Read Phom Naga SHAKEI VAMPÜ 2 Bible Online

SHAKEI VAMPÜ 2 - Phom Naga bible

SHAKEI VAMPÜ 2

¹Ephesia kübü Attoi leipü phongshan kü nyangtuh: Hapayü üpai büpalei lakdah philei litha nyet no, üpai hon awdük shemshing nyet chi kü kamnya, hayü büpalei shah:

²“Ngei ammei dou hatü ammi khe-ei dükpü, hatü am munenpü ngei nyingnyeih. Ammi nemeipüthü kü veishi nenyuaoknyu shei ngei nyingnyüpeih; ammi phongshanthü hih shei epüthü dokei veiteke shejao jom nevaiang, hatü jomü shahshem shei dangaokteke.

³Am munenpü hatü ngelei men kü tok vaipü ngei nyingnyüpeih, hatü am nenyiunenang.

⁴Shejao ngei am khüei ha nyüpeih; am kü shongei nyupü bampü yaktükteke.

⁵Mepa kübü am vüei nyüpa, ha deih-ei dangtuh; mong leptuh, hatü ammi shongei dükpü dou düktuh. Hei nevaijema ngei am touei peiyei ammei awdük vangngai ha shing leipü yahlanghen.

⁶Am kü bamhübenüng hükü ammi Nikolaitan amei dükhiling kü jiühitnyüke, mepa kü ngeiyao jiühitnya.

⁷Üpa kü danhen dhaong nyu, Laanghai attoithü kü mehe enya ha bangtuh. Vehok neüpü peü kü Kahvangei Paradise leipü yangnyuyem pü kübü hahhen ngei shuohhen.”

⁸Smyrna kübü attoi leipü phongshan kü nyangtuh: Hathüyü chongpangpü hatü dohpü, üpa di hatü yangei lei, büpalei shahthü:

⁹Am ponghahpü hatü am taopünangpü ngei nyingnyeih, shejao amü shemmei khih. Üami jom nyingi Jehoda am hih shei enya, shejao nevai, jomi yaüpülungpü ngei nyingnyeih, shejao jomphongü Satanei Sinagog nyüke.

¹⁰Am mepa shangponghen nyu, ha kü tenyem. Am kü dokhen shingvaishi kahshih-i am hanei yah-ei khoklatei shükhen mü nyüke lituh, hatü nyih an shing am shangponghen. Dipü thahshi hinglemtuh, hatü ngei am kü yangnyu athen shuohhen.

¹¹Üpa kü danhen dhaong nyu, Laanghai attoithü kü mehe enya ha bangtuh. üami vehok neünya, nyipabü dipai jom kü nehongpih.

¹²Pergamum kübü attoi leipü phongshan kü nyangtuh: Hathüyü nah nyi kohpü yanlu nyupübalei shahthü:

¹³Melei Satan ong uoshing nyu, halei am nyupü ngei nyingnyeih. Shejao ammi ngelei men kü wongshongi shoungnyüke, hatü ngelei denbü Antipas, ngei kü hinglempü hük, Satan nyushing ammei chingnyülei jütükpü nyih kao ammi ngelei men kü hinglempü neyaktük.

¹⁴Shejao ngei am khüei dou hanei nyüpeih: Israel ami lajeithü kü moilapü hahying hah-ei moila shuohhühen hatü iyjeiphaileihühen shingvaishi Balak kü Balaami nyuhshuohpü nyuhpüvenpü kü shoungshi am hanei nyüke.

¹⁵Shao am hanei Nikolaitani nyuhpüvenpü kü shoungpü am hanei nyüke.

¹⁶Mong leptuh, hei nevaijema ngei lomi am touei peiyei ngelei ju kübü yanlui ngei jom khüei hokhen.

¹⁷Üpa kü banghen dhaong nyu, Laanghai attoithü kü mehe enya, ha bangtuh. Üami vehok neünya, ngei jom kü joshi nyupü manna shuohhen, hatü ngei yaong shola hük hapa kü yahbüi nyingpü mü lenei üpaiyao nenyinghen mü men ja hük nyangtü shuohhen.

¹⁸Thiatira kübü attoi leipü phongshan kü nyangtuh: Hathüyü Kahvang Ha, üpa kü awlom kei mük nyu, hatü layü jintükpü melangnyiam kei nyu, büpalei shahthü:

¹⁹Ngei ammei douthü, ammi bampü, hinglempü ammei dousho, hatü am munenpü nyingnyeih. Ammei shongpü dou meyü shompü-üng longpüba shei ngei nyingnyeih.

²⁰Shejao ngei am khüei ha nyüpeih: Ammi hapa nyüha Jezebel, üpa pinnyü nyingi thibüla shei etü ngelei chongphobüthü kü mükbongjuyunghen hatü lajeithü kü moila shuohtükpü hahying hahhen nyuh-ei lemnyong kü mülang, ammi pinnyü hei-üng veishi tuhnyüke.

²¹Ngei pinnyü kü mong lephen hepak shuoh, shejao pinnyüi mükbongjuyung kübü mong lepei neleihünyu.

²²Lituh, ammi pinnyülei dükhiling kübü mong lepei neleijema, ngei pinnyü lüng hükei noei shükhen hatü üami pinnyü mü mükbongjuyung dükhen, ngei hathü shanghah longpü kü noei shüktükhen;

²³hatü ngei jomei hapeüthü bheitü jütükhen. Shejüang attoithü peüi ngeiyü chudeih mongdang yempüba shei nyinghen, hatü ngei am peü kü ammei doui shangpükei shuohhen.

²⁴Shejao am Thiatiralei nyupü lebüthü üami hapa nyuhpüvenpü kü neshoung, hatü üami “Kahshihlei chülohpü doujo” shei ehen nenying, am kü ngei enyeih, ngei am kü lebü hanggovih meheyao nekohüpih.

²⁵Ngei mangyiükei thahshi ammei lakei mehe nyu, ha kü wongshongi shoungtuh.

²⁶Üami vehok neünya, hatü dohpü thahshi ngelei dou nedoh-i düknya, ngei opa leipü wong yahpükei ngei jatthü shak kü wong shuohhen.

²⁷“Büpai jom kü nyiam lenshuoh notü vanglem lemhen, büpai jom ashem dük bhaopükei bheitü bhaotükhen.”

²⁸Üpai vehok neünya, ngei büpa kü nepnüng litha shuohhen.

²⁹Üpa kü banghen dhaong nyu, Laanghai attoithü kü mehe enya bangtuh.