Read Phom Naga SHAKEI VAMPÜ 22 Bible Online

SHAKEI VAMPÜ 22 - Phom Naga bible

SHAKEI VAMPÜ 22

¹Hapheikü vangsho phongshani ngei kü chüshaü kei daülangpü Kahvang ong uoshing hatü Mi Cheha leipü yenpü yangnyu yung yungyen huphüteke;

²hatü hayü chingnyü chingyangshong jiam homei yenteke. Hapa yungdang nyiphen kü yangnyu pü nyüke, hatü halei betjük lem anpünyi len ieyei jüknyüke; hatü hapalei phenlakü jatthü meihühen shingvaishi nyüke.

³Halei thaüvaü meheyao neshiü. Shejao halei Kahvangei ong uoshing hatü Mi Cheha nyuhen, hatü büpalei chongphobüthüi büpa kü khümhen.

⁴Jomi büpalei dhe eehen, hatü büpalei men jomei shangbalei nyuhen.

⁵Halei vangnyak lanshei neshiü; jomi awdük vangngai nevaijü vanghe vangngai napü neshiü; mehenangkü SHEMBÜPA Kahvangü jomei vangngai, hatü jom den den kü vanglem lemhen.

⁶Hapheikü büpai ngei kü eteke, “Hathü shah-ü hinglemhen hatü shahhing; mehenangkü SHEMBÜPA, thibüthülei laangha Kahvangi mehe lomi vamhen ha laophülei chongphobüthü kü huhen shingvaishi büpalei vangsho phongshanthü shomteke.”

⁷“Veituh, ngei lomi yiükünyeih! Üpai hapa lai kübü thihivam shahthü bangei notei moihiman.”

⁸Ngei, Johani hathü dou danpeih hatü eepeih. Mechem ngei hathü dan hatü eepa, ngei kü hathü hupü vangsho phongshanei la tüngei khümnüng aümei sha;

⁹shejao büpai ngei kü, “Nüngi ha tedük! Ngeiyü nüng mü, hatü nüngei jeihinaü thibüthü hatü hapa lai kübü shahthü ven bangei dükpüthü peü mü chemi chongphopü hih. Kahvang kü khümtuh!” shei eteke.

¹⁰Hatü büpai ngei kü, “Nüngi hapa lai kübü thihivam shahthü füoshangi shüngtü küpshi tetuh; mehenangkü hepak yopailei nyüke.

¹¹Ten dükpüthü shaang thahshi ten dükei nyemnyu, hatü üami jiühitshi nyu, jom jiühitshi nyemnyu; jiüpüthüi jiüpü nyemdük, hatü daülangpüthü daülangi nyemnyu” shei eteke.

¹²“Veituh, ngei lomi yiükünyeih; peü kü laophülei dou aimü shuohhen laklei ngei mü nyüpeih.

¹³Ngeiyü Alpha hatü Omega, shongpü hatü shompü, chongpangpü hatü dohpü.”

¹⁴Laophülei bhagthuh dhotüktü nyupüthü moihiman; mehenangkü jomphongü yangnyu pü kübü betjük hahhen jiüpü nyüpeih, hatü peshaden homei chingnyülei shüaokhen.

¹⁵Chingshelei nyupüthüyü shithü, phongyompüthü, mükbongjuyungpüthü, shennyak jüpüthü, lajei khümpüthü hatü shahshem kü bampü hatü ha dükpüthü.

¹⁶“Attoithü shingvaishi nüng touei hapa denpü koei vangsho phongshanthü shompeyü ngei, Jisu hih. Ngeiyü Davidei tünglang hatü hühiha, nyapü nepnüng litha.”

¹⁷Laangha hatü yiükjinglai enyüke, “Peikei.” hatü danpü peüi “Peikei” shei etuh. Üpai yung lenya peikei. Napü peüi yangnyu yung angkü yahhahtuh.

¹⁸Hapa thihivam lai kübü shah danpüthü peü kü ngei ha shahvüng shuohnyeih: Hanei ami hapa kü üjema, Kahvangi hapa shennyak kü ha lailei eyei nyupü chamthü ühen;

¹⁹hanei ami hapa thihivam lai shah kübü yah-ei yaktükjema hapa lailei eyei nyupükei Kahvangi yangnyu pü kübü hatü hapa daülangpü chingnyü büpalei hean yahlanghen.

²⁰Hathü dou jung denpü shuohpübai, “Hingmei, ngei lomi yiükünyeih” shei enyüke. Amen. Yiükei, SHEMBÜPA Jisu!

²¹SHEMBÜPA Jisulei phahji daülangpüthü peü touei nyute. Amen!