Read Pinyin Matyù 10 Bible Online

Matyù 10 - Pinyin bible

Matyù 10

¹Yěsû à lə̀ fuŋə̀ ɨ̀zùŋə̀ ndzùmə̀ ɨ̀pe pa ntsòbə̀ ɨpaa ŋŋâ a ghobə nɨ mɨ̀tɨ̀ŋnə̀ lo pobə̂ kantə̀ ɨ̀zhwùə̀ tɨ̀pòŋə̀ nkɨ mbarə̀ mbuurə̀ ɨghoonə ɨ̀tsùmə̀.

²Lə̌ mɨ̀linə̀ mɨ ngàŋə ntwuumə̀ ɨ̀ze za ntsòbə̀ ɨpaa: ntsàambyə̀, Shimùnə̀ nɨ pɨ lə̀ mənə nfuŋə̀ e nɨ Pità nɨ ndyimə e Andrù; Jemə̀ moonə̀ Zebedì nɨ momaa e Jònə;

³Filibə̀ pobə Bartholomew; Thomas pobə Matyù ɨ̀nkẅiirə̀ pɨ̀taghə̀; Jemə̀ moonə̀ Àlfeyùsə̀, nɨ Tàdyusə̀;

⁴Shimùnə̀ ŋwùə̀ Kanàanə̀ pobə Yudà Iskaryòtə̀, ẅùə̀ nɨ à lə̀ shwùunə̀nə a Yěsû la.

⁵Yěsû à lə̀ tsàa pèrə pə ntsòbə̀ ɨpaa a àpyìinə nshwəŋə̀ ambo pobə lo, “Kò nɨ̀ lèrə̀ a wɨghə ambo pànə̀ nɨ ka pobə pə ghobə pɨ̀Jew kə̀ nkwuunə̀ amwuə mɨ̀mbòmpə mɨ ɨ̀laʼà mɨ Sàmariyà.

⁶Nɨ̀ lèrə̀ pə ambo pànə̀ pɨ Israel nɨ pobə pənə mbyə̂ ndzìrə̀ Nẅùə̀ za nɨ zèrə pînə la.

⁷Tsaʼnə nɨ̀ mənə ndèrə̀, nɨ̀ pìʼnə̀ a nɨ mə nchwìitə̀ ntwuumə̀ ambo pobə lo, ‘Ànwùə̀ Nɨ̀fò Nɨ̀pwuurə̀ a paatə̀.’

⁸Nɨ̂ parə̀ pɨghoonə, mbə̀ʼkə̀ pɨ̀kwuə̀, nsùu ngàŋə àkɨ̀kẅinə, nkɨ nfuukə̀ ɨ̀zhyə̂ amwuə mɨ̀pùmə̀ mɨ pə̀ənə̀. Nɨ̀ kẅiirə̀ tɨghu nɨ̀ zwuunə̀, nɨ̂ kɨ ŋŋâ tɨghu nɨ̀ kẅiirə̀ nkabə̀.

⁹Kò nɨ̀ lòo a wɨghə ɨ̀pwuumə̀ pɨ tsèntə̀nə nɨ pɨ pa nfuŋə̀ nɨ goldə̀ kə̀ silbà amwuə pɨ̀məpàamə̀ ɨ̀pɨghə.

¹⁰Kò nɨ̀ lòo a wɨghə àpàamə̀ aŋunə àkwùə̀ nɨ̀yìinə̀ ghu kə̀ ɨtsəʼə nɨ ɨtabə pɨ̀nyaanə, kə̀ mbàŋə̀; mbə̀ʼnə a kùʼnə̀ lo pɨ̀ ŋâ mɨ̀zɨghə̀ ambo ngàŋə̀ àfàʼà.

