Read Pinyin Matyù 15 Bible Online

Matyù 15 - Pinyin bible

Matyù 15

¹A kɨ pə tyìʼə̀ aŋunə mətùmə nkwùə̀, pɨ̀Farìsî pobə pɨ̀nèrə̀ mbòomə furə̀ a Yèrusalèmə̀ ntô mbyiitə̀ a Yěsû lo,

²“Ka ɨ̀zùŋə̀ ndzùmə̀ ɨ̀pô nùŋə̀ a ghobə pɨ̀mbòomə pɨ̀tǎ pɨ̀tǎ ɨ̀pəə lə mbə̀ʼə àkə? Ka pobə pə nsùu a ghobə mbô ɨ̀mobə amwuə ndwuumə̀ nɨ ɨ kùʼnə̀nə mbòŋə̀ zɨghə̀!”

³Yěsû a kẅùə̀ lo, “À ghɨ̀rə̀ àkə lo kò nɨ̀ mə ndzùŋə̀ a wɨghə ntə̌ Nẅùə̀, ntyiʼə̀ ndzùŋə̀ pə pɨ̀mbòomə ɨ̀pɨghə?

⁴Ntiinə Nẅùə̀ à lə̀ shwəŋə̀ lo, ‘Zuʼnə̀ a tǎ ɨwɨghə pobə mǎ o,’ nkɨ nshwəŋə̀ lo, ‘Ŋònə̀ nɨ à zòomə̀nə a mǎ e kə̀ a tǎ ɨghobə, à kùʼnə̀ lo pɨ̀ zhwuutə̀ e.’

⁵La nɨ̀ shwəŋə̀ àzɨghə lo ŋwùə̀ à tə nshwəŋə̀ ambo tǎ ɨghobə kə̀ mǎ e lo, ‘Àzwuumə̀ za zhyə̀ nɨ ǹtənə mbə ŋâ ambo ghò la, ŋ̀ŋâ a zèrə̀ ambo Nẅùə̀,’

⁶yi ka à chyə̂ mbə e nɨ àghuʼtə̀ aŋunə tǎ ɨghobə pobə mǎ e. Zèrə zə a nèrə̀ la tsaʼnə nɨ̀ waʼnə mɨ̀ntə̌ mɨ Nẅùə̀ ntyiʼə̀ ndzùŋə̀ pə ɨ̀mɨghə mɨ̀ntə̌.

⁷Pɨghə ngàŋə àpə̀grə̀! Ngàŋə̀ ntwuumə̀ Nẅùə̀ Ìsayà à lə̀ zəənə̀ tyìʼə̀ ɨ̀shìʼnə̀ ŋŋwàʼnə̀ ànwùə̀ nɨ Nẅùə̀ à lə̀ shwəŋə̀nə mbə̀ʼə wɨghə lo:

⁸‘Pànə̀ pə̀ pa ndzuʼnə̀ mə̀ pə nɨ ɨ̀kòbə̀ ntswùə̀, la mɨ̀ntɨŋmə̀ ɨ̀mobə pə a ndyə̌ sàa aŋunə mɨ̀ŋə̀.

⁹Ka ɨ̀sùmə ɨ̀tse ɨ̀ pə e ghu ambo pobə a nɨ səəkə̀ mə̀, ntiinə pobə pa nnèrə̀ pə pɨ̀mbòomə pɨ pànə̀ pɨ mɨsoŋə.’”

¹⁰Yěsû a tyiʼə̀ nfuŋə̀ àpùŋə̀ pə̀ənə̀ za a tô a nɨ̀pwùnə ze nshwəŋə̀ ambo pobə lo, “Nɨ̀ zhwiʼtə̀ àtwuə̀ àzɨghə â laanə̀!

¹¹Ka a ghɨ̀rə̀ e àzwuumə̀ zhyə̀ nɨ ŋwùə̀ à zɨghə̀nə a ntswùə̀ ngɨ̀rə̀ lo â laanə̀ a mbyə̀ Nẅùə̀. La à ghɨ̀rə̀ zhyə̀ za nɨ a furə̀nə a ntɨŋmə̀ ze ngɨ̀rə̀ lo kò a laanə̀ e.”

¹²Ɨ̀zùŋə̀ ndzùmə̀ ɨ̀pe paatə̀ e mbyiitə̀ ambo ze lo, “Wə̀ zhyə̂ lo pɨ̀Farìsî pə ndzaŋə̀ a loŋə aŋunə ghò ntii ànwùə̀ za nɨ wə̀ shwəŋə̀nə la?”

¹³Yěsû a kẅùə̀ lo, “Àzwuumə̀ za àtsùmə̀ nɨ ka à pyə̀ e Tǎ ɨwəə a nɨ̀pwuurə̀ la, pɨ ghǎ sòʼò a zèrə waʼà.

