Read Phom Naga SHAKEI VAMPÜ 17 Bible Online

SHAKEI VAMPÜ 17 - Phom Naga bible

SHAKEI VAMPÜ 17

¹Hapheikü nükshung nyet nopü vangsho phongshanthü nyet khongkü hük peiyei ngei kü eteke, “Heihkei, ngei yung longpüthü yopailei nyupü chingnyü kübü büm yupü nyüha kü mekei shahphenhen nüng kü huphüshah.

²Pinnyü mü kahdoknyü ongthüi mükbongjuyung dükteke, hatü pinnyülei mükbongjuyung yiüi kahdoknyü kü nyupüthü chokhüteke.”

³Hanangkü büpai ngei laangha kü müei jahpanei dai, hatü ngei nyüha hük iyshüm kei hakpü thaüvaü men mon maei nyupü yemha dokshangei uoshi ee, hatü hapa kü shangjing nyet hatü vaung an nyuteke.

⁴Hapa nyühayü manghmepü hatü hakla ow kü hon, douvang yaong hatü yüknyü owtü pinnyülei lakei jiühitnalai hatü pinnyülei mükbongjuyung nedaünelang hon pati kü maei shihtü noshi nyu;

⁵hatü pinnyülei shangbalei shahjo men hük, “LONGPÜ BABYLON, BÜM YUPÜ HATÜ KAHDOKNYÜLEI JIÜHITNALAILEI NYÜ” shei nyangtü nyu.

⁶Hapa nyühayü daülangpüthülei iy, hatü Jisu jung denpü shuohpüthülei iy-i chokei eeteke. Mechem ngei pinnyü eepa, ngei longi yashan.

⁷Vangsho phongshani ngei kü, “Nüng mehekei yashannya?” shei phephüteke. Ngei nüng kü hapa nyühalei doujo, hatü pinnyü uopü shangjing nyet hatü vaung an kohpü yemha jung ephahen.

⁸Shelei nyupü nüngi eepü yemha, shaang nenyu; pinnyü shaongdoh neshiüpü kahsha leipü vamei mahhen temei daikahen. Kahdoknyü kü nyupü shennyakthü kahdoknyü chongnyiam lingshekü üamei men yangnyu laitap kü nyangei nenyu, hathüi yemha kü veitü yashanhen. Mehenangkü ha shelei chem nyu, shaang neshiü, pheilei shao vamkahen.

⁹Hapayü kihikon kohpü sholi kü thongnyüke: Shangjing nyetü hapa nyühai uopü kahshang nyet; shao jomphongü ongthü nyet;

¹⁰hathü khongkü nga dodai, hük shaang nyüke, hatü hük shao-üng mangvam; hatü mechem büpa vamhen, büpa kansho hük mon nyuhen.

¹¹Shelei nyupü yemha mepa shaang nenyu, hapayü shetpabü yemha shejao hapayü nyet khong kübü, hatü hayao mahhen lemei dainyüke.

¹²Nüngi vaung an eepeyü ongching mangdangpü ongthü an nyüke, shejao jomphongi ong vaihen wong yemha mü chemi ghonda hük shingvaishi danghen.

¹³Jom an peü mükhong hük kü mongjemtü yemha kü ngan hatü wong shuohnyüke.

¹⁴Jomi Mi Cheha khüei vehok hokhen, hatü Mi Chehai jom neühen; mehenangkü büpayü shembüthü khongkü SHEMBÜPA, ongthü khongkü Ongpa, hatü büpa mü nyupüthüyü nyüklangpü, jelangpü hatü hinglempüthü.

¹⁵Hapheikü hapa vangsho phongshani ngei kü eteke, “Nüngi eepü hapa büm yupü nyühai uopü yungthüyü nanglakthü, khongnyü, jatthü hatü shahlemthü;

¹⁶hatü nüngi eepü vaung an, jomphong hatü yemhai hapa büm yupü nyüha kü jiühithen; jomi pinnyü lavüngtoiyei bümkong tuhhen; jomi pinnyülei phai hahtükhen hatü aw kü jaktükhen.

¹⁷Mehenangkü Kahvangei shahthü mangdhaüm thahshi Kahvangi mongpü mükhong dükhen büpai jomei mongkü jomei ongching vanglem lemhen yemha kü ngan shuohhen mongteke

¹⁸Nüngi eepü nyühayü kahdoknyü ongthü shak kü vanglem lempü longpü chingnyü hih.”