¹¹“Nkwùə̀ nɨ nɨ̀ pyàanə amwuə mbòmpə àlaʼà kə̀ amwuə àlaʼà, nɨ̀ naŋə̀ a ŋònə̀ nɨ à kẅiirə̀nə a wɨghə ɨ̀shìʼnə̀, nchyə̂ pɨghə pɨ pobə tə mbyàa nkwùə̀ nɨ nɨ̌ myàʼtə̀ alyiʼə ghu.

¹²Tsaʼnə nɨ̀ kwuunə̀nə amwuə ndâ, nɨ̀ ŋâ àchàʼtə̀.

¹³Ndâ ghu ɨ̀ kùʼnə̀, àporə̀porə̀ àzɨghə a ghoŋə̀ amwuə; nkɨ ka kùʼnə̀ e, àporə̀porə̀ àzɨghə a kẅirə̀ ntô ambo pɨghə.

¹⁴Pɨ tə mbəla ka kẅiirə̀ e a wɨghə kə̀ shwəŋnə̀ nɨ pɨghə, nɨ̀ kwùrə̀ àpùbə a mɨ̀kwùə̀ pɨghə nkwùə̀ nɨ nɨ̀ myàʼtə̀nə ndâ ghu kə̀ mbòmpə àlaʼà ghù.

¹⁵Ǹshwəŋə̀ tyìʼə̀ nkǔŋə nkuŋə ambo pɨghə lo, Nẅùə̀ à ghǎ koorə̀ mɨ̀lɨŋə̀ mɨ pànə̀ pɨ àlaʼà Sodòmə̀ pobə Gomorrah njyə̂ ntsoʼtə̀ mɨ̀sàʼa tsàarə̀ pànə̀ pɨ mbòmpə àlaʼà ghu.

¹⁶Ngwə̀ ntsàa a wɨghə a àpyìinə lə tsaʼa mɨ̀mbyə̂ a tɨ̀tɨ̀rə̀ pəfuunə. Nɨ̀ zhìʼtə̀ tsaʼa mɨ̀nyoorə̀, nkɨ mbonə̀ tsaʼa ɨ̀lwuʼə̀.

¹⁷“Nɨ̀ zhìʼtə̀ a wɨghə; pɨ̌ kô a wɨghə ŋŋâ ambo ngàŋə saʼà mɨ̀sàʼa pobə̂ kəʼə̀ a wɨghə amwuə mɨ̀ndâ mɨ àshwatə̀ ɨ̀mobə.

¹⁸Pɨ̌ sùŋə̀ a wɨghə tô a mbyə̀ ɨ̀twuə̀ àlaʼà pobə pɨ̀fò ntii nɨ̀linə̀ ɨ̀tsâ, lo nɨ̀ shwəŋə̀ ntwuumə̀ ghù ɨ̀shìʼnə̀ wa ambo pobə farə ambo pànə̀ nɨ ka pobə pə ghobə pɨ̀Jew.

¹⁹La nkwùə̀ nɨ pobə kônə a wɨghə, kò nɨ̀ kwàŋə̀ ndwuumə̀ nɨ nɨ̌ shwəŋə̀ kə̀ ànwùə̀ nɨ nɨ̌ shwəŋə̀. Nkwùə̀ ɨ̌ tô kùʼù pɨ̀ ŋâ a wɨghə nɨ ànwùə̀ nɨ nɨ̌ shwəŋə̀.

²⁰Mbə̀ʼnə ka la pə shwəŋnə̀ e pɨghə, la ghǎ shwəŋnə̀ Àzhwùə̀ Tǎ ɨwɨghə làŋə̀ a ndzùmə̀ pɨghə.

²¹“Pànə̀ ghǎ mə ŋâ pɨlyimə ɨ̀pobə lo pɨ̀ zhwuutə̀, pɨ̀tǎ kɨ mmə ŋŋâ ɨ̀poonə̀ ɨ̀pobə lo pɨ̀ zhwuutə̀; ɨ̀poonə̀ ghǎ pə̀ŋə̀ zòŋnə̀ pɨ̀tǎ ghobə pɨ̀mǎ zhwuutə̀ a ghobə.

