Read Phom Naga SHAHPHENBÜTHÜ 9 Bible Online

SHAHPHENBÜTHÜ 9 - Phom Naga bible

SHAHPHENBÜTHÜ 9

¹Jerubbaalei cheha Abimeleki Shekhemei cheko am touei heih-ei cheko am phang kemei kü,

²“Jerubbaalei hapeüthü pejempüan kemei am shak kü vanglem lempü meihen hi shennyak hüki vanglem lempü meihenshang Shekhem am bühüthü kü phetuh. Ngeiyü ammei iy hatü phai hih” shei eteke.

³Mechem cheko ami hapa jung meishi Shekhem am kü eshuohpa, “Büpayü jenei jeihinaü” shei etü jomphongi Abimelekh phei mühen mongteke.

⁴Jomphongi büpa kü Baal-Berith phopshem leipü ngin pejempüan yah-ei shuoh, hatü büpai hapa ngini büpa phei mühen shennyaktenthü shakteke.

⁵Büpai Ophrah leipü chepalei shemei leiyei yaong hük shangkü Jerubbaalei chehathü, büpalei jeihinaüthü jom pejempüan jüteke. Shejao Gideonei cheha naüshompa Jotham jodaipü nangkü nejüaok.

⁶Hapheikü Shekhem hatü Beth-Millo shennyakthü kemei Shekhem leipü longkhampü shemnyü touei thaiyei Abimelekh ong vaihüteke.

⁷Mechem Jothami hapa jung danpa, büpai Gerizim Kahshangei heih-ei wong mü lenei jomphong kü, “Ngei epü kü bangtuh, am Shekhem shennyakthü, shejüang Kahvangiyao ammi epü bangkahen.

⁸Nyih hük püthü kemei jom shing ong jehen thaiteke. Jomphongi olive pü kü, ‘Nüng hamei ong vaikütuh’ shei eteke.

⁹Olive pü-i jangei, ‘Ngei ammei ong vaihen tata kü kahvangthü hatü shennyakthü kü dhüm shuoh-ei noteipü mainga yenpü dohdaihen je?’ shei e.

¹⁰Hapheikü püthüi adhapü kü, ‘Nüng hamei ong vaikütuh’ shei e.

¹¹Shejao adhapü-i jangei, ‘Ngei ammei ong vaihen tata kü vüngnyangpü betjük jükpü dohdaihen je?’ shei e.

¹²Hanangkü püthüi nyalingngupai kü, ‘Nüng hamei ong vaikütuh’ shei e.

¹³Shejao nyalingngupai-i jangei, ‘Ngei ammei ong vaihen tata kü kahvangthü kü hatü shennyakthü mongmeihüpü yiü nevami dohdaihen je?’ shei e.

¹⁴Hahepak kü püthü kemei thaiyei daümnyak hüh kü, ‘Nüng hamei ong vaikütuh’ shei e.

¹⁵Hahepak kü daümnyak hüh-i, ‘Hingmei amphongi ngei ong nyemvaikei shei deihjema peiyei ngelei dhüm kü loituh; hapakei nevaijema daümnyak hüh kübü aw vamei Lebanon kübü cedar püthü hahtükkemtuh!’ ” shei eteke.

¹⁶“Hanangkü shaang, amphongi longi dhüm kohshi Abimelekh ong vaihüpü vaijema, Gideoni am kü dükpü shangshi büpa hatü büpalei shem am kü ammi nola?

¹⁷Ngelei opai am nangkü hokpeih. Büpai am Midian amei lak kübü yanghen büpalei yangnyu lanei shuohpeih shei deih-ei dangtuh.

¹⁸Shejao shinnyih ammi opalei shem am khüei yaongteke. Amphongi büpalei hapeüthü kemei aa hüki bühpü Abimelekh shem am vaipü nangkü ong vaihühen tata kü yaong shangkü jükemteke.

