Read Pinyin Mark 14 Bible Online

Mark 14 - Pinyin bible

Mark 14

¹A lə̀ pirə̀ njyə̂ ɨpaa njyə̂ Nɨ̀ghaʼà Àlàŋə̀ Mmyàʼtə̀ pobə njyə̂ nɨ̀zɨghə̀ Àpaanə̀ Tɨkoʼò ɨ pòŋə̀ kùʼù. Pɨ̀fò màʼà Nẅùə̀ pobə pɨ̀nèrə̀ mbòomə lə̀ mə nnaŋə̀ àlàŋə a nɨ kô a Yěsû a ndzùmə̀ ndzùmə̀ zhwuutə̀ e.

²La nshwəŋə̀ lo, “Ka a pòŋə̀ e lo pə̀ənə̀ ghɨ̀rə̀ ànwùə̀ zə̀ amwuə njyə̂ Àlàŋə̀ Mmyàʼtə̀, ntiinə pə̀ənə̀ tə ngɨ̀rə̀ a lenə, mɨ̀làʼà furə̀ amwuə pə̀ənə̀.”

³Yěsû à lə̀ pə a Betanì, a ndâ Shimùnə̀ ngàŋə̀ àkɨ̀kẅinə. Nkwùə̀ nɨ à lə̀ mənə ndzɨghə̀, mə̀ngyə̌ ɨ̀tse à lə̀ kwuunə̀ amwuə ndâ nɨ mɨ̀ghurə̀ mɨ àzhyǎ mɨ tsə̂nə nɨ pɨ tsùŋə̀nə nɨ ngotə nadə̀ amwuə məndzìrə̀ nɨ pɨ tsùŋə̀nə nɨ àlàbastà nkẅìrə̀ a mèrə a àtwuə̀ ze.

⁴Mɨ̀ntɨŋmə̀ mɨ pànə̀ pɨ̀tse nɨ pobə lə̀ pənə a alyiʼə ghu lə̀ zaŋə̀, pobə tyiʼə̀ nshwəŋə̀ pobə nɨ pobə lo, “À lanə ntsə̀ŋə̀ mɨ̀ghurə̀ mɨ àzhyǎ mə lə̀ mbə̀ʼə àkə?

⁵Ntiinə mbə̀ʼə pɨ shwùunə̀ mɨ̀ghurə̀ mə ndàŋə̀ nkaamə̀ nkɨrə ɨtarə ndòo a zèrə ŋŋâ ambo ngàŋə àfumə̀!” Pobə lə̀ saʼà a mə̀ngyə̌ wa nɨ àsinə̀ ɨ̀sɨghə̀.[2]

⁶La Yěsû a shwəŋə̀ ambo pobə lo, “Nɨ̀ myàʼtə̀ e, nɨ̀ tòmnə̀ e lə ntii àkə? À ghɨ̀rə̀ la ànwùə̀ nɨ a pòŋə̀nə ka mɨ̀zùŋə ambo mɨ̀ŋə̀.

⁷Ngàŋə àfumə̀ chyə̂ pɨghə pɨ pobə nkwùə̀ ɨ̀tsùmə̀, mbə̀ʼə nɨ̀ yèmpə̀ a ghobə nkwùə̀ ɨ̀tsùmə̀ nɨ nɨ̀ kòŋə̀nə. La aŋunə mɨ̀ŋə̀, ka mmə mbə mə̀ pə̀ənə̀ nkwùə̀ ɨ̀tsùmə̀.

⁸À ghɨ̀rə̀ la ànwùə̀ nɨ mbə̀ʼə a ghɨ̀rə̀. À zoʼò mə̀ nɨ mɨ̀ghurə̀ ma ndzàamə̀ ntsùnkə̀ la mbɨ̀ŋmə̀ mə̀ mbə̀ʼə nkwùə̀ nɨ̀tẅəŋə̀ mə̀ ɨ̀ kɨ kùʼù.

