Read Pinyin Mark 10 Bible Online

Mark 10 - Pinyin bible

Mark 10

¹Yěsû à lə̀ myàʼtə̀ alyiʼə ghu ndèrə̀ a pàa àlaʼà Judyà, ntwuumə̀ ndèrə̀ a ndzìnə nchyə Jodànə̀. À lə̀ ghə̀ nnwuunə̀ ghu, ɨ̀pùŋə̀ pə̀ənə̀ pɨ̀noʼnə tô ambo ze nkẅirə̀ ntô, a nèrə̀ a ghobə nɨ mɨ̀nwùə̀ tsaʼnə à lə̀ pyə̀nə mmə ngɨ̀rə̀.

²Pɨ̀Farìsî pɨ̀tse lə̀ tô ambo Yěsû ntàʼà lo zhwiʼì e. Mbyiitə̀ ambo ze lo, “Mbòomə ɨ̀wəənə̀ a nèrə̀ lo mbə̀ʼə ŋònə̀ mbyàŋnə̀ a ghàbə̀ nɨ̀zoʼò pobə ngẅùə e?”

³A kẅùə̀ ambo pobə nɨ àpyiitə̀ lo, “Mǔsî à lə̀ shwəŋə̀ ambo pɨghə lo àkə?”

⁴Pobə kẅùə̀ lo, “Mǔsî à lə̀ ŋâ ɨ̀sàanə̀ lo ŋwùə̀ à chyə̂ a nɨ ŋwàʼnə̀ àŋwàʼnə̀ a nɨ sìimə̀ nɨ̀zoʼò ŋŋâ nɨ ngẅùə e mbòŋə̀ myàʼtə̀ e a lèrə̀.”

⁵La Yěsû a kẅùə̀ lo, “Mǔsî à lə̀ ŋwàʼnə̀ ntə̌ wə̀ ŋŋâ ambo pɨghə ntiinə mɨ̀ntɨŋmə̀ ɨ̀mɨghə lə̀ tɨ̀ŋnə̀ tɨsɨŋnə a nɨ zuʼù àtəətə̀ e.

⁶Tsaʼnə àtwuə̀ ɨ̀shyə̂ a lə̀ pìʼnə̀nə, Nẅùə̀ à lə̀ tsùŋə̀ a ŋònə̀ mbyàŋnə̀ pobə mə̀ngyə̌.

⁷‘Lenəla, ŋònə̀ mbyàŋnə̀ à gha myàʼtə̀ a tǎ ɨ̀ghobə pobə mǎ e ghə̀ pwuutə̀ pobə ngẅùə e.

⁸Nɨ ndwuumə̀ wə̀, pànə̀ pə pɨpaa tyiʼə̀ mbə taʼà mbòbə̀ mbɨ̀ŋmə̀, ka chi pə ghobə pànə̀ pɨpaa.

⁹Njiilo àzwuumə̀ nɨ Nẅùə̀ à pwuutə̀nə alyiʼə moʼo, kò ŋònə̀ ɨ̀tse a ghàbə̀ e a zèrə.”

¹⁰Nkwùə̀ nɨ Yěsû pobə ɨ̀zùŋə̀ ndzùmə̀ ɨ̀pe lə̀ kwə̂nə nkwuunə̀ a ndâ, pobə lə̀ chi mbyiitə̀ e nɨ ànwùə̀ zèrə zə.

¹¹A kẅùə̀ ambo pobə lo, “Ŋònə̀ wa nɨ à fuukə̀nə a ngẅùə e, ndzoʼò a yɨ̀ nyàanə la, à fànə̀ la ambo ngẅùə e nɨ à fuukə̀nə la.

¹²Nɨ ndwuumə̀ wə̀, mə̀ngyə̌ nɨ à furə̀nə a ndâ ndwuumə̀ e, ndzoʼò a ŋònə̀ nyàanə, à kɨ ngɨ̀rə̀ la àfànə̀.”

¹³Pànə̀ pɨ̀tse lə̀ lòo a kɨyii àghòbə ntô ambo Yěsû lo â nùŋə̀ mbô ɨ̀me aŋunə pobə, la ɨ̀zùŋə̀ ndzùmə̀ ɨ̀pe lə̀ saʼà a ghobə.

