Read Pinyin Matyù 26 Bible Online

Matyù 26 - Pinyin bible

Matyù 26

¹Nkwùə̀ nɨ Yěsû à lə̀ myàanə̀nə a nɨ shwəŋə̀ mɨ̀nwùə̀ mə mɨ̀tsùmə̀, à lə̀ shwəŋə̀ ambo ɨ̀zùŋə̀ ndzùmə̀ ɨ̀pe lo,

²“Tsaʼnə nɨ̀ zhyə̂nə, à tyiʼə̀ ngoŋə̀ njyə̂ ɨpaa Nɨ̀ghaʼà Àlàŋə̀ Mmyàʼtə̀ â tô, pɨ̀ ŋâ a Moonə̀ Ŋwùə̀ lo pɨ̀ kẅùumə̀ aŋunə àtɨ̀ghə pànkə̀nə.”

³Nkwùə̀ ghu pɨ̀fò màʼà Nẅùə̀ pobə pɨ̀lɨ̀ŋmə̂ lə̀ pwùumə̀ a ntoʼò ɨ̀fò Kayafàsə̀, nɨ à lə̀ pənə àtwuə̀ pɨ̀fò màʼà Nẅùə̀,

⁴mbyantə̀ a nɨ kô Yěsû a ndzùmə̀ ndzùmə̀ kɨ zhwuutə̀ e.

⁵La pobə lə̀ shwəŋə̀ lo, “Kò a pə e nkwùə̀ nɨ̀ghaʼà wə̀, ntiinə pànə̌ pwùə̀ mɨ̀làʼà.”

⁶Nkwùə̀ nɨ Yěsû à lə̀ pənə a Betanì a ndâ Shimùnə̀ nɨ à lə̀ pənə ngàŋə̀ àkɨ̀kẅinə mmə ndzɨghə̀,

⁷mə̀ngyə̌ ɨ̀tse à lə̀ tô ambo ze ntwuʼtə̀ mɨ̀ghurə̀ mɨ àzhyǎ amwuə məndzìrə̀ nɨ pɨ tsùŋə̀nə nɨ àlàbastà nkẅìrə̀ a mèrə àtwuə̀ ze.

⁸Nkwùə̀ nɨ ɨ̀zùŋə̀ ndzùmə̀ ɨ̀pe lə̀ zəənə̀nə ànwùə̀ nɨ mə̀ngyə̌ wə̀ a ghɨ̀rə̀nə, mɨ̀ntɨŋmə̀ ɨ̀mobə zaŋə̀, pobə pyiitə̀ lo, “À tsə̀ŋə̀ a mèrə aŋunə àkə?

⁹Pɨ lə̀ pə shwùunə̀ mɨ̀ghurə̀ mə nɨ nkabə̀ noʼnə ŋŋâ ambo ngàŋə àfumə̀!”

¹⁰Tsaʼnə Yěsû à lə̀ zhyə̂nə ànwùə̀ nɨ pobə mənə nshwəŋə̀ la, à lə̀ shwəŋə̀ ambo pobə lo, “Nɨ̀ tòmnə̀ a mə̀ngyə̌ wə̀ aŋunə àkə? À ghɨ̀rə̀ la ànwùə̀ ɨ̀shìʼnə̀ ambo mɨ̀ŋə̀.

¹¹Ngàŋə àfumə̀ za mbə pɨghə pɨ pobə nkwùə̀ ɨ̀tsùmə̀ la ngə̀ aŋunə mɨ̀ŋə̀ ka mbə pə mə pə̀ənə̀ nkwùə̀ ɨ̀tsùmə̀.

¹²À kẅìrə̀ mɨ̀ghurə̀ mɨ àzhyǎ mə aŋunə mɨ̀ŋə̀ la a nɨ tsùnkə̀ mbɨ̀ŋmə̀ zaʼà pɨ̀ pòŋə̀ ghǎ tẅəŋə̀ mə̀.

¹³Tɨ̀tsòŋə̀ wə̀, ngwə̀ nshwəŋə̀ a wɨghə tyìʼə̀ nkǔŋə nkuŋə lo, alyiʼə àtsùmə̀ amwuə àtwuə̀ ɨ̀shyə̂ nɨ pɨ ghǎ tiitə̀ pə̀ənə̀ nɨ ntwuumə̀ ghù ɨ̀shìʼnə̀ wə̀ ghu, pɨ ghǎ shwəŋə̀ ànwùə̀ nɨ à ghɨ̀rə̀nə lə, tyiʼə̀ mə kẅempə̀ e.”

