Read Phom Naga 1 SAMUEL 24 Bible Online

1 SAMUEL 24 - Phom Naga bible

1 SAMUEL 24

¹Sauli Philistia am kü changei daipü leipheikü “Davidü En-Gedi jahpanei nyükeja” shei eshuohteke.

²Hanangkü Sauli Israel am peü kübü meipü veshanthü haja jem ietü David hatü büpalei shennyakthü yemnüng Meiyah Yaongvak lemei heihteke.

³Büpai lem namei nyupü mi shem yaongsha hükei peiyei nyiumeiyei nyu. David hatü büpalei shennyakthüyü yaongsha mongpalei uoshi nyuteke.

⁴Davidei shennyakthüi büpa kü, “SHEMBÜPAi nüng kü, ‘Ngei nüng kü nüngei vepa nüngei lak kü shuohhen hatü nüngi büpa kü nüng kü meipü aimü dükhen’ shei epü nyih-ü shinnyih khih” shei e. Hahepak kü Davidi joei aongei Sauli nenyingi büpalei ashakjung vetei yahlang.

⁵Hapheiküang Saulei ashak vetei yahpü nang kü David mongshangei deih,

⁶hatü büpalei shennyakthü kü “Ngelei shembü, SHEMBÜPAi jepü kü ngei hapakei dükhen, hatü ngei büpa khüei lak nohenü büpai nemongnyih; mehenangkü büpayü SHEMBÜPAi jepeih” shei e.

⁷Hanangkü Davidi büpalei shennyakthü kü nemei-i lohshuoh hatü Saul jühen jomphong kü nemongshuoh. Hapheikü Saul paoei yaongdung leipü layaongei lüdai.

⁸Hapheikü Davidao yaongdung leipü vamei daiyei Saul kü, “Ngelei shembü ongpa!” shei nyük. Mechem Saul yaakei veipa, Davidi büpalei dhe kahdokei aümei shatü, Saul kü,

⁹“Davidi nüng jütüknüng yemnyüke” shei ephopü shah kü mehekei nüngi bangnya?

¹⁰Shinnyih mekei SHEMBÜPAi yaongdungei ngelei lak kü nüng shuohpa ha nüngei müki eeteke. Hanei-i nüng jütükhen nyeanphopeih shejao ngei jomphong kü, “Ngei ngelei shembü kü lak neshihpih; mehenangkü büpayü SHEMBÜPAi jepeih shei etü ngei nüng yangei tuhpeih.

¹¹Opa, ngelei lak leipü nüngei ashakjung kü veihümao! Ngei nüngei ashakjung vetei yahpeih shejao nüng nejüangpih. Hapa homei ngei nüng khüei nejiüpü dükhen hatü nüng jühen shei deihpü neshiüang shei nyingtuh” shei e. Ngei nüng kü meheyao pungei nedükangpih, shejao nüngi ngei jühen yemnyu khih.

¹²Ji aa kü SHEMBÜPAi-üng shah nyemphenkei! Nüngi ngei kü nejiü-i dükpü nangkü SHEMBÜPAi nüng hanghihühen aok, shejao ngelei laki shei nüng kü nehongpih.

¹³Aivang bütet kü, “Douten dükpü am kübü douten vamnyeih” shei enyüke, shejao ngelei laki nüng khüei dou nedükpih.

¹⁴Üpa khüei Israel ongpa layaongei daipa? Üpa kü nüngü changei dainya? Shimahng kü changei dainyu hi shepaung kü changei dainya?

¹⁵“SHEMBÜPAi-üng ji aa kü üpa jiüpa shah nyemphenkei. Ngelei nang büpai veihen, hatü büpai ngei nüngei lak kübü yangei ngei dah shakhühen” shei e.

¹⁶Mechem Davidi Saul kü hathü shah eyei kempa, Sauli, “Ngelei hapeü David, hapayü nüngei ngeü je?” shei phe. Sauli ngeü wongmü vamei thep.

¹⁷Büpai David kü, “Nüngü ngei mao nyeinya daülangpü khih; mehenangkü nüngi ngei kü mei shuohteke shejao ngeiyü nüng kü ten shuohteke.

¹⁸SHEMBÜPAi ngelei yangnyu nüngei lak kü shuohshingkü nüngi ngei nejü shejao mekei nüngi ngei kü meipü dükpa hapa jung shinnyih nüngi nih-ei eküteke.

¹⁹Mehenangkü üpai laophülei vepa heütü meishi yangei leishihpü nyüpa? Nüngi shinnyih ngei kü mei dükpü shing SHEMBÜPAi nüng kü thintho nyemshuoh.

²⁰Hingmei nüngü ong vaihen shei shaang ngei nyingteke, hatü Israel ongching nüngei laki linghen shei nyingteke.

²¹Hanangkü ngei pheikü ngelei hühihathü nejüpih hatü ngelei men opalei shem kübü nethittükpih shei SHEMBÜPAlei men kü vangei eshih” shei e.

²²Hanangkü Davidi Saul kü vangei eteke. Hapheikü Saulü shemei leidai, shejao David hatü büpalei shennyakthü joshingei leidai.