¹⁹Hanangkü shaang, mepa amphongi Gideon hatü büpalei shem am kü dükpa, hayü shahhingi hatü dhüm shuoh-ei dükpeih shei hinglemei deihjema, amphongi Abimelekh mü mongongshi nyutuh, hatü büpaiyao amphong mü mongongshi nyemnyukei.

²⁰Hei nevaijema Abimelekhei büm kübü aw vamei Shekhem hatü Beth-Millo shennyakthü kemei hahtüktuh nevaijü Shekhem hatü Beth-Millo kübü aw vamei Abimelekh hahtüktuh” shei eteke.

²¹Jothami chejei Abimelekh kü nyempü nangkü Beerlei leiyei nyuteke.

²²Abimelekh-i Israel kü vangbong jem mon vanglem lem.

²³Hahepak kü Kahvangi Abimelekh hi Shekhem am aa kü mang laang shom, hatü jomi Abimelekh kü longi nemei-i noteke.

²⁴Kahvangi hapayü Gideonei cheha jom pejempüan jütükpü jomei iy yenhüpü nangkü jomei jeihinaü Abimelekh kü hatü büpalei jeihinaüthü jühen shingvaishi sheühpü Shekhem am kü bhüh yemhen shingvaishi dükteke.

²⁵Hanangkü Shekhem ami kahshangthülei Abimelekh jühen tapteke, hatü jomi hapa lem kü peihjapü kemeilei douhinang aetteke, hatü hapa jung Abimelekh kü lujateke.

²⁶Mechem Ebedlei cheha Gaali büpalei jeihinaüthü mütü Shekhemei heihpa, Shekhem leipü shennyakthüi büpa kü monghah-ei deih.

²⁷Jomi kahlei shaei jomei kah leipü nyalingngupai vaümei yiü lingtü mo moteke. Hapheikü jomi jomei kahvangthü khümshemei daiyei hahtü yingtü Abimelekh kü yaüeilungei eteke.

²⁸Ebedlei cheha Gaali, “Abimelekh üpaang, hatü jen Shekhem ami büpa chongphohen jen üamang? Jerub-baalei cheha hatü büpalei lakchongbü Zebul nyi-i jenei bü Hamor chongnephoangpü je? Mehekei jeni büpa chongphohen?

²⁹Hapa nanglakthü paoh ngei phangkü nyupü vailangmeyü ngei Abimelekh am changtükhah shepeih, hatü ngei büpa kü veshanthü temhahtuh hatü hokhen vamkei shei ehen vaipeih!” shei eteke.

³⁰Mechem hapa chingnyü kü vanglem lempü Zebuli Ebedlei cheha Gaali epü shah danpa, büpa mongshih.

³¹Büpai Arumahlei Abimelekh touei phongmokbüthü shomei eteke, “Veituh, Ebedlei cheha Gaal hatü büpalei jeihinaüthü Shekhemei peiyei jomi nüng khüei chingnyülei shah ngainyüke.

³²Hanangkü shaang nyak kü nüng hatü nüng mü nyupü veshanthü mütü heih-ei kahlei danei nyutuh,

³³hatü nepnüng dhom mü vanghe aonghinüng layaongei chingnyülei aongtuh, hatü mechem büpa hatü büpa mü nyupü veshanthü nüng khüei hoknüng vamkahenshang, nüngei wong kempai jom mü hoktuh” shei eteke.

³⁴Hanangkü Abimelekh hatü büpa mü nyupü veshanthü khong ali hantü nyak kü layaongei Shekhemei heih-ei showteke.

³⁵Mechem Ebedlei cheha Gaal vamei chingnyü penyüsha touei yaongjapa, Abimelekh hatü büpa mü nyupü veshanthü show kübü vam.

³⁶Mechem Gaali jomphong eepa, büpai Zebul kü, “Veituh, kahshang shangching phi leipü shennyak shakünyüke!” shei e. Zebuli büpa kü, “Kahshang leipü vangdhüm laang kü nüngiyü shennyakthü kei eehahnyu khih” shei e.

³⁷Gaali shao nedoh-i, “Veituh, Tabbur-Erez phi leipü shennyakthü shakünyüke, hatü shao khong hük Elon-Meonenim phi leipü shakünyüke” shei e.

