Read Pinyin Matyù 14 Bible Online

Matyù 14 - Pinyin bible

Matyù 14

¹A lə̀ pə nkwùə̀ ghu, Heròdə̀ nɨ à lə̀ pənə ɨ̀fò Galìlyə̂ a zuʼù ànwùə̀ mbə̀ʼə nɨ̀linə̀ nɨ Yěsû,

²ntyiʼə̀ nshwəŋə̀ ambo pɨ̀ntsɨ̀ pɨ ntoʼò pɨ ɨ̀fò lo, “A tyìʼə̀ Jònə ngàŋə̀ àŋâ àkẅiirə̀ nchyə nɨ à zhwuumə̀nə a nɨ̀wɨghə̀. La ɨ̀sùmə nɨ mɨ̀tɨ̀ŋnə̀ mə nfàʼà amwuə ze la.”

³Ntiinə a lə̀ kɨnə pə nkwùə̀ ghu la nɨ Heròdə̀ à kô mə a Jònə nkorə̀ e nchyâ a ndâ ɨ̀tsaŋə̀ ntii Hèrodyàsə̀ ngẅùə momaa e Filibə̀.

⁴Ntiinə Jònə à lə̀ ghə̀nə ambo ze nshwəŋə̀ lo, “Mbòomə ɨ̀wə̀ənə̀ à nèrə̀ lo ka a kùʼnə̀ e ambo ghò a nɨ zoʼò a mə̀ngyə̌ wə̀.”

⁵À lə̀ patə mmə ntàʼà zhwuutə̀ pə a Jònə la, mmə mbô ɨ̀myə̂ mɨ pə̀ənə̀ ntiinə pobə lə̀ pyiimə̀nə lo Jònə a ngàŋə̀ ntwuumə̀ Nẅùə̀.

⁶La nkwùə̀ nɨ njyə̂ nɨ pɨ lə̀ pyə̂nə a Heròdə̀ ɨ̀ lə̀ kùʼnə, moonə̀ Hèrodyàsə̀ ghu mə̀ngyə̌ à lə̀ tô mbinə̀ àpinə̀ a mbyə̀ pànə̀ nɨ pɨ lə̀ fuŋə̀nə la, ntyiʼə̀ ngɨ̀rə̀ ntɨŋmə̀ Heròdə̀ ɨ pə nɨ nɨ̀ghaʼà.

⁷A Tyiʼə̀ nkaʼà lo, “Mbɨ ŋâ e nɨ àzwuumə̀ àtsùmə̀ nɨ à pyiitə̀nə!”

⁸Mǎ e a tinə̀ e nshwəŋə̀ lo â shwəŋə̀ ambo Heròdə̀ lo, “Ŋâ àtwuə̀ Jònə ngàŋə̀ àŋâ àkẅiirə̀ nchyə ambo mɨ̀ŋə̀ amwuə àpàpə̀ àkaŋə̀.”

⁹Mbɨ̀ŋmə̀ ɨ̀fò ɨ̀ lə̀ kwɨghə̀ mbə̀ʼə ànwùə̀ ghu, la tsaʼnə à lə̀ kàʼnə a mbyə̀ pànə̀ la, a shwəŋə̀ lo pɨ ghɨ̀rə̀ a lenə.

¹⁰À lə̀ twuumə̀ pànə̀ pɨ ghə̀ ndə̂ àtwuə̀ Jònə a ndâ ɨ̀tsaŋə̀,

¹¹ndòo àtwuə̀ ghu ŋŋâ ambo mômə̀ngyə̌ wa a ghə̀ ŋŋâ ambo mǎ e.

¹²Ɨ̀zùŋə̀ ndzùmə̀ Jònə lə̀ zuʼù, ngə̀ ndòo àkwuə̀ e ntẅəŋə̀, ntyiʼə̀ ngə̀ ntiitə̀ a Yěsû.

