Read Pinyin Matyù 1 Bible Online

Matyù 1 - Pinyin bible

Matyù 1

¹Mɨ̀linə̀ mə nɨ pɨ ŋwàʼnə̀nə lə la mɨ̀linə̀ mɨ ngàŋə ngẅàrə̀ Yěsû Kristù nɨ à lə̀ furə̀nə amwuə ngẅàrə̀ ndâ Dàfirə̀ moonə̀ Abràhamə̀.

²Abràhamə̀ a pə tǎ pɨ Isàkə̀, Isàkə̀ a pə tǎ pɨ Yàkobə̀, Yàkobə̀ a pə tǎ pɨ Judà pobə pɨ̀momaa ɨ̀pe pɨ mbyàŋnə̀,

³Judà a pə tǎ pɨ Perèzə̀ pobə Zerà nɨ mǎ ɨghobə à lə̀ pənə Tamà, Perèzə̀ a tyiʼə̀ mbə tǎ pɨ Hezrònə̀, Hezrònə̀ a pə tǎ pɨ Ramə̀,

⁴Ramə̀ a pə tǎ pɨ Àminadàbə̀, Àminadàbə̀ a pə tǎ pɨ Nashònə̀, Nashònə̀ a pə tǎ pɨ Salmònə̀,

⁵Salmònə̀ a pə tǎ pɨ Boàzə̀, nɨ mǎ e à lə̀ pənə Rahàbə̀ la, Boàzə̀ a pə tǎ pɨ Obèdə̀ nɨ mǎ e à lə̀ pənə Rutə̀, Obèdə̀ a pə tǎ pɨ Jesè,

⁶Jesè a tyiʼə̀ mbə tǎ pɨ ɨ̀fò Dàfirə̀. Dàfirə̀ nɨ à lə̀ pənə tǎ pɨ Solomònə̀ ẅùə̀ nɨ mǎ e à lə̀ pənə ngẅùə Uryà la.

⁷Solomònə̀ a pə tǎ pɨ Rehobwàmə̀, Rehobwàmə̀ a pə tǎ pɨ Àbijà, Àbijà a pə tǎ pɨ Asà,

⁸Asà a pə tǎ pɨ Jehoshafàtə̀, Jehoshafàtə̀ a pə tǎ pɨ Jehoràmə̀, Jehoràmə̀ a pə tǎ pɨ Uzyà,

⁹Uzyà a pə tǎ pɨ Jotàmə̀, Jotàmə̀ a pə tǎ pɨ Ahàzə̀, Ahàzə̀ a pə tǎ pɨ Hezekyà,

¹⁰Hezekyà a pə tǎ pɨ Manasè, Manasè a pə tǎ pɨ Amònə̀, Amònə̀ a pə tǎ pɨ Josyà,

¹¹Josyà a pə tǎ pɨ Jekonyà, ẅùə̀ nɨ à lə̀ pyə̂nə a ghobə pɨ̀momaa ɨ̀pe nkwùə̀ nɨ pɨ lə̀ lòonə pɨ̀Jew ndèrə̀ a àlaʼà Babilònə̀ tsaʼa ɨ̀pùʼù ntsòo la.

¹²Tsaʼnə pɨ lə̀ pənə a àlaʼà Babilònə̀ la, Jekonyà à lə̀ pə tǎ pɨ Sheatyèlə̀, Sheatyèlə̀ a pə tǎ pɨ Zèrubabèlə̀,

¹³Zèrubabèlə̀ a pə tǎ pɨ Abẅùdə̀, Abẅùdə̀ a pə tǎ pɨ Èlyakìmə̀, Èlyakìmə̀ a pə tǎ pɨ Azòo,

¹⁴Azòo a pə tǎ pɨ Zadòkə̀, Zadòkə̀ a pə tǎ pɨ Achìmə̀, Achìmə̀ a pə tǎ pɨ Elyùdə̀,

¹⁵Elyùdə̀ a pə tǎ pɨ Eleazà, Eleazà a pə tǎ pɨ Matànə̀, Matànə̀ a pə tǎ pɨ Yàkobə̀,

¹⁶Yàkobə̀ a pə tǎ pɨ Jòsebə̀, nɨ à lə̀ pənə ndwuumə̀ Màriyà, Màriyà ẅùə̀ nɨ à lə̀ pyə̂nə a Yěsû ẅùə̀ nɨ pɨ pa nfuŋə̀ nɨ Kristù la.

