Read Phom Naga 1 SAMUEL 6 Bible Online

1 SAMUEL 6 - Phom Naga bible

1 SAMUEL 6

¹SHEMBÜPAlei Vangpüshuwpü Pela Philistia kahdokei lenyang nyet thahshi angteke.

²Hahepak kü Philistia ami ngongpathü hatü phongyombüthü nyükei, “SHEMBÜPAlei Vangpüshuwpü Pelayü mekei vaihenang? Mekei hami hapa shingei mehe mü nyokei leishihhen eshih” shei e.

³Jomi, “Ammi Israel Kahvangei Vangpüshuwpü Pela shomei leishihjema, hapa mon kongmü teleishih, shejao mehe vaihenshang vaijao büpa kü pungpü moila-ao shomtuh. Shejüang am meihen, hatü mehekei büpalei lak am toueipü neyahlangpa, ha ammi nyinghen” shei e.

⁴Nanglakthüi, “Mepa keipü pungpü moila büpa kü shomhenang?” shei phe. Jomi, “Honi lingpü hihüma lajei nga, honi lingpü yüphüh nga shei Philistia am ongpathü kü hükbaong heshap shuohtuh; mehenangkü hapa aihük chami am hatü ongpathü peü kü shompeih.

⁵Hihüma lajei lingtuh, hatü ammei kahdok mangtükpü yüphüh lajei lingtuh, hatü hapa yah-ei Israel Kahvang kü dhüm hutuh; üpai nyingpa büpai büpalei lak am hatü ammei kahvangthü hatü kahmük kübü yahlangphahen.

⁶Mehekei ammi Ijip am hatü Pharaoh-i kei mong vaannya? Büpai jom ngapa kei leihütükpheikü jomi Israel am yanei neleishih-angpü je?

⁷Hanangkü shaang mohoh khari ja hük, hatü cheha shaantükphei mohoh nyi shejao chemao pang mangpaaipü temtuh. Hapa mohoh nyi kü khari chanhütuh shejao mohoh cheha nyi payü müei leiyei shentüktuh.

⁸SHEMBÜPAlei Vangpüshuwpü Pela hapa khari shangkü haütuh, hatü ammi büpa kü pungpü moila shuohhen lingpü hon lajeithü pela hük kü shihtü ha mü dhienei haütuh. Hapheikü ammi jom nyingnyingi laophülei lem kü leihen shomeishuoh,

⁹shejao ammi ha kü veishi nyutuh. Hapa laophü nyingi laophülei kahdok yemei Beth-Shemesh lemei leidaiphüjema, jen kü shanghah shuohpeyü Israel Kahvang khih shei nyinghen; shejao hapakei nevaijema, jen kü shanghah shuohpeyü büpa nevai, shejao hapayü jen kü hei-üng ngangahük kü peipü shanghah shei nyinghen” shei e.

¹⁰Hanangkü jomi hapakei dük. Jomi hapa keipü mohoh nyi yah-ei khari chanhü hatü cheha nyi shentük.

¹¹Jomi mohoh khari kü SHEMBÜPAlei Vangpüshuwpü Pela mü honi lingpü yüphüh hatü hihüma lajei nyi pela hük kü haüteke.

¹²Hahepak kü mohoh nyiyü kangshangi Beth-Shemesh lemei lemnyüshong phungei vaüyaki lei; jiji laknyong nevaijü lakdah lemei neleplük, hatü Philistia am vanglem lembüthü Beth-Shemesh viongbaong thahshi müei heihteke.

¹³Shaang Beth-Shemesh amü kahjilei hah vetei nyu, hatü mechem jomi ngangei veishuohpa, Vangpüshuwpü Pela leijapü eeyei mongongei hapa mü pongteihen heih.

¹⁴Hapa mohoh khari Beth-Shemesh am Joshualei kahlei yaongnyü longpü touei yaongteke. Hatouei nanglakthü mohoh khari pü vaiyei deanei shüngtü hapa mohoh nyi SHEMBÜPA kü jakpü moila shuoh.

¹⁵Levi ami SHEMBÜPAlei Vangpüshuwpü Pela mü hon lajeithü hüpü pela koei yiüei yaongnyü longpü hük shangkü haü. Hapheikü Beth-Shemesh ami ha nyih SHEMBÜPA kü jakpü moila hatü lebü moilathü shuoh.

¹⁶Philistia am ongthü jom nga-i hapa dükpü peü eetü ha nyihüng Ekronei nyokei leidai.

¹⁷Hathüyü Ashdod, Gaza, Ashkelon, Gath hatü Ekron chingnyüthü shing hükbaong heshap SHEMBÜPA kü jakpü moila shuohhen honi lingpü hihüma lajeithü Philistia ami shomteke.

¹⁸Honi lingpü yüphüh lajei ngayü ongpa ngalei chingnyüthü hatü penyü showtükpü hatü penyü neshowpü chingnyüthü heshap shomteke. Beth-Shemesh am Joshualei kahlei yaongnyü longpü shangkü SHEMBÜPAlei Vangpüshuwpü Pela haüpeyü shinnyih thahshi denpü hük nyüke.

¹⁹Shejao Kahvangi Beth-Shemesh am shennyak pejempüan hükshing jütük; mehenangkü jomi SHEMBÜPAlei Vangpüshuwpü Pela mongkü veiteke. SHEMBÜPAi jom kü lak vihyaki nopü nangkü nanglakthü thepeiyoung,

²⁰hatü Beth-Shemesh ami, “SHEMBÜPA, daülangpü Kahvang touei üpa yaonghenang? Ham toueipü deitükhen shingvaishi üam touei büpa shomtükhenang” shei e.

²¹Hahepak kü jomi Kiriath-Jearim am touei phongmokbü shomei, “Philistia ami SHEMBÜPAlei Vangpüshuwpü Pela leiphüteke yiüei hapa koei aongdaishih” shei e.