Read Pinyin Matyù 6 Bible Online

Matyù 6 - Pinyin bible

Matyù 6

¹“Nɨ̀ zhìʼtə̀ a wɨghə! Kò nɨ̀ kɨ ngɨ̀rə̀ ɨ̀shìʼnə̀ ɨ̀wɨghə a mbyə̀ pə̀ənə̀ lo mbə̀ʼə pɨ̀ tə ndzəənə̀ a wɨghə. Ntiinə nɨ̀ tə mə ngɨ̀rə̀ a lenə nɨ̀ kẅiirə̀ a wɨghə mɨ̀ntsoʼnə̀ mɨ àfàʼà ambo Tǎ ɨwɨghə a nɨ̀pwuurə̀ apə̀.

²“Lenəla nɨ̀ tə ŋâ àzwuumə̀ ambo ngàŋə̀ àfumə̀, kò nɨ̀ kɨ ntoŋə̀ ntàŋnə̀, tsaʼa ngàŋə àpə̀grə̀ za ngɨ̀rə̀ amwuə mɨ̀ndâ mɨ àshwatə̀ mɨ pɨ̀Jew ghobə ɨ̀làŋə ndwuumə̀ mbə̀ʼə pɨ̀ ghuʼtə̀ a ghobə. La ngwə̀ nshwəŋə̀ ambo pɨghə lo pobə kẅiirə̀ mə mɨ̀ntsoʼnə̀ mɨ àfàʼà ɨ̀mobə mɨ̀tsùmə̀.

³La nɨ̀ ŋâ àzwuumə̀ ambo ŋwùə̀, kò nɨ̀ ghɨ̀rə̀ lo àpô àzɨghə yè kẅàbə̀ a zhyə̂ àzwuumə̀ zhyə̀ nɨ àpô àzɨghə yè zɨghə̀nə a ghɨ̀rə̀nə,

⁴njiilo kò ŋwùə̀ a zhyə̂ e àzwuumə̀ nɨ nɨ̀ ŋânə. Lenəla Tǎ ɨwɨghə nɨ à wa ndzəənə̀ àzwuumə̀ àtsùmə̀ nɨ nɨ̀ wa ngɨ̀rə̀ amwuə ndzùmə la, ǎ ŋâ mɨ̀ntsoʼnə̀ mɨ àfàʼà ɨ̀mɨghə.

⁵“Nɨ̀ mə nchàʼtə̀ a Nẅùə̀, kò nɨ̀ pə tsaʼa ngàŋə àpə̀grə̀ nɨ pobə pa nkòŋə̀ a nɨ chàʼtə̀ a Nẅùə̀ a sàŋə̀ amwuə ɨ̀làŋə ndwuumə̀ ghobə mɨ̀ndâ mɨ àshwatə̀ mɨ pɨ̀Jew lo pànə̀ mə ndzəənə̀ a ghobə. Ǹshwəŋə̀ tyìʼə̀ nkǔŋə nkuŋə ambo pɨghə lo, pobə kẅiirə̀ mə mɨntyaŋnə ɨ̀mobə.

⁶La nɨ̀ mə nchàʼtə̀ a Nẅùə̀, nɨ̀ kwuunə̀ amwuə ntaŋə, ngwùʼnə̀ ntswùə̀ ndâ, ntyiʼə̀ nchàʼtə̀ a Nẅùə̀ ambo Tǎ ɨwɨghə. Lenəla Tǎ ɨwɨghə nɨ à wa ndzəənə̀ àzwuumə̀ àtsùmə̀ nɨ nɨ̀ wa ngɨ̀rə̀ amwuə ndzùmə la ǎ ŋâ mɨ̀ntsoʼnə̀ mɨ àfàʼà ɨ̀mɨghə.

