Read Pinyin Matyù 7 Bible Online

Matyù 7 - Pinyin bible

Matyù 7

¹“Kò wə̀ kɨ ntsoʼtə̀ o pànə̀ pɨ̀tse, njiilo Nẅùə̀ à kɨ ntsoʼtə̀ e a ghò apə̀.

²Ntiinə, Nẅùə̀ à ghǎ tsoʼtə̀ o la tsaʼnə wə̀ kɨnə mmə ntsoʼtə̀ a pɨ̀tse pə̀ənə̀. Ndwuumə̀ nɨ wə̀ mənə nfàʼà ambo pɨ̀tse pə̀ənə̀ la ndwuumə̀ nɨ pɨ̌ kɨ fàʼà ambo ghò.

³A ghɨ̀rə̀ àkə wə̀ zəənə̀ àkɨ̀ghɨ nɨ a pənə a nɨ̀lyə̂ ndyimə o, la ka pə zəənə̀ o ntoomə̀ nɨ ɨ̀ pənə a nɨ̀lyə̂ ghò?

⁴Kə̀ mbə̀ʼə wə̀ làŋə̀ lə ɨla nshwəŋə̀ ambo ndyimə o lo, ‘Tô n̂fuukə̀ àkɨ̀ghɨ zə a nɨ̀lyə̂ ghò,’ la nɨ ntoomə̀ ntwaanə̀ e a nɨ̀lyə̂ ghò.

⁵Ghò ngàŋə àpə̀grə̀! Pyə̀ nfuukə̀ ntoomə̀ za nɨ ɨ̀ pənə a nɨ̀lyə̂ ghò zaʼà mbòŋə̀ zəənə̀ àkɨ̀ghɨ nɨ a pənə a nɨ̀lyə̂ ndyimə o fuukə̀.

⁶“Kò nɨ̀ kɨ ŋŋâ ɨ̀pwuumə̀ nɨ pèrə laanə̀nə ambo mɨ̀ngwɨghə̀, yi mèrə̌ pə̀ŋə̀ lẅompə̀ a wɨghə. Kò nɨ kɨ ŋŋâ ɨ̀pwuumə̀ pɨ tsèntə̀nə ambo pə̀kuŋə, yi pèrə̌ nyə̀nkə̀ tsuʼù amwuə nɨ̀lèbə.

⁷“Nɨ̀ pyiitə̀, pɨ̌ ŋâ ambo pɨghə; ntàʼà, nɨ̌ zəənə̀; ntsòotə̀, pɨ̌ ẅùʼə̀ ŋŋâ ambo pɨghə.

⁸Ntiinə ŋwùə̀ ntsùmə̀ nɨ à pyiitə̀nə, ǎ kẅiirə̀; ŋwùə̀ ntsùmə̀ nɨ à tàʼnə, ǎ zəənə̀; ŋwùə̀ ntsùmə̀ nɨ à tsòotə̀nə, pɨ̌ ẅùʼə̀ ŋŋâ ambo ze.

⁹Kə̀ ŋwùə̀ ɨwɨghə ɨ̀tse à wə̀ ghu nɨ mbə̀ʼə moonə̀ e a pyiitə̀ e nɨ àpaanə̀ a tyiʼə̀ ŋŋâ pə nɨ̀ghòorə ambo ze;

¹⁰kə̀ a pyiitə̀ ɨ̀swuə̀ a ŋâ pə ɨ̀nyoorə̀ ambo ze?

¹¹Pɨghə ngàŋə ngɨ̀rə̀ ɨ̀nwùə̀ tɨ̀pòŋə̀ tə nzhyə̂ a nɨ ŋâ ɨ̀pwuumə̀ pɨ̀shìʼnə̀ ambo ɨ̀poonə̀ ɨ̀pɨghə, Tǎ ɨwɨghə a nɨ̀pwuurə̀ à tyiʼə̀ ka ŋâ e ɨ̀pwuumə̀ pɨ̀shìʼnə̀ ambo pànə̀ nɨ pɨ pyiitə̀nə e ntii àkə?

