Read Pinyin Matyù 12 Bible Online

Matyù 12 - Pinyin bible

Matyù 12

¹Tyìʼə̀ nkwùə̀ ghu, Yěsû pobə ɨ̀zùŋə̀ ndzùmə̀ ɨ̀pe lə̀ pə ndàŋə̀ amwuə ɨ̀swùumə nkẅùə̀ amwuə njyə̂ àlaʼà pɨ̀Jew. Njyə̀ ɨ̀ lə̀ pə ndzaŋə̀ ɨ̀zùŋə̀ ndzùmə̀ ɨ̀pe pa, lenəla pobə pìʼnə̀ a nɨ fàatə̀ nkẅùə̀ za yɨ̀tse nkwurə̀.

²Pobə lə̀ pə ngɨ̀rə̀ la pɨ̀Farìsî zəənə̀ a ghobə, nshwəŋə̀ ambo Yěsû lo, “Naŋə̀, ɨ̀zùŋə̀ ndzùmə̀ ɨ̀pô pə ngɨ̀rə̀ ànwùə̀ nɨ ka a kùʼnə̀ e a nɨ ghɨ̀rə̀ aŋunə njyə̂ àlaʼà pɨ̀Jew!”

³Yěsû a shwəŋə̀ ambo pobə lo, “Ka nɨ̀ lə̀ fuŋə̀ a wɨghə a ànwùə̀ nɨ Dàfirə̀ à lə̀ ghɨ̀rə̀nə la amwuə nkwùə̀ nɨ njyə̀ ɨ̀ lə̀ mənə ndzaŋə̀ e pobə pɨ pànə̀ nɨ pobə pɨ pobə lə̀ pənə la?

⁴Ka nɨ̀ zhyə̂ a wɨghə tsaʼnə à lə̀ kwuunə̀nə a ndâ Nẅùə̀ pobə pɨ pə̀ənə̀ ɨ̀pe pa, nkwurə̀ àpaanə̀ nɨ pɨ lə̀ nùŋə̀nə ambo Nẅùə̀, zhyə̀ nɨ mbòomə à lə̀ nèrə̀nə lo mbə̀ʼə pobə kwurə̀ a ghobə apə̀; ntiinə àpaanə̀ zèrə̀ zə̀ à lə̀ mə nkwurə̀ e ngàŋə̀ màʼà Nẅùə̀.

⁵Kə̀ ka nɨ̀ fuŋə̀ a wɨghə amwuə àŋwàʼnə̀ mbòomə Mǔsî lo ngàŋə màʼà Nẅùə̀ amwuə Ndâ Mɨ̀shwàʼà Nẅùə̀ za ngwɨ̀ghə̀ a mbòomə aŋunə njyə̂ àlaʼà pɨ̀Jew la ka pɨ̀ lòo e lo pobə wɨ̀ghə̀ ànwùə̀ àtse?

⁶La ǹshwəŋə̀ a wɨghə lo àzwuumə̀ àtse a zə a nɨ̀ghə̂ nɨ a tsàarə̀nə Ndâ Mɨ̀shwàʼà Nẅùə̀.

⁷Nɨ̀ lə̀ pəla nzhyə̂ a zèrə zə ànwùə̀ lo, ‘Ǹkòŋə̀ la lo pànə̀ koorə̀ mɨ̀lɨŋə̀ ntsàarə̀ a nɨ tòonə̀ ɨ̀pwuumə̀ nchàʼtə Nẅùə̀,’ yi ka nɨ chyâ a wɨghə ɨ̀sàʼa aŋunə pànə̀ nɨ ka pobə wɨ̀ghə̀ a ghobə ànwùə̀.

⁸Moonə̀ Ŋwùə̀ la Ndòʼnə̀mbyə̂ nɨ à wa nsaʼà njyə̂ àlaʼà pɨ̀Jew.”

⁹Yěsû a tyiʼə̀ nfurə̀ ngə̀ nkwuunə̀ a ndâ àshwatə̀ pobə,

¹⁰ŋònə̀ ɨ̀tse nɨ taʼà àpô e à lə̀ kwɨghə̀nə a pə ghu. Pɨ tyiʼə̀ mbyiitə̀ a Yěsû lo, “Mbòomə à nèrə̀ lo mbə̀ʼə pɨ parə̀ a ŋwùə̀ aŋunə njyə̂ àlaʼà?” Pɨ lə̀ pyiitə̀ la a nɨ kwàʼnə̀ e mbə̀ʼə làŋə̀ aŋunə chyâ ɨ̀sàʼa aŋunə ze.

