Read Phom Naga 1 SAMUEL 27 Bible Online

1 SAMUEL 27 - Phom Naga bible

1 SAMUEL 27

¹Shejao Davidi laophü nyingi, “Nyih hükpayü ngei Saulei lak kü mahhen khih; ngei shingvaishi peü mü meipeyü Philistialei paüei daiyei nyupü meihen khih. Shejüang Sauli Israel kemeilei ngei yempü dohhen hatü hapai mon ngei büpalei lak kübü yangaokhen khih” shei deih.

²Hanangkü büpa hatü büpa mü nyupü shennyakthü kho vok layaongei Gath am Maokhei cheha Akhish ongpa touei yiü.

³David hatü büpalei shennyakthü laophü laophülei shem am mü Gath am Akhish mü nyu. Davidao chenyüha nyi mü nyu: Jezreel am Ahinoam hatü Nabal tuhphongtü didaipü Karmel am Abigail nyi nyuteke.

⁴Mechem Sauli David Gathlei yiüdaitekeja shei dan, büpai hajükü David neyem.

⁵Davidi Akhish kü, “Nüngi ngei kü phahjiei deihjema, ngei nyuhen shangmü nüngei kahmükei shing maanpü hük hanshih; mehekei nüng chongphobü ngei nüng mü ongpa chingnyü kü nyuhenang?” shei e.

⁶Hanangkü ha nyih Akhish ongpai büpa kü Ziklag shuoh; hanangkü shinnyih thahshi Ziklagü Judah ongthülei shing nyüke.

⁷Davidi Philistia kahdokei bong hük mü lenyang ali nyu.

⁸David hatü büpalei shennyakthüi Geshur, Girzi hatü Amalek am hahteke. Mehenangkü Telam kübü Shur hatü Ijiplei aongpü lemei jom chingchingei nyuteke.

⁹Mechem Davidi hapa kahdok hahhenshang, büpai nyüha, nevaijü baha üpayao yemmü netuhphong; shejao mi, mohoh, gadu, ut hatü ashakviha kemei yah-ei Akhish touei lei.

¹⁰Mechem Akhish-i, “Shinnyih-ü chinghah melei daipa?” shei pheshuohpa, Davidi, “Heshüphi Judah, nevaijü Jerahmeel, nevaijü Ken am hahpeih” shei ehamteke.

¹¹Davidi nyüha vaijao baha vaijao yemmü Gathlei yah-ei nelei; mehenangkü jomi “Davidi ham kü hapakei dükphopeih” shei ejahen khih shei deih. Philistialei nyuyang kemei kü büpai hei mon dük.

¹²“Akhish-i David kü monghah, mehenangkü büpai laophülei nanglak Israel am kü longi jiühitnyüke; hanangkü büpayü den kü ngelei chongphobü vaihühen” shei deih.