Read Phom Naga 1 SAMUEL 10 Bible Online

1 SAMUEL 10 - Phom Naga bible

1 SAMUEL 10

¹Hahepak kü Samueli mainga shong yah-ei Saulei shangjing kü nyioei om kü jüptü, “SHEMBÜPAi nüng Israel nanglak shak kü vanglem lemhen jeteke” shei e. Nüngi SHEMBÜPAlei nanglak shak kü vanglem lemhen hatü nüngi peü lem kübü vepathülei lak kübü jomphong yanghen. SHEMBÜPAi nüng büpalei nanglak shak kü vanglem lemhen jepü nyangeihepü ha nyukahen.

²Mechem shinnyih nüng ngei mü yanei leijahenshang, Benjamin amei kahdok Zelzahlei Rachelei mahngchong touei shennyak nyi nüngi ponghen. Jiji-i nüng kü, “Nüngi yemei daipü gaduthü hayü dangteke, hatü ampai hathü nangkü mongneshangnyu, shejao ‘Ngelei hapeü nangkü mehe dükhenang’ shei mongshangei enyüke” shei ephahen.

³“Nüng hatoueipü leiyei Tabor leipü longkham pünyü ngoijü nüngi shennyak jem Bethelei Kahvang mü heününg aongpü halei nüngi ponghen. Shennyak hüki yum cheha jem, shennyak hüki aan bhaok jem hatü hükpai yiü-üm hük kotü ponghen.

⁴Jomphongi nüng kü selam shihphahen hatü aan bhaok nyi yahphahen hatü hapa nüngi yahhen.

⁵Hapheikü nüng Philistia amei shangdü nyupü Gibeath-Elohimei aonghen hatü halei nüng jila lemei yiüjajü moidü leipü thibüthü khong hük harp, tambourin, liping, hatü kongkoih vüngei hatü teteivanei yiüküpü nüngi ponghen.

⁶Ngangahük kü SHEMBÜPAlei laangha ngani nüng kü yephen, hatü nüngao jom mü teteivanei ehen hatü nüngü hayaoha shennyak kei yeiyadaihen,

⁷hathü nyangeihepü vamphei kü mehe dükjü meihen khih shei nüngi veiaok, ha düktuh; mehenangkü SHEMBÜPA nüng mü nyüke,

⁸hatü nüngü ngei she kü Gilgalei yiüei chongkei; hapheikü ngei nüng mü ponghen halei yiükahen hatü jakpü moila hatü mongjempü moila shuohhen; ngei yiüei nüngi mehe dükhen mange thahshi nüng halei nyih nyet danei chongkei” shei e.

⁹Mechem Sauli Samuel toueipü leihen yaakjapa, Kahvangi Saulei mongdang jeileihü hatü Samueli epü kemei jiüei pei.

¹⁰Mechem jomphong Gibeah ngoipa, thibüthü khong hük daijapü büpai heü, hatü ngangahük kü Kahvang laanghai büpa kü bak hatü büpa-ao jomphong mü phaukteitungteiyei teteivanteke.

¹¹Mechem shelei büpa nyingei nyupüthüi büpa thibüthü mü tetshahvanshah eyei eepa, jom hüki hük kü, “Kishlei chehayü mehe heühahpa yo? Saul ao thibü leidaipü hiang?” shei etei.

¹²Hammü nyupü shennyak hüki, “Hatü jomei chepa üpaang?” shei jangei e. Hanangkü “Saul-ao thibü khong kü ompü je” shei kandok shah hük lei.

¹³Mechem büpa phaukteitungteiyei teteivanei tempa, büpa shemei leidai.

¹⁴Shaang Saul-ei chepa naüeepai büpa hatü naü nyi kü, “Anji melei daipa?” shei phe. Büpai, “Gadu yemei daipeih, shejao hathü nedangaokükhih shei deihpü nangkü Samuel yemei lüdaipeih” shei e.

¹⁵Saul-ei chepa naü-eepai, “Samueli nüng kü mehe ephopa ekütuh” shei e.

¹⁶Sauli büpa kü, “Gaduthüyü dangteke shei büpai henji kü ephopeih” shei e, shejao ong vaihen nang mehe Samueli eshuoh, ha jung meheyao büpai büpa kü ne-eshuoh.

¹⁷Samueli Israel nanglakthü nyükei Mizpahlei thaihütü,

¹⁸büpai jomphong kü, “SHEMBÜPA, Israel Kahvangi hapakei enyüke: Ngei Israel am Ijip leipü müei leipeih, hatü ngei Ijip amei wong hatü am kü shüveipü ongchingthü peü leipü ngei am yangpeih.

¹⁹Shejao shinnyih ammi am vongshühthü hatü shanghahthü peü kübü yangpü Kahvang yakphongtü, ‘Ham kü ong hük yahshih’ shei yiüteke. Hanangkü shaang amphong laophü laophü jat hatü mükhiphang aimü SHEMBÜPA touei thaituh” shei e.

²⁰Hahepak kü Samueli jat peü yopailei nyükei dei, hatü Benjamin jat SHEMBÜPAi jeyei ngai.

²¹Hahepak kü Samueli Benjamin am phang shelei deitü, Matri am shem jeteke. Shompülei Kishlei cheha Saul jeteke. Shejao jomphongi büpa yem, shejao büpa nedang.

²²Hanangkü jomphongi SHEMBÜPA kü, “Hatouei peikahen shennyak shao hanei nyüpü je?” shei phe, hatü SHEMBÜPAi jangei, “Veituh, büpayü hanggothü phangei joshi nyüke” shei e.

²³Hanangkü jomphong mokei heih-ei Saul müei deiyei nanglakthü touei yaonghüjü büpayü mih peü mü shao lushi nyuteke.

²⁴Samueli nanglakthü peü kü, “SHEMBÜPAi jepü shennyakü büpa hih. Nanglakthü peü khong kü büpa keipü üpayao neshiüpih” shei e. Hahepak kü nanglakthüi lenei, “Ongpa yangnyu shoshoshi nyutuh!” shei e.

²⁵Samueli nanglakthü kü ongpai mehe dükhen büpalei dousho kemei e, hatü laitap hük kü ha nyang hatü SHEMBÜPA touei tuhphong. Hapheikü Samueli nanglakthü laophü laophülei shemei leitük.

²⁶Saul-ao jomei shem Gibeahlei, hatü büpa mü Kahvangi mong kü thonghüpü vehokbüthü mü chemi lei.

²⁷Shejao hanei büpa kü yaüei, “Hapa shennyaki mekei etü jen yangaokhenang?” shei e. Jomphongi büpa kü yaüei e, hatü meheyao thintho neshuoh. Shejao Saul nenmü nyu.