⁹Lenəla, ǹshwəŋə̀ tyìʼə̀ nkǔŋə nkuŋə ambo pɨghə lo, alyiʼə àtsùmə̀ nɨ pɨ ghǎ chwìitə̀ ntwuumə̀ ghù ɨ̀shìʼnə̀ wə̀ amwuə àtwuə̀ ɨ̀shyə̂ àtsùmə̀, pɨ ghǎ kẅuumə̀ ànwùə̀ nɨ à ghɨ̀rə̀nə lə.”

¹⁰Yudà Iskaryòtə̀ nɨ à lə̀ pənə taʼà ŋwùə̀ amwuə ɨ̀zùŋə̀ ndzùmə̀ pa ntsòbə̀ ɨpaa à lə̀ lèrə̀ ambo àtwuə̀ pɨ̀fò màʼà Nẅùə̀ a nɨ ghə̀ shwùunə̀ a Yěsû ambo pobə.

¹¹Pobə lə̀ ghaʼà ka mɨ̀zùŋə a nɨ zuʼù a lenə, ntyiʼə̀ nkàʼà a nɨ ŋâ e nɨ nkabə̀. Lenəla a tyiʼə̀ mbìʼnə̀ a nɨ tàʼà àlàŋə a nɨ ŋâ e ambo pobə.

¹²Amwuə ntsàambyə̀ njyə̂ a nɨ zɨghə̀ àpaanə̀ tɨ koʼò, nɨ pɨ lə̀ mənə ngwàrə̀ a mômbyə̂ ndzìrə̀ Àlàŋə̀ Mmyàʼtə̀, ɨ̀zùŋə̀ ndzùmə̀ Yěsû pyiitə̀ ambo ze lo, “Wə̀ tàʼà lo pəə ghə̀ ntsùŋə̀ la zèrə alyiʼə ambo ghò a nɨ zɨghə̀ mɨ̀zɨghə̀ mɨ Àlàŋə̀ Mmyàʼtə̀?”

¹³Lenəla ntwuumə̀ ɨ̀zùŋə̀ ndzùmə̀ ɨ̀pe ɨpaa, nshwəŋə̀ ambo pobə lo, “Nɨ̀ nkwuunə̀ ndèrə̀ amwuə mbòmpə àlaʼà, nɨ̌ tsirə̀ a ŋònə̀ mbyàŋnə̀ ɨ̀tse a pìʼì nɨkɨŋə nɨ nchyə. Nɨ̀ zùŋə̀ e,

¹⁴nkwuunə̀ amwuə ndâ nɨ ǎ kwuunə̀ nshwəŋə̀ ambo ngàŋə̀ ndâ lo, ‘Ɨ̀nèrə̀, ntaŋə wa nɨ pəə pɨ ɨ̀zùŋə̀ ndzùmə̀ ɨ̀pâ zɨghə̀ mɨ̀zɨghə̀ mɨ Àlàŋə̀ Mmyàʼtə̀ amwuə la ɨ ghə?’

¹⁵Ǎ nèrə̀ a wɨghə nɨ ntaŋə ghù ẅùunə nɨ ɨ pənə àtɨ̀ghə nɨ pɨ chyâ mə ɨ̀pwuumə̀ ɨ̀tsùmə̀ amwuə nkɨ ntsùŋə̀ ambo pɨghə. Nɨ̀ tyiʼə̀ ntsùŋə̀ ɨ̀pwuumə̀ nɨ pə̀ənə̌ zɨghə̀ mɨ̀zɨghə̀ mɨ Àlàŋə̀ Mmyàʼtə̀ amwuə.”

¹⁶Ɨ̀zùŋə̀ ndzùmə̀ ɨ̀pe pa lə̀ lèrə̀ ngə̀ kwuunə̀ amwuə mbòmpə àlaʼà nkɨ ndzəənə̀ tyìʼə̀ tsaʼnə à lə̀ shwəŋə̀nə la, ntyiʼə̀ ntsùŋə̀ ɨ̀pwuumə̀ njyə̂ Àlàŋə̀ Mmyàʼtə̀ pa.

