Read Pinyin Matyù 24 Bible Online

Matyù 24 - Pinyin bible

Matyù 24

¹Yěsû a furə̀ amwuə Ndâ Mɨ̀shwàʼà Nẅùə̀ mmə ndèrə̀, ɨ̀zùŋə̀ ndzùmə̀ ɨ̀pe tô nnèrə̀ e nɨ Ndâ Mɨ̀shwàʼà Nẅùə̀ mbə̀ʼə â zəənə̀ tsaʼnə pɨ lə̀ poomə̀nə a zèrə tyìʼə̀ ɨ̀shìʼnə̀.

²La a shwəŋə̀ ambo pobə lo, “Nɨ̀ tsùŋə̀ ndzəənə̀ ɨ̀pwuumə̀ pə̀ ɨ̀tsùmə̀? Ǹshwəŋə̀ tyìʼə̀ nkǔŋə nkuŋə ambo pɨghə lo ka taʼà nɨ̀ghòorə a nɨ̀ghə̂ a pə ghǎ nwuunə̀ e àtwuə̀ tsɨ̀tse, pɨ ghǎ shàʼtə̀ tyìʼə̀ mɨ̀tsùmə̀ mmàʼtə̀ a ɨ̀shyə̂.”

³Tsaʼnə Yěsû à lə̀ nwuunə̀nə àtwuə̀ Mbarə̀ Olìvə̀ la, ɨ̀zùŋə̀ ndzùmə̀ ɨ̀pe lə̀ tô ntsirə̀ e pobə tyiʼə̀ mbə tyìʼə̀ pobə nɨ pobə. Pobə pyiitə̀ e lo, “Tsùŋə̀ ntiitə̀ a wəə pəə zuʼù. Mɨ̀nwùə̀ mèrə mə ghǎ furə̀ la nkwùə̀ àkə? Àlènə̀ ànwùə̀ nɨ a ghǎ nèrə̀ nkwùə̀ nɨ wə̀ ghǎ tô pobə nkwùə̀ nɨ àtwuə̀ ɨ̀shyə̂ a ghǎ lẅùutə̀ a ghǎ pə la àkə?”

⁴Yěsû kẅùə̀ ambo pobə lo, “Nɨ̀ zhìʼtə̀ mbə̀ʼə ŋònə̀ ɨ̀tse a fɨ̀kə̀ wɨghə.

⁵Mbə̀ʼnə pànə̀ pɨ̀noʼnə ghǎ tô aŋunə nɨ̀linə̀ ɨ̀tsâ shwəŋə̀ lo, ‘Mɨ̀ŋə̌ Ghù Ndzoʼnə wa!’ lenəla fɨ̀kə̀ pànə̀ pɨ̀noʼnə.

⁶Nɨ̀ ghǎ zuʼù àzòrə̀ mɨ̀ntsòo ghobə ɨ̀shwəŋnə̀ mbə̀ʼə mɨ̀ntsòo, la kò nɨ̀ pô a wɨghə mbə̀ʼnə zèrə zə̀ a chyə̂ a nɨ ghɨ̀rə̀, la ka pə e nkwùə̀ ndẅùutə àtwuə̀ ɨ̀shyə̂.

⁷Ntiinə ɨ̀laʼà ghǎ zòŋnə̀ a pyə̀, ɨ̀laʼà a ɨ̀sùmə pɨ̀fò zòŋnə̀ a pyə̀, ndzàŋə̀ ɨ̂ kwuunə̀ amwuə àlaʼà, ɨ̀shyə̂ ɨ̂ nə̀ʼnə̀ a ɨlyiʼə ɨlyiʼə.

⁸Mɨ̀nwùə̀ mèrə mə ghǎ pə la tsaʼa mə̀ngyə̌ yɨ̀ sùŋə̀nə a pìʼnə̀ a nɨ zuʼù àndzaŋə nkwùə̀ nɨ à kòonə a moonə̀.