¹⁴Taʼà àzùŋə̀ ndzùmə̀ a Yěsû amwuə ɨ̀zùŋə̀ ndzùmə̀ ɨ̀pe pa ntsòbə̀ ɨpaa a laʼa ndèrə̀ ambo pɨ̀fò màʼà Nẅùə̀

¹⁵ntyiʼə̀ shwəŋə̀ lo, “Nɨ̌ ŋâ àkə ambo mɨ̀ŋə̀ n̂shwùunə̀ a Yěsû ambo pɨghə?” Pobə ŋâ e nɨ pɨ̀silbà mɨ̀ghumə̀ mɨntarə.

¹⁶A nɨ furə̀ nkwùə̀ ghu, Yudà à lə̀ mə nnaŋə̀ àlàŋə a nɨ shwùunə̀ a Yěsû ambo pobə.

¹⁷A pə ntsàambyə̀ njyə̂ a nɨ zɨghə̀ àpaanə̀ tɨ mbyə, ɨ̀zùŋə̀ ndzùmə̀ Yěsû tô ambo ze mbyiitə̀ lo, “Wə̀ tàʼà lo pəə tsùŋə̀ la alyiʼə àkə ambo ghò a nɨ zɨghə̀ mɨ̀zɨghə̀ mɨ Àlàŋə̀ Mmyàʼtə̀?”

¹⁸Yěsû a kẅùə̀ ambo pobə lo, “Nɨ̀ lèrə̀ ambo ŋònə̀ ɨ̀tse amwuə mbòmpə àlaʼà ngẅùunə nshwəŋə̀ ambo ze lo, ‘Ɨ̀nèrə̀ à shwəŋə̀ lo, Nkwùə̀ mə̀ ɨ̀ paatə̀. Mbɨ zɨghə̀ mɨ̀zɨghə̀ mɨ Àlàŋə̀ Mmyàʼtə̀ pəə pɨ ɨ̀zùŋə̀ ndzùmə̀ ɨ̀pâ la a ndâ ghò.’”

¹⁹Lenəla ɨ̀zùŋə̀ ndzùmə̀ Yěsû lə̀ ghɨ̀rə̀ tsaʼnə à lə̀ tiitə̀nə a ghobə ntsùŋə̀ mɨ̀zɨghə̀ mɨ Àlàŋə̀ Mmyàʼtə̀ mə.

²⁰A lə̀ pə nkwùə̀ nkwə̌, Yěsû pobə ɨ̀zùŋə̀ ndzùmə̀ ɨ̀pe ntsòbə̀ ɨpaa nwuunə̀ aŋunə tepèrə̀ a nɨ zɨghə̀.

²¹Tsaʼnə pobə lə̀ mənə ndzɨghə̀, Yěsû a lə̀ shwəŋə̀ ambo pobə lo, “Ǹshwəŋə̀ tyìʼə̀ nkǔŋə nkuŋə ambo pɨghə lo, taʼà ŋwùə̀ amwuə pɨghə ǎ shwùunə̀ mə̀.”

²²Pobə lə̀ pə nɨ àsòmnə̀ tɨsɨŋnə, ntyiʼə̀ mbyiitə̀ moʼo moʼo ambo ze lo, “La mɨ̀ŋə̀ nɨ Ndòʼnə̀mbyə̂?”

²³A kẅùə̀ lo, “Ŋònə̀ wa nɨ à chyânə àpô e amwuə àkaŋə̀ pəə ze a taʼà nkwùə̀ la ŋònə̀ nɨ ǎ shwùunə̀ mə̀.

²⁴Moonə̀ Ŋwùə̀ à ghǎ kwɨghə̀ tyìʼə̀ tsaʼnə àŋwàʼnə̀ Nẅùə̀ a lə̀ shwəŋə̀nə mbə̀ʼə e. La ngəʼə̀ ɨ̀ chyə̂ aŋunə ŋònə̀ wa ẅùə̀ nɨ à pɨ shwùunə̀ Moonə̀ Ŋwùə̀! A lə̀ pòŋə̀ lo kò pɨ pyə̂ e a ŋònə̀ ẅèrə wə̀.”