¹⁷Nkwùə̀ nkwə̌ ɨ lə̀ kùʼù Yěsû pobə ɨ̀zùŋə̀ ndzùmə̀ ɨ̀pe pa ntsòbə̀ ɨpaa lèrə̀ ghu.

¹⁸Pobə lèrə̀ ghu la ngə̀ nnwuunə̀ àtwuə̀ tepèrə̀ mmə ndzɨghə̀, Yěsû a shwəŋə̀ ambo pobə lo, “Ǹshwəŋə̀ tyìʼə̀ nkǔŋə nkuŋə, taʼà ŋwùə̀ wɨghə ɨ̀tse ǎ shwùunə̀ mə̀, mbə ŋònə̀ nɨ à wə̀ ndzɨghə̀ pəə ze.”

¹⁹Pobə pìʼnə̀ a nɨ sòmnə̀ ntyiʼə̀ mbyiitə̀ pobə nɨ pobə lo “A mɨ̀ŋə̀?”

²⁰Yěsû a kẅùə̀ ambo pobə lo, “A taʼà ŋwùə̀ amwuə pɨghə pa ntsòbə̀ ɨpaa nɨ à wə̀ ntsùbə̀ àpaanə̀ pəə ze amwuə taʼà àkaŋə̀.

²¹Moonə̀ Ŋwùə̀ ǎ kwɨghə̀ tyìʼə̀ tsaʼnə pɨ lə̀ ŋwàʼnə̀nə amwuə àŋwàʼnə̀ Nẅùə̀ la. Ngəʼə̀ noʼnə ɨ chyə̂ àtwuə̀ ŋònə̀ wa nɨ ǎ shwùunə̀ a Moonə̀ Ŋwùə̀! A lə̀ pyə̀ mbòŋə̀ lo kò pɨ pyə̂ e a ye.”

²²Tsaʼnə pobə lə̀ mənə ndzɨghə̀, Yěsû a piinə̀ àpaanə̀, ŋŋâ a mɨyàa ambo Nẅùə̀ mbəʼə̀ a zèrə, ŋŋâ ambo ɨ̀zùŋə̀ ndzùmə̀ ɨ̀pe nshwəŋə̀ lo, “Nɨ̀ kò. Lə̌ mbɨ̀ŋmə̀ mə̀.”

²³A lə̀ kɨ mbìʼì ndoŋə̀ mɨ̀lùʼù, ŋŋâ a mɨyàa ambo Nẅùə̀, ŋŋâ a zèrə ambo pobə, pobə pɨ̀tsùmə̀ nô amwuə ndoŋə̀ ghu.

²⁴Yěsû a tyiʼə̀ nshwəŋə̀ ambo pobə lo, “Lə̌ àləəmə̀ mə̀; àləəmə̀ ɨ̀kàanə̀ nɨ mbɨ wàrə̀ nɨ a pɨ kẅìnə̀ àtwuə̀ nɨ pànə̀ pɨ̀noʼnə.

²⁵Ǹshwəŋə̀ tyìʼə̀ nkǔŋə nkuŋə ambo pɨghə lo, ka mbə chi nô mə̀ mɨ̀lùʼù mə tə mbyàa njyə̂ nɨ ngǎ kẅirə̀ nô a mèrə shwuə̀ shwuə̀ amwuə alyiʼə Nɨ̀fò Nẅùə̀.”

²⁶Lenəla, pobə tyiʼə̀ ndzòbə̀ nchyə, nfurə̀ nkoʼò ndèrə̀ àtwuə̀ Mbarə̀ Olìvə̀.

²⁷Yěsû a shwəŋə̀ ambo pobə lo, “Pɨghə pɨ̀tsùmə̀ ghǎ kɨ̀ɨrə̀ waʼà mə̀, ntiinə pɨ ŋwàʼnə̀ amwuə àŋwàʼnə̀ Nẅùə̀ lo, ‘Ngǎ zhwuutə̀ a mbyabə̀ mɨ̀mbyə̂ mɨ ndzìrə̀ wa, mɨ̀mbyə̂ mɨ ndzìrə̀ mɨ̀tsùmə̀ taanə̀.’