¹¹Yěsû a kẅùə̀ lo, ŋwùə̀ wɨghə à tə mbə nɨ mbyə̂ e, zèrə kunə̀ amwuə nɨ̀ntaamə̀ aŋunə njyə̂ àlaʼà, a ka sùŋə̀ e a zèrə fuukə̀?

¹²Ka ŋwùə̀ a tsàarə̀ e mbyə̂? Tsaʼnə a pənə lə la, mbòomə à nèrə̀ lo, pə̀ənə̀ tə ngɨ̀rə̀ ɨ̀pòŋə̀ aŋunə njyə̂ àlaʼà.

¹³A tyiʼə̀ nshwəŋə̀ ambo ŋònə̀ wa nɨ àpô e a lə̀ kwɨghə̀nə la lo, shwùumə̀ àpô o za. Ŋònə̀ wa à lə̀ shwùumə̀ àpô e za a tyiʼə̀ ntɨ̀ŋnə̀ tsaʼa zhyə̀.

¹⁴Pɨ̀Farìsî lə̀ furə̀ ndèrə̀, ntyiʼə̀ ndaamə̀ a mɨnaŋə tsaʼnə pobə zhwuutə̀ e.

¹⁵Yěsû à lə̀ zuʼù lo pɨ pə ndaamə̀ a mɨnaŋə àtwuə̀ e, ndzùŋə̀ ndòo e a alyiʼə ghu ndèrə̀ e. Ɨ̀nòonə̀ pànə̀ pɨ̀noʼnə lə̀ zùŋə̀ e. A parə̀ pànə̀ pɨ̀tsùmə̀ nɨ pobə lə̀ pənə ngòonə̀,

¹⁶A kwàtə̀ a ghobə lo kò pobə ghɨ̀rə̀ pɨ zhyə̂.

¹⁷À lə̀ ghɨ̀rə̀ a zèrə̀ zə ànwùə̀ la a nɨ lẅenə̀ ànwùə̀ nɨ ngàŋə̀ ntwuumə̀ Nẅùə̀ Ìsayà à lə̀ shwəŋə̀nə lo,

¹⁸“Nɨ̀ zəənə̀! Lə̌ ngàŋə̀ àfàʼà mə̀ nɨ ǹtsoʼnə, ẅùə̀ nɨ ǹkòŋə̀nə, nɨ ntɨŋmə̀ mə̀ nkɨ mbə nɨ nɨ̀ghaʼà aŋunə ze. Mbɨ chyâ Àzhwùə̀ mə̀ aŋunə ze mbə̀ʼə â chwìitə̀ ànwùə̀ Nẅùə̀ za nɨ à tônə nɨ zèrə̀ â təəmə̀ ambo pànə̀ nɨ ka pobə pə ghobə pɨ̀Jew.

¹⁹Ka à pə ghǎ zòŋnə̀ e pobə pɨ pə̀ənə̀, kə̀ shwəŋnə̀ nɨ ɨ̀tɨ̀ŋnə̀, kə̀ ŋònə̀ ɨ̀tse â zuʼù ngyə̀ e a àlàŋə ndwuumə̀.

²⁰Ka à pə ghǎ pəʼə̀ e àkɨ̀kàʼà nɨ a zə̀ŋnə̀nə, kə̀ kɨ pyaatə̀ e a làamə̀ nɨ à tyiʼnə mmə mbyaatə̀ e apə̀, mbyàa nkwùə̀ nɨ ànwùə̀ nɨ a təəmə̀nə a ghǎ furə̀ laanə̀;

²¹pànə̀ pɨ̀tsùmə̀ nɨ ka pobə pə ghobə pɨ̀Jew ghǎ tyiʼə̀ tə̂ àtwuə̀ a nɨ pyabə̀ e.”

²²Pànə̀ pɨ̀tse lə̀ tô nɨ ŋwùə̀ nɨ ɨ̀zhyə̂ lə̀ ghɨ̀rə̀nə a fə̀, ka kɨ mə shwəŋnə̀ e ambo Yěsû lo â parə̀ e. À lə̀ parə̀ e, a tyiʼə̀ nshwəŋnə̀ nkɨ mmə ndzəənə̀ ɨlyiʼə.

²³Pànə̀ pɨ̀tsùmə̀ lə̀ yerə̀ ànwùə̀ nɨ à lə̀ ghɨ̀rə̀nə, ntyiʼə̀ mbyiitə̀ lo, “Lə̌ tyìʼə̀ moonə̀ Dàfirə̀ wa?”

