok neüpü jung enyüke. SHEMBÜPAlei nanglakthü chingnyü penyüsha thahshi peiteke.

¹²Paotuh, paotuh, Deborah, paotuh, kesho loktuh! Paotuh, Oh Barak, Abinoamei cheha, shennyakthü wüpküpei mülangtuh.

¹³Hahepak kü haüpü wongpüthü jomei mübüthü touei, SHEMBÜPAlei nanglakthü büpa touei hokhen temei peiteke.

¹⁴Jom Ephraim leipü kahjilei heih, nüng pheikü Benjamin jat hatü hapa nanglakthü müteke. Makir kübü mübüthü yiüteke, hatü Zebulun leipü lakchongbüthü vamteke.

¹⁵Issakhar kübü mübüthü Deborah mü dai, Hih, Issakhar am Barak mü kahjilei mokteke. Reuben ami shahphen neyah-aoki mong üathamaei nyuteke.

¹⁶Mehekei jom mithü ngaümpheilei nyupa? Hih, Reuben jat hanteitü nyu; jomi shahphen neyah-aoki mong üathamaei nyuteke.

¹⁷Gad am jat Jordan heong philei nyu, Dan am jahas touei nyu. Asher jatü yungching yungkung kü nyuteke.

¹⁸Shejao Zebulun hatü Naphtali am nanglakthüi thepju kü yangnyu lanei shuohteke.

¹⁹Taanakhlei, Megiddo yungyen touei ongpathü peiyei hokteke, Kanan ongthü hokteke, shejao jomi hon hi ngin yah-ei neleiaok.

²⁰Vangsho lithilenthüi jom kamshingkü Sisera khüei hokteke.

²¹Kishon yung bhümei jom maoei shanlang, Mokpü Kishon yungnyü büngi jom wong mü maoeishanlang.

²²Hahepak kü koyeithü phaukteiyaki, kahdok kü la shoupei peiteke.

²³Meroz am thaüvaütüktuh, halei nyupüthü shahyaki thaüvaütüktuh shei SHEMBÜPAlei phongshani eteke; Mehenangkü jomphongi SHEMBÜPA kü sheühhen, büpa khüambakei hokhen nepei.

²⁴Peü mü moihimanpeyü ashak shemei nyupü Ken am Heberlei chenyüha Jael khih.

²⁵Sisera-i pinnyü kü yung yüteke, shejao pinnyüi amma shuoh; Pinnyüi nükshung kü amma cheü shihtü shuoh.

²⁶Pinnyüi lak phihükei phaaknyong, lak hük lemei kaoklak noteke. Pinnyüi Sisera kü hattü büpalei shangjing ngümtük, pinnyüi büpalei shangba nihtük.

²⁷Büpa doei shateke; büpa pinnyülei la tüngei shükteke; Büpa doei shükpü shingei büpa di.

²⁸Siseralei hümlungnyüi ümha shaden homei vei; Mükyang yungdaitü shadenei chiyei, mehekei koyei leiküpü ladhaok ngeü nedannya; mehekei om pheinya yo shei eteke.

²⁹Nyühathü khongkü peü mü nahpü shennyaki pinnyü kü eteke,

³⁰Jomi vehok kü yahpü douhinang, hatü veshan pabüm ieyei nela hük nevaijü nyi; Sisera shing shemmei ashak, hatü onglanyü shing üng kü ngeihhen hiupü ashak hanteiyei shiühen.

³¹Hanangkü nüngei vepathü hapakei mahkemhen, Oh Ongpa! Shejao nüng kü bampüthü vanghenyü keiha nyahen! Hatü kahdok kü bong pinyi thahshi chingmeivangmei nyu.”