Read Phom Naga 1 SAMUEL 20 Bible Online

1 SAMUEL 20 - Phom Naga bible

1 SAMUEL 20

¹Hahepak kü Davidi Ramah kahdok Naioth leipü laongei daiyei Jonathan touei peiyei, “Ngei mehe ten dükpa? Ngei pungpü meheang? Büpai ngei jününg yemhen mü ngei ampa kü mehe nemeipü dükpa?” shei phe.

²Jonathani, “Nedükangpih! Nüng nedipih. Veituh, ngei kü ngaiyei ne-e-i shei opai longtuh maantuh meheyao nedüknyih, hatü mehekei opai ha ngei kü johen? Hapakei nevaipih!” shei e.

³Shejao Davidi lah-ei, “Nüngi meshük ngei kü kennya ha ampai nyingei nyüke, hatü büpai, ‘Jonathan kü ha nenyinghüpih, hei nevaijema büpa hanghihen’ shei deihnyüke. Shejao vanyangyem SHEMBÜPAlei men kü, hatü nüng yemmü nyupü thahshi ngei hatü dihen nyi aa kü lakham hük mon nyüke” shei e.

⁴Jonathani David kü, “Nüngi mehe mehe dükhahhünya ngei nüng kü hapa dükphahen hih” shei e.

⁵Hanangkü Davidi Jonathan kü, “Veituh, ngenyih-ü Lenja Mo khih, hatü ngei ongpa mü hahyinghen nadang; shejao ngei daiyei hingnyih om dhüshi kahlei joshi chongkahen.

⁶Ampai ngei hahying shingei neompü nyingei eküjema, ‘Davidü jomei ching Bethlehemei jom shem am peü shingvaishi bong ieyei moila shuohpü hepak ngoiteke shei ngei kü khümei ephongtü leidaitih’ shei eyeishuoh.

⁷Büpai, ‘Meiteke!’ shei eküjema, ngei shingvaishiyao meipü-üng; shejao büpai mongshih-ei eküjema, büpai ngei kü nemei-i dükhen deihnyu khih shei nüngi nyinghen.

⁸Hanangkü nüngei chongphobü kü phahji hutuh; mehenangkü nüngi ngei mü daülangpü vangpüshuwpü lingteke. Shejao ngei pungpü lemhük dangkao nyujema, nüngi-üng ngei jütüktuh; mehekei nüngi ampa touei ngei müei deihenang?” shei e.

⁹Jonathani, “Hapakei nevai” shei e. “Opai nüng kü nemei-i dükhen deihnyüke shei ngei nyinglangmeyü ngei nüng kü neephahen je” shei e.

¹⁰Hahepak kü Davidi Jonathan kü, “Ampai nüng kü nemei-i epü üpai ngei kü ephahenang?” shei e.

¹¹Jonathani, “Huoi, ji chemi kahlei heihshah” shei e. Hanangkü jiji chemi kahlei heih.

¹²Hahepak kü Jonathani David kü, “SHEMBÜPA, Israel amei Kahvang men kü enyeih, ngei ngenyih nevaijü hingnyih hapa hepak kü ngei opa kü dokei veihen; büpai nüng nang meishi eküjema ngei nüng kü shah shomphahen.

¹³Shejao opai nüng kü nemeihen mü eküjema ngei nüng kü yanglem yemei lüdaihen shah shomphahen. Ngei nüng kü hapa jung ne-ejema SHEMBÜPAi ngei kü ha mao nyeishi nemei-i nyemdükpha. Opa mü nyuhampükei SHEMBÜPA nüng mü nyemnyuma.

¹⁴Ngei yemmü nyupü thahshi mon SHEMBÜPA bampü huhen nevai, shejao ngei didaijao,

¹⁵SHEMBÜPAi nüngei vepathü kemei kahdok shak kübü thittükjao hapa aihük bampü ngelei shem am kübü tedohdaima” shei e.

¹⁶Hanangkü Jonathani David am shem mü vangeishuwei, “SHEMBÜPAi Davidei vepathü leipü ha yiühen” shei e.

¹⁷Jonathani shao büpai büpa kü bampü nangkü David kü lahhü; mehenangkü büpai laophü kü bampükei büpai büpa kü bam.

¹⁸Jonathani David kü, “Ngenyih-ü Lenja Mo khih; nüng neomhen, hanangkü nüngei uoshingü kongei chongkahen.

¹⁹Hingnyih om philei shelei nüngi joshi nyuhampü shingei yiüei yaong khongpü touei joshi chongkei.