²⁵Yudà ŋònə̀ nɨ à lə̀ pənə a nɨ shwùunə̀ e a pyiitə̀ lo, “Masàa, ǹkwàŋə̀ lo ka wə̀ shwəŋə̀ o la a gha?” Yěsû a kẅùə̀ ambo ze lo, “Wə̀ shwəŋə̀ mə.”

²⁶Tsaʼnə Pobə lə̀ mənə ndzɨghə̀, Yěsû a piinə̀ àpaanə̀, ŋŋâ a mɨyàa ambo Nẅùə̀, mbiʼtə̀ a zèrə, ŋŋâ ambo ɨ̀zùŋə̀ ndzùmə̀ ɨ̀pe, nshwəŋə̀ ambo pobə lo, “Nɨ̀ kò nkwurə̀, lə̌ mbòbə̀ mbɨ̀ŋmə̀ mə̀.”

²⁷Lenəla, a pìʼì a tɨtoʼo, nchàʼtə̀ a Nẅùə̀ ŋŋâ a mɨyàa, ŋŋâ ambo pobə, nshwəŋə̀ ambo pobə lo, “Pɨghə pɨ̀tsùmə̀ nô amwuə tɨtoʼo wə̀.

²⁸Lə̌ àləəmə̀ mə̀, a nɨ wàrə̀ ɨ̀kàanə̀ ghù shwuə̀, nɨ a lə̀ kẅìnə̀nə àtwuə̀ nɨ pànə̀ pɨ̀noʼnə a nɨ lə̀ənə̀ a tɨ̀pòŋə̀ ɨghobə.

²⁹Ǹshwəŋə̀ wɨghə lo, a nɨ pìʼnə̀ tɨ̀tsòŋə̀ wə̀ mbə̀ʼə m̀bòŋə̀ chi nô mə̀ mɨ̀lùʼù mɨ àtɨ̀ghə mɨ̀ntàamə mɨ̀lùʼù mə apə̀ tə mbyàa njyə̂ za nɨ mbɨ ghǎ kẅirə̀ nô a mɨ shwuə̀ pə̀ənə̀ amwuə alyiʼə nɨ̀fò Tǎ ɨwəə.”

³⁰Lenəla, pobə lə̀ zòbə̀ nchyə nfurə̀ ndèrə̀ a Mbarə̀ Olìvə̀.

³¹Yěsû a tyiʼə̀ nshwəŋə̀ ambo pobə lo, “Pɨghə pɨ̀tsùmə̌ kɨ̀ɨrə̀ myàʼtə̀ mə̀ nɨ ɨ̀twuʼə̀ sìnə̀ wə̀, ntiinə àŋwàʼnə̀ Nẅùə̀ a shwəŋnə̀ lo, ‘Mbɨ zhwuutə̀ a ɨ̀ndzə̂ mɨ̀mbyə̂, mɨ̀mbyə̂ taanə̀ nkɨ̀ɨrə̀.’

³²La nkwùə̀ za nɨ mbɨ zhwuumə̀ a nɨ̀wɨghə̀ la, ǹgǎ lèrə̀ àlaʼà Galìlyə̂ a mbyə̀ pɨghə.”

³³Pità a kẅùə̀ lo, “Ŋwùə̀ ntsùmə̀ à tə pə twuunə̀ o, ǹdaʼa ntwuunə̀ mə̀ ghò apə̀.”

³⁴Yěsû a kẅùə̀ ambo Pità lo, “Ǹtiitə̀ o nɨ nkǔŋə nkuŋə lo ankəʼə à ghǎ kɨ toŋə̀ nɨ ɨ̀twuʼə̀ sìnə̀ wə̀, nɨ wə̀ twuunə̀ mə mə̀ nkwùə̀ ɨtarə.”

³⁵La Pità a shwəŋə̀ lo, “A tə pə zhyə̀ nɨ mbə̀ʼə ǹkwɨghə̀ pùu, ǹdaʼa ntwuunə̀ mə̀ a ghò apə̀.” Lenəla, pyə̀ ɨ̀zùŋə̀ ndzùmə̀ kɨ nshwəŋə̀ tyìʼə̀ a lenə.