²⁴Nkwùə̀ nɨ pɨ̀Farìsî lə̀ zuʼnə a zèrə̀ zə ànwùə̀, pobə lə̀ kẅùə̀ lo, “Ŋònə̀ wə̀ à wa nfuukə̀ ɨ̀zhyə̂ la nɨ ɨ̀tɨ̀ŋnə̀ Beelzebùbə̀ ɨ̀fò ɨ̀zhyə̂ wa.”

²⁵Yěsû à lə̀ zhyə̂ ànwùə̀ nɨ pobə lə̀ mənə nkwàŋə̀ la, ntyiʼə̀ nshwəŋə̀ ambo pobə lo, “Àlaʼà za zhyə̀ nɨ a za ngàpə̀ ntyiʼə̀ ndzòŋnə̀ pobə nɨ pobə la, ka à pə ghǎ lyàrə̀ e a nɨ pɨ̂, mbòmpə àlaʼà kə̀ ngẅàrə̀ za zhyə̀ nɨ ɨ̀ za ngàpə̀ ntyiʼə̀ ndzòŋnə̀ pobə nɨ pobə la, ɨ̀ ghǎ sìimə̀.

²⁶A tə mbə amwuə ànwùə̀ nɨ̀fò Satàanə̀ lo Satàanə̀ â chi ndzòŋnə̀ a ẅùə̀, nɨ̀fò ɨ̀tse ghàbə̀ ɨ̀pàa ɨpaa; ànwùə̀ nɨ̀fò ghu a tyiʼə̀ ntəəmə̀ lə ɨla?

²⁷A tə mbə zhyə̀ nɨ ǹfuukə̀nə ɨ̀zhyə̂ nɨ ɨ̀tɨ̀ŋnə̀ Beelzebùbə̀, ɨ̀zùŋə̀ ndzùmə̀ ɨ̀pɨghə tyiʼə̀ nfuukə̀ la nɨ ɨ̀tɨ̀ŋnə̀ ɨ̀wə̌? Nɨ ndwuumə̀ wə̀ ɨ̀nwùə̀ nɨ ɨ̀zùŋə̀ ndzùmə̀ ɨ̀pɨghə pa ngɨ̀rə̀ pa nnèrə̀ lo ka nɨ̀ kùʼnə̀ a wɨghə aŋunə mɨ̀nwùə̀ nɨ nɨ̀ wə̀ nshwəŋə̀.

²⁸Ǹtə mmə nfuukə̀ ɨ̀zhyə̂ la nɨ ɨ̀tɨ̀ŋnə̀ Nẅùə̀, yi a nèrə̀ lo ànwùə̀ Nɨ̀fò Nẅùə̀ a tô mə ntyiʼə̀ a tɨ̀tɨ̀rə̀ pɨghə.

²⁹“Mbə̀ʼə ŋwùə̀ a tô mbə a ndâ ngàŋə̀ mɨ̀tɨ̀ŋnə̀ tɨ pyə̀ nkô e nkorə̀ lə ɨla? À tə nkô e nkorə̀ a pòŋə̀ pəʼə̀ ndâ e.

³⁰“Ŋònə̀ nɨ ka à pə e pəə ze a ngàŋə̀ kɨpaanə mə̀. Ŋònə̀ nɨ ka à shwatə̀ e ɨ̀pâ ɨ̀pwuumə̀ à wa nshàʼtə̀ shàʼtə̀nə.

³¹Ǹshwəŋə̀ a wɨghə lo pɨ ghǎ lə̀ənə̀ a tɨ̀pòŋə̀ ntsùmə̀ pobə ndzòomə̀ za ntsùmə̀ nɨ pɨ zòomə̀nə a Nẅùə̀ ghu, la ka pɨ pə ghǎ lə̀ənə̀ e ndzòomə̀ za nɨ pɨ zòomə̀nə a Àzhwùə̀ Nẅùə̀ ghu la.

³²Pɨ ghǎ lə̀ənə̀ a tɨ̀pòŋə̀ ŋònə̀ wa nɨ à shwəŋə̀nə a tɨ̀pòŋə̀ àtwuə̀ Moonə̀ Ŋwùə̀, la ka pɨ pə ghǎ lə̀ənə̀ e a tɨ̀pòŋə̀ ŋònə̀ nɨ à shwəŋə̀nə ànwùə̀ àtwuə̀ Àzhwùə̀ Nẅùə̀ àtwuə̀ ɨ̀shyə̂ ghə kə̀ amwuə zhyə̀ àtwuə̀ ɨ̀shyə̂ nɨ a ghǎ tô.

