Read Pinyin Matyù 27 Bible Online

Matyù 27 - Pinyin bible

Matyù 27

¹Tsaʼnə njyə̂ ɨ̀ lə̀ laanə̀nə, pɨ̀fò màʼà Nẅùə̀ pɨ̀tsùmə̀ pobə pɨ̀lɨ̀ŋmə̂ pɨ àlaʼà lə̀ lòo àkwàŋə̀ a nɨ zhwuutə̀ a Yěsû.

²Pobə lə̀ korə̀ e ndòo e ngə̀ ŋŋâ ambo Palètə̀ nɨ à lə̀ pənə govɨnò.

³Yudà, ŋònə̀ nɨ à lə̀ shwùunə̀nə a Yěsû à lə̀ pə nɨ àsòmnə̀ nkwùə̀ nɨ à lə̀ zəənə̀nə lo pɨ lə̂ ɨ̀sàʼa lo zhwuutə̀ a Yěsû. Lenəla à lə̀ kẅirə̀ nkẅuə̀ pɨ̀silbà pa mɨ̀ghumə̀ mɨntarə ambo pɨ̀fò màʼà Nẅùə̀ pobə pɨ̀lɨ̀ŋmə̂ pɨ àlaʼà.

⁴À lə̀ shwəŋə̀ lo, “Ǹgɨ̀rə̀ ànwùə̀ tɨ̀pòŋə̀ a nɨ shwùunə̀ a ntsinyaŋə lo pɨ̀ zhwuutə̀.” Pobə kẅùə̀ lo, “Zèrə za a zəənə̀ a wəə nɨ àkə? La ànwùə̀ o.”

⁵Lenəla, Yudà à lə̀ màʼà nkabə̀ ghu amwuə Ndâ Mɨ̀shwàʼà Nẅùə̀, ndèrə̀ ndzùŋə̀ ngə̀ ntɨ̀ŋnə̀ e àtɨ̀ghə.

⁶Pɨ̀fò màʼà Nẅùə̀ piinə̀ nkabə̀ ghu nshwəŋə̀ lo, “Ka mbòomə a nèrə̀ e lo pɨ̀ nyàamə̀ nkabə̀ zə̀ amwuə nkabə̀ Ndâ Mɨ̀shwàʼà Nẅùə̀, ntiinə a nkabə̀ àləəmə̀.”

⁷Lenəla, pobə lə̀ pyiimə̀ a nɨ lòo nkabə̀ zə̀ ndzwuunə̀ àpàbə ɨ̀shyə̂ ɨ̀mboomə̀ mɨkɨŋə a nɨ tə ntẅəŋə̀ ngàŋə nɨ̀ghaanə̀ alyiʼə ghu.

⁸La ɨ̀sùmə nɨ pɨ pə mbirə̀ nfuŋə̀ àpàbə ɨ̀shyə̂ ghu tə mbyàa sìnə̀ nɨ “Àpàbə ɨ̀shyə̂ Àləəmə̀.”

⁹Lenəla, ànwùə̀ nɨ ngàŋə̀ ntwuumə̀ Nẅùə̀ Yèrə̀myâ à lə̀ shwəŋə̀nə a lə̀ lòo alyiʼə lo, “Pobə lə̀ lòo pɨ̀silbà pɨ̀ghu mɨ̀ghumə̀ mɨntarə, nɨ lə̀ pənə nkabə̀ nɨ pànə̀ pɨ Israel lə̀ naŋə̀nə lo ɨ̀ kùʼnə̀ a nɨ zwuunə̀ e ghu,

¹⁰ntyiʼə̀ ndòo a zèrə̀ ndzwuunə̀ àpàbə ɨ̀shyə̂ ɨ̀mboomə̀ mɨkɨŋə ghu, tsaʼnə Ndòʼnə̀mbyə̂ à tiitə̀nə mə̀.”

¹¹Yěsû à lə̀ təəmə̀ a mbyə̀ govɨnò pɨ̀Roman, a pyiitə̀ e lo, “Ghò la ɨ̀fò pɨ̀Jew?” Yěsû a kẅùə̀ lo, “Wə̀ shwəŋə̀ a lenə.”