³⁶Yěsû pobə ɨ̀zùŋə̀ ndzùmə̀ ɨ̀pe pa ghə̀ mbyàa alyiʼə nɨ pɨ lə̀ mənə nfuŋə̀ nɨ Gethsemane, a shwəŋə̀ ambo pobə lo, “Nɨ̀ nwuunə̀ a ɨ̀shyə̂ nɨ̀ghə̂ n̂dèrə̀ a ndzìnə yì ngə̀ nchàʼtə̀ a Nẅùə̀.”

³⁷À lə pə nɨ àsòmnə̀ ghobə ntòmnə̀ tsaʼnə à lə̀ lòonə Pità pobə ɨ̀poonə̀ pɨ Zebedì pə ɨpaa pobə pɨ pobə mə ndèrə̀.

³⁸Lenəla, a shwəŋə̀ ambo pobə lo, “Ntɨŋmə̀ mə̀ ɨ wə̀ ndẅenə̀ nɨ àsòmnə̀ amwuə ndwuumə̀ nɨ mbə̀ʼə ǹkwɨghə̀. Nɨ̀ ghoŋə̀ a nɨ̀ghə̂ mmə nchàʼtə̀ a Nẅùə̀ pə̀ənə̀.”

³⁹À lə̀ nyaʼa ndèrə̀ nɨ mbyə̀ nkunə̀ a ɨ̀shyə̂ àkùbəkubə̀, nchàʼtə̀ a Nẅùə̀ nshwəŋə̀ lo, “Tǎ ɨwəə, àlàŋə a pə ghu a nɨ kẅiirə̀ ndoŋə̀ ngəʼə̀ zə̀ ambo mɨ̀ŋə̀ wə̀ kẅiirə̀! La, kò wə̀ ghɨ̀rə̀ ǹgɨ̀rə̀ pə tsaʼnə ǹkòŋə̀nə, ghɨ̀rə̀ n̂gɨ̀rə̀ pə tsaʼnə wə̀ kòŋə̀nə.”

⁴⁰Tsaʼnə Yěsû à lə̀ kẅirə̀nə ntô ambo ɨ̀zùŋə̀ ndzùmə̀ ɨ̀pe, a zəənə̀ pobə mə ndyə̂ a ghobə. A fuŋə̀ a Pità nshwəŋə̀ ambo ze lo, mbə̀ʼə ka nɨ̀ nwuunə̀ wɨghə a nɨ̀lyìinə̀ pə̀ənə̀?

⁴¹Nɨ̀ nwuunə̀ a nɨ̀lyìinə̀, mmə nchàʼtə̀ a Nẅùə̀ njiilo, kò nɨ̀ kunə̀ amwuə àkwàʼnə̀. Ntɨŋmə̀ ɨ wə̀ nkòŋə̀ a nɨ ghɨ̀rə̀ ànwùə̀ nɨ a təəmə̀nə la, mbòbə̀ mbɨ̀ŋmə̀ ɨ̀ tyiʼə̀ mborə̀.

⁴²À lə̀ kẅirə̀ ndèrə̀ ngə̀ a nɨ chàʼtə̀ a Nẅùə̀ nshwəŋə̀ lo, “Tǎ ɨwəə, a lə̀ pə pə zhyə̀ nɨ mbə̀ʼə ka wə̀ kẅiirə̀ o ndoŋə̀ ngəʼə̀ zə̀ ambo mɨ̀ŋə̀ ndàŋə̀ e lo ǹnô a zèrə, wə̀ ghɨ̀rə̀ tsaʼnə wə̀ kòŋə̀nə.”

⁴³Nkwùə̀ nɨ à kẅirə̀nə ntô, à lə̀ chi nkɨ ntsirə̀ a ghobə pobə mə ndyə̂, ntiinə pɨlô à lə̀ lẅenə̀nə ɨ̀myə̂ ɨ̀mobə.

⁴⁴Lenəla, Yěsû a myàʼtə̀ a ghobə nchi nkẅirə̀ ndèrə̀ ngə̀ nchàʼtə̀ a Nẅùə̀, nshwəŋə̀ tyìʼə̀ ànwùə̀ nɨ à pyə̀nə mmə shwəŋə̀.

⁴⁵À lə̀ kẅirə̀ ntô ambo ɨ̀zùŋə̀ ndzùmə̀ ɨ̀pe nshwəŋə̀ ambo pobə lo, nɨ̀ wə̀ mbirə̀ ndyə̂ nzhwùutə̀ wɨghə? Naŋə̀! Nkwùə̀ ɨ̀ kùʼù lo pɨ̀ ŋâ a Moonə̀ Ŋwùə̀ ambo ngàŋə ngɨ̀rə̀ ànwùə̀ tɨ̀pòŋə̀.