¹⁴La nkwùə̀ nɨ Yěsû à lə̀ zəənə̀nə lo ɨ̀zùŋə̀ ndzùmə̀ ɨ̀pe saʼà pànə̀ pa, ntɨŋmə̀ e ɨ lə̀ zaŋə̀, a shwəŋə̀ ambo pobə lo, “Nɨ̀ myàʼtə̀ a kɨyii àghòbə wa â tô ambo mɨ̀ŋə̀, kò nɨ̀ nàanə̀ a ghobə. Mbə̀ʼnə ànwùə̀ Nɨ̀fò Nẅùə̀ a chyə̂ la ambo pànə̀ tsaʼa pə.

¹⁵Ǹshwəŋə̀ tyìʼə̀ nkǔŋə nkuŋə ambo pɨghə lo ŋònə̀ nɨ ka à pə kẅiirə̀ e ànwùə̀ Nɨ̀fò Nẅùə̀ tsaʼa mɨlyiʼə mɨnkɨ̂, ka à pə ghǎ kwuunə̀ e amwuə.”

¹⁶Yěsû a shwəŋə̀ a lenə la, nkẅiirə̀ ɨ̀poonə̀ pa nkẅaʼà moʼo moʼo nnùŋə̀ mbô ɨ̀me àtwuə̀ pobə, nchyâ mborə̀ aŋunə.

¹⁷Yěsû à lə̀ furə̀ mmə ndèrə̀ e a àkarə̀, ŋònə̀ mbyàŋnə̀ ɨ̀tse a kɨ̀ɨrə̀ ntô nkẅiʼtə̀ a mbyə̀ ze mbyiitə̀ e lo; “Ɨ̀nèrə̀ ɨ̀nwùə̀ ghù ɨ̀shìʼnə̀, mbə̀ʼə ǹgɨ̀rə̀ lə ɨla a nɨ gha mbə nɨ nɨ̀chyə̂mbyə̂ nɨ à ghoŋə̀nə nɨ nkuŋə̀?”

¹⁸Yěsû a kẅùə̀ nɨ àpyiitə̀ lo, “A ghɨ̀rə̀ àkə wə̀ fuŋə̀ mə̀ nɨ ŋònə̀ ghù ɨ̀shìʼnə̀? Ka ŋònə̀ ɨ̀tse a pə e ŋònə̀ ghù ɨ̀shìʼnə̀ ndàŋə̀ e Nẅùə̀.

¹⁹Wə̀ zhyə̂ mɨ̀ntə̌ mə: ‘Kò wə̀ zhwuutə̀, kò wə̀ fànə̀, kò wə̀ zə̀ərə̀, kò wə̀ pyiimə̀ a ndzəənə̀ zəənə̀nə yɨ̀ pɨ̀chwìrə̀, kò wə̀ fɨ̀ghə̀ a ŋwùə̀, zuʼnə̀ tǎ ɨwɨghə pobə mǎ o.’”

²⁰A kẅùə̀ ambo Yěsû lo, “Ɨ̀nèrə̀, ndə̀ pìʼnə̀ a nɨ nùŋə̀ mɨ̀nwùə̀ mə tsaʼnə ndə̀ pənə môngwàswùumə̀.”

²¹Yěsû a naŋə̀ e, nkòŋə̀ e, nshwəŋə̀ ambo ze lo, “Wə̀ puŋə̀ a taʼà àzwuumə̀. Lèrə̀ ngə̀ shwùunə̀ àzwuumə̀ àtsùmə̀ nɨ wə̀ pənə nɨ zèrə, ŋŋâ nkabə̀ ambo ngàŋə àfumə̀, àfùʼù o â tyiʼə̀ mbə a nɨ̀pwuurə̀; wə̀ pəla ngə̀ ngɨ̀rə̀ a lenə, wə̀ tô ndzùŋə̀ mə̀.”

²²Tsaʼnə à lə̀ zuʼnə ànwùə̀ zə̀ la, mbɨ̀ŋmə̀ e ɨ̀ lə̀ tyèbrə̀, a pə̀ŋə̀ ndèrə̀ e nɨ àsòmnə̀ ntiinə ɨ̀pwuumə̀ ɨ̀pe lə̀ noʼnə.

²³Yěsû a naŋə̀ nkamnə̀, nshwəŋə̀ ambo ɨ̀zùŋə̀ ndzùmə̀ ɨ̀pe lo, “A tɨ̀ŋnə̀ ambo ngàŋə̀ nkabə̀ a nɨ kwuunə̀ amwuə ànwùə̀ Nɨ̀fò Nẅùə̀!”