³⁸Hahepak kü Zebuli büpa kü, “Jeni mehekei Abimelekh chongphohen shei shahlong etükpü ju shaang melei daipa? Nüngi naamshi deihpü veshanthü nevaiang je? Vamei daiyei jom mü hoktuh” shei eteke.

³⁹Hanangkü Gaali Shekhem shennyakthü mütü vamei daiyei Abimelekh mü hok.

⁴⁰Abimelekh-i büpa kü chang, hatü büpa mokdai. Shennyakthü longi penyüsha touei ma yahteke.

⁴¹Hanangkü Abimelekh Arumahlei nyu, hatü Zebuli Gaal hatü jeihinaüthü changtük hatü jom Shekhemei nenyuaok.

⁴²Nyihphei Abimelekh-i Shekhem nanglakthü kahlei shahen vampü eeyei,

⁴³büpai veshanthü khong jem vaishi hantü kahlei show lingei uohü. Mechem büpai chingnyü kübü shennyakthü laoei vamjapü eepa, büpai jom khüei yaong, hatü hathü jüteke.

⁴⁴Abimelekh mü nyupü veshan khong chingnyü penyüsha philei mokei heih-ei yaong, hatü lebü khong nyi vamei kahlei nyupüthü kü changitei-i jüteke.

⁴⁵Abimelekh-i helu hapa chingnyü hah, hatü halei nyupü shennyakthü jü; büpai hapa chingnyü hahtü hüm haiphong.

⁴⁶Mechem Shekhem Shangdülei nyupü shennyakthüi ha jung danpa, jomi El-berith phopshem mongei shüei joteke.

⁴⁷Shekhem Shangdü leipü shennyakthü kemei chemi thaiyei nyüke shei Abimelekh kü eshuohteke.

⁴⁸Hanangkü Abimelekh hatü büpa mü nyupü veshanthü peü Zalmon Kahshangei aong. Abimelekh-i ay yah-ei aongei pükao langei bhagchongei pai, hatü büpai veshanthü kü, “Shaang ammi ngei mehe dükei eepa, hapakei amphongi lomi düktuh” shei e.

⁴⁹Hanangkü veshanthü peüi pükao langei paitü Abimelekh phei müei lei, hatü shennyakthü jopü shingei shüngteke, hatü ha kü awi haptü hapa Shekhem Shangdü mongei nyupü shennyak nyüha baha haja hükshing jü.

⁵⁰Hapheikü Abimelekh Thebezlei heih-ei Thebez am khüei baümtap vetü ha hahteke.

⁵¹Shejao chingnyü mongei shangdü longi wong kohpü hük nyu, hatü halei chingnyü kübü nyüha baha peü mübüthü omshi ha mongei shüei küptü jom shangei aongteke.

⁵²Abimelekh-i shangdü touei heih-ei hok, hatü shangdü mongei shüpü shaden touei aw haphen shingvaishi heih.

⁵³Shejao nyühathü hanei-i Abimelekhei shangjing kü hahngüm yaong vüshih-ei shüktü shangjing vang bhaotük.

⁵⁴Shülangi büpai büpalei phunglang kopü nethepa kü nyüktü büpa kü, “Nanglakthü ngei nang ‘Nyüha hüki büpa jüpüja’ shei ne-eteihen shingvaishi nüngei yan tukei ngei kü baptü jütüktuh” shei e. Hanangkü hapa nethepai büpa kü baptü jütük.

⁵⁵Mechem Israel ami Abimelekh diteke shei nyingpa, jom peü shemei leidaikem.

⁵⁶Hapa keiha Abimelekh-i chepa khüei büpalei jeihinaüthü jom pejempüan jüpü nangkü Kahvangi büpa kao ha nyokei shuoh,

⁵⁷hatü Kahvangi Shekhem nanglakthülei mang jomei shangjing kü kohü, hatü jom kü Jerubbaalei cheha Jothamei thaüvaü jom kü peihüteke.