⁴⁶Nɨ̀ lòo a ɨ̀shyə̂ pə̀ənə̀ lèrə̀, ntiinə ŋònə̀ nɨ ǎ shwùunə̀ mə̀ à wə̀ ntô.

⁴⁷Tsaʼnə à lə̀ pirə̀nə mmə nshwəŋnə̀ la, Yudà nɨ à lə̀ pənə taʼà ŋwùə̀ amwuə ɨ̀zùŋə̀ ndzùmə̀ ɨ̀pe pa ntsòbə̀ ɨpaa a tô. À lə̀ tô pobə àpùŋə̀ pə̀ənə̀ yè ẅùunə nɨ pɨ̀fò màʼà Nẅùə̀ nɨ pɨ̀lɨ̀ŋmə̂ pɨ àlaʼà lə̀ tsàanə. Pobə lə̀ twuʼtə̀ pɨ̀mɨnẅuə pɨ ntsòo pobə mɨ̀pòrə̀.

⁴⁸A lə̀ kɨ pə nkwùə̀ ghu la nɨ Yudà à nèrə̀ mə àlènə̀ ambo pobə lo, “Ŋònə̀ wa nɨ mbɨ kô kampə̀ la ŋònə̀ ghu. Lenəla nɨ̀ kô e.”

⁴⁹Yudà à lə̀ zùŋə̀ ntə̂ àlàŋə ntô ambo Yěsû, nchàʼtə̀ e, nkô e nkampə̀.

⁵⁰Yěsû a shwəŋə̀ ambo ze lo, “Ngɨ̀ɨnə̀ mə̀, fàʼà ngɨ̀rə̀ ànwùə̀ nɨ wə̀ tônə aŋunə.” Pànə̀ pa nɨ pobə pɨ Yudà lə̀ tônə la zùŋə̀ ntô nkô e.

⁵¹Tsaʼnə pobə lə̀ tônə la, taʼà àzùŋə̀ ndzùmə̀ Yěsû à lə̀ tsoʼò a mɨnẅuə ntsòo e ntserə̀ nɨtugrə nɨ ngàŋə̀ àfàʼà àtwuə̀ pɨ̀fò màʼà Nẅùə̀.

⁵²Yěsû à lə̀ shwəŋə̀ ambo ze lo, “Kẅirə̀ nkẅuə̀ a mɨnẅuə ntsòo wa alyiʼə nɨ à furə̀nə, ntiinə ŋònə̀ wa ntsùmə̀ nɨ à tsoʼnə a mɨnẅuə amwuə ngwaanə̀ à ghǎ kɨ kwɨghə̀ la nɨ̀wɨghə̀ mɨnẅuə.

⁵³Ka nɨ̀ zhyə̂ a wɨghə lo mbə̀ʼə m̀byiitə̀ àyèmpə̀ ambo Tǎ ɨwəə aŋunə àtùmə nkwùə̀, a tsàa mə̀ nɨ ɨ̀pùŋə̀ pəngèrə̀ ambo mɨ̀ŋə̀ nɨ làŋə̀nə ɨ̀pùŋə̀ ntsòbə̀ ɨpaa?

⁵⁴Ǹtə pəla ngɨ̀rə̀ a lenə yi ànwùə̀ nɨ pɨ ŋwàʼnə̀nə amwuə àŋwàʼnə̀ Nẅùə̀ a gha ntyiʼə̀ nfurə̀ mbə nkǔŋə nkuŋə la ɨla?”

⁵⁵Yěsû a shwəŋə̀ a lenə la mbə̀ŋə̀ mbyiitə̀ àpùŋə̀ pə̀ənə̀ za lo, “Nɨ̀ tô nɨ mɨ̀pòrə̀ ghobə pɨ̀mɨnẅuə pɨ ntsòo a nɨ kô mə̀ tsaʼa nɨ̀ wə̀ ntô kô a ɨ̀ntuŋə̀ ɨ̀shyə̂? Ndə̀ mə nnèrə̀ mɨ̀nwùə̀ njyə̂ ɨ̀tsùmə̀ a Ndâ Mɨ̀shwàʼà Nẅùə̀ la ka nɨ̀ kô wɨghə a gha.

