Read Phom Naga SHAKEI VAMPÜ 8 Bible Online

SHAKEI VAMPÜ 8 - Phom Naga bible

SHAKEI VAMPÜ 8

¹Mechem Mi Chehai nyetpabü füoshang appa, vangsholei adha ghonda hükshing nendaiteke.

²Hapheikü ngei vangsho phongshan nyet Kahvang touei yaongshi jomphong kü amit nyet yahshuoh-ei ee.

³Lebü vangsho phongshan hük hon awjakshung notü heih-ei moidü touei yaong. Daülangpüthü peüi phoppü kü üei ong uoshing toueipü hon moidülei moila shuohhen ayingshü longi büpa kü shuoh.

⁴Ayingshü jakpü awshit mü daülangpüthüi phoppü chemi vangsho phongshanei lak leipü Kahvang touei aongteke.

⁵Hapheikü vangsho phongshani hon awjakshung yah-ei moidü leipü aw maei shihtü kahdoknyü kü haishuoh, hatü vangmuk khungei klang nyepei hatü pedi vükei pei.

⁶Shaang amit nyet nyupü vangsho phongshanthüi amit vünghen tem.

⁷Shongpü vangsho phongshani büpalei amit vüng, hatü shüyaong hatü aw mü iy vuktü vam, hatü hathü yah-ei kahdoknyü kü haishuoh; hatü kahdoknyü phaihan jem kü hük awi hahtük, hatü pü phaihan jem kü hük hahtük hatü phenhavunglak kemei hahtük.

⁸Nyipabü vangsho phongshani büpalei amit vüng, hatü kahshang longpü hük leshi aw bahtü yungchingei shük.

⁹Yungching phaihan jem kü hük iy leidai, yungching yemhathü phaihan jem kü hük di, hatü jahas phaihan jem kü hük mangdai.

¹⁰Jempabü vangsho phongshani büpalei amit vüng, litha longpü hük vangsho leipü aw kei bahtü vü, hatü hapayü yungyen hatü yunglok phaihan jem kübü phaihan hük kü vüteke.

¹¹Hapa lithalei menü, “Shahyakpü” nyuteke. Yung phaihan jem kübü phaihan hük shahyaki leidai, hatü hapa shahpü nangkü yung leipü longi di.

¹²Alipabü vangsho phongshani büpalei amit vüng, hatü vanghenyü phaihan jem kübü hük kü, lennyü phaihan jem kübü hük kü, hatü lithathü phaihan jem kübü hük kü sheüteke; hanangkü jomei vangngai phaihan jem kübü phaihan hük manghdai; nyihnüng phaihan jem kübü phaihan hük nenya-i leidai hatü yanüngao hapakei nyuteke.

¹³Hahepak kü ngei veishuohjü alang hük vangsho jiam kü ngeüwong anei, “Onyükei! Onyükei! Onyükei kahdoknyülei nyupüthü; mehenangkü lebü vangsho phongshanthü jem leipü amit vünghen mü nyüke” shei vaüyaki piyei daipü ngei danteke.