Read Phom Naga 1 SAMUEL 23 Bible Online

1 SAMUEL 23 - Phom Naga bible

1 SAMUEL 23

¹Mechem David kü, “Philistia ami Keilah ching hahnyüke hatü haleipü hah vetei tuhpü shetlangkemnyüke” shei eshuohpa,

²Büpai SHEMBÜPA kü, “Ngei daiyei hapa Philistia am hahtükshah nyu?” shei phe. SHEMBÜPAi David kü, “Daituh, hatü nüngi Philistia am hahtuh hatü Keilah am yangtuh” shei e.

³Shejao Davidei shennyakthüi büpa kü, “Hamü jen Judahlei dangkao hajük nyemjü, Keilahlei heih-ei Philistia veshanthü mü hokhenü meshük nyembenüngang?” shei e.

⁴Hanangkü shao chem Davidi SHEMBÜPA kü phe, hatü SHEMBÜPAi büpa kü, “Keilahlei yiütuh hatü ngei nüngei lak kü Philistia am lanei shuohhen” shei e.

⁵Hanangkü David hatü büpalei shennyakthüi Keilahlei yiüei Philistia am mü hok hatü Philistia am longi jütü jomei yemhimakthü peü shetei aongdai hatü Keilah am yangei tuh.

⁶Mechem Ahimelekhei cheha Abiathar laongei daiyei Keilahlei David touei peipa, büpai bhagthuh hük noei peiteke.

⁷Davidü Keilahlei peiyei nyükeja shei Saul kü eshuoh, hatü Sauli, “Kahvangi ngelei lak kü büpa shuohteke; mehenangkü David büpa nyingi penyüsha mon nyupü chingei shüei laophü nying khoklatei küpdaiteke” shei e.

⁸Hanangkü Sauli Keilahlei yiüei David hatü büpalei shennyakthü kü shümei yahtü hokhen shingvaishi büpalei veshanthü peü nyükteke.

⁹Mechem Sauli büpa jühen temnyüke shei Davidi danpa, büpai ngongpa Abiathar kü, “Bhagthuh deikei” shei e.

¹⁰Hapheikü Davidi, “Oh SHEMBÜPA, Israel Kahvang, Sauli Keilahlei yiüei ngei tata kü hapa ching hahtükhen küpjan tempü nüngei chongphobüi lekei danteke.

¹¹Keilah bühü ami ngei Saul kü yepei shuohhen hiang? Ngei danpükei Saul hingmei peikahen je? Oh SHEMBÜPA Israel Kahvang, nüngei chongphobü kü eshih” shei e. SHEMBÜPAi, “Büpa yiükahen” shei e.

¹²Hahepak kü Davidi, “Keilah am bühüthüi ngei hatü ngelei shennyakthü büpa kü shuohhen hiang?” shei phe. SHEMBÜPAi, “Hih” shei e.

¹³Hanangkü David hatü büpalei shennyakthü Keilah leipü jom kho vok hük shing nyaiyei daiyei shing hük kübü hük shei longteiyei nyu. Mechem Sauli David Keilah leipü lüdaiteke shei danpa, büpa halei neyiü.

¹⁴Davidi Ziph yopai leipü phaüshang kahmük yingnyü yingnyakei joshi nyu. Nyihjeih Sauli David yem shejao Kahvangi Saulei lak kü David neshuoh.

¹⁵Mechem David Ziph yopai leipü Horesh jahpanei nyupa, Sauli büpa jühen yemnyüke shei dan.

¹⁶Saulei cheha Jonathan David nyushing Horeshlei peiyei Kahvang leipü wong danghen mongyang shah eshuoh.

¹⁷“Lanshei tenyem. Opa Saulei laki shei nüng nejüaokpih. Nüngi nyih hükü Israel amei ong vaihen, hatü ngei nyipabü vaihen hatü hapayü opai meishi nyingei nyüpeih” shei e.

¹⁸Hahepak kü jiji SHEMBÜPA touei vangpüshuwpü ling; Davidü Horeshlei nyu hatü Jonathanü shemei leidai.

¹⁹Ziph am shennyak hanei Gibeahlei peiyei Saul kü, “Davidü hamei peiyei Jeshimon kü heshüphi Hakilah Kahshang Horeshlei joshi nyüke.

²⁰Hanangkü Oh ongpa, nüngi mechem yiühününgshang yiükei, hatü hami büpa nüngei lak kü yepei yahphahen” shei e.

²¹Sauli büpa kü, “Nüngi ngei nangkü shinshangei deihpü nangkü SHEMBÜPAi nüng kü moihimantuh.

²²Leituh hatü büpa melei nyu, hatü üpa üpai eepa meishi shao chem lekei nyingkei; büpayü longi kon kohshi khih shei ngei kü eküpeih.

²³Büpa joteipü shing meishi yemei nyingkei hatü hapa jung lekei shahjang koei peikei. Hapheiküang ngei nüng mü daihen, hatü büpa hapa moidoi mongei nyuküjema, Judah am haja nyupüthü khong kao büpa yemhen” shei e.

²⁴Hanangkü jomphongi Saul shekü Ziphlei leiteke. Shaang David hatü büpalei shennyakthüyü Jeshimon pehephi yungji Maon jahpanei nyu.

²⁵Saul hatü büpalei shennyakthüi büpa yemnüng dai. Mechem Davidi hapa jung danpa, büpai Maon jahpan leipü yaongvakei daiyei halei joshi nyu. Sauli ha danei, David yemei Maon jahpanei dai.

²⁶Saul hatü büpalei shennyakthü kahshang hük lemei dai; David hatü büpalei shennyakthü kahshang hükpa lemei Sauli phei nethahhahhen daiyei nyu. Saul hatü büpalei shennyakthüi David hatü büpalei shennyakthü phei thah-ei yephen yoshi kü,

²⁷Saul touei phongmokbü hük peiyei, “Lomi leikei! Philistia ami jenei kahmük hahtüknyüke” shei eshuohteke.

²⁸Hanangkü Sauli David kü changei daipü yakphongtü Philistia am mü hokhen nyokei lei. Hanangkü jomi hapa shingkü Sela Hammahlekoh shei nyük,

²⁹hatü David haleipü daiyei En-Gedi jahpanei joshi nyu.