Read Pinyin Mark 11 Bible Online

Mark 11 - Pinyin bible

Mark 11

¹Tsaʼnə pobə lə̀ tônə mbaatə̀ a Yèrusalèmə̀ a mbòmpə àlaʼà Bethphage pobə Betanì, a Mbarə̀ Olìvə̀, Yěsû à lə̀ twuumə̀ ɨ̀zùŋə̀ ndzùmə̀ ɨ̀pe ɨpaa,

²nshwəŋə̀ ambo pobə lo, “Nɨ̀ lèrə̀ amwuə àlaʼà zhyə̀ a mbyə̀ pɨghə, tyìʼə̀ tsaʼnə nɨ̌ kwuunə̀, nɨ̌ zəənə̀ a moonə̀ ndzàkɨshyə̀ nɨ pɨ tɨ̀ŋnə̀nə, ẅùə̀ nɨ ŋwùə̀ à pirə̀ mə e aŋunə tɨ koʼò. Nɨ̀ kyàa a ẅèrə ndòo ntô.

³Ŋònə̀ ɨ̀tse a pə la mbyiitə̀ ambo pɨghə lo, ‘Nɨ̀ ghɨ̀rə̀ lə àkə?’ Nɨ̀ shwəŋə̀ ambo ze lo, ‘Ndòʼnə̀mbyə̂ à tàʼà a zèrə, mbə kɨ kẅuə̀ a zèrə tyìʼə̀ tɨ̀tsòŋə̀.’”

⁴Pobə lə̀ lèrə̀ ngə̀ ndzəənə̀ a moonə̀ ndzàkɨshyə̀, pɨ tɨ̀ŋnə̀ a zèrə a ntswùə̀ ndâ a nɨ̀pwùnə àlàŋə; pobə lèrə̀ a nɨ ghə̀ nkyàa a zèrə.

⁵Tsaʼnə pobə lə̀ mənə nkyàa a zèrə, pànə̀ pɨ̀tse nɨ pɨ lə̀ təəmə̀nə a alyiʼə ghu lə̀ pyiitə̀ lo, “Nɨ̀ ghɨ̀rə̀ lə àkə, nkyàa a moonə̀ ndzàkɨshyə̀ wa?”

⁶Tsaʼnə pobə pyiitə̀nə la, pobə lə̀ tiitə̀ a ghobə nɨ ànwùə̀ nɨ Yěsû a tənə nshwəŋə̀. Lenəla, pɨ lə̀ myàʼtə̀ a ghobə pobə lèrə̀.

⁷Pobə lə̀ tô nɨ moonə̀ ndzàkɨshyə̀ wa ambo Yěsû, ndòo ɨtsəʼə ɨ̀pobə nshànkə̀ a nkàʼtə̀ nyàamə̀ wa, Yěsû a koʼò nnwuunə̀ aŋunə.

⁸Pànə̀ pɨ̀noʼnə lə̀ shànkə̀ ɨtsəʼə ɨ̀pobə a àlàŋə ndwuumə̀, pɨ̀tse fàatə̀ mɨ̀fàa mɨ àtɨ̀ghə a mɨpaʼa nɨ mɨfuə mɨ̀noʼnə aŋunə nshànkə̀ a àlàŋə.

⁹Pànə̀ pyə̀ nɨ pɨ lə̀ mənə ndèrə̀ a mbyə̀ pobə pyə̀ nɨ pɨ lə̀ mənə ndzùŋə̀ a ndzùmə̀ lə̀ tyiʼə̀ nkyiinə̀ nshwəŋə̀ lo, “Hòsanà! Mborə̀ ɨ̀ chyə̂ ambo ŋònə̀ nɨ a tônə aŋunə nɨ̀linə̀ nɨ Ndòʼnə̀mbyə̂!

¹⁰Mborə̀ ɨ̀ chyə̂ aŋunə ànwùə̀ nɨ̀fò tǎ ɨ̀wə̀ənə̀ Dàfirə̀ nɨ a zə ntô! Hòsanà ambo Nẅùə̀ Àkoʼntsirə̀!”

¹¹Yěsû à lə̀ kwuunə̀ a Yèrusalèmə̀, ndèrə̀ amwuə Ndâ mɨ̀shwàʼà Nẅùə̀, nnaŋə̀ nkamnə̀ ndzəənə̀ àzwuumə̀ àtsùmə̀ nɨ a lə̀ pənə amwuə. La tsaʼnə nkwùə̀ ɨ̀ lə̀ làŋə̀nə tɨsɨŋnə la, à lə̀ furə̀ ndèrə̀ pobə ɨ̀zùŋə̀ ndzùmə̀ ɨ̀pe pa ntsòbə̀ ɨpaa a Betanì.

¹²Njyə̂ ɨ̀ lə̀ laanə̀, pobə furə̀ a Betanì nkẅirə̀ mə nkwə̂, njyə̀ ɨ̀ pə ndzaŋə̀ a Yěsû.