¹²La, nkwùə̀ nɨ pɨ̀fò màʼà Nẅùə̀ pobə pɨ̀lɨ̀ŋmə̂ pə̀ àlaʼà lə̀ chyâ nɨ ɨ̀sàʼa aŋunə ze, ka a kẅùə̀ ànwùə̀ àtse.

¹³Palètə̀ à lə̀ tyiʼə̀ mbyiitə̀ e lo, “Wə̀ zuʼù mɨ̀nwùə̀ mə nɨ pɨ pə nshwəŋə̀ aŋunə ghò lanə?”

¹⁴La ka Yěsû a lə̀ kẅùə̀ a taʼà ànwùə̀. Ànwùə̀ zèrə zə a lə̀ kə̀ʼnə̀ a Govɨnò ka mɨ̀zùŋə.

¹⁵A lə̀ pə mbòomə lo amwuə nkwùə̀ Nɨ̀ghaʼà Àlàŋə̀ Mmyàʼtə̀, govɨnò a lə̀ chyə̂ a nɨ fuukə̀ a taʼà ngàŋə̀ ɨ̀tsaŋə̀ nɨ pɨ̀Jew lə̀ pyiitə̀nə.

¹⁶A pə nkwùə̀ ghu Barabbas a pə ghu, mbə ngàŋə̀ ɨ̀tsaŋə̀ nɨ pɨ lə̀ zhyə̂nə ɨ̀shìʼnə̀.

¹⁷Tsaʼnə àpùŋə̀ pə̀ənə̀ ghu a lə̀ shwatə̀nə la, Palètə̀ à lə̀ pyiitə̀ a ghobə lo, “Nɨ̀ tàʼà lo n̂fuukə̀ a ɨ̀wə̌ ŋŋâ nɨ pɨghə; A Barabbas kə̀ a Yěsû nɨ pɨ pa nfuŋə̀ nɨ Kristù la?”

¹⁸Mbə̀ʼnə à lə̀ zhyə̂ nkǔŋə nkuŋə lo, à lə̀ ghɨ̀rə̀ àghə̀ʼnə̀ lo pobə̂ lòo a Yěsû ntô ambo ze.

¹⁹Nkwùə̀ nɨ Palètə̀ a lə̀ nwuunə̀ nɨ aŋunə aləŋə ntsoʼtə̀ ɨ̀sàʼa, ngẅùə e a lə̀ tsàa ntwuumə̀ ambo zə lo, “Kò wə̀ ghɨ̀rə̀ ànwùə̀ àtse aŋunə ntsinyaŋə wa, ntiinə à lə̀ pə nɨ ɨ̀twuʼə̀ ndzəənə̀ ngəʼə̀ mbə̀ʼə e amwuə ndzə̀əmə̀ e.”

²⁰La pɨ̀fò màʼà Nẅùə̀ pobə pɨ̀lɨ̀ŋmə̂ pɨ àlaʼà lə̀ ghɨ̀rə̀ lo àpùŋə̀ pə̀ənə̀ ghu â ghɨ̀rə̀ lo Palètə̀ â myàʼtə̀ pə a Barabbas nzhwuutə̀ a Yěsû.

²¹Govɨnò à lə̀ pyiitə̀ a ghobə lo, “M̂myàʼtə̀ a ɨ̀wə̌ amwuə pànə̀ pə pɨpaa?” Pobə kẅùə̀ lo, “A Barabbas.”

²²Palètə̀ à lə̀ pyiitə̀ ambo pobə lo, “N̂tyiʼə̀ ngɨ̀rə̀ ɨla nɨ Yěsû nɨ pɨ pa nfuŋə̀ nɨ Kristù?” Pobə pɨ̀tsùmə̀ kẅùə̀ lo, “Kẅùumə̀ e aŋunə àtɨ̀ghə pànkə̀nə!”

²³Palètə̀ a pyiitə̀ ambo pobə lo, “Ntii àkə? Ànwùə̀ tɨ̀pòŋə̀ nɨ à ghɨ̀rə̀nə a àkə?” La pobə pɨ̀tsùmə̀ kyiinə̀ nɨ ɨ̀tɨ̀ŋnə̀ nshwəŋə̀ lo, “Kẅùumə̀ e!”