⁷“Nɨ̀ mə nchàʼtə̀ a Nẅùə̀, kò nɨ̀ shwəŋə̀ ɨ̀shwəŋnə̀ a pyəŋə pyəŋə tsaʼnə pɨ̀tɨ̀pyiimə̀ a Nẅùə̀ pa ngɨ̀rə̀ la, ntiinə pobə kwàŋə̀nə lo pɨ̀nẅùə̀ ɨ̀pobə ghǎ zuʼù a ghobə a nɨ zùŋə̀ a ndzùmə̀ ɨ̀shwəŋnə̀ ɨ̀pobə pɨ̀sàa.

⁸Kò nɨ̀ pə tsaʼa pobə, ntiinə Tǎ ɨwɨghə à tə mə nzhyə̂ a ngotə ànwùə̀ nɨ nɨ̀ tàʼnə zaʼà pòŋə̀ mə pyiitə̀ e.

⁹Nɨ̀ tyiʼə̀ mmə nchàʼtə̀ a Nẅùə̀ la lo: ‘Tǎ ɨwəə a nɨ̀pwuurə̀, ghɨ̀rə̀ pəə tə nguʼtə̀ nɨ̀linə̀ ɨ̀tsô.

¹⁰Ànwùə̀ Nɨ̀fò o â tô. Ghɨ̀rə̀ pànə̀ pɨ àtwuə̀ ɨ̀shyə̂ zuʼnə̀ ntə̌ o tsaʼa pànə̀ pɨ nɨ̀pwuurə̀.

¹¹Ŋâ mɨ̀zɨghə̀ myə̀ nɨ mɨ kùʼnə̀nə ambo pəə sìnə̀ wə̀.

¹²Ndə̀ənə̀ ɨ̀fàntə̀ ɨ̀nwùə̀ ɨ̀pəə, tsaʼnə pəə kɨnə mmə ndə̀ənə̀ pyə̀ nɨ pànə̀ pa nfàntə̀ ambo pəə la.

¹³Kò wə̀ pyiimə̀ o pəə kwɨghə̀ nkɨrə Satàanə̀, nchwarə̀ a wəə aŋunə ɨ̀nwùə̀ tɨ̀pòŋə̀.’

¹⁴“Nɨ̀ tə pəla mmə ndə̀ənə̀ ɨ̀fàntə̀ ɨ̀nwùə̀ pànə̀, yi Tǎ ɨwɨghə a nɨ̀pwuurə̀ ǎ kɨ lə̀ənə̀ ɨ̀pɨghə.

¹⁵La nɨ̀ tə pəla ka mə lə̀ənə̀ a wɨghə ɨ̀fàntə̀ ɨ̀nwùə̀ pànə̀, yi ka Tǎ ɨwɨghə pə kɨ lə̀ənə̀ e ɨ̀pɨghə.

¹⁶“Nɨ̀ mə nnwuunə̀ a wɨghə tɨ zɨghə̀ amwuə àchàʼtə̀ Nẅùə̀, kò nɨ̀ kɨ nsòmnə̀ tsaʼa ngàŋə àpə̀grə̀, ntiinə pobə pa nkyatə̀ mɨ̀sɨghə̀ ɨ̀mobə mbə̀ʼə pànə̀ mə ndzəənə̀ lo pobə nwuunə̀ tɨ zɨghə̀ amwuə àchàʼtə̀ Nẅùə̀. Ǹshwəŋə̀ a wɨghə tyìʼə̀ nɨ nkuŋə̀ lo pobə kẅiirə̀ mə mɨ̀ntsoʼnə̀ mɨ àfàʼà ɨ̀mobə mɨ̀tsùmə̀.

¹⁷La nɨ̀ mə nnwuunə̀ tɨ zɨghə̀ amwuə àchàʼtə̀ Nẅùə̀, nɨ̀ sùu mɨ̀sɨghə̀ ɨ̀mɨghə, nshàbə̀ ɨ̀twuə̀ ɨ̀pɨghə.

