Read Pinyin Matyù 20 Bible Online

Matyù 20 - Pinyin bible

Matyù 20

¹“Ànwùə̀ nɨ̀fò nɨ̀pwuurə̀ a chyə̂ tsaʼa ngàŋə̀ ɨ̀swùumə mɨ̀tɨ̀ghə mɨ̀ntàamə mɨ mɨ̀lùʼù nɨ à lə̀ furə̀nə a ngẅùʼə ngẅùʼə ngə̀ a nɨ tàʼà ngàŋə àfàʼà nchyâ amwuə ɨ̀swùumə mɨ̀tɨ̀ghə mɨ̀ntàamə mɨ mɨ̀lùʼù e.

²Nkwùə̀ nɨ pobə pɨ pobə lə̀ pyiimə̀nə aŋunə ndùnə̀ nkabə̀ a nɨ twuə̀ a ghobə aŋunə taʼà njyə̂, à lə̀ tsàa a ghobə amwuə ɨ̀swùumə e ghu.

³À lə̀ furə̀ ndèrə̀ alyiʼə mɨ̀tàanə aŋunə pɨ̀nẅùumə̀ nɨ̀pwùʼə ndzəənə̀ pànə̀ pɨ̀tse təəmə̀ ghu ka pə fàʼà a ghobə àzwuumə̀ àtse.

⁴Lenəla, a shwəŋə̀ ambo pobə lo, ‘Nɨ̀ lèrə̀ àzɨghə amwuə ɨ̀swùumə mɨ̀ntàamə mɨ mɨ̀lùʼù ẅùə̀, mbɨ twuə̀ a wɨghə nɨ nkabə̀ nɨ ɨ̀ kùʼnə̀nə.’

⁵Lenəla, ngàŋə àfàʼà ghu lèrə̀. “À lə̀ kɨ nchi nfurə̀ aŋunə pɨ̀nẅùumə̀ ntsòbə̀ ɨpaa ghobə pɨ̀nẅùumə̀ pɨtarə nkẅirə̀ ngɨ̀rə̀ tyìʼə̀ a lenə.

⁶A lə̀ kɨ pə tsaʼa pɨ̀nẅùumə̀ pɨtaanə̀ a chi nfurə̀ ndèrə̀ alyiʼə mɨ̀tàanə nkɨ chi ndzəənə̀ a pɨ̀tse pə̀ənə̀ təəmə̀ ghu, a pyiitə̀ a ghobə lo, ‘À ghɨ̀rə̀ àkə nɨ̀ təəmə̀ a nɨ̀ghə̂ aŋunə njyə̂ zə̀ ka pə fàʼà a wɨghə àzwuumə̀ àtse?’

⁷Pobə kẅùə̀ lo, ‘Ntiinə ka ŋònə̀ ɨ̀tse a ŋâ e àfàʼà ambo pəə.’ A shwəŋə̀ ambo pobə lo, ‘Nɨ̀ kɨ ndèrə̀ àzɨghə nfàʼà amwuə ɨ̀swùumə mɨ̀tɨ̀ghə mɨ̀ntàamə mɨ mɨ̀lùʼù mə̀.’

⁸“Nkwùə̀ nɨ nkwùə̀ nkwə̌ ɨ̀ lə̀ kùʼnə̀nə, ngàŋə̀ ɨ̀swùumə a shwəŋə̀ ambo àtwuə̀ ngàŋə àfàʼà lo, ‘Fuŋə̀ ngàŋə àfàʼà ntwuə̀ a ghobə mbìʼnə̀ aŋunə pànə̀ nɨ pɨ tənə ndẅùutə̀ ntô ngə̀ ndẅùutə̀ aŋunə pànə̀ nɨ pɨ tənə ndzàamə̀ ntô.’

⁹Lenəla, pɨ lə̀ twuə̀ pànə̀ nɨ pobə lə̀ pìʼnə̀nə àfàʼà aŋunə pɨ̀nẅùumə̀ pɨtaanə̀ nɨ ndwùnə̀ nkabə̀ nɨ pɨ lə̀ pyiimə̀nə aŋunə taʼà njyə̂ àfàʼà.

¹⁰Nkwùə̀ nɨ pànə̀ pa nɨ pobə lə̀ pìʼnə̀nə àfàʼà a ngẅùʼə ngẅùʼə lə̀ tônə a nɨ kẅiirə̀ àzobə nkabə̀, pobə lə̀ mə nkwàŋə̀ lo pɨ̌ twuə̀ a ghobə nɨ nkabə̀ yɨ̀noʼnə. La pɨ kɨ ŋŋâ a ghobə nɨ ndwùnə̀ nɨ pɨ lə̀ pyiimə̀nə aŋunə taʼà njyə̂.