²⁴Nkwùə̀ nɨ Palètə̀ à lə̀ zəənə̀nə lo ka àpùŋə̀ pə̀ənə̀ ghu a mə mbyiimə̀ a ghobə ànwùə̀ nɨ à wə̀ nshwəŋə̀, mɨ̀làʼà mə ntàʼà furə̀, à lə̀ lòo nchyə nsùu mbô ɨ̀me a mbyə̀ pobə, nshwəŋə̀ lo, “Ka àpô mə̀ a pə e aŋunə nɨ̀wɨghə̀ ŋònə̀ wə̀, a ɨ̀sàʼa wɨghə!”

²⁵Pobə pɨ̀tsùmə̀ lə̀ kẅùə̀ lo, “Tyìʼə̀ àləəmə̀ e ǎ pə àtwuə̀ pəə farə ɨ̀poonə̀ ɨ̀pəə!”

²⁶Lenəla, à lə̀ fuukə̀ a Barabbas ŋŋâ ambo pobə ntyiʼə̀ nkəʼə̀ a Yěsû ŋŋâ lo pobə̂ ghə̀ nkẅùumə̀ e aŋunə àtɨ̀ghə pànkə̀nə.

²⁷Pɨ̀soyì pɨ Palètə̀ lə̀ lòo a Yěsû nkwuunə̀ amwuə ntoʼò ze, ntyiʼə̀ nfuŋə̀ a pyə̀ pɨ̀soyì pɨ̀noʼnə pɨ tô nkamnə̀ e.

²⁸Pobə lə̀ tsoʼtə̀ ɨtsəʼə ɨ̀pe ntyiʼə̀ mmàʼà atsəʼə yè pàŋə̀nə aŋunə ze.

²⁹Pobə lə̀ paʼà a tɨ̀làarə̀ pɨ̀fò nɨ pɨ̀kɨkobə ntuŋə̀ àtwuə̀ ze. Pobə lə̀ kɨ nchyâ àkɨ̀kàʼà àpô ze yè zɨghə̀nə, nkẅiʼtə̀ a mbyə̀ ze mmə nnyèŋə̀ e nshwəŋə̀ lo, “Nɨ̀chyə̂mbyə̂ o â sàa mbǎ ɨ̀fò pɨ̀Jew.”

³⁰Pobə lə̀ tẅùə̀ mɨ̀tẅuə̀ aŋunə ze nkẅiirə̀ àkɨ̀kàʼà za ambo ze ndòo nkəʼə̀ àtwuə̀ ze.

³¹Nkwùə̀ nɨ pobə lə̀ myàanə̀nə a nɨ nyèŋə̀ e, pobə lə̀ tsoʼò atsəʼə yè pàŋə̀nə za aŋunə ze ntyiʼə̀ mmàʼà ngotə ɨtsəʼə ɨ̀pe aŋunə ze. Lenəla, ntyiʼə̀ ndòo e a nɨ ghə̀ nkẅùumə̀ aŋunə àtɨ̀ghə pànkə̀nə.

³²Tsaʼnə pobə lə̀ pənə nfurə̀ ndèrə̀, pobə lə̀ pwùumə̀ a Shimùnə̀ ŋwùə̀ Sìrenə̀, lenəla, nkô e, ngɨ̀rə̀ a pìʼì àtɨ̀ghə pànkə̀nə ghu.

³³Pobə lə̀ ghə̀ mbyàa alyiʼə nɨ pɨ pa nfuŋə̀ nɨ Golgotà, nɨ ɨ̀sùmə pənə lo, “Alyiʼə àghòʼrə àtwuə̀”.

³⁴Nkwùə̀ nɨ pobə lə̀ pyàanə ghu, pobə lə̀ ŋâ mɨ̀lùʼù nɨ pɨ nyàamə̀nə nɨ àzwuumə̀ yè lẅùə̀nə nɨ pɨ pa nfuŋə̀ nɨ galə̀ ŋŋâ lo â nô; a zhwiʼì a mèrə ntwuunə̀ e a nɨ nô.