¹³Nkwùə̀ nɨ Yěsû à lə̀ zuʼnə ànwùə̀ zèrə zə mbə̀ʼə Jònə la, à lə̀ myàʼtə̀ alyiʼə ghu nkwuunə̀ amwuə àkànwuʼə ndèrə̀ e amwuə yètse alyiʼə nɨ ka pànə̀ lə̀ pə e ghu mbə̀ʼə pə e ghu ze nɨ ze. Nkwùə̀ nɨ àpùŋə̀ pànə̀ za lə̀ zuʼnə a lenə la, pobə lə̀ furə̀ amwuə mɨ̀mbòmpə mɨ ɨ̀laʼà ɨ̀mobə ngyìinə̀ nɨ mɨ̀kwùə̀ ndzùŋə̀ e ghu.

¹⁴Tsaʼnə Yěsû à lə̀ mənə nfurə̀ amwuə àkànwuʼə za, à lə̀ zəənə̀ àpùŋə̀ pànə̀ za, ntɨŋmə̀ e ɨ lẅenə̀ nɨ àsòmnə̀. A tyiʼə̀ mbarə̀ pɨghoonə nɨ pɨ lə̀ pənə amwuə pobə.

¹⁵A pə a nkwə̌ njyə̂ ghu, ɨ̀zùŋə̀ ndzùmə̀ ɨ̀pe tô nshwəŋə̀ ambo ze lo, “Nkwùə̀ ɨ̀ zə̀ ndàŋə̀, alyiʼə zə a pə ɨ̀fùmə̀. Ghɨ̀rə̀ pànə̀ pə sìimə̀ mbə̀ʼə pobə ghə̀ ntàʼà àzwuumə̀ yè zɨghə̀nə amwuə pɨ̀tse ɨ̀laʼà ndzwuunə̀ ndzɨghə̀.”

¹⁶Yěsû a kẅùə̀ ambo pobə lo, “Mbə̀ʼə pobə sìimə̀ ghobə apə̀. Pɨghə àtwuə̀ ɨ̀pɨ̀ŋmə̀ àzɨghə nɨ tàʼà àzwuumə̀ ŋŋâ pobə̂ zɨghə̀.”

¹⁷Pobə kẅùə̀ ambo ze lo, “Àzwuumə̀ nɨ pəə pənə nɨ zèrə̀ a ɨ̀shyə̂ nɨ̀ghə̂ a ndàʼà ntsɨŋə̀ àpaanə̀ ɨtaanə̀ nɨ ɨ̀swuə̀ ɨpaa.”

¹⁸Yěsû a shwəŋə̀ lo, “Nɨ̀ lòo pèrə ntô ŋŋâ ambo mɨ̀ŋə̀.”

¹⁹A shwəŋə̀ ambo àpùŋə̀ pànə̀ za lo pobə̂ nwuunə̀ a ɨ̀shyə̂ aŋunə nɨ̀yìinə. Nkwùə̀ nɨ pobə lə̀ nwuunə̀nə a ɨ̀shyə̂, à lə̀ lòo ntsɨŋə̀ àpaanə̀ za ɨtaanə̀ ŋŋaŋə̀ ɨ̀myə̂ ɨ̀me a àtɨ̀ghə ŋŋâ a mɨyàa ambo Nẅùə̀ mbiʼtə̀ a zèrə ŋŋâ ambo ɨ̀zùŋə̀ ndzùmə̀ ɨ̀pe pobə ghàpə̀ ambo pànə̀ pa.

²⁰Ŋwùə̀ ntsùmə̀ à lə̀ zɨghə̀ ndzwurə̀, ɨ̀zùŋə̀ ndzùmə̀ ɨ̀pe pa chi ndyàa ɨ̀chepə̀ ndẅenə̀ mɨnkaamə ntsòbə̀ ɨpaa.

²¹Mbyàŋnə̀ nɨ lə̀ zɨghə̀nə mɨ̀zɨghə̀ mə lə̀ pə tsaʼa nkaamə̀ ɨtaanə̀, la ka pɨ shaŋə̀ e pə̀ngyə̌ pobə ɨ̀poonə̀.

²²Yěsû à lə̀ zùŋə̀ ngɨ̀rə̀ ɨ̀zùŋə̀ ndzùmə̀ ɨ̀pe kwuunə̀ amwuə àkànwuʼə ntwuumə̀ ndèrə̀ amwuə zhyə̀ ndzìnə a mbyə̀ ze. A tyiʼə̀ ngoŋə̀ a ndzùmə̀ nsìimə̀ àpùŋə̀ pànə̀ za.