¹¹Nkwùə̀ nɨ pobə lə̀ kẅiirə̀nə a zèrə, pobə lə̀ pìʼnə̀ a nɨ lẅùmpə̀ aŋunə ŋònə̀ nɨ à lə̀ lòonə a ghobə àfàʼà.

¹²Pobə shwəŋə̀ lo, ‘Pànə̀ pə nɨ wə̀ lòonə a ghobə a ndzùmə̀ lə̀ fàʼà pə aŋunə taʼà awà la pəə fàʼà aŋunə taʼà njyə̂ a ɨ̀sùmə nẅùumə̀, wə̀ twuə̀ a wəə pɨ pobə nɨ taʼà àzwuumə̀!’

¹³“A kẅùə̀ a taʼà ŋwùə̀ ghu yɨ̀tse lo, ‘Ngɨ̀ɨnə̀ mə̀, ka ǹgɨ̀rə̀ mə̀ ànwùə̀ àtse nɨ a pɨ̂nə ambo ghò. Yi pùu lə̀ pyiimə̀ la aŋunə nkabə̀ nɨ ɨ̀ kùʼnə̀nə aŋunə àfàʼà taʼà njyə̂?

¹⁴Kẅiirə̀ nkabə̀ o ndèrə̀ o. Ǹtàʼà ŋâ nkabə̀ ambo ngàŋə̀ àfàʼà ndẅùə̀ndzùmə̀ wə̀ tsaʼnə ǹkɨnə ŋŋâ ambo ghò.

¹⁵Kə̀ ka ǹtwuʼtə̀ mə̀ ɨ̀tɨ̀ŋnə̀ a nɨ ghɨ̀rə̀ tsaʼnə ǹkòŋə̀nə aŋunə zhyə̀ nɨ a pənə àzâ? Kə̀ nɨ̌ ghə̀ʼnə̀ mə̀ ntiinə ngwə̀ ngàbə̀ àpô?’

¹⁶“Lenəla, ndẅùə̀ndzùmə̀ à ghǎ pə ntsàambyə̀, ntsàambyə̀ â pə ndẅùə̀ndzùmə̀.”

¹⁷Tsaʼnə Yěsû à lə̀ pənə nkoʼò ndèrə̀ a Yèrusalèmə̀ la, à lə̀ lòo ɨ̀zùŋə̀ ndzùmə̀ ɨ̀pe ntsòbə̀ ɨpaa mmìntə̀ a nɨ̀pwùnə, pobə pɨ pobə pə ngyìinə̀, a shwəŋə̀ ambo pobə lo,

¹⁸“Nɨ̀ zəənə̀! Pə̀ənə̀ koʼò ndèrə̀ a Yèrusalèmə̀, la pɨ̌ ŋâ a Moonə̀ Ŋwùə̀ ambo pɨ̀fò màʼà Nẅùə̀ nɨ pɨ̀nèrə̀ mbòomə pɨ̀ saʼà ɨ̀sàʼa e ndə̂ lo pɨ̌ zhwuutə̀ e,

¹⁹lenəla, ŋâ e ambo pànə̀ nɨ ka pobə pə ghobə pɨ̀Jew lo pɨ̀ nyèŋə̀ e, nkəʼə̀ e, nkẅùumə̀ e aŋunə àtɨ̀ghə pànkə̀nə, njyə̂ kɨ làŋə̀ ɨtarə â zhwuumə̀ a nɨ̀wɨghə̀.”

²⁰Mǎ pɨ ɨ̀poonə̀ pɨ Zebedì a tô ambo Yěsû pobə ɨ̀poonə̀ ɨ̀pe ntə̂ mɨ̀kwìʼtə ɨ̀me a ɨ̀shyə̂ ndoonə̀ lo â ghɨ̀rə̀ ànwùə̀ àtse ambo ze.

²¹Yěsû a pyiitə̀ ambo ze lo, “Wə̀ tàʼà la àkə ambo mɨ̀ŋə̀?” Mǎ wa a shwəŋə̀ lo, “Kàʼà ambo mɨ̀ŋə̀ lo ɨ̀poonə̀ ɨ̀pâ pɨ mbyàŋnə̀ pə̀ pɨpaa ghǎ nwuunə̀ a nɨ̀pwùnə ghò, taʼà â nwuunə̀ àpô ghò yè zɨghə̀nə, ẅùə̀ a kɨ nnwuunə̀ aŋunə yè kẅàbə̀ amwuə alyiʼə nɨ̀fò o.”

