Read Phom Naga SHAKEI VAMPÜ 21 Bible Online

SHAKEI VAMPÜ 21 - Phom Naga bible

SHAKEI VAMPÜ 21

¹Hapheikü ngei vangsho ja hük hatü kahdoknyü ja hük ee; mehenangkü shongpü vangsho hatü kahdoknyü peihdai, hatü yungching hajük kü neshiüi leidai.

²Hatü ngei Daülangpü Chingnyü ja Jerusalem vangsho leipü vamei yiükjingla hük laophülei baha mü ponghen ow tempükei temtüktü Kahvang leipü yiüküpü ee,

³hatü ngei ong uoshing leipü ngeü longpü hük hapakei epü dan: “Veituh, shaang Kahvangei shemü hangku mü nyüke; Büpa jomphong mü jomei Kahvang vaishi nyuhen, hatü jomphongü büpalei nanglakthü vaihen, hatü Kahvangü jom mü nyuhen;

⁴büpai jomei mük kübü mükphi peü thittükhen. Dipü hajük kü nenyuhen; theppü, youngpü hatü tüngpü hajük kü nenyuhen; mehenangkü shongpü douthü peü peihdaiteke.”

⁵Hahepak kü ong uoshing kü uopübai, “Veituh, ngei dou peü ja lingnyüpeih” shei e. Shao büpai, “Ha nyangtuh, mehenangkü hathü shah-ü hinglemhen hatü shahhing” shei e.

⁶Hapheikü büpai ngei kü eteke, “Ha dükteke. Ngeiyü Alpha hatü Omega, Chongpangpü hatü Dohpü. Yung lepüthü kü ngei lop neyah-i yangnyu yunglok kübü yung yinghen shuohhen.

⁷Üami vehok neühen hathüi mükjüp danghen, hatü ngei jomei Kahvang vaihen, hatü jomphongü ngelei hapeüthü vaihen.

⁸Shejao mong nelongpü, hingnelempü, sheihdaipü, shennyak jüpüthü, mükbongjuyungpüthü, phongyompüthü, lajei khümpüthü, hatü shahshem epüthülei shingü awkaong meli kü aw bahpü shemyungei nyuhen; hapayü nyipabü dipü.”

⁹Hapheikü vangsho phongshanthü nyet khongkü hük shompü cham nyet nükshung nyet kü maei notü peiyei ngei kü, “Peikei, ngei nüng kü yiükjingla, Mi Chehalei yiük huphahen hih” shei e,

¹⁰hatü laangha kü büpai ngei longpü, shaopü kahshangei müei dai, hatü ngei kü daülangpü chingnyü Jerusalem Kahvang leipü vangsho aptüktü vamei yiükei-i huphüteke.

¹¹Hapa kü Kahvang müknyinshekhang nyu, hatü longi taoshi dangpü douvang yaong kei, jasper kei hatü chüshaü kei daülangi vangngai nyuteke.

¹²Hapalei longpü hatü shaopü penyü shaden anpünyi kohshi, hatü shadenei vangsho phongshan anpünyi nyu, hatü shadenthü kü Israel phang anpünyilei men nyangtü nyu.

¹³Heong philei shaden jem; apsha philei shaden jem; pehe philei shaden jem; hatü heshü philei shaden jem nyu.

¹⁴Hatü chingnyü penyü kü chongnyiam anpünyi nyu, hatü hathü ieyei kü Mi Chehalei phongshan anpünyilei men anpünyi nyu.

¹⁵Ngei mü shah eteipü vangsho phongshanei lakei hon nyiamlüng hük hapa chingnyü, peshaden hatü penyü shethen noshi nyu.

¹⁶Hapa chingnyü bahiyang hükkei nyu; hapalei yangü ba mü hükkei nyu, hatü büpai hapa chingnyü nyiamlüngi shetjü yang kü kilometer 2, 400 nyu, hatü yang shük ba kao hatü shaopü kao nyuteke.

¹⁷Hapa vangsho phongshani penyü shetshingkü büpalei nopü nyiamlüng aimü meter 65 nyu.

¹⁸Hapa penyü bhamü jasper yah-ei ling, shejao chingnyü-ü daülangpü honi aina kei daülangi ling.

¹⁹Hapa chingnyü penyü bham chongnyiamü douvang yaong yah-ei ling; shongpü kü jasper, nyipabü kü sapphir, jempabü kü agate, alipabü kü emerald,

²⁰ngapabü kü onyx, vokpabü kü karnelian, nyetpabü kü khrisolit, shetpabü kü beril, shüpabü kü topaz, anpabü kü khrisophase, anpühükpabü kü jakinth, anpünyipabü kü amethist.

²¹Hatü shaden anpünyiyü yüknyü anpünyi, shaden ieyei yüknyü hük hüki mon ling, hatü chingnyü chingyangshongü daülangpü hon aina kei peipeileiyei eeshi lingteke.

²²Ngei hapa chingnyülei phopshem ne-ee; mehenangkü hapalei phopshemü Jeiyong SHEMBÜPA Kahvang hatü Mi Cheha nyu,

²³hatü hapa chingnyülei vanghenyü nevaijü lennyü nyahen napü neshiü; mehenangkü Kahvang müknyinshekhangü hapalei vangngai, hatü hapalei awdükü Mi Cheha.

²⁴Jatthüi hapalei vangngai kü kamhen, hatü kahdoknyü ongthüi halei jomei müknyinshekhang koei peihen.

²⁵Nyihnüng haleipü peshadenthü neküphen; halei vangnyak nenyu.

²⁶Nanglakthüi halei jatthülei müknyinshekhang, dhüm koei peihen.

²⁷Shejao halei nedaünelangpü, nevaijü jiühitnalai dou dükpü nevaijü shahshem meheyao neshüaokhen, shejao Mi Chehalei yangnyu laitap kü men nyangei nyupüthü mon shühen.