⁹“Pɨ ghǎ kô a wɨghə ŋŋâ ambo pə̀ənə̀ pɨ̀ chyâ ngəʼə̀ yɨ̀noʼnə aŋunə pɨghə kə̀ nzhwuutə̀ a wɨghə. Àtwuə̀ ɨ̀shyə̂ àtsùmə̀ a ghǎ pàanə̀ a wɨghə mbə̀ʼə nɨ̀linə̀ ɨ̀tsâ.

¹⁰Pànə̀ pɨ̀noʼnə ghǎ kẅebə̀ àpyiimə̀ ntɨŋmə̀ àzobə nkwùə̀ ghu, shwùunə̀ mbɨ̀ŋmə̀ ɨ̀zobə pobə nɨ pobə, kɨ pàanə̀ mbɨ̀ŋmə̀ ɨ̀zobə pobə nɨ pobə.

¹¹Ngàŋə ntwuumə̀ Nẅùə̀ pɨ pɨ̀chwìrə̀ ghǎ furə̀ kɨ fɨ̀kə̀ pànə̀ pɨ̀noʼnə.

¹²Tɨ̀pòŋə̀ à ghǎ kẅìʼnə̀ noʼò, ɨ̀kòŋnə̀ pànə̀ pɨ̀noʼnə ɨ̂ porə̀.

¹³La ŋònə̀ nɨ à ẅìimə̀nə ntɨŋmə̀ e tə pyàa a ndẅùutə, à ghǎ chwarə̀.

¹⁴Pɨ ghǎ chwìitə̀ Ntwuumə̀ Ghù Ɨ̀shìʼnə̀ wə̀ mbə̀ʼə Ànwùə̀ Nɨ̀fò Nɨ̀pwuurə̀ ambo àtwuə̀ ɨ̀shyə̂ àtsùmə̀ ɨ̂ pə tsaʼa ndzəənə̀ zəənə̀nə amwuə ɨ̀laʼà ɨ̀tsùmə̀ amwuə àtwuə̀ ɨ̀shyə̂, zaʼà ndẅùutə àtwuə̀ ɨ̀shyə̂ ɨ̂ pòŋə̀ tô.”

¹⁵“Nɨ̀ ghǎ zəənə̀ ‘Ànwùə̀ za nɨ a fèrə̀nə’ nɨ ngàŋə̀ ntwuumə̀ Nẅùə̀ Daniel à lə̀ shwəŋə̀nə, â pə amwuə alyiʼə nɨ a laanə̀nə mmyàanə̀. (Ŋònə̀ nɨ à fuŋə̀nə, â tsùŋə̀ ndzuʼù ànwùə̀ zə̀ ɨ̀shìʼnə̀).

¹⁶Nɨ̀ pəla ndzəənə̀ àlènə̀, pànə̀ pa nɨ pɨ pənə àlaʼà Judyà kɨ̀ɨrə̀ nkoʼò ndèrə̀ àtwuə̀ pɨ̀kòŋə̀.

¹⁷Kò ŋònə̀ nɨ à pənə àtwuə̀ ndâ ze a shwuʼə̀ e a nɨ ghə̀ mbiinə̀ àzwuumə̀ àtse a ndâ.

¹⁸Kò ŋònə̀ nɨ à pənə a atwurə a kẅirə̀ ndèrə̀ a ndâ a nɨ piinə̀ a kutə̀ e.

¹⁹Ngəʼə̀ ɨ̀ ghǎ pə pə ɨla ambo pə̀ngyə̌ pɨ̀sùŋə̀nə pobə pɨ̀məpwùrə̀ amwuə mɨ̀njyə̂ mɨ̀ghu!