²⁴Ɨ̀zùŋə̀ ndzùmə̀ Yěsû lə̀ yerə̀ ànwùə̀ zèrə zə. La Yěsû a chi nshwəŋə̀ ambo pobə lo, “Ɨ̀poonə̀, a tɨ̀ŋnə̀, ambo ngàŋə̀ nkabə̀ a nɨ kwuunə̀ amwuə ànwùə̀ Nɨ̀fò Nẅùə̀.

²⁵A zàŋə̀ ambo ləəmə nkunə a nɨ tswurə̀ amwuə nɨ̀lyə̂ nɨ lyàmnə̀ ntsàarə̀ ambo ngàŋə̀ nkabə̀ a nɨ kwuunə̀ amwuə ànwùə̀ Nɨ̀fò Nẅùə̀.”

²⁶Tsaʼnə ɨ̀zùŋə̀ ndzùmə̀ ɨ̀pe lə̀ zuʼnə àshwəŋnə̀ zanə, ànwùə̀ ghu a lə̀ tsàarə̀ a ghobə ka mɨ̀zùŋə. Pobə tyiʼə̀ nshwəŋnə̀ pobə nɨ pobə lo, “Ŋònə̀ nɨ ǎ tyiʼə̀ chwarə̀ lə ɨ̀wə̌?”

²⁷Yěsû a naŋə̀ a ghobə nshwəŋə̀ lo, “Ànwùə̀ tsaʼa zə̀ a za ntsàarə̀ pə a ŋwùə̀ mɨsoŋə la ka tsàarə̀ e a Nẅùə̀, ntiinə ka ànwùə̀ àtse a pə e ghu nɨ a tsàarə̀nə a Nẅùə̀.”

²⁸Pità à lə̀ pìʼnə̀ a nɨ shwəŋə̀ ambo ze lo, “Wə̀ zhyə̂ lo pəə waʼà ɨ̀nwùə̀ ɨ̀pəə ɨ̀tsùmə̀ ndzùŋə̀ o.”

²⁹Yěsû a shwəŋə̀ lo, “Ǹshwəŋə̀ tyìʼə̀ nkǔŋə nkuŋə ambo pɨghə lo ŋwùə̀ ntsùmə̀ wa nɨ à myàʼtə̀nə ndâ e kə̀ pɨlyimə ɨ̀pe pɨ mbyàŋnə̀ pobə pɨ pə̀ngyə̌, kə̀ a mǎ e pobə tǎ ɨ̀ghobə, kə̀ ɨ̀poonə̀ ɨ̀pe, kə̀ ɨlyiʼə ɨ̀shyə̂ ntii mə̀ ghobə ntwuumə̀ ghù ɨ̀shìʼnə̀,

³⁰à ghǎ kẅiirə̀ mɨ̀ndâ pobə pɨlyimə pɨ mbyàŋnə̀ pobə pɨ pə̀ngyə̌, nɨ pɨ̀mǎ pobə ɨ̀poonə̀, nɨ ɨlyiʼə ɨ̀shyə̂, nɨ nɨ̀nyàŋə̀ tɨ̀tsòŋə̀ a àtwuə̀ ɨ̀shyə̂ ghə nkwùə̀ nkɨrə, ghǎ lẅùutə̀ kẅiirə̀ a nɨ̀chyə̂mbyə̂ wa nɨ à ghoŋə̀nə nɨ nkuŋə̀ tɨ̀tsòŋə̀ amwuə nkwùə̀ nɨ ɨ̀ ghǎ tô.

³¹La pɨ̀noʼnə nɨ pɨ pənə pɨ̀tsàa pɨ̀mbyə̀ tɨ̀tsòŋə̀ pobə ghǎ tyiʼə̀ pɨ̀lẅùə̀ pɨ̀ndzùmə̀, pyə̀ nɨ pɨ lẅùutə̀nə ndzùmə̀ tɨ̀tsòŋə̀ tyiʼə̀ mbə pɨ̀tsàa pɨ̀mbyə̀.”

³²Yěsû a lùŋə̀ mbyə̀ pobə ɨ̀zùŋə̀ ndzùmə̀ ɨ̀pe mə nkoʼò ndèrə̀ a Yèrusalèmə̀. Ànwùə̀ ghu a lə̀ kə̀ʼnə̀ a ghobə, pànə̀ nɨ pɨ lə̀ mənə ndzùŋə̀ a ghobə pə nɨ àkẅàrə̀. Lenəla, a chi ndòo ɨ̀zùŋə̀ ndzùmə̀ ɨ̀pe pa ntsòbə̀ ɨpaa mmìntə̀ a nɨ̀pwùnə ntiitə̀ a ghobə nɨ ànwùə̀ nɨ a tô ghɨ̀rə̀ aŋunə ze.