³⁵Pobə lə̀ kẅùumə̀ e aŋunə àtɨ̀ghə pànkə̀nə ntyiʼə̀ ntumə̀ ɨpirə a nɨ ghàbə̀ ɨtsəʼə ɨ̀pe a tɨ̀tɨ̀rə̀ pobə,

³⁶ndzùŋə̀ nnwuunə̀ a ɨ̀shyə̂ alyiʼə ghu a nɨ pyabə̀ e.

³⁷Pobə lə̀ ŋwàʼnə̀ ànwùə̀ nɨ pobə lə̀ ẅìimə̀nə e aŋunə, aŋunə àpàa àtɨ̀ghə lo, “Lə̌ Yěsû Ɨ̀fò Pɨ̀Jew,” mbaanə̀ aŋunə àtɨ̀ghə pànkə̀nə àtwuə̀ ze.

³⁸Pɨ lə̀ kɨ nkẅùumə̀ pɨ̀zə̀ərə̀ pɨpaa pobə pɨ Yěsû; taʼà a pə a pàa àpô ze yè zɨghə̀nə, taʼà a kɨ mbə a pàa àpô yè kẅàbə̀.

³⁹Pànə̀ nɨ pɨ lə̀ pənə ndàŋə̀, lə̀ nə̀ʼə̀ ɨ̀twuə̀ ɨ̀pobə, ntyiʼə̀ nnyèŋə̀ Yěsû,

⁴⁰nshwəŋə̀ lo, “Ghò wa nɨ wə̀ pənə shàʼtə̀ Ndâ Mɨ̀shwàʼà Nẅùə̀ kẅirə̀ poomə̀ aŋunə njyə̂ ɨtarə, chwarə̀ mbɨ̀ŋmə̀ o, nshwuʼə̀ aŋunə àtɨ̀ghə pànkə̀nə za, mbə̀ʼə wə̀ pəla mbə Moonə̀ Nẅùə̀!”

⁴¹Pɨ̀fò màʼà Nẅùə̀ nɨ pɨ̀nèrə̀ mbòomə nɨ pɨ̀lɨ̀ŋmə̂ pɨ àlaʼà lə̀ kɨ nnyèŋə̀ e nshwəŋə̀ lo,

⁴²“À lə̀ mə nchwarə̀ pə̀ənə̀ la, ka à pə chwarə̀ e mbɨ̀ŋmə̀ e! Ka lə pə e ɨ̀fò pànə̀ pɨ Israel yɨ̀ghu? Â shwuʼə̀ aŋunə àtɨ̀ghə pànkə̀nə zə pəə pòŋə̀ pyiimə̀ e!

⁴³À nùŋə̀ ntɨŋmə̀ e aŋunə Nẅùə̀, Nẅùə̀ â chwarə̀ e tɨ̀tsòŋə̀ wə̀ mbə̀ʼə a kɨ ntàʼà a nɨ chwarə̀ e, ntiinə à lə̀ shwəŋə̀ lo, ‘Ǹchyə̂ mbə Moonə̀ Nẅùə̀.’”

⁴⁴Mbaa pə pɨ̀zə̀ərə̀ pa nɨ pɨ lə̀ kẅùumə̀nə a ghobə pɨ Yěsû la lə̀ kɨ ndzòomə̀ e tyìʼə̀ a lenə.

⁴⁵Ndzùmə ɨ̀ lə̀ sinə̀ nnàanə̀ ɨlyiʼə ɨ̀tsùmə̀, a nɨ pìʼnə̀ aŋunə pɨ̀nẅùumə̀ ntsòbə̀ ɨpaa nɨ àzhwùunə ngə̀ mbyàa aŋunə pɨ̀nẅùumə̀ pɨtarə a ndzə̀ŋə̀ nẅùumə̀.

⁴⁶A lə̀ kɨ pə tsaʼa pɨ̀nẅùumə̀ pɨtarə a ndzə̀ŋə̀ nẅùumə̀, Yěsû à lə̀ kyiinə̀ nɨ ngyə̀ ntɨ̀ŋnə̀ nshwəŋə̀ lo, “Eli, Eli, lama sàbatanì?” Zhyə̀ nɨ ɨ̀sùmə ɨ̀ pənə lo, “Nẅùə̀ mə̀, Nẅùə̀ mə̀, wə̀ waʼà mə̀ mbə̀ʼə àkə?”

