Read Pinotepa Nacional Mixtec Tutu Juaan 21 Bible Online

Tutu Juaan 21 - Pinotepa Nacional Mixtec bible

Tutu Juaan 21

¹Tacan cuu, ta queta inga quivi, ta ndehe ndico tucu ra sacuaha chi ra Jesuu chi ra yu tañuhun Tiberia, ta tehen ni ndehe ra chi ra.

²Iyo cuiti ra Simón Pedro chi ra Tuma xinihin chi ra Natanael ñuun Caná chi nduvi ra cuu sehe ra Zebedeo chi inga uvi ra sacuaha chi ra.

³Tacan ni iyo cuiti ra, ta quechaha cati ra Simón Pedro chi ra ta ra ti: ―Cuahin, vati cua tiin main tiaca. Ta cati ndico ra ta ra chi ra ti: ―Coho, vati cua cuhun tahan ndi chihun. Chacan cuu cha cuahan ra ta ra, ta quihvi ra tichi tundoo, ta ña ta ñahni cha tiin ra cha cuaa can.

⁴Cha cua cundichin, ta ndehe ra cha inda Jesuu yu nduta can, soco ña chito ra ta ra ti ra Jesuu cuu ra.

⁵Tacan cuu, ta cati ra Jesuu chi ra ta ra ti: ―¿Atu ña ta ñahni cha tiin ndo, ta yani xaa? Ta cati ndico ra ta ra ti: ―Ña ta ñahni.

⁶Ta cati ra Jesuu chi ra ti: ―Cua cani ndo taraya inga chiyo, ta cua nihin ndo chi ri ―cati ra. Chacan cuu cha cani ra ta ra chi chi inga chiyo, ta ña cuu ca canihin ra chi chi, vati cuaha xaan ri tiaca indi.

⁷Iyo tahan ra cha cuni xaan ra Jesuu, ta cati racan chi ra Pedro ti: ―¡Jihna! Ra chahnu cuu ra cha inda. Nu ni chini ra Simón Pedro ti ra chahnu cuu ra chuhni ndico ra tichi ra, vati ña chanami vaha ra, ta chapa ra tichi nduta, ta cuahan ra iti yu nduta,

⁸soco cuahan inga ra tichi tundoo can, vati ña cani iyo yuhu nduta. Vasi queta ciendu metro, ta queta ra ta ra yu nduta can. Xita queñuhun ra taraya can, ta cuaha xaan tiaca ñuhun tichi chi.

⁹Tacan cuu, ta queta ra ta ra yu nduta can, ta ndehe ra cha cayu ñuhun, ta cha tihyo tiaca, ta iyo tahan paan.

¹⁰Tacan cuu, ta cati ra Jesuu chi ra ta ra ti: ―Cua naquihin ndo uvi uni tiaca cha tiin ndo vitin ―cati ra.

¹¹Quihvi ra Simón Pedro tichi tundoo can, ta quechaha xita queñuhun ra chi ri nda cua nda nu ñuhun iti, ta mani tiaca nahnu ñuhun taraya can. Queta iin ciendu uvi xico uchi uni ri, ta cuaha xaan ri cuu ri, soco ña tahnda taraya can.

¹²Tacan cuu, ta cati ra Jesuu chi ra ta ra ti: ―Nahan ndo, vati cua curamosa ndo ―cati ra. Ta yuhvi ra ta ra nducu tuhun ra chi ra yoo ra cuu ra, vati chito ra ti ra chahnu cuu ra, [soco tucu cuhva iyo ra].

¹³Tacan cuu, ta ni tuhva ra Jesuu yu nuhun can, ta quihin ra paan can, ta ni chaha ra chi chi chi ra ta ra, ta ta ni cuhva chaha ra tiaca can.