¹³Lenəla, a təəmə̀ a ndyə̌ sàa ndzəənə̀ àtɨ̀ghə figə̀ nɨ mɨfuə pənə aŋunə nnoʼò, ntyiʼə̀ ndèrə̀ a ɨ̀sùmə lo mbə̀ʼə a zəənə̀ nɨ̀ntàamə nɨ àtɨ̀ghə aŋunə. Nkwùə̀ nɨ à lə̀ ghə̀nə mbyàa a ɨ̀sùmə, à lə̀ zəənə̀ lo ka àzwuumə̀ àtse a pə e aŋunə ndàŋə̀ e mɨfuə, ntiinə nkwùə̀ ɨ̀ lə̀ pirə̀nə e tɨ kùʼù lo mɨ̀tɨ̀ghə mɨ figə̀ zumə̀ mɨ̀ntàamə.

¹⁴Tsaʼnə Yěsû à lə̀ zəənə̀nə lo ka àzwuumə̀ a pə e aŋunə la, à lə̀ shwəŋə̀ ambo àtɨ̀ghə figə̀ za lo, “A nɨ furə̀ sìnə̀, ka ŋwùə̀ a pə laʼa zɨghə̀ e nɨ̀ntàamə nɨ nɨ furə̀nə aŋunə ghò.” Lenəla, ɨ̀zùŋə̀ ndzùmə̀ ɨ̀pe zuʼù ànwùə̀ ghu.

¹⁵Nkwùə̀ nɨ pobə lə̀ kwuunə̀nə a Yèrusalèmə̀, Yěsû à lə̀ kwuunə̀ amwuə Ndâ Mɨ̀shwàʼà Nẅùə̀ ndzəənə̀ pànə̀ pə nshwùunə̀ nkɨ mmə ndzwuunə̀ ɨ̀pwuumə̀. À lə̀ kantə̀ a ghobə, mbə̀ŋə̀ pɨ̀tepèrə̀ pɨ pànə̀ nɨ pɨ lə̀ mənə nkyopə̀ nkabə̀ nkumnə̀ a ɨ̀shyə̂ pobə ɨləŋə pànə̀ nɨ pɨ lə̀ mənə nshwùunə̀ ɨ̀lwuʼə̀,

¹⁶mbə chi pyiimə̀ e lo ŋwùə̀ a pìʼì àzwuumə̀ mɨ̀tàanə ndàŋə̀ a alyiʼə Ndâ Mɨ̀shwàʼà Nẅùə̀ gha apə̀.

¹⁷À lə̀ ghɨ̀rə̀ la, mbìʼnə̀ a nɨ nèrə̀ a ghobə nshwəŋə̀ lo, “A chyə̂ amwuə Àŋwàʼnə̀ Nẅùə̀ lo, ‘Pɨ ghǎ fuŋə̀ ndâ mə̀ la nɨ ndâ nɨ pànə̀ ghǎ furə̀ amwuə ɨ̀laʼà ɨ̀tsùmə̀ tô chàʼtə̀ a Nẅùə̀,’ la nɨ̀ kùmə̀ ngɨ̀rə̀ ɨ̀ tyiʼə̀ mbwùʼə̀ pɨ̀ntuŋə̀ ɨ̀shyə̂.”

¹⁸Tsaʼnə a lə̀ pənə a lenə la, pɨ̀fò màʼà Nẅùə̀ pobə pɨ̀nèrə̀ mbòomə lə̀ zuʼù ànwùə̀ ghu ntyiʼə̀ ntàʼà àlàŋə a nɨ zhwuutə̀ e. Pobə lə̀ mə mbô e, ntiinə àpùŋə̀ pànə̀ nɨ a lə̀ pənə a alyiʼə ghu a lə̀ yerə̀ ndwuumə̀ nɨ à lə̀ mənə nnèrə̀ mɨ̀nwùə̀.

¹⁹A lə̀ pə a nẅùumə̀ nkwə̌, Yěsû pobə ɨ̀zùŋə̀ ndzùmə̀ ɨ̀pe furə̀ amwuə Yèrusalèmə̀ ndèrə̀ a ghobə.

²⁰Tsaʼnə njyə̂ ɨ̀ lə̀ laanə̀nə, Yěsû pobə ɨ̀zùŋə̀ ndzùmə̀ ɨ̀pe pə ndàŋə̀, ndzəənə̀ àtɨ̀ghə figə̀ za a zwuumə̀ tə ngə̀ mbyàa aŋunə mɨŋaŋə ɨ̀me.

²¹Pità à lə̀ zəənə̀ nkẅempə̀ ànwùə̀ nɨ Yěsû à lə̀ shwəŋə̀nə, nshwəŋə̀ ambo ze lo, “Masàa, naŋə̀! Àtɨ̀ghə figə̀ za nɨ wə̀ lə̀ chyânə ndòonə̀ aŋunə la a zwuumə̀.”

²²Yěsû a kẅùə̀ ambo pobə lo, “Nɨ̀ pə nɨ àpyiimə̀ ntɨŋmə̀ aŋunə Nẅùə̀.