²³Tsaʼnə àpùŋə̀ pànə̀ za lə̀ sìimə̀nə la, à lə̀ koʼò ndèrə̀ àtwuə̀ mbarə̀ a nɨ chàʼtə̀ a Nẅùə̀ ze nɨ ze nkwùə̀ nkwə̌.

²⁴Nkɨ pə nɨ àkànwuʼə za a mìntə̀ mə ndèrə̀ amwuə nchyə ndyə̌ sàa ntiinə fèrə̀ à lə̀ tɨ̀ŋnə̀ nchyə ɨ tyiʼə̀ ntinə̀ ndèrə̀ ntinə̀ nkwə̂.

²⁵A pə a nkòʼò njyə̂, Yěsû a yìinə̀ àtwuə̀ nchyə ntô ambo ɨ̀zùŋə̀ ndzùmə̀ ɨ̀pe pa.

²⁶Nkwùə̀ nɨ pobə lə̀ zəənə̀nə e a mə ngyìinə̀ àtwuə̀ nchyə la, àlùmə a lə̀ kəʼə̀ a ghobə, àkẅàrə̀ a kwuunə̀ a ghobə, pobə tyiʼə̀ nshwəŋə̀ lo, “A àzhyòbə̀.”

²⁷Yěsû à lə̀ faʼa nshwəŋnə̀ ambo pobə lo, “Nɨ̀ ẅìimə̀ mɨ̀ntɨŋmə̀ ɨ̀mɨghə, a mɨ̀ŋə̀, kò nɨ̀ pô.”

²⁸Pità a shwəŋə̀ ambo ze lo, “Ndòʼnə̀mbyə̂, à tə mbə ghò wə̀ shwəŋə̀ ambo mɨ̀ŋə̀ lo n̂tô a nɨ̀pwùnə ghò àtwuə̀ nchyə ghə.”

²⁹Yěsû a shwəŋə̀ ambo ze lo, “Tô!” Pità a furə̀ amwuə àkànwuʼə za ngyìinə̀ ntô ambo Yěsû.

³⁰La tsaʼnə à lə̀ zəənə̀nə a fèrə̀ wa la, àkẅàrə̀ a lə̀ kwuunə̀ e a pìʼnə̀ a nɨ mìnə̀ amwuə nchyə, ntyiʼə̀ nkyiinə̀ ngyìi lo, “Ndòʼnə̀mbyə̂, chwarə̀ mə̀!”

³¹Yěsû a faʼa nshwùumə̀ àpô e ngẅìimə̀ e nshwəŋə̀ lo, “Àpyiimə̀ ntɨŋmə̀ o a tyiʼə̀ nkɨ̂ tyìʼə̀ lə mbə̀ʼə àkə? A ghɨ̀rə̀ àkə wə̀ pə nɨ mɨnkə?”

³²Nkwùə̀ nɨ pobə lə̀ koʼnə nkwuunə̀ amwuə àkànwuʼə za, fèrə̀ wa à lə̀ ləənə̀.

³³Pànə̀ nɨ pɨ lə̀ pənə amwuə àkànwuʼə za pyiimə̀ lo, “A tyìʼə̀ nkǔŋə nkuŋə lo ghǒ Moonə̀ Nẅùə̀.”

³⁴Tsaʼnə pobə lə̀ twuumə̀nə ndèrə̀ àlaʼà Gennesaret,

³⁵pànə̀ pɨ alyiʼə ghu lə̀ zəənə̀ e nzhyə̂, ntsàa ntwuumə̀ alyiʼə alyiʼə a mɨ̀mbwùnə mɨ àlaʼà lo pɨ̀ shwatə̀ pɨghoonə ntô nɨ pèrə ambo Yěsû.

³⁶Pobə lə̀ puʼù mbô ambo ze lo â myàʼtə̀ pɨghoonə pa pɨ pètə̀ àtsəŋə̀ atsəʼə e. Pànə̀ pɨ̀tsùmə̀ nɨ pɨ lə̀ pètə̀nə lə̀ tɨ̀ŋnə̀.