Read Phom Naga 1 SAMUEL 19 Bible Online

1 SAMUEL 19 - Phom Naga bible

1 SAMUEL 19

¹Sauli cheha Jonathan hatü büpalei chongphobüthü kü David jühen jung eteke. Shejao Saulei cheha Jonathani David kü longi ken,

²hatü Jonathani David kü, “Opai nüng jühen khenyüke, hanangkü ngenepü joshing yemei lüdaituh.

³Ngei opa mü daiyei nüng nyushingei büpa mü yaonghen, hatü ngei büpa kü nüng nang ejahen; ngei lemhük dangkao nyingjema ngei nüng kü ephahen hih” shei e.

⁴Jonathani chepa Saul kü David nang meishi e, hatü büpa kü, “Ongpa, nüngi laophülei chongphobü David kü meheyao nemeipü tedük, mehenangkü büpai nüng khüei meheyao nemeipü nedük; hatü büpai mehe dük, hayü nüng shing nanglei mon.

⁵Büpai Goliath jühen nangkü laophülei yangnyu-ao lanei shuohpeih hatü SHEMBÜPAi Israel am peü shingvaishi aokpü longpü danghüpeih. Nüngi ha eeteke hatü mongongteke. Shejema meheyao mang neshiüpü David jüei mang thahhen je?” shei e.

⁶Jonathani epü kü Sauli bangteke hatü lah-ei, “SHEMBÜPAlei men kü ngei David nejüpih” shei e.

⁷Hanangkü Jonathani David kü nyükei hathü kemei büpa kü eshuoh. Hapheikü Jonathani David nyükei Saul touei dei hatü sheleipükei büpa mü nyuei dai.

⁸Shao vehok vam, hatü David daiyei Philistia am mü hok. Büpai longi wong kohshi hokpü nangkü jom büpa toueipü nyaidaikem.

⁹Saul shemei phung notü uoshi, Davidü kesho lokei nyushing kü SHEMBÜPAi mang laangha Saul kü shom.

¹⁰Sauli David kü bham kü nyeanei hümei jühen khe, shejao David keüdaitü bham kü phung hümteke. David ha ya-ao mokei daiyei yangteke.

¹¹Sauli Davidei shemei yomshi nyutü nepnüng dhom mü büpa jütuh shei shennyakthü shom. Shejao Davidei chenyüha Mikhali büpa kü, “Nüng sheya-üng yanglem yemei nelüdaijema, ngenyih-ü nüng mahhen khih” shei e.

¹²Hanangkü Mikhali ümha shadenei David lükei deishih, hatü David laongei daiyei yangdai.

¹³Hapheikü Mikhali lajei hük yah-ei sho lingtü ashak ümphongteke.

¹⁴Mechem Sauli David yephen shennyakthü shompa, Mikhali, “Büpayü tüngei nyüpeih” shei e.

¹⁵Hapheikü shao Sauli shennyakthü shomei David kü amphongi meishi veituh hatü “Büpa lüng mü chemi paiyei leikei, ngei büpa jütükhen hih” shei e.

¹⁶Shejao mechem shennyakthü shem mongei shüpa, lüngeiyü lajei hük shangjing kü yumha mum shihtü chongjateke.

¹⁷Sauli Mikhal kü, “Nüngi dangkao ngei kü hapakei mehekei lueilemnya hatü ngelei vepa yangdaihen mü mehekei deitükpa?” shei e. Mikhali büpa kü, “Büpai ngei kü ngei lüdaishah; mehekei ngei nüng jühenang? shei ephopeih” shei e.

¹⁸Mechem David laongei daiyei yangdaipa, büpai Ramahlei Samuel touei peiyei Sauli büpa kü dükshuohpü jung peü ejateke. Hapheikü büpa hatü Samuel nyi Naiothlei daiyei halei nyu.

¹⁹Saul kü, “Davidü Ramah kahdok Naiothlei nyupüja” shei e.

²⁰Hahepak kü Sauli David yephen shennyakthü shom shejao jomi Samueli mütü thibüthüi teteivanei eteke, hatü Kahvang laangha jomphong kao bak, hatü jomao teteivanei e.

²¹Saul kü hapa jung eshuohpü nangkü büpai lebü shennyakthü shom hatü jomphongao teteivanei e. Sauli jempabü shao shennyakthü shom hatü jomphongao hapakei teteivanei eteke.

²²Hapheikü büpa laophü nyingi Ramahlei heih. Büpai Seku leipü yungkuk longpü hük ngoiyei, “Samuel hi David nyi metouei nyüpa yo?” shei phe. Hanei ami, “Jijinyiyü Ramah kahdok Naiothlei nyüpüja” shei eshuoh.

²³Büpai Ramah kahdok Naiothlei heih, hatü Kahvang laangha büpa kü bakteke. Büpa daishingkü Ramah kahdok Naioth mangngoi thahshi büpayao phaukteiyei heih.

²⁴Büpai ashakviha kemei bintüktü Samuel touei teteivanei eteke. Büpa ha nyih ha ya kemei bümkong shükshi nyu. Hanangkü nanglakthüi, “Saulao thibüthü khongkü omshi nyüpü je” shei eteiteke.