Read Phom Naga SHAKEI VAMPÜ 1 Bible Online

SHAKEI VAMPÜ 1 - Phom Naga bible

SHAKEI VAMPÜ 1

¹Jisu Khrista shakei vampü mepa Kahvangi büpa kü büpalei chongphobüthü kü mehe lomi vamhen, ha huhen shingvaishi shuohteke. Büpai hayü büpalei chongphobü Johan touei vangsho phongshan shomei shuoh,

²hatü Kahvangei shah kü denpü shuoh, hatü Jisu Khristalei denpü büpai eepü peü shuoh.

³Üpai hapa thihivam shahthü wongmü ie, büpa moihiman, hatü üami ha danei halei nyangei nyupü noteinya, jom moihiman; mehenangkü hepak yopailei nyüke.

⁴Johani Asia kü nyupü Attoithü nyet touei: Üpa nyüpa, üpa nyutepa, hatü üpa peikahen nyu, hatü büpalei ong uoshing toueipü laangha nyet,

⁵hatü Jisu Khrista, shahhing denbü, dipü kübü shongei bühpü, hatü kahdoknyü ongthü shak kü vanglem lembü leipü am touei phahji hatü büpa leipü chingmei nyute. Üpai jen kü bamnya hatü büpalei iy homei jenei mang kübü bümei leihü,

⁶hatü jen ongching hük leihü, hatü büpalei Pa Kahvang chongphohen ngongpathü leihü, büpa kü müknyinshekhang hatü vanglem lempü den den kü nyute. Amen.

⁷Veituh, büpa phum mü yiükünyüke; peüei müki büpa eehen; büpa kü phungi hümpüthüi dangkao eehen; hatü büpa tata kü kahdoknyü jatthü peü mahng thephen. Hapa keiha ha nyuhen! Amen.

⁸Üpa nyüpa, üpa nyutepa, hatü Jeiyongpa üpa peikahen nyu, büpai, “Ngeiyü Alpha hatü Omega” shei SHEMBÜPA Kahvangi enyüke.

⁹Ngei, Johan, Jisu nangkü shüveipü hatü ongching hatü munenpü kü am mü hean yahpü ammei jeihinaü, Kahvangei shah hatü Jisu jung denpü nangkü Patmos shei epü shübaongei nyuteke.

¹⁰SHEMBÜPAlei nyih kü ngei Laangha kü nyu, hatü ngei pheilei ngeü longpü hük amit ngeü keiha,

¹¹“Nüngi mehe eenya, ha lai hük kü nyangtü attoi nyet, Ephesia, Smyrna, Pergamum, Thiatira, Sardis, Philadelphia hatü Laodikea touei shomtuh” shei eyei dan.

¹²Hahepak kü ngei kü epeyü üpalei ngeüang shei ngei yaakei lei, hatü yaakei veishingkü ngei hon awdük shemshing nyet ee,

¹³hatü hathü awdük shemshing jiamei ngei Shennyak Ha kei hük bhagthuh lula thuhtü hatü jaaba kü bhag-ai aitü eeteke.

¹⁴Büpalei shangjing hatü sho-ü phümphah kei hatü shüdao kei shoshi; büpalei mükü awlom kei;

¹⁵büpalei layü aw kü jakei thittükpü melangnyiam kei, hatü büpalei ngeü yungmok ngeü kei nyuteke.

¹⁶Büpalei lakdah philei litha nyet noteke, hatü büpalei ju leipü nah nyi kohpü yanlu vamteke, hatü büpalei dheyü vanghe hebaongwong kei nyuteke.

¹⁷Mechem ngei büpa eepa, mahng kei ngei büpalei la tüngei doei shük. Shejao büpai ngei kü büpalei lakdah-i düktü, “Nüng tenyem; ngeiyü chongpangpü hatü dohpü;

¹⁸hatü yemmü nyupü hük. Ngei diyei nyuteke, hatü veituh, ngei den dok kü den yemmü nyüpeih, hatü ngelei lakei Dipü hatü Yimching sabi nyüpeih.

¹⁹Hanangkü shaang mehe nyu, hatü hapa pheikü mehe vamkahen nyu, ha nang nüngi shaang eepü nyangtuh.

²⁰Ngelei lakdah philei litha nyet, hatü hon awdük shemshing noshi eepü doujo nangü ha hih: litha nyet-ü attoi nyet kübü phongshan nyet, hatü awdük shemshing nyet-ü attoi nyet hih” shei eteke.