²⁰Nɨ̀ mə nchàʼtə̀ a Nẅùə̀ lo kò mɨ̀nwùə̀ mèrə mə ghǎ furə̀ e amwuə nkwùə̀ ghɨɨmə kə̀ amwuə njyə̂ àlaʼà pɨ̀Jew,

²¹ntiinə ngəʼə̀ nɨ ɨ̀ ghǎ pə amwuə nkwùə̀ ghu, ɨ̀ ghǎ fèrə̀ tsàarə̀ mɨ̀ngəʼə̀ mɨ̀tsùmə̀ nɨ mɨ lə̀ pyə̀ mə nfurə̀ a nɨ pìʼnə̀ nkwùə̀ nɨ pɨ lə̀ tsùŋə̀nə àtwuə̀ ɨ̀shyə̂ zə̀ tə mbyàa tɨ̀tsòŋə̀. Mbə̀ʼə yɨ̀nyàanə ɨ̀ ghǎ nchi nfurə̀ e tsaʼa zèrə zə̀ apə̀.

²²La Nẅùə̀ à ghǎ shwùʼtə̀ ndùnə̀ mɨ̀njyə̂ mèrə mə ntii pànə̀ pa nɨ à tsoʼnə la. A tə ka pə e a lenə ŋònə̀ ɨ̀tse a gha nchwarə̀ e apə̀.

²³“Amwuə nkwùə̀ ghu, ŋònə̀ ɨ̀tse à tə ntô nshwəŋə̀ ambo pɨghə lo, ‘Zəənə̀, Ghù Ndzoʼnə wa à wə̀, kə̀ à ẅùə̀!’ kò nɨ̀ pyiimə̀ a wɨghə ànwùə̀ nɨ à shwəŋə̀nə.

²⁴Ntiinə Ghù Ndzoʼnə yɨ̀ pɨ̀chwìrə̀ pobə ngàŋə ntwuumə̀ Nẅùə̀ pɨ pɨ̀chwìrə̀ ghǎ furə̀ ghɨ̀rə̀ ɨ̀lènə̀ ɨ̀nwùə̀ pɨ ẅùunə ghobə mɨ̀nwùə̀ mɨ yerə̀nə yerə̀nə a nɨ fɨ̀kə̀ pə̀ənə̀, lopə̀ a nɨ fɨ̀kə̀ farə pànə̀ pa nɨ Nẅùə̀ à tsoʼnə la.

²⁵Nɨ̀ zəənə̀, ǹshwəŋə̀ mə a wɨghə zaʼà nkwùə̀ ghu ɨ pòŋə̀ kùʼù.

²⁶“Lenəla, pànə̀ tə ghǎ shwəŋə̀ ambo pɨghə lo, ‘Zəənə̀, à ẅùə̀ a alyiʼə waakə!’ kò nɨ̀ ghə̀ wɨghə alyiʼə ghu; kə̀ pɨ shwəŋə̀ pə lo, ‘À wə̀ amwuə ntaŋə amwuə ndâ!’ kò nɨ̀ pyiimə̀ wɨghə.

²⁷Ntiinə nɨ̀tô Moonə̀ Ŋwùə̀ à ghǎ pə la tsaʼa mbə̀ŋə̀ ɨ̀ ŋwàŋə̀ nkàʼà e wa ɨ kyàʼà nfurə̀ a pàa saʼà nẅùumə̀ ndàŋə̀ ngẅènə̀ a pàa ngẅènə̀ nẅùumə̀.

²⁸“Alyiʼə nɨ àkwuə̀ àzwuumə̀ a nwuunə̀nə ghu, a alyiʼə nɨ pɨ̀məsaŋə shwatə̀nə ghu.”

²⁹“Tsaʼnə mɨ̀njyə̂ mɨ̀ngəʼə̀ mɨ ghu ghǎ pə myə̀ la, nẅùumə̀ a ghǎ sinə̀, məŋwɨgrə̀ â chi ntâ e apə̀, pɨsaŋə furə̀ a nɨ̀pwuurə̀ nkẅìntə̀ a ɨ̀shyə̂, pɨ̂ nə̀ʼə̀ ɨ̀tɨ̀ŋnə̀ ɨ̀tsùmə̀ a nɨ̀pwuurə̀.