²²Ŋwùə̀ ntsùmə̀ à ghǎ pàanə̀ a wɨghə mbə̀ʼə nɨ̀linə̀ ɨ̀tsâ. La ŋònə̀ nɨ à təəmə̀nə ntɨ̀ŋnə̀ ngə̀ ndẅùunə̀ la à ghǎ chwarə̀.

²³Lenəla, pɨ mə nnyàŋə̀ a wɨghə amwuə zə mbòmpə àlaʼà, nɨ̀ kɨ̀ɨrə̀ ndèrə̀ amwuə yɨ̀ nyàanə. Ǹshwəŋə̀ tyìʼə̀ nkǔŋə nkuŋə ambo pɨghə lo, ka nɨ̀ pə myàanə̀ a wɨghə àfàʼà àzɨghə amwuə mɨ̀mbòmpə mɨ ɨ̀laʼà mɨ Israel zaʼà Moonə̀ Ŋwùə̀ â pòŋə̀ tô.

²⁴“Ka mɨnkɨ̂ àŋwàʼnə̀ â tsàarə̀ e a ɨ̀nèrə̀; ka ngàŋə̀ àfàʼà a kɨ ntsàarə̀ e a masàa e.

²⁵A kùʼnə̀ ambo mɨnkɨ̂ àŋwàʼnə̀ a nɨ pə tsaʼa ɨ̀nèrə̀ e, ngàŋə̀ àfàʼà â kɨ mbə tsaʼa masàa e. Pɨ tə pəla nfuŋə̀ àtwuə̀ ngẅàrə̀ nɨ ɨ̀fò pɨ ɨ̀zhyə̂, yi pɨ̌ fuŋə̀ pànə̀ pɨ ngẅàrə̀ ghu nɨ mɨ̀linə̀ nɨ mɨ pɨ̂nə ntsàarə̀!

²⁶“Kò nɨ̀ pô a wɨghə pə̀ənə̀. Ka àzwuumə̀ àtse â pə e ghu nɨ pɨ lə̀əmə̀nə nɨ ka pɨ̀ pə ghǎ zhyə̂ e.

²⁷Ànwùə̀ nɨ ngwə̀ nshwəŋə̀ a wɨghə amwuə ndzùmə, nɨ̂ shwəŋə̀ a zèrə amwuə njyə̂; zhyə̀ nɨ pɨ chùmpə̀nə ambo pɨghə, nɨ̀ təəmə̀ a mɨ̀kẅùə̀ mɨ ndâ nshwəŋə̀.

²⁸Kò nɨ̀ pô a wɨghə pànə̀ nɨ mbə̀ʼə pobə zhwuutə̀ mbɨ̀ŋmə̀, la ka pə zhwuutə̀ a ghobə ntɨŋmə̀. Nɨ̀ pô pə a Nẅùə̀ nɨ mbə̀ʼə a màʼà mbɨ̀ŋmə̀ pobə ntɨŋmə̀ amwuə àkɨɨnə̀ ɨ̀mǔ.

²⁹Yi pɨ pa ndzwuunə̀ pɨ̀zɨghə̀ àkòʼò pɨpaa la nɨ taʼà kapà, la mbə̀ʼə taʼà a kunə̀ e a ɨ̀shyə̂ tɨghu Tǎ ɨwɨghə à zhyə̂ apə̀.

³⁰La ngə̀ aŋunə pɨghə, pɨ shaŋə̀ mə mɨ̀nyùŋə̀ mɨ àtwuə̀ ɨ̀mɨghə.

³¹Lenəla, kò nɨ̀ pô; nɨ̀ tsàarə̀ pɨ̀zɨghə̀ àkòʼò pɨ̀noʼnə.

³²“Ŋònə̀ nɨ à nèrə̀nə a sàŋə̀ lo à zhyə̂ mə̀, ngǎ kɨ pyiimə̀ e a sàŋə̀ a mbyə̀ Tǎ ɨwəə a nɨ̀pwuurə̀.

