Read Phom Naga 1 SAMUEL 3 Bible Online

1 SAMUEL 3 - Phom Naga bible

1 SAMUEL 3

¹Shaang hashih Samuel-ü Eli phangkü SHEMBÜPA chongphoei nyu. Hathü nyih kü SHEMBÜPAleipü shahjangü longi komshi, hatü manghkhangao banghshi nenyuham.

²Ya hük, sheyü Eli mük pumdaitü meishi ne-eeaoki shinshingei lemshi nyu;

³Samuel payü SHEMBÜPAlei phopshemei Kahvangei Vangpüshuwpü Pela tuhpü touei awdük meishi nemettüki shishi nyu.

⁴Hahepak kü SHEMBÜPAi, “Samuel! Samuel!” shei nyük, hatü büpai, “Ngei hammü nyüpeih” shei etü,

⁵Eli touei mokei heih-ei, “Nüngi nyükpü nangkü ngei heihküpeih” shei e. Shejao Eli-i, “Ngei nenyükangpih, leiyei lemdaituh” shei e. Hanangkü büpa leiyei lemdai.

⁶SHEMBÜPAi shao “Samuel!” “Samuel!” shei nyük. Samueli paoei Eli touei heih-ei, “Nüngi nyükpü nangkü ngei heihküpeih” shei e. Shejao büpai, “Hapeü, ngei nenyükangpih; leiyei lemdaituh” shei e.

⁷Shaang Samueli shaoüng SHEMBÜPA meishi mangnying, hatü SHEMBÜPAlei shah chemao shakei vamei mangeshuoh-i nyuteke.

⁸SHEMBÜPAi Samuel kü shao jempabü nyük, hatü büpai paoei Eli touei heih-ei, “Nüngi nyükpü nangkü ngei heihküpeih” shei e. Hahepak kü Eli-i naü keyü SHEMBÜPAi nyükshuohnyu khih shei nying.

⁹Hanangkü Eli-i Samuel kü, “Leiyei lemdaituh; büpai shao nyükphüjema, ‘Eshih, SHEMBÜPA, nüng chongphobüi bangnyüpeih’ shei eyeishuoh” shei eteke. Hanangkü Samuel leiyei büpalei shinshingei lemshi nyu.

¹⁰Shaang SHEMBÜPA peiyei yaongtü sheleipü keiha, “Samuel! Samuel!” shei nyük. Hatü Samueli, “Eshih, nüngei chongphobüi bangnyüpeih” shei e.

¹¹Hahepak kü SHEMBÜPAi Samuel kü, “Veituh, ngei Israel kü lemhük dükhen hih, hatü üami hapa danhenshang peüi jomei dhaong nohen.

¹²Hapa nyih chongpangpü kübü dohpü thahshi ngei Eli hatü jom shem khüei dükhen shei epü peü dükhen.

¹³Mehenangkü den shingvaishi ngei jomei shemong kü hanghi shuohhen shei ngei büpa kü etüktih, hatü hapa mangü büpai nyingei nyüpeih; mehenangkü büpalei cheha nyi-i Kahvang ne-ienelemi dükpeih hatü büpai ha kü tah shei ne-epeih.

¹⁴Hanangkü Eli am shemi thahpü mangü denden kü jakpü moila nevaijü lebü moilathüiyao netükaokpih shei ngei lahtüktih” shei e.

¹⁵Samueli vang mangngai thahshi halei lemshi nyu; hapheikü büpai SHEMBÜPAlei shemshathü ap. Samueli hapa manghkhang Eli kü ehen nyemei nyu.

¹⁶Shejao Eli-i Samuel kü nyükei, “Ngelei hapeü Samuel!” shei nyük. Büpai, “Ngei hammü nyüpeih” shei e.

¹⁷Eli-i büpa kü, “Büpai nüng kü mehe ephopa? Nüngi ha ngei kü tejo. Büpai nüng kü epü lemhük dangkao ngei kü ne-e-i jojema Kahvangi nüng kao ha mü nyeishi dükphahen” shei eteke.

¹⁸Hanangkü Samueli meheyao nejo-i büpa kü lemphüli eshuohteke. Hahepak kü büpai, “Hapayü SHEMBÜPA mong khih; büpa kü mehe mei, ha nyemdükpha” shei e.

¹⁹Samuel long hatü SHEMBÜPA büpa mü nyu hatü büpalei shah hükao kahdokei nevüshih.

²⁰Dan kübü Beer-sheba thahshi Israel am peüi Samuel-ü SHEMBÜPAlei hingshangpü thibü khih shei nying.

²¹SHEMBÜPAi nedoh-i Shilohlei vamei hu, hatü shah etei.