³⁰Amwuə nkwùə̀ ghu, ɨ̀lènə̀ Moonə̀ Ŋwùə̀ furə̀ a nɨ̀pwuurə̀, ngẅàrə̀ mɨŋwùə̀ ntsùmə̀ ɨ̂ yìi, tsaʼnə pobə̌ zəənə̀ a Moonə̀ Ŋwùə̀ a mə tô amwuə mbàʼà nɨ ɨ̀tɨ̀ŋnə̀ pobə nɨ̀ghaʼà ngẅùunə.

³¹Ntàŋnə̀ Nẅùə̀ ɨ̀ ghǎ tswuə̀ nɨ ɨ̀tɨ̀ŋnə̀, a twuumə̀ pəngèrə̀ ɨ̀pe amwuə pɨ̀pàa pɨ mbyə̂ pə̀ nɨ̀kwàa pɨ ghə̀ nshwatə̀ pànə̀ pyə̀ nɨ à tsoʼò mə la, mbìʼnə̀ amwuə taʼà pàa ngə̀ mbyàa amwuə ẅùə̀ pàa.”

³²“Nɨ̀ lanə̀ ànwùə̀ aŋunə àtɨ̀ghə figə̀. A pə nkwùə̀ nɨ mɨ̀fàa ɨ̀me fuukə̀nə mɨfuə mɨ̀shwuə̀, nɨ̀ zhyə̂ lo mbə̀ŋə̀ ɨ̀ tyiʼə̀ a mbô.

³³A tyìʼə̀ ndəŋə ndəŋə lo nɨ̀ tə zəənə̀ ɨ̀nwùə̀ pə̀ ɨ̀tsùmə̀, nɨ̀ zhyə̂ lo à tô mə ntyiʼə̀ tyìʼə̀ a ntswùə̀ àpùʼù.

³⁴Ǹshwəŋə̀ tyìʼə̀ nkǔŋə nkuŋə ambo pɨghə lo, mbə̀ʼə ɨ̀waanə̀ pànə̀ wə̀ làŋə̀ e tɨghu ɨ̀nwùə̀ pèrə pə̀ ɨ̀tsùmə̀ furə̀ apə̀.

³⁵Nɨ̀pwuurə̀ ghobə ɨ̀shyə̂ ghǎ làŋə̀, la, àshwəŋnə̀ mə̀ a làŋə̀ e apə̀.”

³⁶“Ka ŋònə̀ ɨ̀tse a zhyə̂ e njyə̂ kə̀ nkwùə̀ ghu tə farə pəngèrə̀ nɨ pɨ pənə a nɨ̀pwuurə̀ kə̀ Moonə̀. À kɨ nzhyə̂ e pə Tǎ ze nɨ ze.

³⁷Ndwuumə̀ nɨ a lə̀ pənə amwuə nkwùə̀ Noà, a ndwuumə̀ nɨ a ghǎ pə nkwùə̀ nɨ Moonə̀ Ŋwùə̀ a ghǎ tô la.

³⁸Tyìʼə̀ tsaʼnə a lə̀ pyə̀nə mbə nchyə ghǎ mbòŋə̀ kẅupə̀ àtwuə̀ ɨ̀shyə̂ la, pànə̀ lə̀ mə ndzɨghə̀ nkɨ nô, ndzoʼò pə̀ngyə̌, nkɨ mə ŋŋâ ɨ̀poonə̀ ɨ̀pobə amwuə mɨ̀ndâ mɨ nɨ̀zoʼò, mbyàa amwuə njyə̂ za zhyə̀ nɨ Noà a lə̀ kwuunə̀nə amwuə àpaŋə̀,

³⁹ka pobə lə̀ zhyə̂ a ghobə ànwùə̀ àtse tə mbyàa nkwùə̀ nɨ nchyə lə̀ zə̀ənə ghobə. A ndwuumə̀ nɨ a ghǎ pə amwuə nkwùə̀ za nɨ Moonə̀ Ŋwùə̀ a ghǎ tô la.