²⁸La nkwùə̀ nɨ mbɨ zhwuumə̀ a nɨ̀wɨghə̀, mbɨ lèrə̀ a mbyə̀ pɨghə a Galìlyə̂.”

²⁹Pità a shwəŋə̀ ambo ze lo, “Pànə̀ pɨ̀tsùmə̀ lə pyə̀ nkɨ̀ɨrə̀ mmyàʼtə̀ o, mmyàʼtə̀ mə̀ a ghò apə̀.”

³⁰Yěsû a kẅùə̀ lo, “Ǹshwəŋə̀ tyìʼə̀ nkǔŋə nkuŋə ambo ghò lo, tyìʼə̀ nɨ ɨ̀twuʼə̀ sìnə̀, ankəʼə a ghǎ kɨ toŋə̀ nkwùə̀ ɨpaa wə̀ twuunə̀ mə̀ nkwùə̀ ɨtarə.”

³¹La Pità a kẅirə̀ nshwəŋə̀ nɨ ɨ̀tɨ̀ŋnə̀ lo, “A tə mbə pə nɨ̀wɨghə̀, nkwɨghə̀ pùu; mbə̀ʼə ntwuunə̀ mə̀ a ghò apə̀.” Ɨ̀zùŋə̀ ndzùmə̀ ɨ̀pe ɨ̀tsùmə̀ zùŋə̀ nkɨ shwəŋə̀ a lenə.

³²Pobə lə̀ ghə̀ mbyàa a alyiʼə àtse nɨ pɨ lə̀ mənə nfuŋə̀ nɨ Gethsemane, a shwəŋə̀ ambo ɨ̀zùŋə̀ ndzùmə̀ ɨ̀pe lo, “Nɨ̀ nwuunə̀ a ɨ̀shyə̂ nɨ̀ghə̂ n̂gə̀ nchàʼtə̀ a Nẅùə̀.”

³³À lə̀ shwəŋə̀ a lenə la ndòo Pità, nɨ Jemə̀, nɨ Jònə, pobə pɨ pobə lèrə̀. Mbɨ̀ŋmə̀ e ɨ pìʼnə̀ a nɨ pɨ̂, ntɨŋmə̀ e lẅenə̀ nɨ àsòmnə̀.

³⁴A shwəŋə̀ ambo pobə lo, “Ntɨŋmə̀ mə̀ ɨ wə̀ ndẅenə̀ nɨ àsòmnə̀ tə ntyiʼə̀ tyìʼə̀ a nɨ zhwuutə̀ a mə̀, nɨ̀ nwuunə̀ a ɨ̀shyə̂ nɨ̀ghə̂ mbə a nɨ̀lyìinə̀ mmə mbyabə̀.”

³⁵À lə̀ nyaʼa mmìntə̀ tyìʼə̀ lə mmàʼà mbɨ̀ŋmə̀ e a ɨ̀shyə̂, nchàʼtə̀ a Nẅùə̀ lo, àlàŋə a tə mbəla mbə ghu, yi mbə̀ʼə mətùmə nkwùə̀ ngəʼə̀ wə̀ a làŋə̀ tɨghu à zəənə̀ a zèrə.

³⁶Nshwəŋə̀ lo, “Abà, Tǎ ɨwəə! Mbə̀ʼə wə̀ ghɨ̀rə̀ ànwùə̀ àtsùmə̀. Kẅiirə̀ ndoŋə̀ ngəʼə̀ zə̀ ambo mɨ̀ŋə̀. Kò a pə e pə tsaʼnə ǹtàʼnə, â pə pə tsaʼnə wə̀ tàʼnə a nɨ ghɨ̀rə̀.”

³⁷A kẅirə̀ ntô ndzəənə̀ ɨ̀zùŋə̀ ndzùmə̀ ɨ̀pe pə ndyə̂, a shwəŋə̀ ambo Pità lo, “Shimùnə̀, ghò wə̀ ndyə̂ o? Mbə̀ʼə ka wə̀ nwuunə̀ o a nɨ̀lyìinə̀ aŋunə mətùmə nkwùə̀?

