Read Pinyin Matyù 17 Bible Online

Matyù 17 - Pinyin bible

Matyù 17

¹Njyə̂ ntuurə̀ lə̀ làŋə̀ Yěsû a lòo Pità nɨ Jemə̀ pobə momaa e Jònə pobə pɨ pobə koʼò ndèrə̀ àtwuə̀ mbarə̀ sàa ɨ̀tse mbə ghu tyìʼə̀ pobə nɨ pobə.

²Mbɨ̀ŋmə̀ e ɨ̀ kẅebə̀ a mbyə̀ pobə, ɨ̀sɨghə̀ e ɨ tyiʼə̀ mmə ntsìinə̀ tsaʼa nẅùumə̀, ɨtsəʼə ɨ̀pe fuə̀ ntsèntə̀.

³Pobə kɨ wùutə̀ ndzəənə̀ a Mǔsî pobə Elijah pobə furə̀ mmə nshwəŋnə̀ pobə pɨ Yěsû.

⁴Pità a tyiʼə̀ nshwəŋə̀ ambo Yěsû lo, “Ndòʼnə̀mbyə̂, a pòŋə̀ tsaʼnə pə̀ənə̀ pə̀ a nɨ̀ghə̂. Wə̀ pəla nkòŋə̀, mbɨ korə̀ ɨ̀zuŋə̀ ɨtarə, taʼà a pə ambo ghò, taʼà a pə ambo Mǔsî, taʼà a pə ambo Elijah.”

⁵Tsaʼnə à lə̀ pirə̀nə mmə nshwəŋnə̀ la, mbàʼà yɨ̀ fuə nɨ pubə ɨ̀ wùutə̀ nkẅupə̀ a ghobə, ngyə̀ ɨ̀ furə̀ amwuə mbàʼà ghu nshwəŋə̀ lo, “Lə̌ moonə̀ mə̀ ghu mbyàŋnə̀ wa nɨ ǹkòŋə̀nə la, m̀mə ngaʼà mbə̀ʼə e. Nɨ̀ tsùŋə̀ nzhwiʼtə̀ ànwùə̀ nɨ à wə̀ nshwəŋə̀.”

⁶Nkwùə̀ nɨ ɨ̀zùŋə̀ ndzùmə̀ ɨ̀pe lə̀ zuʼnə a lenə la, pobə lə̀ kunə̀ a ɨ̀shyə̂ àkùbəkubə̀, àkẅàrə̀ a kwuunə̀ a ghobə.

⁷La Yěsû a tô mbètə̀ a ghobə nshwəŋə̀ lo, “Nɨ̀ lòo a ɨ̀shyə̂, kò nɨ̀ pô.”

⁸Pobə ŋaŋə̀ ɨ̀myə̂ ɨ̀mobə àtɨ̀ghə ka zəənə̀ a ghobə a ŋònə̀ ɨ̀tse ndàŋə̀ e Yěsû.

⁹Tsaʼnə pobə lə̀ furə̀nə àtwuə̀ mbarə̀ gha mmə nshwuʼə̀ la, Yěsû à lə̀ kwàtə̀ a ghobə lo, “Kò nɨ̀ shwəŋə̀ a wɨghə ànwùə̀ mbə̀ʼə ànǐ zə̀ ambo ŋònə̀ ɨ̀tse tə mbyàa nkwùə̀ nɨ Moonə̀ Ŋwùə̀ à ghǎ zhwuumə̀ a nɨ̀wɨghə̀.”

¹⁰Ɨ̀zùŋə̀ ndzùmə̀ ɨ̀pe pa pyiitə̀ e lo, “Pɨ̀nèrə̀ mbòomə shwəŋə̀ lo Elijah a chyə̂ a nɨ pyə̀ ntô la ntii àkə?”

¹¹Yěsû kẅùə̀ ambo pobə lo, “Elijah à chyə̂ a nɨ tô nkɨ shìitə̀ ɨ̀nwùə̀ ɨ̀tsùmə̀ kẅuə̀ tsaʼnə ɨ lə̀ pyə̀nə mbə la.

¹²La ngwə̀ nshwəŋə̀ a wɨghə lo, Elijah à pyə̀ mə ntô ka pɨ̀ zhyə̂ e la ngɨ̀rə̀ mɨ̀nwùə̀ nɨ pɨ kòŋə̀nə aŋunə ze. A kɨ mbə tyìʼə̀ ndəŋə ndəŋə tsaʼnə Moonə̀ Ŋwùə̀ à ghǎ zəənə̀ ngəʼə̀ ambo pobə.”

¹³Ɨ̀zùŋə̀ ndzùmə̀ ɨ̀pe pa tyiʼə̀ ndzuʼù ànwùə̀ ghu a laanə̀ àtwuə̀ pobə nkwùə̀ ghu lo à shwəŋə̀ la ànwùə̀ mbə̀ʼə Jònə ngàŋə̀ àŋâ àkẅiirə̀ nchyə.

¹⁴Nkwùə̀ nɨ pobə lə̀ kẅirə̀nə nkwə̂ ntsirə̀ àpùŋə̀ pànə̀ za, ŋònə̀ mbyàŋnə̀ ɨ̀tse à lə̀ tô nkẅiʼtə̀ a mbyə̀ Yěsû nshwəŋə̀ lo,

¹⁵“Ndòʼnə̀mbyə̂, koorə̀ mɨ̀lɨŋə̀ aŋunə moonə̀ mə̀ wə̀ ntiinə à wə̀ nkunə̀ àkɨ̀pwùrə̀ ndzəənə̀ ngəʼə̀ tɨsɨŋnə. A pə nkwùə̀ ɨ̀tse, a kunə̀ amwuə ɨ̀mǔ, mbə nkwùə̀ ɨ̀tse a kunə̀ amwuə nchyə.