¹⁴Nɨ̀ myàʼtə̀ a ghobə! Pobə la pɨ̀fə̀ mmə nnèrə̀ àlàŋə ambo pɨ̀tse pɨ̀fə̀; ɨ̀fə̀ à tə mə nnèrə̀ àlàŋə ambo yɨ̀tse ɨ̀fə̀, yi pobə pɨ̀tsùmə̌ kunə̀ amwuə nɨ̀ntaamə̀.”

¹⁵Pità a shwəŋə̀ ambo ze lo, “Tiitə̀ ɨ̀sùmə àshwəŋnə̀ nàanə nàanə zə̀ ambo pəə.”

¹⁶Yěsû a kẅùə̀ lo, “Mbaa pə pɨghə, ka nɨ̀ zhwuumə̀ a wɨghə a nɨ zhyə̂ ànwùə̀ nɨ ǹshwəŋə̀nə?

¹⁷Ka nɨ̀ zəənə̀ a wɨghə lo, àzwuumə̀ zhyə̀ nɨ ŋwùə̀ a zɨghə̀nə a ntswùə̀ ze a làŋə̀ nshwuʼə̀ la a nɨ̀pùmə̀ ze a kɨ nchi nnyìi a zèrə?

¹⁸Àshwəŋnə̀ nɨ a furə̀nə a ntswùə̀ ŋwùə̀ a furə̀ la a ntɨŋmə̀ ze mbə la zhyə̀ za nɨ a ghɨ̀rə̀nə lo kò ŋwùə̀ a laanə̀ e a mbyə̀ Nẅùə̀.

¹⁹Àkwàŋə̀ tɨ̀pòŋə̀ nɨ a pənə a ntɨŋmə̀ ŋwùə̀ a za ngɨ̀rə̀ ŋwùə̀ a zhwuutə̀, ngɨ̀rə̀ àfànə̀, ngɨ̀rə̀ a məghàbə̀, ngɨ̀rə̀ a zə̀ərə̀, nnyìi a chwìrə̀, nshwəŋə̀ a tɨ̀pòŋə̀ àtwuə̀ ŋwùə̀.

²⁰La a ghɨ̀rə̀ mɨ̀nwùə̀ mə lo kò ŋwùə̀ a laanə̀; ka nɨ̀zɨghə̀ tɨ sùu mbô a ghɨ̀rə̀ e lo kò ŋwùə̀ a laanə̀.”

²¹Yěsû à lə̀ tyiʼə̀ mmyàʼtə̀ alyiʼə ghu ndèrə̀ a pàa àlaʼà Tayə̀ ghobə Sidònə̀.

²²A təəmə̀ lo, mə̀ngyə̌ Kanàanə̀ ɨ̀tse nɨ à lə̀ mənə nchyə̂ a pàa àlaʼà ghu, a tô ambo ze ngyìi nshwəŋə̀ lo, “Koorə̀ mɨ̀lɨŋə̀ ɨ̀mâ mbǎ Ndòʼnə̀mbyə̂ moonə̀ Dàfirə̀; àzhyə̂ àtse a zə amwuə moonə̀ mə̀ ghù mə̀ngyə̌ mmə ŋŋâ ngəʼə̀ ambo ze ka mɨ̀zùŋə.”

²³La ka Yěsû a lə̀ kẅùə̀ e ànwùə̀ àtse ambo ze. Ɨ̀zùŋə̀ ndzùmə̀ ɨ̀pe tyiʼə̀ ntô ambo ze mbuʼù mbô nshwəŋə̀ lo, “Kantə̀ e â lèrə̀ kò a kɨ nga ngyìi àzwuumə̀ zə̀ a ndzùmə̀ pə̀ənə̀.”

²⁴Yěsû a kẅùə̀ lo, “Pɨ lə̀ tsàa mə̀ la ndàʼà ambo pànə̀ pa nɨ pɨ pənə amwuə àlaʼà Israel pyə̀ nɨ pənə tsaʼa mɨ̀mbyə̂ mɨ̀ndzìrə̀ ma nɨ mɨ pînə la.”

²⁵Nkwùə̀ ghu, mə̀ngyə̌ wa a tô nkẅiʼtə̀ a mbyə̀ Yěsû nshwəŋə̀ lo, “Ndòʼnə̀mbyə̂ yèmpə̀ mə̀!”

²⁶Yěsû a kẅùə̀ lo, “Ka a kùʼnə̀ e a nɨ lòo àpaanə̀ àghòbə mmàʼà ambo mɨ̀ngwɨghə̀.”

²⁷Mə̀ngyə̌ wa a kẅùə̀ lo, “A nkǔŋə nkuŋə mbǎ Ndòʼnə̀mbyə̂; La mɨ̀ngwɨghə̀ ma ndyàa ɨ̀chepə̀ mɨ̀zɨghə̀ nɨ mɨ furə̀nə àtwuə̀ tepèrə̀ pɨ̀tǎ ɨ̀pobə nkẅìnə̀ a ɨ̀shyə̂ ndzɨghə̀.”

