Read Phom Naga 1 SAMUEL 26 Bible Online

1 SAMUEL 26 - Phom Naga bible

1 SAMUEL 26

¹Hapheikü Ziph am hanei Gibeahlei heih-ei Saul kü, “Davidü Hakilahlei Jeshimon philemei joshi nyükeja” shei lushuohteke.

²Hanangkü Saul layaongei Israel am veshan haja jem mütü David yemnüng Ziph amei jahpanei dai.

³Sauli Hakilah Kahshangei Jeshimon kü dangshi lemhaoei baümtap ve. Shejao Davidü jahpanei nyu hatü mechem Sauli büpa yemnüng jahpanei peiyei nyükeja shei danpa,

⁴Davidi gühshukhen shennyak hanei shomshingkü hingmei Saul jahpanei daiyei nyu.

⁵Hahepak kü David laongei Sauli baümtap vepü shingei pei, hatü Davidi Saul hatü veshan mübü Nerlei cheha Abner metouei shi, ha eeteke. Saulü baümtap mongei shi hatü veshanthü büpa shonei shiteke.

⁶Hahepak kü Davidi Hit am Ahimelekh hatü Zeruiahlei cheha Abishai Joabei chenaü kü, “Saulei baümtapei ngei mü üpa yiükahen ang?” shei phe. Abishai-i, “Ngei yiükahen hih” shei e.

⁷Hanangkü David hatü Abishai nyi, baümtap mongei yanüng shüjashingkü Saulü baümtap mongei büpalei shoshelei phung haongtü shishi nyu. Abner hatü veshanthü büpa shonei shishi nyu.

⁸Abishai-i David kü, “Kahvangi shinnyih nüngei lak kü nüngei vepa shuohteke, hanangkü shaang ngei büpa kahdok kü nyeanei chem mon nyipaao nevai, phungi shühshah” shei e.

⁹Shejao Davidi Abishai kü, “Büpa tejü; üpai SHEMBÜPAi jepü ong kü lak hethenshang, büpa pungpü nevaihen je?” shei e.

¹⁰Davidi, “Vanyangyem SHEMBÜPAi jütükhen, nevaijü büpalei hantet ngoiyei dihen nevaijü vehok kü daiyei mahdaihen.

¹¹Shejao SHEMBÜPAi jepü shennyak kü lakhünghen SHEMBÜPAi nemongnyih. Shejoong büpalei shoshelei haongpü phung hatü yungshong yahtuh hatü daishah” shei e.

¹²Hanangkü Davidi Saulei shoshe leipü phung, hatü yungshong yah-ei dai. Üpaiyao hapa ne-ee, nevaijü nenying, nevaijü üpayao nepao; mehenangkü jom peü mükhet ngoiyei shi; mehenangkü SHEMBÜPAi jom peü dipükei shihen peihüteke.

¹³Hapheikü Davidi kahji homei hükpa lemei taishi heih-ei kahshangei yaongtü,

¹⁴Davidi veshanthü hatü Nerlei cheha Abner kü, “Abner! ngei nyükpü dannyüla?” shei nyüktü eteke. Hahepak kü Abneri jangei, “Ongpa kü nyükpü üpaang?” shei phe.

¹⁵Davidi, “Nüngü bapeühapeü nevaipü je? Israel kü nüng keipü üpa nyüpa? Mehekei nüngi nüngei shembü ongpa yomei nenyunya? Shaangüng shennyak hanei nüngei shembü ongpa jühen baümtap mongei shüteke.

¹⁶Nüngi dükpü dou nemeiang. Vanyangyem SHEMBÜPAi am peü jütükhen shangei nyüke; mehenangkü ammi amei shembü ongpa SHEMBÜPAi jepü yomei nenyu. Hanangkü shaang, ongpa shoshe leipü phung hatü yungshong melei nyüke veihümao?” shei e.

¹⁷Sauli hapayü Davidei ngeü khih shei nyingei, “Ngelei hapeü David, hapayü nüngei ngeü je?” shei phe. Davidi, “Hapayü ngelei ngeü hih, ngelei shembü, Oh ongpa” shei jang.

¹⁸Hatü büpai shao, “Ngelei shembü nüngi mehekei nüngei chongphobü kü changnya? Ngei mehe dükphopa? Ngei mehe nejiüpü dükphaei nyüpa?

¹⁹Hanangkü shaang ngelei shembü ongpai nüngei chongphobülei shahthü kü banghümao. SHEMBÜPAi ngei khüei nüng shompü vailangmeyü büpai ngelei moila yahpai mongmeidaihen; hapayü shennyakthüi dükpü vaijema SHEMBÜPAlei thaüvaü jom kü hethen, mehenangkü jomi shinnyih ngei SHEMBÜPAlei mükjüp kübü changtüktü, ‘Daituh lebü kahvangthü chongphotuh’ shei hanpü khih.

²⁰Hanangkü shaang, ngelei iy lebü kung kahdokei SHEMBÜPA toueipü yanei daiyei teyenhü; mehenangkü Israel amei ongi nyemei lüdaipü pheikü phaüouha jününg daipükei daiküpü je?” shei e.

²¹Hahepak kü Sauli, “Ngei pungei dükteke; nyokei leikei, ngelei hapeü David; hajük kü ngei nüng kü meheyao ne-epih; nüngi ngelei yangnyu shinnyih yangei tuhteke; ngei ngapü khih; ngei longi pungteke” shei e.

²²Davidi, “Oh ongpa, nüngei phung hammü shepeih, veshanthü hanei deishihei hapa leihahtuh.

²³SHEMBÜPAi daülangshemshepü hatü shahhing epüthü kü thintho shuohnyeih; mehenangkü SHEMBÜPAi shinnyih ngelei lak kü nüng shuohteke, shejao SHEMBÜPAi jepü ong vaipü nangkü ngei nüng kü lak nehingangpih.

²⁴Shinnyih ngei nüngei yangnyu yangei tuhpükei SHEMBÜPAi ngelei yangnyuao yangei nyemtuhpha hatü lebü shanghahthü peü kübü büpai ngei nyemyangpha” shei e.

²⁵Hahepak kü Sauli David kü, “Nüng moihimantuh, ngelei hapeü David! Nüngi dou longi dükhen hatü hathü lemphü kü nüngi aokpü danghen” shei e. Hanangkü Davidi büpalei lemei leidai hatü Saul-ao shemei leidai.