³³Yěsû à lə̀ shwəŋə̀ ambo ɨ̀zùŋə̀ ndzùmə̀ ɨ̀pe lo, “Tsaʼnə pə̀ənə̀ mənə nkoʼò ndèrə̀ a Yèrusalèmə̀ lə, pɨ̌ lòo a Moonə̀ Ŋwùə̀ ŋŋâ ambo ɨ̀twuə̀ pɨ̀fò màʼà Nẅùə̀ pobə pɨ̀nèrə̀ mbòomə. Pobə̌ saʼà ɨ̀sàʼa e nnùŋə̀ lo pɨ̀ zhwuutə̀ e, lenəla, ŋŋâ e ambo pànə̀ nɨ ka pobə pə ghobə pɨ̀Jew,

³⁴pobə nyèŋə̀ e, ntẅùə̀ mɨ̀tẅuə̀ aŋunə ze, nkəʼə̀ e nɨ ngwàanə̀, nzhwuutə̀ e, njyə̂ kɨ làŋə̀ ɨtarə â zhwuumə̀ a nɨ̀wɨghə̀.”

³⁵Jemə̀ pobə Jònə nɨ pobə lə̀ pənə ɨ̀poonə̀ pɨ Zebedì lə̀ tô ambo Yěsû, nshwəŋə̀ ambo ze lo, “Ɨ̀nèrə̀, pəə tàʼà lo wə̀ ghɨ̀rə̀ ànwùə̀ àtse ambo pəə.”

³⁶Yěsû a pyiitə̀ a ghobə lo, “Nɨ̀ tàʼà lo n̂gɨ̀rə̀ la ɨla ambo pɨghə?”

³⁷Pobə kẅùə̀ lo, “Ghɨ̀rə̀ taʼà ŋwùə̀ ɨ̀wəə wə̀ yɨ̀tse â nwuunə̀ a pàa àpô ghò yè zɨghə̀nə, ẅùə̀ â nwuunə̀ a pàa àpô yè kẅàbə̀ amwuə alyiʼə nɨ̀fò o.”

³⁸La Yěsû shwəŋə̀ ambo pobə lo, “Ka nɨ̀ zhyə̂ a wɨghə àzwuumə̀ nɨ nɨ̀ wə̀ mbyiitə̀. Mbə̀ʼə nɨ̀ nô ndoŋə̀ nɨ mbɨ nô lanə, kə̀ nkɨ nkẅiirə̀ àkẅiirə̀ nchyə nɨ mbɨ kẅiirə̀ lanə?”

³⁹Pobə kẅùə̀ lo, “Mbə̀ʼə pəə ghɨ̀rə̀.” Yěsû a tyiʼə̀ nshwəŋə̀ ambo pobə lo, “Njiilo, nɨ̌ nô ndoŋə̀ nɨ mbɨ nô lə, kɨ kẅiirə̀ àkẅiirə̀ nchyə nɨ mbɨ kẅiirə̀ lə,

⁴⁰la ka à pə e alyiʼə mə̀ a nɨ tsoʼò a ŋònə̀ nɨ ǎ nwuunə̀ a pàa àpô mɨ̀ŋə̀ yè zɨghə̀nə kə̀ yè kẅàbə̀. Pɨ chwuʼtə̀ mə ɨlyiʼə pə ambo pànə̀ nɨ pèrə pənə ɨ̀pobə.”

⁴¹Nkwùə̀ nɨ pyə̀ ɨ̀zùŋə̀ ndzùmə̀ ɨ̀pe nɨ̀ghumə̀ lə̀ zuʼnə ànwùə̀ zanə, mɨ̀ntɨŋmə̀ ɨ̀mobə lə̀ pìʼnə̀ a nɨ zaŋə̀ aŋunə Jemə̀ pobə Jònə.