¹⁷Lə lə̀ pə ɨ̀waanə̀ pɨ̀tǎ pɨ̀tǎ pɨ Yěsû ntsòbə̀ nɨ̀kwàa mbìʼnə̀ aŋunə Abràhamə̀ mbyàa aŋunə Dàfirə̀, mbə ɨ̀waanə̀ ntsòbə̀ nɨ̀kwàa nfurə̀ aŋunə Dàfirə̀ mbyàa nkwùə̀ nɨ pɨ lə̀ lòonə a ghobə tsaʼa ɨ̀pùʼù a àlaʼà Babilònə̀, nkɨ mbə ntsòbə̀ nɨ̀kwàa a nɨ furə̀ nkwùə̀ ɨ̀pùʼu mbyàa nkwùə̀ nɨ pɨ lə̀ pyə̂nə Kristù Ghù Ndzoʼnə wa.

¹⁸Tɨ̀tsòŋə̀, lə̌ ndwuumə̀ nɨ pɨ lə̀ làŋə̀nə mbyə̂ a Yěsû. Nkwùə̀ nɨ mǎ e Màriyà à lə̀ pirə̀nə mbə môngwàngòonə̀, pɨ lə̀ tsoʼò mɨ̀lùʼù mɨ àtwuə̀ ɨ̀me lo â pə ngẅùə Jòsebə̀. Nkwùə̀ ɨ̀ lə̀ kɨ kùʼù lo pobə̂ pwuutə̀ a nɨ̀zoʼò wə̀, Màriyà a sùŋə̀ a moonə̀ e amwuə Àzhwùə̀ Nẅùə̀.

¹⁹Ndwuumə̀ e Jòsebə̀ à lə̀ pə ŋònə̀ nɨ à pənə nɨ mbòomə ghù ɨ̀shìʼnə̀, ka kɨ kòŋə̀ e a nɨ chyâ ɨ̀siŋnə̀ àtwuə̀ Màriyà. À lə̀ pə nɨ àkwàŋə̀ a nɨ ghàbə̀ a nɨ̀zoʼò ghu àchyə̌chyə̂.

²⁰Tsaʼnə à lə̀ mənə nkwàŋə̀ a nɨ ghɨ̀rə̀ a lenə la, angèrə̀ Ndòʼnə̀mbyə̂ a tô ambo ze amwuə ndzə̀əmə̀ nshwəŋə̀ lo, “Jòsebə̀ moonə̀ ngẅàrə̀ Dàfirə̀, kò wə̀ pô a nɨ lòo Màriyà tsaʼa ngẅùə o, ntiinə moonə̀ wə̀ a nɨ̀pùmə̀ ze à chyə̂ la nɨ ɨ̀tɨ̀ŋnə̀ Àzhwùə̀ Nẅùə̀.

²¹À ghǎ pyə̂ a mômbyàŋnə̀ wə̀ chwùə̀ nɨ̀linə̀ ɨ̀tse nɨ Yěsû ntiinə à ghǎ chwarə̀ pə̀ənə̀ ɨ̀pe aŋunə tɨ̀pòŋə̀ ɨghobə.”

²²Ɨ̀nwùə̀ pə̀ ɨ̀tsùmə̀ lə̀ lòo alyiʼə a nɨ lẅenə̀ ànwùə̀ za nɨ Ndòʼnə̀mbyə̂ à lə̀ shwəŋə̀nə ndàŋə̀ a ndzùmə̀ ngàŋə̀ ntwuumə̀ Nẅùə̀ lo,

²³“Mômə̀ngyə̌ nɨ ka à zhyə̂ e a ŋònə̀ mbyàŋnə̀ à ghǎ sùŋə̀ kɨ pyə̂ a mômbyàŋnə̀, pɨ̀ fuŋə̀ e nɨ Immanuel” (nɨ ɨ̀sùmə ɨ̀ chyə̂nə mbə lo, “Nẅùə̀ à wə̀ pə̀ənə̀ pɨ pobə”).

²⁴Nkwùə̀ nɨ Jòsebə̀ à lə̀ zhwèmnə̀nə, à lə̀ ghɨ̀rə̀ tyìʼə̀ tsaʼnə angèrə̀ Ndòʼnə̀mbyə̂ wa à lə̀ tiitə̀nə, ndòo Màriyà tsaʼa ngẅùə e.

²⁵La ka à lə̀ lyə̂ e nɨ ze tə mbyàa nkwùə̀ nɨ à lə̀ pyə̂nə a mômbyàŋnə̀ wə̀. Jòsebə̀ a chwùə̀ e nɨ Yěsû.