Read Phom Naga 1 SAMUEL 7 Bible Online

1 SAMUEL 7 - Phom Naga bible

1 SAMUEL 7

¹Hanangkü Kiriath-Jearim am shennyakthü yiüei SHEMBÜPAlei Vangpüshuwpü Pela koei anei shangtaolei nyupü Abinadabei shemei tuh, hatü büpalei cheha, Eleazari hapa SHEMBÜPAlei Vangpüshuwpü Pela kü veihen daühüteke.

²Kiriath-Jearimei SHEMBÜPAlei Vangpüshuwpü Pela tuhpheikü hepak luangi bong kukha hükshing daipheikü Israel nanglakthü kemei thepeiyoungei SHEMBÜPA yemteke.

³Hahepak kü Samueli Israel phang kempü kü, “Ammi ammei mongdang kempai SHEMBÜPA touei lepei leipü vaijema, am toueipü kung amei kahvangthü hatü Astartes kahvangthü yaktüktuh, hatü SHEMBÜPA kü lanei shuohtuh hatü büpa mon chongphotuh; shejema büpai am Philistia amei lak kübü yangphahen” shei e.

⁴Hanangkü Israel ami Baal, hatü Astartes kahvangthü yaktük, hatü SHEMBÜPA mon chongpho.

⁵Hapheikü Samueli, “Israel am kemei Mizpahlei thaikei, hatü ngei SHEMBÜPA kü am shingvaishi phophen hih” shei e.

⁶Hanangkü jom Mizpahlei thaiyei yung shoei anei SHEMBÜPA touei langteke. Ha nyih jomi shüaeiyungleyei, “Hami SHEMBÜPA khüei mang thahteke” shei mang lah, hatü Samueli Mizpahlei nyuei Israel am kü vanglem lemteke.

⁷Mechem Philistia ami Israel am Mizpahlei thainyuja shei danpa, Philistia am ongthü Israel am mü hokhen aong, hatü mechem Israel ami ha danpa, jomi Philistia am kü nyemei nyu.

⁸Israel ami Samuel kü, “Ham nangkü leneiwongpü tedohdai; hatü büpai ham Philistia amei lak kübü yanghen phopshih” shei e.

⁹Hahepak kü Samueli amma aokshem mebü miha hük yah-ei SHEMBÜPA kü dhaomü jakpü moila shuoh. Samueli Israel am shing lenei phop, hatü SHEMBÜPAi büpai phoppü kü jang.

¹⁰Samueli SHEMBÜPA kü jakpü moila shuoh-ei nyushingkü Israel am mü hokhen Philistia am yopailei heih, shejao SHEMBÜPAi ha nyih Philistia am kü vangmuk vangteng kei ngeü longpü hük vamhüei jom ai mah-ei Israel am toueipü nyaidai.

¹¹Israel am Mizpah leipü daiyei Philistia am kü Beth-Kar thahshi changei shanei jüteke.

¹²Hapheikü Samueli yaong hük yah-ei Mizpah hatü Shen nyi aa kü haong, hatü büpai hapa kü Ebenezer lappai, “Hajük thahshi SHEMBÜPAi ham kü sheühpeih” shei nyükteke.

¹³Hanangkü Philistia am neütük, hatü hajük kü jom Israel amei viong peih-ei neshü. Samuelei den kemei SHEMBÜPAi Philistia am kü lak vihyaki noteke.

¹⁴Philistia ami Israel amei jilathü Ekron kübü Gath thahshi yahei nyupao nyokei yah, hatü Israel ami ngeih-ei shonei nyupü kahdokao Philistia amei lak kübü yang. Israel hi Amor am aa kü chingmeivangmei nyu.

¹⁵Samueli büpalei den kemei Israel kü vanglem lem.

¹⁶Bong ieyei büpai Bethel, Gilgal hatü Mizpah kü shinei shinei kam, hatü hathü shing peü kü vanglem lem.

¹⁷Hapheikü büpai Ramahlei lei; mehenangkü büpalei shem halei nyu; büpai halei Israel amei shahphenbü vai, hatü büpai hammü SHEMBÜPA kü moidü hük lingteke.