Read Phom Naga 1 SAMUEL 12 Bible Online

1 SAMUEL 12 - Phom Naga bible

1 SAMUEL 12

¹Samueli Israel nanglak peü kü, “Ammi epü lemphü kü ngei bangtepih, hatü am kü ongao hük jeyei shuohtepih.

²Sheyü am mühen ammei ong hük nyüke. Sheyü ngeiyü viüei shosho pungdaiteke, hatü ngelei hapeüthü hammü am mü nyüke. Ngei hashih mebü shaang thahshi ammei mübü vaiyei heihteke.

³Ngei hammü nyüpeih. Ngei lemhük dangkao pungei dükei nyujema SHEMBÜPA, hatü büpai jepü ongpa touei ngei khüei denpü shuohtuh. Ngei üamei mohoh nevaijü gadu dangkao yahlangphüla? Nevaijü ngei üam kü lueilemei nevaijü ühingei nyüpa? Üpalei lak kübü ngei yawhdou yahpai ngelei mük phüngei nyüpa? Ngei hathü hük dangkao dükei nyujema shemhen” shei e.

⁴Jomi büpa kü, “Nüngi mechemao ham kü lueilemei nevaijü ühingei nenyupih, hatü nüngi üpalei lak kübüao meheyao yah-ei neshiü” shei e.

⁵Samueli jomphong kü, “Ngei kü meheyao ten neshiü shei ammi eeteke; SHEMBÜPA, hatü büpai jepü ongpa nyiyü am touei denpü nyüke. Jomi, ‘Hih,’ büpayü denpü” shei e.

⁶Samueli nedoh-i nanglakthü kü, “Mosa hatü Aaron jepü, hatü ammei bühipa Ijip leipü müei leipeyü SHEMBÜPA büpa hih” shei e.

⁷Hanangkü shaang, hammü yaongtuh; mehenangkü SHEMBÜPA am hatü ammei bühipa yanghen shingvaishi dükpü douthü am mü SHEMBÜPA touei ngei shahphen shingei yah-ei shühen.

⁸Mechem Jakob Ijiplei yiüpa, hatü shüveipa, ha hepak kü ammei bühipai SHEMBÜPA kü nyükshingkü SHEMBÜPAi Mosa hatü Aaron nyi shomei ammei bühipa Ijip leipü müei leiyei jom hapa shingei chingchingei tuhpeih.

⁹Shejao jomi SHEMBÜPA, jomei Kahvang betükpü nangkü büpai jom Hazor am Jabin ongpalei veshan mübü Sisera, hatü Philistia, hatü Moab ongpalei lakmong kü lanei shuohtükpeih, hatü jomi ammei bühipa am khüei hokpeih.

¹⁰Hahepak kü jomi SHEMBÜPA kü, “Hami mang thahteke; mehenangkü hami SHEMBÜPA yakphongtü Baal, hatü Astartes kahvangthü chongphoteke. Shejao shaang nüngi ham vepathülei lak kübü yangshih, hatü hami nüng chongphohen.

¹¹Hahepak kü SHEMBÜPAi Jerubbaal, Barak, Jephthah, hatü Samson shom, hatü lem peü phi kübü vepathülei lak kübü am yangei shaang am hatouei hüshemei nyunyüpeih.

¹²Shejao mechem Ammon am Nahash ongpa am mü hokhen layaongpü eepa, ammi ngei kü, ‘SHEMBÜPA, ammei Kahvangü ammei ongpa vailangmao ha tuhphongtü, ham kü ong hük yahshihnyuhen’ shei eteke.

¹³Veituh, ammi naei phepü, ammi jehahpü ongpayü ha khih. Veituh, SHEMBÜPAi am kü ong hük shuohteke.

¹⁴Ammi SHEMBÜPA kü nyemjema hatü büpa chongphoei büpalei shah bangei, shejao SHEMBÜPAlei shahkungnyüthü kü khüei neyaongjema, hatü am hatü am shak kü vanglem lempü ongpai SHEMBÜPA, ammei Kahvang phei müjema, hapayü meikahen;

¹⁵Shejao ammi SHEMBÜPAlei shah nebangi büpalei shahkungnyü khüei yaongjema, am hatü ammei ong khüei büpalei lak nohen.

¹⁶Hanangkü, shaang, wong kohshi yaongtuh hatü ammei müki eeshi SHEMBÜPAi mehe dou longpü dükkahen veituh.

¹⁷Shaangü wheat hahvet hepak nevaipü je? Ngei SHEMBÜPA kü nyükhen, hatü büpai vangmuk hatü vang shomphahen; hatü ammi am shing ong hük yüpü hepak kü SHEMBÜPA touei ammi thahpü mangü ahshi-üng longshi khih shei nyinghen hatü eehen.

¹⁸Hanangkü Samueli SHEMBÜPA kü nyük, hatü ha nyih SHEMBÜPAi vangmuk hatü vang shom, hatü nanglak peüi SHEMBÜPA hatü Samuel nyi kü longi nyem.

¹⁹Nanglakthü peüi Samuel kü, “SHEMBÜPA, nüngei Kahvang kü nüng chongphobüthü nedihen shangmü phopeishuoh, ham shing ong hük yüpai hamei mangthü kü shao ühahpü khih” shei e.

²⁰Samueli nanglakthü kü, “Am tenyem; ammi ha mangthü peü dükteke, shejao ammi SHEMBÜPA toueipü telepdai shejao ammei mong kempai chongphotuh;

²¹hatü am nanglei nedanghen nevaijü am neyangaokhen yahlak neshiüpü douthü lemei teleptei.

²²Mehenangkü SHEMBÜPAi laophülei nanglak büpalei men longpü men kü neyakphongpih; mehenangkü amphongü büpalei nanglak leihühenü SHEMBÜPAi monghahpü dou hih.

²³Nyeinya vaishi, ngei nangkeyü am shingvaishi nephoppü nangkü shei SHEMBÜPA touei ngei mang nethahpih, hatü ngei am kü meipü, hatü jiüpü lem huphahen.

²⁴SHEMBÜPA kü mon nyemtuh, hatü mong kempai hinglemei büpa chongphotuh, hatü büpai am shing mehe dou longpü dükpa ha deih-ei dangtuh.

²⁵Shejao ammi nedoh-i mang dükjema, am hatü ammei ong shei chemi büpai maoei yaktükhen” shei e.