Read Phom Naga RUTH 3 Bible Online

RUTH 3 - Phom Naga bible

RUTH 3

¹Nyih hük Naomi-i Ruth kü, “Nüngao nüngei shem hih shei nyuhen shingvaishi ngei nüng kü baha hük yemhen vaipü khih.

²Boaz, üpalei dou dükpü nelathü mü nüng nyutepa, hapayü jenei showsheipü shennyak hih. Veituh, sheya büpa barley hah tenshingei hah yüpei paümkahen.

³Hanangkü nüngi hangha lakei meli nyioei, ow meipü owei temtuh, hatü büpa hah tenpü shingei yiütuh, shejao büpa hahyingei mangtem thahshi nüng halei nyupü büpa kü tenyinghü.

⁴Mechem büpa shinüng lemdaiphahenshang, büpa lempü shing nyingei tuhtuh. Hapheikü büpalei ashak phuktü shüei büpalei lashaongei lemjatuh. Mehe dükhen ha büpai ephahen” shei e.

⁵“Nüngi mehe epüshang hathü peü ngei dükhen” shei Ruth-i e.

⁶Hanangkü pinnyü hah tenshingei yiü, hatü chenyei-i düktuh shei eshuohpü lemphü dükteke.

⁷Mechem Boaz hahyingei tempa, büpa kü mongdhüng vam; büpa hahbhaong shüngpü dohpü lemei shihen lemteke. Pinnyü nenmü shüei ashak phuktü la tüngei lemteke.

⁸Nyak jiam kü hantü paoei yaakei veishuohjü nyüha hük büpalei la tüngei lemshi nyujateke.

⁹“Nüng üpaang?” shei büpai phe. “Ngeiyü nüng chongphobü Ruth hih; nüngü showsheipü shennyak vaipü nangkü nüngei ashak ngei kü ümshih” shei e.

¹⁰“SHEMBÜPAi nüng kü moihimantuh, lamei; nüngi hamei shahishem kü shaang thahshi nyakpükenpü hupeyü sheleipü mao nyeipüba khih. Mehenangkü taopa vaijao shemmei vaijao nüngi lebü nethe yemei nedai.

¹¹Hanangkü, lamei, nüng mongteshang; nüngi mehe nanya, ngei peü dükphahen; mehenangkü hapa jila kü nyupü küphüanaü peüi nüngü nyümeihama shei nyingei nyüke.

¹²Shejao ngei mü showsheipü shennyak shei epeyü jiülangmao ngei mao nyeinya showsheipü shennyak hük nyüpeih.

¹³Sheya payü hamü paümtuh, hatü büpai nüng tongkoliyei yah-aokjema meitei; büpai hapakei nyemdükkei. Büpai nüng kü hapakei dükhen nemongjema vanyangyem SHEMBÜPAlei men kü ngei vangei enyeih, ngei tongkoliyei yahhen hih. Vangngaipü thahshi hamü paümtuh” shei e.

¹⁴Hanangkü pinnyüi büpalei la tüngei paüm, shejao shennyak dhehimen mangnyingi vangngai pibom kü pinnyü paodai; mehenangkü hah tenshingei nyüha peiyei paümpü khih shei üpaiyao tenyinghü” shei Boaz-i eteke.

¹⁵Boaz-i pinnyü kü, “Nüngei ashak yah-ei antolei nyemtuh” shei e. Pinnyüi hapakei nyemjashingkü büpai barley hah dok kukha hükshing shihteke, hatü yah-ei pinnyülei bhagchongei paishuohteke, hatü pinnyüi ha paitü jila yemei lei.

¹⁶Mechem pinnyü shem ngoijapa, Naomi-i, “Shahhidou mekeiang, lamei?” shei phe. Hahepak kü Boaz-i pinnyü kü mehe dükshuoh, ha kemei pinnyü kü ejateke,

¹⁷hatü pinnyüi, “Anyei touei nüng lakkong telei shei eshi büpai ngei kü hapa barley hah yahphopeih” shei e.

¹⁸Hahepak kü Naomi-i, “Lamei, meheshang lemhük kei mangvam thahshi nenmü danei nyutuh; shinnyih hapa shahhidou mangheng thahshi Boaz nenmü nenyuküpih” shei eteke.