¹⁴Chehe cuu uni chaha cha ni ndehe ra sacuaha chi ra Jesuu chi ra, ta cha ni chihi ra, ta natacu ndico ra. Cahan ra Jesuu chi ra Simón Pedro

¹⁵Ndihi chachi ra ta ra, ta sa quechaha cati ra Jesuu chi ra Simón Pedro sehe Jonaa ti: ―Moon, cuni rahya ta ra chihin yu. ¿Atu cuni con chihin yu? Ta cati ndico ra Pedro chi ra ti: ―Chito cun ti cuni yu chihun, ra chahnu. Ta cati ra Jesuu ti: ―Cua tindeun chi ñivi yu ―cati ra.

¹⁶Tacan cuu, ta cati ndico tucu ra Jesuu chi ra Pedro ti: ―¿Atu cuni cun chihin yu, Moon? Ta cati ndico ra Pedro chi ra ti: ―Chito cun ti cuni yu chihun, ra chahnu. Ta cati ra Jesuu chi ra ti: ―Cua cumi cun chi ñivi yu ―cati ra.

¹⁷Tacan cuu, ta cati ndico tucu ra Jesuu chi ra cha cuu uni chaha: ―¿Atu cuni cun chihin yu, Moon? ―cati ra. Ta quechaha cucuihya cuni anima ra Pedro, vati cha uni chaha cha nducu tuhun ra tuhun can chi ra, ta cati ra chi ra ti: ―Ra chahnu, chito cun ndihi cha iyo. Chito cun ti cuni yu chihun. Ta cati ndico ra Jesuu ti: ―Cua tindeun chi ñivi yu.

¹⁸Cati ndicha yu chihun ti cha cuun ra tivaa, ta chacundichin cun sahmon, ta cuahun ndaa iti cuni maun cuhun, soco cua nduchahnu cun, ta sa cua sacaun ndahun, ta cua sacundichin inga ñivi chihun, ta cua cuiso ñi chihun ndaa iti cuni maan ñi. Ña cua cuu ca cati maun ndaa iti cua cuhun cun ―cati ra Jesuu chi ra Pedro.

¹⁹Tacan cati ra Jesuu, vati chaha ra cuenda yoso cuhva cua cuvi ra Pedro, ta cua sacahnu ra chi ra Ndioo. Tacan cuu, ta cati ndico tucu ra chi ra ti: ―Na cua savahun cuhva cuni yu ―cati ra. Iin ra amigu xaan ra chi ra Jesuu

²⁰Tacan cuu, ta ndico coo ra Pedro, ta ndehe ra ti chata ra vachi iin ra, ta cuni xaan ra Jesuu chi ra. Racan cuu ra ni chacava yatin nu chacava ra Jesuu, ta chachi ra icaa ni nu quichi quivi, ta quivi can quechaha nducu tuhun ra chi ra Jesuu ti yoo ra cuu ra cua xico tuhun chihin ra.

²¹Ndehe ra Pedro ti ra cahan tuhun can cuu ra vachi iti chata, ta cati ra chi ra Jesuu ti: ―¿Ñaan cha cua tahan racan, ta ra chahnu? ―cati ra.

²²Ta cati ndico ra Jesuu chi ra Pedro ti: ―Tu cua cuni yu cha cua ndoo ra nda cua nda quivi cua quichi ndico yu, ñavi cuenda maun cua cuu chi. Maun na cua savahun cuhva cuni yu ―cati ra.

²³Tacan cuu, ta quechaha saxini ndihi ñivi Ndioo ti ña cua cuvi racan, soco ña cati ra Jesuu ti ña cua cuvi ra. Cati ra ti tu cua cuni ra cha cua ndoo ra nda cua nda quivi cua quichi ndico tucu ra, ñavi cuenda ra Pedro cua cuu chi, cati ra.

²⁴Ta ra cuu amigu xaan chi ra Jesuu cuu ra ni cati tuhun ndihi tuhun ya, ta ni taa ra chi chi nu tutu ya, ta chito yo ti cha ndicha cuu tuhun cati tuhun ra.

²⁵Iyo cuaha xaan ca cha ni savaha ra Jesuu, soco yuhu saxini ti ña cua cundee yo taa yo ndihi tuhun cha ni savaha ra, vati cuaha xaan chi cuu chi. Na cua cuu chi tacan ni.