²⁸Lenəla Yěsû a kẅùə̀ lo, “Mə̀ngyə̌, àpyiimə̀ ntɨŋmə̀ o a noʼò. Wə̌ pə nɨ ànwùə̀ nɨ wə̀ tàʼnə la.” Tyìʼə̀ nkwùə̀ ghu moonə̀ e wa a zùŋə̀ nfiitə̀.

²⁹Yěsû à lə̀ tyiʼə̀ nfurə̀ alyiʼə ghu ngə̀ ndàŋə̀ a nɨ̀pwùnə atəŋə Galìlyə̂, nkoʼò ngə̀ nnwuunə̀ àtwuə̀ mbarə̀.

³⁰Ɨ̀pùŋə̀ pə̀ənə̀ pɨ̀ẅùunə lə̀ tô ambo ze nɨ pɨ̀kɨkə̀ghə, nɨ pɨ̀fə̀, nɨ pɨ̀koŋə̀ ɨ̀shyə̂, nɨ pɨ̀paapaa, nɨ pɨ̀tse pɨghoonə tyìʼə̀ pɨ̀noʼnə ntô nnwuunə̀ a mbyə̀ ze a parə̀ a ghobə.

³¹Pànə̀ pèrə pə lə̀ yerə̀ amwuə ndwuumə̀ nɨ pobə lə̀ zəənə̀nə pɨ̀paapaa shwəŋnə̀, pɨ̀koŋə̀ ɨ̀shyə̂ yìinə̀, pɨ shyə̀ mɨ̀kwùə̀ mɨ pɨ̀kɨkə̀ghə, pɨ̀fə̀ zəənə̀, pobə pɨ̀tsùmə̀ tyiʼə̀ nguʼtə̀ a Nẅùə̀ pànə̀ pɨ Israel.

³²Yěsû à lə̀ tyiʼə̀ nfuŋə̀ ɨ̀zùŋə̀ ndzùmə̀ ɨ̀pe nshwəŋə̀ ambo pobə lo, “Ngwə̀ nkoorə̀ mɨ̀lɨŋə̀ mɨ pànə̀ pə, ntiinə pobə pə mə njyə̂ ɨtarə pə̀ənə̀ pɨ pobə tɨ̀tsòŋə̀ ka zɨghə̀ a ghobə àzwuumə̀ àtse. Mbə̀ʼə ntsàa mə̀ a ghobə nɨ njyə̀ apə̀, ntiinə pobə chyə̂ ghə̀ kuntə̀ a àlàŋə.”

³³Ɨ̀zùŋə̀ ndzùmə̀ ɨ̀pe pyiitə̀ e lo, “Mbə̀ʼə pə̀ənə̀ lòo mɨ̀zɨghə̀ la ɨghə a alyiʼə waakə a nɨ zə̂ ɨ̀pùŋə̀ pànə̀ pɨ̀noʼnə pə̀?”

³⁴Yěsû a pyiitə̀ a ghobə lo, “Nɨ̀ wə̀ nɨ ntsɨŋə̀ àpaanə̀ ɨshiʼə?” Pobə kẅùə̀ lo, “Ntsɨŋə̀ àpaanə̀ sàmbaa nɨ kɨyii ɨ̀swuə̀ ɨ̀tse.”

³⁵Lenəla Yěsû a shwəŋə̀ ambo pànə̀ pɨ̀ghu lo nɨ̀ nwuunə̀ a ɨ̀shyə̂.

³⁶A tyiʼə̀ ndòo àpaanə̀ za ntsɨŋə̀ sàmbaa ghobə ɨ̀swuə̀ za, ŋŋâ a mɨyàa ambo Nẅùə̀, mbiʼtə̀ a zèrə̀ ŋŋâ ambo ɨ̀zùŋə̀ ndzùmə̀ ɨ̀pe, pɨ tyiʼə̀ ngàbə̀ ambo pànə̀ pa.

³⁷Ŋwùə̀ ntsùmə̀ à lə̀ zɨghə̀ ndzwurə̀; ɨ̀zùŋə̀ ndzùmə̀ ɨ̀pe tyiʼə̀ ndyàa ɨ̀chepə̀ ndẅenə̀ mɨnkaamə sàmbaa.

³⁸Mbyàŋnə̀ nɨ lə̀ zɨghə̀nə lə̀ pə nkaamə̀ nɨ̀kwàa, ka pɨ shaŋə̀ e pə̀ngyə̌ pobə ɨ̀poonə̀.

³⁹Yěsû à lə̀ ghɨ̀rə̀ pànə̀ pa sìimə̀ ndèrə̀, a tyiʼə̀ nkwuunə̀ amwuə àkànwuʼə ndèrə̀ a pàa àlaʼà Magadànə̀.