²²Yěsû a kẅùə̀ ambo pobə lo, “Ka nɨ̀ zhyə̂ a wɨghə ànwùə̀ nɨ nɨ̀ wə̀ mbyiitə̀. Mbə̀ʼə nɨ̀ nô ndoŋə̀ nɨ mbɨ nô?” Pobə kẅùə̀ lo, “Mbə̀ʼə pəə nô.”

²³Yěsû a shwəŋə̀ ambo pobə lo, “Nɨ̌ nô ndoŋə̀ ngəʼə̀ mə̀, la ngə̀ a nɨ nwuunə̀ a pàa àpô mɨ̀ŋə̀ yè zɨghə̀nə kə̀ yè kẅàbə̀, ka a pə e alyiʼə ànwùə̀ mə̀ a nɨ tiitə̀. La ɨlyiʼə pɨ̀ghu chyə̂ ambo pànə̀ pyə̀ nɨ Tǎ ɨwəə à lə̀ tsùŋə̀nə ambo pobə.”

²⁴Nkwùə̀ nɨ pyə̀ ɨ̀zùŋə̀ ndzùmə̀ Yěsû pa nɨ̀ghumə̀ lə̀ zuʼnə, pobə lə̀ zaŋə̀ a loŋə aŋunə pɨlyimə pa pɨpaa.

²⁵Lenəla, Yěsû a fuŋə̀ a ghobə pobə tô a shwəŋə̀ ambo pobə lo, “Nɨ̀ zhyə̂ lo ɨ̀twuə̀ ɨ̀laʼà pànə̀ nɨ ka pobə pə ghobə pɨ̀Jew pa mbuʼtə̀ a ghobə nɨ mɨ̀tɨ̀ŋnə̀ ɨ̀mobə, pə̀ənə̀ ɨ̀pobə pɨ̀ẅùunə kɨ mmə mbuʼtə̀ a ghobə nɨ ɨ̀mobə mɨ̀tɨ̀ŋnə̀.

²⁶Lenəla, kò a pə e a lenə a tɨ̀tɨ̀rə̀ pɨghə, la ŋònə̀ nɨ à tàʼnə lo pə ŋònə̀ ngẅùunə amwuə pɨghə, ǎ pə ngàŋə̀ àfàʼà ɨwɨghə.

²⁷Lenəla, ŋònə̀ nɨ à tàʼnə lo pə ntsàambyə̀, ǎ pə àpùʼù àzɨghə,

²⁸ntiinə tyìʼə̀ Moonə̀ Ŋwùə̀ ka à lə̀ tô e pə lo pɨ̀ fàʼà ambo ze. À lə̀ tô pə lo fàʼà, ŋŋâ a nɨ̀chyə̂mbyə̂ e lo tsuʼù ɨ̀twuə̀ pànə̀ pɨ̀noʼnə ghu.”

²⁹Tsaʼnə Yěsû pobə ɨ̀zùŋə̀ ndzùmə̀ ɨ̀pe lə̀ mənə mmyàʼtə̀ àlaʼà Jèrikò la, àpùŋə̀ pə̀ənə̀ pɨ̀noʼnə a lə̀ zùŋə̀ a ghobə.

³⁰Pɨ̀fə̀ pɨpaa lə̀ nwuunə̀ a nɨ̀pwùnə àlàŋə, nkwùə̀ nɨ pobə lə̀ zuʼnə lo Yěsû à wə̀ ndàŋə̀ la, pobə lə̀ kyiinə̀ nshwəŋə̀ lo, “Ndòʼnə̀mbyə̂, Moonə̀ Dàfirə̀, koorə̀ mɨ̀lɨŋə̀ ɨ̀məə!”

³¹Àpùŋə̀ pə̀ənə̀ za a saʼà a ghobə nshwəŋə̀ lo pobə̂ zhwemnə̀. La pobə lə̀ chi nkyiinə̀ nɨ mɨ̀tɨ̀ŋnə̀ lo, “Ndòʼnə̀mbyə̂, Moonə̀ Dàfirə̀, koorə̀ mɨ̀lɨŋə̀ ɨ̀məə!”

³²Yěsû à lə̀ təəmə̀ nfuŋə̀ a ghobə, mbyiitə̀ lo, “Nɨ̀ tàʼà lo n̂gɨ̀rə̀ ɨla nɨ pɨghə?”

³³Pobə kẅùə̀ lo, “Ndòʼnə̀mbyə̂, pəə tàʼà zəənə̀ ɨlyiʼə.”

³⁴Yěsû à lə̀ sòmnə̀ aŋunə pobə ntyiʼə̀ mbètə̀ ɨ̀myə̂ ɨ̀mobə. Tyìʼə̀ nkwùə̀ ghu, pobə lə̀ zùŋə̀ ndzəənə̀ ɨlyiʼə, ndzùŋə̀ e.