¹⁸Mbə̀ʼə ŋònə̀ ɨ̀tse a kaŋə zhyə̂ lo nɨ̀ nwuunə̀ tɨ zɨghə̀ amwuə àchàʼtə̀ Nẅùə̀, ndàŋə̀ e Tǎ ɨwɨghə nɨ à zhyə̂nə ànwùə̀ za nɨ nɨ̀ wə̀ ngɨ̀rə̀ amwuə ndzùmə la. Tǎ ɨwɨghə nɨ à wa ndzəənə̀ ànwùə̀ yè lə̀əmə̀nə àtsùmə̀ la, à pɨ tsoʼò àfàʼà àzɨghə.

¹⁹“Kò nɨ̀ kɨ ndòʼnə̀ nkabə̀ ɨzɨghə a àtwuə̀ ɨ̀shyə̂ ghə, nɨ a pənə alyiʼə nɨ mbə̀ʼə ɨ̀sə̀ʼə zɨghə̀ kə̀ àwùrə̀kaamə a tsə̀ŋə̀, kə̀ pɨ̀zə̀ərə̀ zə̀ərə̀ a zèrə.

²⁰Nɨ̀ lòʼnə̀ nkabə̀ ɨzɨghə pə a nɨ̀pwuurə̀, nɨ à pənə alyiʼə nɨ mbə̀ʼə ɨ̀sə̀ʼə zɨghə̀ e apə̀, àwùrə̀kaamə a tsə̀ŋə̀ e apə̀, pɨ̀zə̀ərə̀ kɨ ndzə̀ərə̀ e apə̀.

²¹Ntiinə alyiʼə nɨ nkabə̀ o ɨ̀ pənə ghu, la alyiʼə nɨ ntɨŋmə̀ o ɨ kɨnə mbə ghu.

²²“Nɨ̀lyə̂ ɨ̀tsô la nkàʼà ambo mbɨ̀ŋmə̀. Njiilo nɨ̀lyə̂ ɨ̀tsô tə pə ɨ̀shìʼnə̀, yi mbɨ̀ŋmə̀ o ntsùmə̀ ɨ̌ lẅenə̀ nɨ nkàʼà.

²³La nɨ̀lyə̂ ɨ̀tsô tə ka pə e ɨ̀shìʼnə̀ yi mbɨ̀ŋmə̀ o ntsùmə̀ ɨ̌ pə nɨ ndzùmə. Njiilo nkàʼà nɨ ɨ̀ pənə amwuə ghò tə pə ndzùmə, yi la ndzùmə nɨ ɨ̀ fèrə̀nə ka mɨ̀zùŋə.

²⁴“Mbə̀ʼə ŋònə̀ ɨ̀tse a laʼa nfàʼà e ambo pɨ̀masàa pɨpaa apə̀. Ntiinə ǎ pàanə̀ a taʼà kòŋə̀ a ẅùə̀, kə̀ ǎ fàʼà ambo taʼà nɨ ntɨŋmə̀ e ɨ̀tsùmə̀ tyiʼə̀ ghə̀ làŋə̀ e làŋə̀nə ambo ẅùə̀. Mbə̀ʼə wə̀ fàʼà o ambo Nẅùə̀ pobə nkabə̀ apə̀.

²⁵“Amwuə ndwuumə̀ wanə, ngwə̀ nshwəŋə̀ ambo pɨghə lo kò nɨ̀ kɨ nkwàŋə̀ mɨ̀nwùə̀ mbə̀ʼə nɨ̀chyə̂mbyə̂ ɨwɨghə lo nɨ̌ zɨghə̀ la àkə, kə̀ nnô la àkə, kə̀ mbə̀ʼə mbɨ̀ŋmə̀ ɨ̀zɨghə lo nɨ̌ ẅî la àkə. Ka nɨ̀chyə̂mbyə̂ ɨwɨghə a tsàarə̀ e mɨ̀zɨghə̀, kə̀ ka mbɨ̀ŋmə̀ ɨ̀zɨghə kɨ ntsàarə̀ e ɨtsəʼə?