²³Ǹshwəŋə̀ tyìʼə̀ nkǔŋə nkuŋə ambo pɨghə lo ŋwùə̀ wa ntsùmə̀ nɨ à shwəŋə̀nə ambo mbarə̀ zə̀ lo tsoʼnə̀ ngə̀ nkunə̀ amwuə nchyə ghu nɨŋnə̀nə ka pə e nɨ mɨnkə amwuə ntɨŋmə̀ e, la mbyiimə̀ lo ànwùə̀ nɨ à shwəŋnə̀ ǎ lòo alyiʼə, a pɨ ghɨ̀rə̀ a lenə ambo ze.

²⁴Nɨ ndwuumə̀ wə̀, ǹshwəŋə̀ ambo pɨghə lo àzwuumə̀ àtsùmə̀ nɨ nɨ̀ pyiitə̀nə amwuə àchàʼtə̀ Nẅùə̀, nɨ̀ pə nɨ àpyiimə̀ ntɨŋmə̀ lo nɨ̀ kẅiirə̀ mə a zèrə, lenəla Nẅùə̀ ǎ kɨ ŋâ a zèrə ambo pɨghə.

²⁵Nkwùə̀ ntsùmə̀ za nɨ nɨ̀ pənə nchàʼtə̀ a Nẅùə̀, nɨ̀ tə ndə̀ənə̀ ɨ̀fàntə̀ mɨ̀nwùə̀ mɨ pànə̀ nɨ pobə pa nfàntə̀ ambo pɨghə, njiilo Tǎ ɨwɨghə nɨ à pənə a nɨ̀pwuurə̀ a kɨ ndə̀ənə̀ ɨ̀pɨghə.

²⁶[Nɨ̀ tə ngoŋə̀ a wɨghə ɨ̀fàntə̀ mɨ̀nwùə̀ pə̀ənə̀ tɨ pə ngwaʼà, yi ka Tǎ ɨwɨghə nɨ à pənə a nɨ̀pwuurə̀ â pə kɨ waʼà e ɨ̀pɨghə ɨ̀fàntə̀ mɨ̀nwùə̀.]”

²⁷Pobə lə̀ kẅirə̀ ndèrə̀ a Yèrusalèmə̀. Tsaʼnə pobə lə̀ tônə, Yěsû a pə nkarə̀ amwuə Ndâ Mɨ̀shwàʼà Nẅùə̀, pɨ̀fò màʼà Nẅùə̀ nɨ pɨ̀nèrə̀ mbòomə pobə pɨ̀lɨ̀ŋmə̂ pɨ àlaʼà tô ambo ze,

²⁸mbyiitə̀ ambo ze lo, “Wə̀ ghɨ̀rə̀ mɨ̀nwùə̀ mə lə nɨ ɨ̀tɨ̀ŋnə̀ ɨ̀wə̌? Kə̀ a ŋâ ɨ̀wə̌ ŋŋâ mɨ̀tɨ̀ŋnə̀ lo wə̀ ghɨ̀rə̀ mɨ̀nwùə̀ mə?”

²⁹Yěsû a shwəŋə̀ ambo pobə lo, “Mbɨ pyiitə̀ a wɨghə nɨ taʼà àpyiitə̀. Nɨ̀ tə nkẅùə̀ mə̀, ǹtiitə̀ a wɨghə nɨ alyiʼə nɨ ǹdòonə mɨ̀tɨ̀ŋnə̀ a nɨ ghɨ̀rə̀ mɨ̀nwùə̀ mə.

³⁰Jònə ngàŋə̀ àŋâ àkẅiirə̀ nchyə̂ à lə̀ lòo mɨ̀tɨ̀ŋnə̀ la ɨghə a nɨ ŋâ àkẅiirə̀ nchyə? À lə̀ lòo la ambo Nẅùə̀ kə̀ ambo pə̀ənə̀? Nɨ̀ kẅùə̀ ndzuʼù.”

³¹Pobə lə̀ tànkə̀ pobə nɨ pobə mmə nshwəŋə̀ lo, “Pə̀ənə̀ tə mbəla nshwəŋə̀ lo, ‘A lə̀ lòo la ambo Nẅùə̀,’ yi à pɨ pyiitə̀ lo, ‘Nɨ̀ ka tyiʼə̀ pyiimə̀ a wɨghə ànwùə̀ nɨ à lə̀ mənə nshwəŋə̀ mbə̀ʼə àkə?’

³²La mbə̀ʼə pə̀ənə̀ shwəŋə̀ lo, ‘À lə̀ lòo ambo pànə̀?’” Pobə lə̀ pə mbô pə̀ənə̀, mbə̀ʼnə ŋwùə̀ ntsùmə̀ à lə̀ zhyə̂nə lo Jònə ngàŋə̀ àŋâ àkẅiirə̀ nchyə̂ à lə̀ pə ngàŋə̀ ntwuumə̀ Nẅùə̀.

³³Lenəla, pobə kẅùə̀ ambo Yěsû lo, “Ka pəə zhyə̂ a wəə.” Yěsû a shwəŋə̀ ambo pobə lo, “Ka mbə kɨ tiitə̀ mə̀ a wɨghə nɨ alyiʼə nɨ ǹdòonə mɨ̀tɨ̀ŋnə̀ a nɨ ghɨ̀rə̀ mɨ̀nwùə̀ mə.”