⁵⁶La mɨ̀nwùə̀ mə mɨ̀tsùmə̀ lə̀ furə̀ a nɨ lẅenə̀ mɨ̀nwùə̀ nɨ ngàŋə ntwuumə̀ Nẅùə̀ lə̀ ŋwàʼnə̀ mə amwuə àŋwàʼnə̀ Nẅùə̀.” Ɨ̀zùŋə̀ ndzùmə̀ ɨ̀pe ɨ̀tsùmə̀ lə̀ myàʼtə̀ e nkɨ̀ɨrə̀ a ghobə.

⁵⁷Pànə̀ nɨ pɨ lə̀ kônə a Yěsû lə̀ lòo e ndèrə̀ ambo Kayafàsə̀ nɨ à lə̀ pənə àtwuə̀ pɨ̀fò màʼà Nẅùə̀; pɨ̀nèrə̀ mbòomə pobə pɨ̀lɨ̀ŋmə̂ pɨ àlaʼà lə̀ kɨ nshwatə̀ alyiʼə ghu.

⁵⁸Pità à lə̀ mə ndzùŋə̀ e la ntyiʼə̀ ntəəmə̀ a ntyə̌ sàa tə mbyàa a àtɨ̀taa àtwuə̀ pɨ̀fò màʼà Nẅùə̀. À lə̀ kwuunə̀ nnwuunə̀ ghobə pɨ̀soyì nɨ pobə mənə mbyabə̀ Ndâ Mɨ̀shwàʼà Nẅùə̀ a nɨ zəənə̀ ànwùə̀ nɨ pɨ̌ ghɨ̀rə̀ aŋunə Yěsû.

⁵⁹Pɨ̀fò màʼà Nẅùə̀ pobə pɨ Kansèrə̀ ntsùmə̀ lə̀ tyiʼə̀ ntàʼà àlàŋə a nɨ tə̂ ànwùə̀ àtwuə̀ ze mbə̀ʼə zhwuutə̀ e.

⁶⁰Pànə̀ pɨ̀noʼnə lə̀ patə mbə pə pɨ̀ndzəənə̀ zəənə̀nə pɨ pɨ̀chwìrə̀ aŋunə ze la, ka pɨ kɨ ndzəənə̀ e àwɨ̀ghə̀ ànwùə̀ e. Pɨ lə̀ kɨ lẅùutə̀, pànə̀ pɨpaa làŋə̀ a mbyə̀ nshwəŋə̀ lo,

⁶¹“Ŋònə̀ wə̀ à shwəŋə̀ lo, ‘Mbə̀ʼə ǹshàʼtə̀ Ndâ Mɨ̀shwàʼà Nẅùə̀, nkẅirə̀ nkorə̀ a zèrə aŋunə njyə̂ ɨtarə.’”

⁶²Lenəla àtwuə̀ pɨ̀fò màʼà Nẅùə̀ a lə̀ lòo a ɨ̀shyə̂ mbyiitə̀ a Yěsû lo, “Ka wə̀ pə o nɨ ànwùə̀ àtse a nɨ shwəŋə̀ mbə̀ʼə mɨ̀nwùə̀ mə nɨ pɨ shwəŋə̀nə aŋunə ghò lanə?”

⁶³La ka Yěsû a lə̀ shwəŋə̀ e ànwùə̀ àtse. Àtwuə̀ pɨ̀fò màʼà Nẅùə̀ a chi nshwəŋə̀ ambo ze lo, “Tsə̀əmə̀ aŋunə nɨ̀linə̀ nɨ Nẅùə̀ lo ghò la Moonə̀ Nẅùə̀ ghù ndzoʼnə wa.”

⁶⁴Yěsû a kẅùə̀ lo, “Ee, a chyə̂ tsaʼnə wə̀ shwəŋə̀nə la. La m̀mə nshwəŋə̀ ambo pɨghə pɨ̀tsùmə̀ lo a nɨ pìʼnə̀ tɨ̀tsòŋə̀ nɨ̌ zəənə̀ a Moonə̀ Ŋwùə̀ â nwuunə̀ a pàa àpô Nẅùə̀koʼò yè zɨghə̀nə nɨ a pənə nɨ ɨ̀tɨ̀ŋnə̀, â furə̀ a nɨ̀pwuurə̀ mmə nshwuʼə̀ ntô amwuə mbàʼà.”