⁴⁰Mbyàŋnə̀ ɨpaa ghǎ pə fàʼà amwuə ɨ̀swùumə, pɨ lòo a taʼà ngwaʼà a taʼà.

⁴¹Pə̀ngyə̌ pɨpaa ghǎ pə ghòʼò àpaanə̀, pɨ̀ tô ndòo a taʼà ngwaʼà a taʼà.

⁴²“Lenəla nɨ̀ nwuunə̀ a nɨ̀lyìinə̀ ntiinə ka nɨ̀ zhyə̂ wɨghə nkwùə̀ nɨ masàa wɨghə à ghǎ ntô.

⁴³Nɨ̀ zhyə̂ ɨ̀shìʼnə̀ lo ngàŋə̀ ndâ a pə la nzhyə̂ nkwùə̀ nɨ ɨ̀ndzə̀ərə̀ â tô nɨ ɨ̀twuʼə̀ yi ǎ lyə̂ a nɨ̀lyìinə̀ a nɨ pyabə̀ ndâ e za mbə̀ʼə ɨ̀ndzə̀ərə̀ a kaŋə pəʼə̀ a zèrə kwuunə̀ amwuə.

⁴⁴Nɨ ndwuumə̀ wə̀ nɨ̀ pə nchwuʼtə̀ mbɨ̀ŋmə̀ ɨ̀zɨghə ntiinə Moonə̀ Ŋwùə̀ a ghǎ ntô la amwuə nkwùə̀ nɨ ka nɨ̀ mə nkwàŋə̀ wɨghə lo mbə̀ʼə a tô.”

⁴⁵“A ɨ̀wə̌ nɨ à pənə ngàŋə̀ àfàʼà nɨ à wa nfàʼà nɨ ntɨŋmə̀ e ɨ̀tsùmə̀ mbə nɨ àzhìʼtə̀? A ẅùə̀ wa nɨ masàa e à ŋânə pə̀ənə̀ ɨ̀pe lo â twuʼtə̀ ŋŋâ a ghobə nɨ mɨ̀zɨghə̀ amwuə ngotə nkwùə̀ mɨ̀zɨghə̀?

⁴⁶Ǎ pòŋə̀ ambo ngàŋə̀ àfàʼà ẅèrə wa nɨ masàa e ǎ kwə̂ tsirə̀ e â mə nfàʼà nɨ ndwuumə̀ ẅèrə wə̀.

⁴⁷Ǹshwəŋə̀ tyìʼə̀ nkǔŋə nkuŋə ambo pɨghə lo, masàa e wa ǎ tyiʼə̀ ghɨ̀rə̀ a mə ntyiʼə̀ nnaŋə̀ ɨ̀pwuumə̀ ɨ̀pe ɨ̀tsùmə̀.

⁴⁸La, ngàŋə̀ àfàʼà ghù tɨ̀pòŋə̀ wa a tə shwəŋə̀ ambo ɨ̀pɨ̀ŋmə̀ e lo, masàa mə̀ à pɨ lyàrə̀,

⁴⁹lenəla mbìʼnə̀ a nɨ kəʼə̀ a zhyə̀ ngàŋə àfàʼà, mmə ndzɨghə̀ nkɨ nnô pobə ɨ̀pàarə̀ mɨ̀lùʼù,

⁵⁰yi masàa e wa à pɨ tô amwuə njyə̂ za nɨ ka à lə̀ pə mbyabə̀ e la pobə nkwùə̀ za nɨ ka à zhyə̂ e.

⁵¹Masàa e wa à pɨ tsɨ̀nkə̀ ngəʼə̀ àtwuə̀ ze, lòo e ghə̀ chyâ amwuə ngàŋə àpə̀grə̀, alyiʼə gha nɨ pɨ̌ yìi kɨ kwurə̀ mɨsoŋə ghu la.”