⁴⁷Pànə̀ pɨ̀tse nɨ pɨ lə̀ təəmə̀nə alyiʼə ghu, pobə zuʼù tsaʼnə à lə̀ pənə nshwəŋnə̀, ntyiʼə̀ shwəŋə̀ lo, “À wə̀ nfuŋə̀ a Elijah.”

⁴⁸Tyìʼə̀ nkwùə̀ ghu, taʼà ŋwùə̀ ɨghobə ghùtse à lə̀ kɨ̀ɨrə̀ ngə̀ mbiinə̀ a kùntsa, ntsùbə̀ a ẅèrə amwuə mɨ̀lùʼù mɨ tsəətə̀nə nfàmnə̀ aŋunə àkɨ̀kàʼà ŋŋâ ambo Yěsû lo â nô.

⁴⁹La pyə̀ pànə̀ lə̀ shwəŋə̀ lo, “Myàʼtə̀ e ze nɨ ze, pə̀ənə̀ zəənə̀ lo Elijah ǎ tô chwarə̀ e lo.”

⁵⁰Yěsû à lə̀ chi nkyiinə̀ nɨ ngyə̀ ntɨ̀ŋnə̀; ndzùŋə̀ nkwɨghə̀.

⁵¹Nkwùə̀ ghu, atsəʼə nɨ a lə̀ ghàbə̀nə Ndâ Mɨ̀shwàʼà Nẅùə̀ yɨ̀ ngẅùunə a Yèrusalèmə̀ a lə̀ saanə̀ ɨ̀pàa ɨpaa nfurə̀ àtwuə̀ nshwuʼə̀ mbyàa a ɨ̀sùmə. Ɨ̀shyə̂ ɨ̀ lə̀ nə̀ʼnə̀, mɨ̀ghòorə shantə̀.

⁵²Mɨ̀shyə̀ lə̀ nyaʼkə̀, pànə̀ pɨ Nẅùə̀ nɨ pɨ kwɨghə̀ mə pə̀ʼkə̀ aŋunə nɨ̀wɨghə̀.

⁵³Pobə lə̀ furə̀ amwuə mɨ̀shyə̀ ɨ̀mobə nkwùə̀ nɨ Yěsû à lə̀ zhwuumə̀nə a nɨ̀wɨghə̀ la ndèrə̀ amwuə mbòmpə àlaʼà ngẅùunə yɨ̀ ndaanə̀nə. Pànə̀ pɨ̀noʼnə lə̀ zəənə̀ a ghobə nkwùə̀ nɨ Yěsû à lə̀ zhwuumə̀nə a nɨ̀wɨghə̀.

⁵⁴Nkwùə̀ nɨ àtwuə̀ pɨ̀soyì pobə pɨ̀soyì nɨ pobə lə̀ mənə mbyabə̀ a Yěsû lə̀ zəənə̀nə tsaʼnə ɨ̀shyə̂ ɨ̀ lə̀ mənə nə̀ʼnə̀ farə mɨ̀nwùə̀ mɨ̀tsùmə̀ nɨ mɨ lə̀ mənə nfurə̀, àkẅàrə̀ a lə̀ kwuunə̀ a ghobə. Pobə tyiʼə̀ nshwəŋə̀ lo, “A nkǔŋə nkuŋə lo ŋònə̀ wə̀ à lə̀ pə la Moonə̀ Nẅùə̀!”

⁵⁵Pə̀ngyə̌ pɨ̀noʼnə nɨ pə lə̀ furə̀nə a Galìlyə̂ ntô mmə ngyèmpə̀ a Yěsû, lə̀ təəmə̀ a ndyə̌ sàa nnaŋə̀ mɨ̀nwùə̀ nɨ mɨ lə̀ mənə ngɨ̀rə̀.