¹²“Mə ngɨ̀rə̀ ɨ̀nwùə̀ pa pyə̀ nɨ wə̀ kòŋə̀nə lo pɨ̀ ghɨ̀rə̀ aŋunə ghò la aŋunə pɨ̀tse pə̀ənə̀. Mbə̀ʼnə lə̌ ànwùə̀ nɨ mbòomə Mǔsî pobə àshwəŋnə̀ ngàŋə ntwuumə̀ Nẅùə̀ lə̀ mənə nshwəŋə̀ la.

¹³“Nɨ̀ làŋə̀ amwuə ntswùə̀ ndâ ghù kɨ̂ wa nkwuunə̀ ntiinə ntswùə̀ ndâ ghù ẅùunə wa nɨ ɨ nyaʼkə̀nə, àlàŋə a təəmə̀ la, ɨ lèrə̀ la a amwuə àkɨɨnə̀ ɨ̀mǔ. Pànə̀ pɨ̀noʼnə pa ndzùŋə̀ àlàŋə zèrə zə ngyìinə̀ aŋunə.

¹⁴La ntswùə̀ ndâ wa nɨ ɨ wa ndèrə̀ amwuə nɨ̀chyə̂mbyə̂ la ɨ kɨ̂, àlàŋə a kɨ ntɨ̀ŋnə̀ ka mɨ̀zùŋə; a pə kɨ zəənə̀ e tyìʼə̀ pànə̀ pɨ̀kɨ̂ zəənə̀ a zèrə.

¹⁵“Nɨ̀ zhìʼtə̀ a wɨghə nɨ ngàŋə ntwuumə̀ Nẅùə̀ pɨ pɨ̀chwìrə̀ nɨ za ntô ambo pɨghə amwuə ngòbə̀ mbyə̂ ndzìrə̀, la mbə pəfuunə pɨ̀tsə̂nə amwuə ɨmwuə.

¹⁶Nɨ̀ ghǎ zhyə̂ a ghobə aŋunə mɨ̀ntàamə ɨ̀mobə. Mbə̀ʼə àtɨ̀ghə pɨ̀kɨkobə a laʼa ndzumə̀ e nɨpyə apə̀, kə̀ ɨtsaamə ɨ laʼa ndzumə̀ e a pyâ apə̀?

¹⁷Àtɨ̀ghə yè ɨ̀shìʼnə̀ a zumə̀ pə mɨ̀ntàamə mɨ̀shìʼnə̀, àtɨ̀ghə tɨ̀pòŋə̀ a kɨ mmə ndzumə̀ mɨ̀ntàamə mɨ tɨ̀pòŋə̀.

¹⁸Mbə̀ʼə àtɨ̀ghə yè ɨ̀shìʼnə̀ a laʼa ndzùmə̀ e mɨ̀ntàamə mɨ tɨ̀pòŋə̀ apə̀. Àtɨ̀ghə tɨ̀pòŋə̀ a kɨ ndaʼa ndzùmə̀ e mɨ̀ntàamə mɨ̀shìʼnə̀ apə̀.

¹⁹Pɨ pa ngwàrə̀ àtɨ̀ghə za àtsùmə̀ nɨ a za ka zumə̀ e mɨ̀ntàamə mɨ̀shìʼnə̀ la mmàʼà amwuə ɨ̀mǔ.

²⁰Lenəla, nɨ̀ ghǎ tyiʼə̀ zhyə̂ a ghobə la aŋunə mɨ̀ntàamə ɨ̀mobə.