³³“Nɨ̀ ghɨ̀rə̀ àtɨ̀ghə â pòŋə̀ njiilo mɨ̀ntàamə ɨ̀me kɨ mbòŋə̀, ngɨ̀rə̀ àtɨ̀ghə a pɨ̂ mɨ̀ntàamə ɨ̀me kɨ mbɨ̂. Ntiinə pɨ pa nzhyə̂ àtɨ̀ghə la mbə̀ʼə mɨ̀ntàamə nɨ a za ndzumə̀.

³⁴Pɨghə ɨ̀poonə̀ pɨ ɨ̀nyoorə̀, mbə̀ʼə nɨ̀ pyə̀ nshwəŋə̀ ànwùə̀ ɨ̀shìʼnə̀ lə ɨla, tsaʼnə nɨ̀ pənə a wɨghə pànə̀ pɨ tɨ̀pòŋə̀ lə? Ŋwùə̀ à wa nshwəŋə̀ la ànwùə̀ nɨ a pənə amwuə ntɨŋmə̀ ze.

³⁵Ŋònə̀ ɨ̀shìʼnə̀ à wa nfuukə̀ la mɨ̀nwùə̀ mɨ̀shìʼnə̀ nɨ mèrə furə̀nə amwuə ntɨŋmə̀ ghù ɨ̀shìʼnə̀; ŋònə̀ tɨ̀pòŋə̀ a kɨ mə nfuukə̀ la ɨ̀nwùə̀ tɨ̀pòŋə̀ amwuə ntɨŋmə̀ tɨ̀pòŋə̀.

³⁶“Ǹshwəŋə̀ ambo pɨghə lo, a ghǎ pə njyə̂ ntsoʼtə̀ mɨ̀sàʼa, ŋwùə̀ ntsùmə̀ a shwəŋə̀ ànwùə̀ mbə̀ʼə mɨ̀nwùə̀ mɨ àfǐfǐ nɨ à lə̀ shwəŋə̀ mə.

³⁷La ghǎ ghɨ̀rə̀ ɨ̀shwəŋnə̀ ɨ̀pɨghə ghɨ̀rə̀ Nẅùə̀ â pyiimə̀ lo nɨ̀ zɨghə̀ ɨ̀sàʼa kə̀ ngwɨ̀ghə̀ ɨ̀sàʼa.”

³⁸Pɨ̀Farìsî pobə pɨ̀nèrə̀ mbòomə pɨ̀tse lə̀ tyiʼə̀ nshwəŋə̀ ambo Yěsû lo, “Pəə tàʼà la lo wə̀ nèrə̀ a wəə nɨ àlènə̀ ànwùə̀ yerə̀nə yerə̀nə pəə zəənə̀.”

³⁹Yěsû a kẅùə̀ ambo pobə lo, “A tyìʼə̀ ɨ̀waanə̀ pànə̀ pɨ tɨ̀tsòŋə̀ pa nɨ pobə pa ngɨ̀rə̀ a tɨ̀pòŋə̀ nkɨ ngwaʼà a Nẅùə̀ nɨ pobə pa ntàʼà àlènə̀ ànwùə̀ yerə̀nə yerə̀nə, la ka mbə nèrə̀ mə̀ a wɨghə nɨ àlènə̀ ànwùə̀ yerə̀nə yerə̀nə yè nyaanə ndàŋə̀ a yè ngàŋə̀ ntwuumə̀ Nẅùə̀ Jonà.

⁴⁰Tsaʼnə Jonà à lə̀ chyə̂nə njyə̂ ɨtarə nɨ mɨ̀twuʼə̀ mɨntarə amwuə nɨ̀pùmə̀ nɨ ɨ̀swuə̀ ngẅùunə za la, a tsaʼnə Moonə̀ Ŋwùə̀ à ghǎ kɨ chyə̂ amwuə nɨ̀pùmə̀ nɨ ɨ̀shyə̂ aŋunə njyə̂ ɨtarə pobə mɨ̀twuʼə̀ mɨntarə.