²⁶Nɨ̀ naŋə̀ pɨ̀mɨsɨŋə nɨ pɨ pa ntàarə̀ a àtɨ̀ghə. Pobə pa ka pyə̀ a ghobə àzwuumə̀, ka kɨ mmə fùʼù a ghobə ɨ̀pwuumə̀ nùŋə̀ amwuə ɨ̀zuŋə̀. La Tǎ ɨwɨghə nɨ à pənə a nɨ̀pwuurə̀ a mə ndzə̂ a ghobə. Ka ndùnə̀ ɨ̀wɨghə ɨ tsə̂ e ntsàarə̀ a ghobə?

²⁷A ɨ̀wə̌ amwuə pɨghə nɨ mbə̀ʼə a kẅìʼnə̀ a mətùmə nkwùə̀ aŋunə nɨ̀chyə̂mbyə̂ e ntiinə à wa nkwàŋə̀ mɨ̀nwùə̀?

²⁸“Nɨ̀ wə̀ nkwàŋə̀ mɨ̀nwùə̀ mbə̀ʼə ɨtsəʼə lə ntii àkə? Nɨ̀ naŋə̀ tsaʼnə pɨ̀tǒŋtǒŋə pa nkoʼò amwuə mɨpaʼa. Pobə pa ka fàʼà a ghobə, ka kɨ mə tsùŋə̀ a ghobə ɨtsəʼə.

²⁹La ǹshwəŋə̀ a wɨghə lo mbaa pə ɨ̀fò Solomònə̀ nɨ à lə̀ pənə nɨ nkabə̀, ka à lə̀ ẅî e atsəʼə àtse nɨ a lə̀ pòŋə̀nə mbə tsaʼa ɨ̀pobə pə.

³⁰Nẅùə̀ à tə mmə nnaŋə̀ pɨ̀tǒŋtǒŋə nɨ pèrə pənə sìnə̀ nkɨ pə a ngẅùʼə mbɨ̂ a ghobə, a tyiʼə̀ ka tsùŋə̀ ẅî e ɨtsəʼə pɨ̀shìʼnə̀ aŋunə pɨghə? Àpyiimə̀ ntɨŋmə̀ àzɨghə a kɨ̂!

³¹“Nɨ ndwuumə̀ wə̀, kò nɨ̀ kɨ nkwàŋə̀ a wɨghə ntyiʼə̀ mbyiitə̀ lo, ‘Pəə zɨghə̀ àkə, kə̀ nô àkə, kə̀ mə ẅî lə àkə?’

³²Ntiinə pɨ̀tɨ̀pyiimə̀ a Nẅùə̀ pa ntàʼà la ɨ̀pwuumə̀ pèrə pə. La Tǎ ɨwɨghə a nɨ̀pwuurə̀ à zhyə̂ mə lo nɨ̀ wə̀ ntàʼà ɨ̀pwuumə̀ pèrə pə tyìʼə̀ ɨ̀tsùmə̀.

³³La nɨ̀ pyə̀ mə ntàʼà pə ànwùə̀ Nɨ̀fò Nẅùə̀ pobə ànwùə̀ yè təəmə̀nə, â pòŋə̀ tyiʼə̀ mmə ŋŋâ ɨ̀pwuumə̀ pèrə pə ɨ̀tsùmə̀ ambo pɨghə.

³⁴Lenəla, kò nɨ̀ kɨ nkwàŋə̀ mɨ̀nwùə̀ mbə̀ʼə ngẅùʼə ntiinə ngẅùʼə à ghǎ pə nɨ ɨ̀me mɨ̀nwùə̀. Ngəʼə̀ sìnə̀ wə̀ ɨ̀ kùʼnə̀ sìnə̀.