⁵⁶Amwuə pə̀ngyə̌ nɨ pɨ lə̀ pənə alyiʼə ghu à lə̀ pə Màriyà nɨ à lə̀ furə̀nə a Magdalà, nɨ Màriyà mǎ pɨ Jemə̀ pobə Jòsebə̀, farə mǎ pɨ ɨ̀poonə̀ pɨ Zebedì.

⁵⁷Nkwùə̀ nkwə̌ ɨ̀ lə̀ kùʼù, ngàŋə̀ nkabə̀ ɨ̀tse nɨ à lə̀ furə̀nə a Àrəmàtyâ nɨ̀linə̀ ɨ̀tse pə Jòsebə̀, nkɨ mbə àzùŋə̀ ndzùmə̀ Yěsû a tô,

⁵⁸ndèrə̀ ngə̀ ndoonə̀ àkwuə̀ Yěsû ambo Palètə̀. Lenəla, Palètə̀ a tyiʼə̀ nshwəŋə̀ lo, pɨ ŋâ àkwuə̀ a ghu ambo ze.

⁵⁹Jòsebə̀ a lə̀ lòo àkwuə̀ ghu, ndyibə̀ amwuə atsəʼə fuə yè shwuə̀ yè ɨ̀shìʼnə̀,

⁶⁰lenəla, nnùŋə̀ àkwuə̀ ghu amwuə nɨ̀shyə̀ ɨ̀tse tsɨ̀ shwuə̀ nɨ à lə̀ pyə̀nə ntsùnkə̀ nnùŋə̀ lo pɨ ghǎ ntẅəŋə̀ e amwuə; mbɨgrə̀ a maa nɨ̀ghòorə nkumnə̀ ntswùə̀ nɨ̀shyə̀ tsɨ̀ghu ndèrə̀ e.

⁶¹Màriyà nɨ à lə̀ furə̀nə a Magdalà pobə ẅùə̀ Màriyà lə̀ pə ghu nnwuunə̀ amwuə ẅùə̀ pàa mmə mbyabə̀.

⁶²Njyə̂ ɨ̀ lə̀ laanə̀ mbə njyə̂ àlaʼà pɨ̀Jew, pɨ̀fò màʼà Nẅùə̀ pobə pɨ̀Farìsî lèrə̀ ambo Palètə̀,

⁶³nshwəŋə̀ lo, “Masàa, pəə pə nkẅuumə̀ lo nkwùə̀ nɨ ngàŋə̀ àfɨ̀ghə̀ wə̀ à lə̀ pirə̀nə ghù ntɨ̀ŋnə̀, à lə̀ shwəŋə̀ lo, ‘Njyə̂ ghǎ làŋə̀ ɨtarə m̂bə̀ʼkə̀ aŋunə nɨ̀wɨghə̀.’

⁶⁴Njiilo ghɨ̀rə̀ pɨ̀ pyabə̀ nɨ̀shyə̀ chyə̀ tə njyə̂ ɨtarə làŋə̀, mbə̀ʼə ɨ̀zùŋə̀ ndzùmə̀ ɨ̀pe tô nɨ ɨ̀twuʼə̀ ndzə̀ərə̀ àkwuə̀ e ntyiʼə̀ nshwəŋə̀ ambo pànə̀ lo, à zhwuumə̀ a nɨ̀wɨghə̀. Chwìrə̀ wə̀ nɨ ǎ tyiʼə̀ furə̀ a ndzùmə̀ lə a pɨ̂ ntsàarə̀.”

⁶⁵Palètə̀ a shwəŋə̀ ambo pobə lo, “Nɨ̀ chyə̂ nɨ pɨ̀soyì, njiilo nɨ̀ ghɨ̀rə̀ pobə̂ pyabə̀ nɨ̀shyə̀ tsèrə tsə̀ amwuə ndwuumə̀ ɨ̀tsùmə̀.”

⁶⁶Lenəla, pobə lə̀ lèrə̀ ngə̀ nchyâ àlènə̀ aŋunə nɨ̀ghòorə nɨ nɨ lə̀ pənə a ntswùə̀ nɨ̀shyə̀, ntyiʼə̀ mmyàʼtə̀ lo pɨ̀soyì mə mbyabə̀.