¹⁶Ndə̀ lòo e ntô ambo ɨ̀zùŋə̀ ndzùmə̀ ɨ̀pô lo pobə̂ parə̀ e la ka pobə zhyə̂ a ghobə ndwuumə̀ nɨ mbə̀ʼə pobə parə̀ e.”

¹⁷Yěsû a shwəŋə̀ lo, “Pànə̀ pɨ tɨ̀tsòŋə̀, nɨ ka nɨ̀ mə nnùŋə̀ a wɨghə ntɨŋmə̀ aŋunə Nẅùə̀ ka kɨ mə ghɨ̀rə̀ a wɨghə mɨ̀nwùə̀ mɨ təəmə̀nə! Ngǎ chyə̂ pə̀ənə̀ tə pyàa lə nkwùə̀ àkə? Mbɨ ẅìimə̀ ntɨŋmə̀ mə̀ mbə̀ʼə wɨghə tə pyàa lə nkwùə̀ àkə? Nɨ̀ lòo e ntô a ɨ̀shyə̂ nɨ̀ghə̂!”

¹⁸Yěsû à lə̀ saʼà àzhyə̂ za, a zùŋə̀ nfurə̀, moonə̀ wa a zùŋə̀ ntɨ̀ŋnə̀.

¹⁹Ɨ̀zùŋə̀ ndzùmə̀ Yěsû lə̀ tyiʼə̀ ntô mbyiitə̀ e a ndzùmə̀ ndzùmə̀ lo, “A ghɨ̀rə̀ àkə ka pəə tô nzhyə̂ fuukə̀ a wəə àzhyə̂ zə̀?”

²⁰A kẅùə̀ ambo pobə lo, “Ntiinə àpyiimə̀ ntɨŋmə̀ àzɨghə a pirə̀nə nkɨ̂. Ngwə̀ nshwəŋə̀ a wɨghə lo nɨ̀ tə mbə nɨ àpyiimə̀ ntɨŋmə̀ a kɨ̂ mbə tsaʼa mbyə àloonə̀ yi mbə̀ʼə nɨ̀ shwəŋə̀ ambo mbarə̀ zə̀ lo, ‘lòo a nɨ̀ghə̂ ngə̀ ntəəmə̀ a nɨ̀yî!’ ɨ̀ kɨ ndòo. Nɨ ndwuumə̀ wanə, ànwùə̀ àtse a chyə̂ ntsàarə̀ a wɨghə apə̀.”

²¹Mbuurə̀ àzhyə̂ zə̀ a tàʼà la lo nɨ̀ nwuunə̀ tɨ zɨghə̀ amwuə àchàʼtə̀ Nẅùə̀ zaʼà mbòŋə̀ fuukə̀.

²²Nkwùə̀ nɨ ɨ̀zùŋə̀ ndzùmə̀ ɨ̀pe lə̀ shwatə̀nə a Galìlyə̂ la, Yěsû à lə̀ shwəŋə̀ ambo pobə lo, “Pɨ̌ ŋâ a Moonə̀ Ŋwùə̀ ambo pə̀ənə̀,

²³pɨ̀ zhwuutə̀ e a kɨ pə aŋunə njyə̂ ɨtarə pɨ chi mbə̀ʼkə̀ e aŋunə nɨ̀wɨghə̀.” Mbɨ̀ŋmə̀ ɨ̀zùŋə̀ ndzùmə̀ ɨ̀pe pa lə̀ pɨ̂ ka mɨ̀zùŋə.

²⁴Nkwùə̀ nɨ Yěsû pobə ɨ̀zùŋə̀ ndzùmə̀ ɨ̀pe lə̀ tônə nkwuunə̀ a Kàpenòmə̀, pɨ̀nkẅiirə̀ pɨ̀taghə̀ a Ndâ Mɨ̀shwàʼà Nẅùə̀ a Yèrusalèmə̀ tô ambo Pità mbyiitə̀ e lo, “Ka ɨ̀nèrə̀ ɨwɨghə â twuə̀ e a taghə̀ a Ndâ Mɨ̀shwàʼà Nẅùə̀ a Yèrusalèmə̀?”

²⁵Pità a kẅùə̀ lo, “À wa ntwuə̀.” Nkwùə̀ nɨ Pità à lə̀ kwuunə̀nə a ndâ la, Yěsû à lə̀ pyiitə̀ e lo, “Shimùnə̀, àkwàŋə̀ o a chyə̂ lə lo àkə? Pɨ̀fò pɨ àtwuə̀ ɨ̀shyə̂ pa ngə̀ nkẅiirə̀ pɨ̀taghə̀ la ambo pɨ̀wə̌? Pobə pa ngə̀ nkẅiirə̀ la ambo ngàŋə àlaʼà kə̀ ambo ngàŋə nɨ̀ghaanə̀?”

²⁶Pità kẅùə̀ lo, “Ambo ngàŋə nɨ̀ghaanə̀.” Yěsû a tyiʼə̀ nshwəŋə̀ lo, “Mbə a lenə yi ka ngàŋə àlaʼà àzobə pə e a nɨ twuə̀.

²⁷La ka pə̀ənə̀ pə ntàʼà wəənə̀ a nɨ ghɨ̀rə̀ mɨ̀ntɨŋmə̀ ɨ̀mobə zaŋə̀. Tsaʼnə a pənə lə la, ghə̀ amwuə atəŋə mmàʼà àlàʼà o. Ntsàambyə̀ ɨ̀swuə̀ nɨ wə̀ kônə, nyaʼkə̀ ntswùə̀ e, wə̌ zəənə̀ nkabə̀. Lòo a zèrə ŋŋâ ambo pobə àtwuə̀ nɨ pùu.”