⁴²Lenəla, Yěsû a fuŋə̀ a ghobə pobə tô nshwatə̀. A shwəŋə̀ ambo pobə lo, “Nɨ̀ zhyə̂ lo pànə̀ nɨ pobə pənə a nɨ pə àtwuə̀ pànə̀ nɨ ka pobə pə ghobə Pɨ̀jew pa nzhyiʼə̀ a ghobə, lenəla, pə̀ənə̀ ɨ̀pobə pɨ̀ẅùunə tyiʼə̀ mbə nɨ ɨ̀tɨ̀ŋnə̀ àtwuə̀ pobə.

⁴³La ka a pə e tsaʼnə a ghǎ pə amwuə tɨ̀tɨ̀rə̀ pɨghə. Ŋònə̀ nɨ à tàʼnə a nɨ pə ŋònə̀ ngẅùunə a tɨ̀tɨ̀rə̀ pɨghə ǎ pə tsaʼa ngàŋə̀ àfàʼà,

⁴⁴lenəla, ŋònə̀ nɨ à tàʼnə a nɨ pə ntsàambyə̀, â pə àpùʼù ambo ŋwùə̀ ntsùmə̀.

⁴⁵Ntiinə ka Moonə̀ Ŋwùə̀ a lə̀ tô e la lo pɨ fàʼà ambo ze, à lə̀ tô pə a nɨ fàʼà ambo pə̀ənə̀, lenəla ŋŋâ a nɨ̀chyə̂mbyə̂ e a nɨ lòo ntsuʼù ɨ̀twuə̀ pànə̀ pɨ̀noʼnə.”

⁴⁶Yěsû pobə ɨ̀zùŋə̀ ndzùmə̀ ɨ̀pe lə̀ kwuunə̀ a Jèrikò; tsaʼnə pobə lə̀ pənə nfurə̀ ghu, àpùŋə̀ pànə̀ pɨ̀noʼnə lə̀ pə ndzùŋə̀ a ghobə. Pobə lə̀ zəənə̀ a ɨ̀fə̀ ɨ̀myə̂ Bartimaeus, moonə̀ Timòsə̀ a nwuunə̀ a nɨ̀pwùnə àlàŋə mmə ndoonə̀ ɨ̀pwuumə̀.

⁴⁷Nkwùə̀ nɨ à lə̀ zuʼnə lo la Yěsû ŋwùə̀ Nazarètə̀, a lə̀ pìʼnə̀ a nɨ kyiinə̀ nshwəŋə̀ lo, “Yěsû Moonə̀ Dàfirə̀, koorə̀ mɨ̀lɨŋə̀ ɨ̀mâ!”

⁴⁸Lenəla, pànə̀ pɨ̀noʼnə lə̀ saʼà e nshwəŋə̀ lo â zhwemnə̀, la a chi nkyiinə̀ ntsàarə̀ nshwəŋə̀ lo, “Moonə̀ Dàfirə̀, koorə̀ mɨ̀lɨŋə̀ ɨ̀mâ!”

⁴⁹A nɨ zùŋə̀ ndwuumə̀ nɨ à lə̀ mənə nkyiinə̀, Yěsû à lə̀ təəmə̀, nshwəŋə̀ lo, “Nɨ̀ fuŋə e â tô.” Lenəla, pobə lə̀ fuŋə a ɨ̀fə̀ ɨ̀myə̂ ẅèrə wə̀ nshwəŋə̀ ambo ze lo, “Lòo a ɨ̀shyə̂ nshwèntə̀ mbɨ̀ŋmə̀ o. Yěsû à wə̀ nfuŋə̀ o.”

⁵⁰À lə̀ tsoʼò atsəʼə nɨ a lə̀ lyibə̀nə aŋunə ze mmàʼà a ɨ̀shyə̂ ndòo nɨ ɨ̀tɨ̀ŋnə̀ ntô ambo Yěsû.

⁵¹Yěsû a pyiitə̀ e lo, “Wə̀ tàʼà lo n̂gɨ̀rə̀ ɨla ambo ghò?” Ɨ̀fə̀ ɨ̀myə̂ wa a kẅùə̀ ambo ze lo, “Ɨ̀nèrə̀, ghɨ̀rə̀ n̂dzəənə̀ ɨlyiʼə.”

⁵²Lenəla, Yěsû à lə̀ shwəŋə̀ ambo ze lo, “Lèrə̀ o, àpyiimə̀ ntɨŋmə̀ o a ghɨ̀rə̀ wə̀ fiitə̀.” À lə̀ zùŋə̀ ndzəənə̀ ɨlyiʼə ndzùŋə̀ a Yěsû a àlàŋə nɨ à lə̀ mənə ndèrə̀.