⁶⁵Tsaʼnə à lə̀ shwəŋə̀nə a lenə la àtwuə̀ pɨ̀fò màʼà Nẅùə̀ a sìitə̀ ɨtsəʼə ɨ̀pe nshwəŋə̀ lo, “À zòomə̀ a Nẅùə̀! Nɨ̀ zuʼù tsaʼnə à zòomə̀nə a Nẅùə̀. Pə̀ənə̀ chi ntàʼà a ndzəənə̀ zəənə̀nə aŋunə àkə?

⁶⁶Nɨ̀ kwàŋə̀ àzɨghə lo àkə?” Pobə kẅùə̀ lo, “À kùʼnə̀ a nɨ kwɨghə̀.”

⁶⁷Lenəla, pobə lə̀ tẅùə̀ mɨ̀tẅuə̀ a ɨ̀sɨghə̀ ze ntsòo e nɨ mbô. Pɨ̀tse pànə̀ lùbə̀ e,

⁶⁸nshwəŋə̀ lo, “Kristù, tsaʼnə wə̀ pənə Ghù Ndzoʼnə wa la, tiitə̀ a wəə nɨ ŋònə̀ nɨ à tsòonə o.”

⁶⁹Pità a lə̀ nwuunə̀ a àpyìinə amwuə àtɨ̀taa, àtwuə̀ pɨ̀fò màʼà Nẅùə̀. Taʼà ngàŋə̀ àfàʼà àtwuə̀ pɨ̀fò màʼà Nẅùə̀ ghu mə̀ngyə̌ a lə̀ pə a àpyìinə. A lə̀ tô ambo ze nshwəŋə̀ lo, “Wə̀ lə̀ kɨ mbə àzô pɨghə Yěsû nɨ à furə̀nə a Galìlyə̂ la.”

⁷⁰La Pità a twuunə̀ e ànwùə̀ ghu a mbyə̀ pobə pɨ̀tsùmə̀, nshwəŋə̀ lo, “Ka ǹzhyə̂ mə̀ ànwùə̀ nɨ nɨ̀ wə̀ nshwəŋə̀ lə.”

⁷¹À lə̀ furə̀ ndèrə̀ a ntswùə̀ àpùʼù, ghùtse ngàŋə̀ àfàʼà àtwuə̀ pɨ̀fò màʼà Nẅùə̀ ghù mə̀ngyə̌ a kɨ chi ndzəənə̀ e, nshwəŋə̀ ambo pə̀ənə̀ alyiʼə ghu lo, “Ŋònə̀ wə̀ à lə̀ pə pobə Yěsû nɨ à furə̀nə a Nazarètə̀ la.”

⁷²Pità a kɨ nchi ntwuunə̀ e, ntsə̀əmə̀ lo, “Ka ǹzhyə̂ mə̀ a ŋònə̀ wə̀.”

⁷³A kɨ pə tyìʼə̀ lə, pànə̀ nɨ pɨ lə̀ təəmə̀nə alyiʼə ghu lèrə̀ ambo Pità nshwəŋə̀ ambo ze lo, “A nkǔŋə nkuŋə lo ghò la taʼà ŋònə̀ ghu yɨ̀tse ntiinə ndwuumə̀ nɨ wə̀ wə̀ nshwəŋnə̀ ɨ nèrə̀ lo ghò la taʼà ŋwùə̀ ghu yɨ̀tse.”

⁷⁴Lenəla, à lə̀ pìʼnə̀ a nɨ fuŋə̀ mɨ̀ndòonə̀ àtwuə̀ ze, ntsə̀əmə̀ nshwəŋə̀ lo, “Ka ǹzhyə̂ mə̀ a ŋònə̀ ghu!” À lə̀ kɨ myàanə̀ a nɨ shwəŋnə̀, ankəʼə a toŋə̀.

⁷⁵Lenəla, Pità a kẅuumə̀ ànwùə̀ nɨ Yěsû à lə̀ shwəŋə̀nə lo, “Ankəʼə ǎ tô kɨ toŋə̀ nɨ wə̀ twuunə̀ mə mə̀ nkwùə̀ ɨtarə.” Lenəla, à lə̀ furə̀ a àpyìinə ngyìi ka mɨ̀zùŋə.