⁴¹A ghǎ pə njyə̂ tsoʼtə̀ mɨ̀sàʼa, pànə̀ pɨ Ninivè lòo a ɨ̀shyə̂ nchyâ ɨ̀sàʼa aŋunə pɨghə ɨ̀waanə̀ tɨ̀tsòŋə̀, ntiinə pobə lə̀ zuʼnə ànwùə̀ nɨ Jonà à lə̀ shwəŋə̀nə ambo pobə mbə̀ŋə̀ mɨ̀ntɨŋmə̀ ɨ̀mobə ngwaʼà a tɨ̀pòŋə̀ ghobə. La tɨ̀tsòŋə̀, ŋònə̀ ɨ̀tse à wə̀ a nɨ̀ghə̂ nɨ à tsàarə̀nə a Jonà.

⁴²A ghǎ pə njyə̂ ntsoʼtə̀ mɨ̀sàʼa, ɨ̀fò mə̀ngyə̌ nɨ à furə̀nə a àlaʼà Shebà â lòo a ɨ̀shyə̂ pobə pɨ ɨ̀waanə̀ pànə̀ pə̀ chyâ ɨ̀sàʼa aŋunə pobə; ntiinə à lə̀ furə̀ la àlaʼà ze ntô a nɨ zuʼù ànwùə̀ mbə̀ʼə àzhìʼtə̀ ɨ̀fò Solomònə̀, la tɨ̀tsòŋə̀ ŋònə̀ ɨ̀tse à wə̀ a nɨ̀ghə̂ nɨ à tsàarə̀nə a ɨ̀fò Solomònə̀.

⁴³“Nkwùə̀ nɨ àzhwùə̀ tɨ̀pòŋə̀ a furə̀nə amwuə ŋwùə̀, a za nkarə̀ ngyìinə̀ amwuə ɨlyiʼə pɨ zopə̀ a nɨ tàʼà alyiʼə nɨ mbə̀ʼə a zhwùutə̀. A tə mbəla ka zəənə̀ e,

⁴⁴a tyiʼə̀ nshwəŋə̀ ze nɨ ze lo, ‘Mbɨ kẅirə̀ kwə̂ amwuə ndâ za nɨ ǹtənə nfurə̀ amwuə la.’ Lenəla a kẅirə̀ nkwə̂ ndzəənə̀ ndâ za ɨ̀ təəmə̀ a lenə, pɨ zə̀ə a zèrə ntsùnkə̀.

⁴⁵A zəənə̀ a lenə, a kẅirə̀ ndèrə̀ ngə̀ ndòo pɨ̀tse ɨ̀zhyə̂ sàmbaa pyə̀ nɨ pèrə pɨ̂nə ntsàarə̀ e, pobə pɨ pobə tô nkwuunə̀ amwuə ndâ za. A pə la ngɨ̀rə̀ a lenə aŋunə ŋònə̀ ghu, a tyiʼə̀ mbɨ̂ ntsàarə̀ tsaʼnə a lə̀ pyə̀nə mbə. Lə̌ tsaʼnə ǎ pə aŋunə ɨ̀waanə̀ pànə̀ pɨ tɨ̀pòŋə̀ pɨ tɨ̀tsòŋə̀.”

⁴⁶Nkwùə̀ nɨ Yěsû à lə̀ pirə̀nə mmə nshwəŋnə̀ ambo pànə̀ pa, mǎ e pobə pɨ̀momaa ɨ̀pe tô ntəəmə̀ a àpyìinə, mmə ntàʼà àlàŋə lo â tô pobə pɨ pobə shwəŋnə̀.

⁴⁷Ŋònə̀ wa ghùtse a shwəŋə̀ ambo ze lo, “Mǎ o pobə pɨ̀momaa ɨ̀pô pə àpyìinə mmə ntàʼà àlàŋə lo pɨghə pɨ pobə shwəŋnə̀.”

⁴⁸A kẅùə̀ ambo ze lo, “Mǎ mə̀ la ɨ̀wə̌? Pɨ̀momaa ɨ̀pâ pə pɨ̀wə̌?”

⁴⁹Lenəla Yěsû a shwùumə̀ àpô e nnèrə̀ ɨ̀zùŋə̀ ndzùmə̀ ɨ̀pe, nshwəŋə̀ lo, “Lə̌ ngotə mǎ mə̀ pobə pɨ̀momaa ɨ̀pâ.

⁵⁰Ŋwùə̀ ntsùmə̀ nɨ à ghɨ̀rə̀nə ànwùə̀ nɨ Tǎ ɨwəə a nɨ̀pwuurə̀ à tàʼnə la momaa mə̀ ghu mbyàŋnə̀ pobə ghu mə̀ngyə̌ nɨ mǎ mə̀.”