²¹“Ka a pə e ŋwùə̀ wa ntsùmə̀ nɨ à wa nfuŋə̀ mə̀ nɨ ‘Ndòʼnə̀mbyə̂, Ndòʼnə̀mbyə̂’ la nɨ à ghǎ kwuunə̀ amwuə ànwùə̀ Nɨ̀fò nɨ̀pwuurə̀. À ghǎ kwuunə̀ e tyìʼə̀ pànə̀ pa nɨ pobə pa ngɨ̀rə̀ ànwùə̀ nɨ Tǎ ɨwəə a nɨ̀pwuurə̀ à tàʼnə la.

²²A ghǎ pə njyə̂ ntsoʼtə̀ mɨ̀sàʼa la, pànə̀ pɨ̀noʼnə tyiʼə̀ ntô nshwəŋə̀ ambo mɨ̀ŋə̀ lo, ‘Ndòʼnə̀mbyə̂, Ndòʼnə̀mbyə̂! Pəə lə̀ mə nchwìitə̀ ntwuumə̀ ghù ɨ̀shìʼnə̀ nɨ nɨ̀linə̀ ɨ̀tsô, mmə nfuukə̀ ɨ̀zhyə̂ nɨ nɨ̀linə̀ ɨ̀tsô, nkɨ mmə ngɨ̀rə̀ mɨ̀nwùə̀ mɨ yerə̀nə yerə̀nə mɨ̀noʼnə nɨ nɨ̀linə̀ ɨ̀tsô.’

²³N̂tyiʼə̀ nshwəŋə̀ ambo pobə lo, ‘Ka ndə̀ zhyə̂ mə̀ a wɨghə. Nɨ̀ lòo a wɨghə a nɨ̀pwùnə mɨ̀ŋə̀, ngàŋə ngɨ̀rə̀ ɨ̀nwùə̀ tɨ̀pòŋə̀!’

²⁴“Njiilo ŋwùə̀ wa ntsùmə̀ nɨ à zuʼnə ɨ̀shwəŋnə̀ ɨ̀pâ nkɨ mmə nfàʼà nɨ pèrə la, à chyə̂ la tsaʼa ngàŋə̀ àzhìʼtə̀ nɨ à poomə̀nə ndâ e àtwuə̀ àlàrə̀kə̀ nɨ̀ghòorə.

²⁵Mbə̀ŋə̀ ɨ̀ tə ndô, mɨnchyə zhaʼà, fèrə̀ a tô ntumə̀ ndâ za, ɨ̀ kunə̀ e apə̀ ntiinə à lə̀ poomə̀nə a zèrə aŋunə àlàrə̀kə̀ nɨ̀ghòorə.

²⁶“La ŋwùə̀ wa ntsùmə̀ nɨ à zuʼnə ɨ̀shwəŋnə̀ ɨ̀pâ pə̀ ka mə fàʼà nɨ pèrə à chyə̂ la tsaʼa àpuukə̀ ŋònə̀ wa nɨ à lə̀ poomə̀nə ndâ e àtwuə̀ waakə.

²⁷Nkwùə̀ nɨ mbə̀ŋə̀ ɨ̀ lônə mɨnchyə zhaʼà, fèrə̀ a mə ndàŋə̀ ntinə̀ ndâ ghu, ɨ̀ kunə̀ a ɨ̀shyə̂ tsaʼa nɨ̀ghòorə tsɨ̀ ẅùunə.”

²⁸Nkwùə̀ nɨ Yěsû à lə̀ myàanə̀nə ɨ̀nwùə̀ pèrə pə, àpùŋə̀ pə̀ənə̀ za àtsùmə̀ a lə̀ yerə̀ ndwuumə̀ nɨ à lə̀ mənə nnèrə̀ ànwùə̀ Nẅùə̀,

²⁹ntiinə à lə̀ mə nnèrə̀ a ghobə la tsaʼa ŋònə̀ nɨ à pənə nɨ ɨ̀tɨ̀ŋnə̀ ka pə e tsaʼnə pɨ̀nèrə̀ mbòomə lə̀ mənə nnèrə̀ pànə̀ la.