Read Phom Naga JUD 1 Bible Online

JUD 1 - Phom Naga bible

JUD 1

¹Jud, Jisu Khristalei chongphobü hatü Jakobei chenaü, Nyüklangpüthü, hatü Pa Kahvangi bampüthü hatü Jisu Khristai yangei tuhpüthü touei,

²Phahji, nyiushemmei, hatü bampü am mü changshi nyute.

³Bampü küphüthü, jeni chem kü hean yahpü yemleipü jung am kü nyanghen shei temeilemei nyushingkü denshing chem mon daülangpüthü kü shuohpü jeni vaipü nangkü vehok hokhen khih shei nyanghen hatü khümhen vongbong kei vamteke.

⁴Hingmei am khong touei Kahvang nenyingpüthü nyonghühen shingvaishi shelei mebü temtükpü nenyingi joei am touei peiteke. Jomi jenei Kahvang phahjiyü mükbongjuyung mü jeiteitüknyüke, hatü jenei SHEMBÜPA Jisu Khrista yaktüknyüke.

⁵SHEMBÜPAi denshing chem mon laophülei nanglak Ijip leipü yangei lei, shejao hingnelempüthü mahtükpü jung ammi meishi nyingei nyujao ha deihhen leiyei ehünyüke.

⁶Hatü vangsho phongshanthü üami laophülei wong laphen jiüshi netuh, shejao laophü nyushing tuhphong, büpai hathü nedohnetenpü nyiamvüi shatü vangnyakei longpü shahphenpü nyih shingvaishi tuhtükpeih.

⁷Ha aihük mü Sodom, Gomorrah hatü shinpü chingnyüthüi mükbongjuyung hatü nyongnyongpü kü lanei shuohpeih. Jomü nedohnetenpü molo awi hanghipü lappü nyüpeih.

⁸Hapa aihük mü hathü mangh manghteipüthüi laophülei büm sheihtüknyüke, Kahvangei wong kü ne-ienelemnyu, hatü vangsho leipüthü kü yaünyüke.

⁹Shejao vangsho phongshan longpüba Mikhaeli dangkao mechem kahshih mü Mosalei mahng kü aetteipa, büpai büpa kü yaüeilungei thaüvaüei ne-eangpih shejao, “SHEMBÜPAi nüng kü lohnyüke” shei epeih.

¹⁰Shejao ha shennyakthüi jomi nenyingaokpü peü kü yaünyüke, hatü jomphongü hathü doui-üng mahhünyüke; jomi sholi neshiüpü yemhathü kei nyingnyoi kü lepü mon nyingnyüke.

¹¹Hathüyü Onyükei! Mehenangkü jomi Kainei lem kü kamnyüke; nanglei shingvaishi Balaami pungpü lem kü dainyüke, hatü Korah-i khüei yaongpü mang kü mahnyüke.

¹²Jomü ammei bambhaong kü kawhikang; maaniyao nenyemi am mü hahyingnyüke; jom mon moh-ei hahpü miyombüthü nyüke. Jomphongü vanglüki maoei deilangpü vang neompü phum; jomü bhitükpü betjük nejükpü ünyüdok pü, nyipa didaipü.

¹³Jomphongü mangpü yungching yungmok, jomei veüpong yung-oup kei puoei aongnyüke; shing nenüngpü lithathü, den kü jom shingvaishi peü mü nyakpü vangnyak jaoei nyüke.

¹⁴Adam kübü hüshomhülai nyetpabü Enokh-i hathü nang hei tetei epeih: “Veituh, SHEMBÜPAi büpalei daülangpü vangsho phongshan haja dok kü haja müei yiükünyüke;

¹⁵büpai Kahvang nenyingpü lem kü Kahvang nenyingpü dou dükpüthü peü kü, hatü Kahvang nenyingpü mangthüi büpa khüei epü shahlong peü kü shahphenhen.”

¹⁶Ha shennyakthüyü nümnümpü hatü mih-ei mang yempüthü; jomi mangi vaüpü lem kü münyüke; jomi bom bhaopükei shah enyüke, hatü jom vangmeihen tata kü mih yawhlangnyüke.

¹⁷Shejao bampü küphüthü, jenei SHEMBÜPA Jisu Khristalei phongshanthüi tetei epü deih-ei danghümao;

¹⁸mehenangkü jomphongi am kü, “Dohpü hepak kü mih vüshih-ei epüthü, Kahvang nenyingpü ten lem kü kampüthü vamkahen” shei eteke.

¹⁹Hapayü Laangha neshiüpü kahdoknyü shennyakthüi hanteipanteipü vamhünyüke.

²⁰Shejao bampü küphüthü, am vaipü daülangpü kü am nyingi lingdaituh; Laangha Daülangpü kü phoptuh;

²¹Kahvang bampü kü am nyutuh; vanyangyem lemei müpü jenei SHEMBÜPA Jisu Khristalei phahji kü shesha lemei veituh.

²²Jüüpüthü hanei am kü phahjituh;

²³aw leipü leppükei lebüthü yangtuh, hatü lebüthü kü nyempü mü phahji hutuh, shejao jomei büm iyjeiphailei homei sheihtükpü ashakviha kü jiühittuh.

²⁴Shaang büpa, üpai nüng dohen kübü yangei tuh-aok, hatü büpalei müknyinshekhang mü mongongpü touei nüng kawhikang neshiüi yaonghüaok,

²⁵Jisu Khrista jenei SHEMBÜPA homei Kahvang jen Yemleipüba kü mon denshem peü kü, shaang hatü dohpü neshiüi müknyinshekhang, dhüm, ngan, hatü wong nyute. Amen.