Read Phom Naga 1 SAMUEL 11 Bible Online

1 SAMUEL 11 - Phom Naga bible

1 SAMUEL 11

¹Lenyang hük shing daiphei kü Ammon ongpa Nahash aongei Jabesh Gilead shüm, hatü Jabesh am nanglakthüi Nahash kü, “Chingmei lingshah, hatü hami am chongphoshah” shei e.

²Shejao Ammon am Nahash-i jom kü, “Ngei am peüei lakdahphi mük luktüktü Israel kempü kü eela shatü nyuhen mongküjü mon chingmei linghen hih” shei e.

³Jabesh am behethüi büpa kü, “Ham yanghen üpayao peikü-üla shangkü Israel kempülei phongmokbüthü shomhen ham kü nyih nyet mon yahshih; üamao hapakei nepeiküjema hami am kü lanei shuohhen” shei e.

⁴Mechem phongmokbüthüi Saul nyupü Gibeah ngoipa, jomi nanglakthü kü hapa jung shah-om aokjashingkü peüi wongmü thepteke.

⁵Shaang-üng Saul kah lingei nyupü mohoh müei leiyaki büpai, “Nanglakthü hapakei thephen meyü mehe pongpa?” shei phe. Hahepak kü jomi büpa kü Jabesh ami mehe epa, ha jung ejateke.

⁶Mechem Sauli jomphongei shah dan, büpa kü Kahvang laangha ngan pei, hatü büpa longi mongshih.

⁷Büpai mohoh jora nyi yah-ei khih mü deh, hatü Israel am peü touei phongmokbü homei hapa shomei, “Saul hatü Samuel nyi pheikü nemüpüthülei mohohthü kü hapakei dükhen” shei baongteke. Hahepak kü SHEMBÜPAleipü nyempü nanglakthü kü pei, hatü jom mong hük vaitü chemi vamteke.

⁸Sauli jom Bezeklei thaihüjü Israel am 3, 00, 000 hatü Judah am 30, 000 nyuteke.

⁹Jomi Jabesh leipü peipü phongmokbü kü, “Jabesh-Gilead kü nyupü nanglakthü kü ammi hapakei eyeishuoh: Ngenyih, shaang kei vanghe nyahpü hepak kü am yanglanghen” shei e. Mechem phongmokbüthüi leiyei Jabesh am kü ha ejapa, jom longi mongong.

¹⁰Hanangkü Jabesh ami Nahash kü, “Ngenyih hami am kü lanei shuohhen, hatü am kü mehe mei, ha dükshih” shei e.

¹¹Nyihphei Sauli büpalei nanglakthü khong jem vaishi hanteke. Nepnüng dhom mü jomi baümtap mongei shüei vanghe nyahpü thahshi Ammon am jü, hatü nejüi aopüthüao kemei yantük, hatü ba nyi chemi üamao netuh.

¹²Nanglakthüi Samuel kü, “Ham shak kü Sauli vanglem lemhen je? Hathülei men ham kü yahshih, hami hathü jütükhen hih” shei e.

¹³Shejao Sauli, “Shinnyih üpayao nejühen; mehenangkü shinnyih SHEMBÜPAi Israel am yanghen” shei e.

¹⁴Hahepak kü Samueli nanglakthü kü, “Kei, jeni Gilgalei aongei shao büpa ong vaihen shahbhawlaongvetshah” shei e.

¹⁵Hanangkü nanglakthü kemei Gilgalei aongei SHEMBÜPA touei Saul-ü ongpa shei jeteke. Halei jomi SHEMBÜPA kü mongjempü moila shuoh, hatü halei Saul hatü nanglakthü longi mongongtei.