³³La ŋònə̀ nɨ à twuunə̀nə mə̀ a sàŋə̀, ngǎ kɨ twuunə̀ e a mbyə̀ Tǎ ɨwəə a nɨ̀pwuurə̀.

³⁴“Kò nɨ̀ kwàŋə̀ lo ǹtô la nɨ àporə̀porə̀ amwuə àtwuə̀ ɨ̀shyə̂. Ngaŋə! Ǹtô la lo ghɨ̀rə̀ pànə̀ tə ndzòŋnə̀ nɨ mɨnẅuə ntsòo.

³⁵Ǹtô la a nɨ ghɨ̀rə̀ lo mômbyàŋnə̀ â zòŋnə̀ a tǎ ɨghobə, mômə̀ngyə̌ â zòŋnə̀ a mǎ e, pə̀ngyə̌ zòŋnə̀ pɨ̀mǎ pɨ ndâ ɨ̀pobə;

³⁶ngotə ngàŋə kɨpaanə ŋwùə̀ ghǎ tyiʼə̀ pə ngàŋə ngẅàrə̀ ɨ̀ze.

³⁷“Ŋònə̀ nɨ à kòŋə̀nə a tǎ ɨghobə kə̀ a mǎ e ntsàarə̀ mə̀ ka à kùʼnə̀ e a nɨ pə àzùŋə̀ ndzùmə̀ mə̀; ŋònə̀ nɨ à kòŋə̀nə a moonə̀ e ghu mbyàŋnə̀ kə̀ a ghu mə̀ngyə̌ ntsàarə̀ mə̀ ka kùʼnə̀ e a nɨ pə àzùŋə̀ ndzùmə̀ mə̀.

³⁸Ŋònə̀ nɨ ka à pìʼì e àtɨ̀ghə pànkə̀nə e ndzùŋə̀ mə̀, ka à kùʼnə̀ e a nɨ pə àzùŋə̀ ndzùmə̀ mə̀.

³⁹Ŋònə̀ nɨ à wa ntàʼà pə a nɨ̀chyə̂mbyə̂ e, ǎ pî a ẅèrə; ŋònə̀ nɨ à pînə a nɨ̀chyə̂mbyə̂ ntii mə̀, à ghǎ zəənə̀ a ẅèrə.

⁴⁰“Ŋònə̀ nɨ à kẅiirə̀nə a wɨghə, à kẅiirə̀ la a gha; ŋònə̀ nɨ à kẅiirə̀nə mə̀ à kẅiirə̀ la ŋònə̀ nɨ à tsàanə mə̀.

⁴¹Ŋònə̀ nɨ à kẅiirə̀nə a ngàŋə̀ ntwuumə̀ Nẅùə̀ ntiinə à pənə ngàŋə̀ ntwuumə̀ Nẅùə̀ à ghǎ kẅiirə̀ mɨntyaŋnə mɨ ngàŋə̀ ntwuumə̀ Nẅùə̀; ŋònə̀ nɨ à kẅiirə̀nə a ŋònə̀ ɨ̀shìʼnə̀ ntiinə à pənə ŋònə̀ ɨ̀shìʼnə̀, à ghǎ kẅiirə̀ mɨntyaŋnə mɨ ŋònə̀ ɨ̀shìʼnə̀.

⁴²Lenəla, ŋònə̀ nɨ à wa ŋŋâ ndoŋə̀ nchyə yɨ̀ fiitə̀nə ambo taʼà mɨlyiʼə mɨnkɨ̂ wə̀ yɨ̀tse ntiinə à pənə àzùŋə̀ ndzùmə̀ mə̀, ǹshwəŋə̀ a wɨghə nɨ nkǔŋə nkuŋə lo, ka à pə ghǎ pî e mɨntyaŋnə ɨ̀me.”