²⁰Lemhük phuo kü kappü keiha ngei lemei lahhan jem kapphahen,

²¹hatü ngei naü hük shomei, ‘Yiütuh, hapa lahhan yemtuh’ shei ehen. Ngei büpa kü, ‘Veituh, veituh lahhanü nüng lemei nyüke, hathü ankei’ shei eküjema, nüng aongkei; mehenangkü vanyangyem SHEMBÜPAlei men kü nüng shingvaishi ten hatü vongshüh neshiü.

²²Shejao ngei hapa naü kü, ‘Veituh, lahhanü nüng homei heih-ei nyüke’ shei eküjema, nüng lüdaituh; mehenangkü hapayü SHEMBÜPAi nüng deitükpü vaihen.

²³‘Ji aa kü eteipü shahhidou nangkü ji aa kü SHEMBÜPAyü den kü denbü’ ” shei e.

²⁴Hanangkü David kahlei joshi nyu. Mechem Lenja Mo ngoipa, ongpai mo hahhen uo.

²⁵Ongpai lebü hepak kü kei büpalei uoshing bham touei uo. Jonathanü büpa mü khangteishi uo; Abner büpa mü dhienei uo, shejao Davidei uoshing kong mü nyu.

²⁶Shejao Sauli ha nyih meheyao ne-e; mehenangkü David nedaü-i leihen mü lemhük vamjapü vaaishang; hingmei büpa nedaüi shiühen khih shei büpai deih.

²⁷Shejao nyihphei Lenja nyih phei kao Davidei uoshing kong mü nyu. Hahepak kü Sauli cheha Jonathan kü, “Menyih-ao shinnyih-ao Jesselei cheha David hahyinghen mehekei nepeipa?” shei phe.

²⁸Jonathani Saul kü, “Davidü Bethlehemei leihen khih shei ngei kü phephopeih.

²⁹Ngei leihen vaipü khih; mehenangkü ham shem ami ha chingei SHEMBÜPA kü moila shuohnyüpeih, hatü ngelei jeihinaüthüi halei omkei shei epü khih. Nüngi bamei deihjema ngelei jeihinaüthü mü pongteihen leishihtuh shei ephopeih. Hanangkü ongpa mü hahyinghen büpa nepeikünyu khih” shei e.

³⁰Hahepak kü Sauli Jonathan kü mongshih-ei büpa kü, “Thennyongmongnyong hatü venlepü nyüi bühpü ha! Veüao neveüi hatü nüngbüh nüng paümpü hümlungnyü kao neveüi nüngü Jesselei cheha mü mong khenpü ngei nenyingpü je?

³¹Jesselei cheha kahdoknyülei nyupü thahshi nüng nevaijü nüngei ongching chongkhenei nelingaokpih. Shaang ngei touei müei deikei; büpa jütükhen hih” shei e.

³²Hahepak kü Jonathani chepa Saul kü, “Mehe med kü büpa jühenang? Büpai mehe dükphopa?” shei e.

³³Shejao Sauli büpa jütüknüng shei phungi shühteke. Hanangkü chepai David jütükhen deihshi nyüke shei Jonathani nying.

³⁴Jonathani nyih nyipabü kü mongshih-ei meheyao nehah-i yaongei lüdai; mehenangkü chepai David kü veüshi dükpü nangkü büpa longi mongshang.

³⁵Nepnüng Jonathani naü hük mütü David mü pongteinüng eteipükei kahlei shateke.

³⁶Büpai naü kü, “Moktuh, hatü ngei kappü lahhan yemtuh” shei e. Hapa naü mokyaki büpai naü homei lahhan kap.

³⁷Mechem hapa naüi Jonathani kappü lahhan vüpü shing ngoipa, Jonathani naü kü nyüktü, “Lahhanü nüng peih-ei heih-ei nenyuang je?” shei e.

³⁸Jonathani naü kü nyüktü, “Shülangi, tephei, lomi mokkei” shei e. Hanangkü hapa naüi lahhan homei notü büpa touei mokei lei.

³⁹Shejao hapa naüi hapa güh neyao; Jonathan hi David nyi moni hapa nying.

⁴⁰Jonathani büpalei lah hapa naü kü shuohtü, “Hapa koei chingei aongei chongkei” shei e.

⁴¹Hapa naü aongdaipheikü Davidi yaong khongpü toueipü vamei Jonathan touei jempa thahshi kahdokei aümei shatü khüm. Jiji om kü jüptei, hatü chemi thep shejao Davidi nyeishi thep.

⁴²Jonathani David kü, “Meishi daituh; mehenangkü ji SHEMBÜPAlei men kü, ‘Ji aa kü hatü jiei hühihathü aa kü düngei SHEMBÜPAyü denbü vaihen’ shei lahteitükteke” shei e. Hapheikü David lüdai, hatü Jonathan chingei aongdai.