³⁸Nɨ̀ nwuunə̀ a nɨ̀lyìinə̀ mmə nchàʼtə̀ a Nẅùə̀ mbə̀ʼə nɨ̀ kaŋə kunə̀ amwuə àkwàʼnə̀. Àzhwùə̀ a zə̀ nkòŋə̀, la mbòbə̀ mbɨ̀ŋmə̀ ɨ̀ porə̀.”

³⁹Yěsû a kẅirə̀ ndèrə̀ a nɨ chàʼtə̀ a Nẅùə̀, nkɨ nshwəŋə̀ tyìʼə̀ mɨ̀nwùə̀ nɨ à pyə̀nə mə nshwəŋə̀.

⁴⁰A kɨ kẅirə̀ tô, mbirə̀ ndzəənə̀ ɨ̀zùŋə̀ ndzùmə̀ ɨ̀pe pa pobə mə ndyə̂ a ghobə lyə̂nə, ntiinə pɨlô a lə̀ pənə a àtwuə̀ pobə tɨsɨŋnə. Ka pobə lə̀ zhyə̂ a ghobə ànwùə̀ nɨ mbə̀ʼə pobə shwəŋə̀ ambo ze.

⁴¹A lə̀ chi ntô nkwùə̀ nɨ pyàanə ɨtarə, mbyiitə̀ ambo pobə lo, “Nɨ̀ wə̀ nkɨ mbirə̀ ndyə̂ a wɨghə lyə̂nə nzhwùutə̀ a wɨghə? Â kùʼù! Nkwùə̀ ɨ̀ kùʼù; pɨ shwùunə̀ mə a Moonə̀ Ŋwùə̀ ambo ngàŋə ngɨ̀rə̀ ɨ̀nwùə̀ tɨ̀pòŋə̀.

⁴²Nɨ̀ lòo a ɨ̀shyə̂, pə̀ənə̀ lèrə̀! Nɨ̀ zəənə̀, ŋònə̀ nɨ à shwùunə̀nə mə̀ à wə̀ ntô.”

⁴³Tsaʼnə Yěsû à lə̀ pirə̀nə mmə nshwəŋnə̀, Yudà nɨ à lə̀ pənə taʼà ŋwùə̀ amwuə ɨ̀zùŋə̀ ndzùmə̀ ɨ̀pe pa ntsòbə̀ ɨpaa a zùŋə̀ ntô pobə pɨ àpùŋə̀ pə̀ənə̀ nɨ pobə twuʼtə̀nə pɨ̀mɨnẅuə pɨ ntsòo pobə mɨ̀pòrə̀, nɨ pɨ̀fò màʼà Nẅùə̀ pobə pɨ̀nèrə̀ mbòomə nɨ pɨ̀lɨ̀ŋmə̂ pɨ àlaʼà lə̀ twuumə̀nə.

⁴⁴Yudà, ŋònə̀ nɨ à lə̀ shwùunə̀nə e à lə̀ ŋâ àlènə̀ ambo pobə lo, “Ŋònə̀ wa nɨ mbɨ nyoŋə̀ mɨ̀ghə̀ʼə̀ ɨ̀me la ŋònə̀ ghu. Njiilo nɨ̀ kô e ngyìinə̀ mbyabə̀ ɨ̀shìʼnə̀ ndòo ndèrə̀ nɨ ẅèrə.”

⁴⁵Tyìʼə̀ tsaʼnə Yudà à lə̀ tônə, à lə̀ zùŋə̀ ndàŋə̀ ndèrə̀ a nɨ̀pwùnə Yěsû nnyoŋə̀ mɨ̀ghə̀ʼə̀ ɨ̀me nshwəŋə̀ lo, “Masàa!”

⁴⁶Lenəla, pànə̀ pɨ̀ghu lə̀ kô a Yěsû ngẅìimə̀ e nɨ mbô mɨ̀tɨ̀ŋnə̀.

⁴⁷La taʼà ŋwùə̀ amwuə pànə̀ nɨ pobə lə̀ təəmə̀nə a nɨ̀pwùnə mmə nnaŋə̀, a tsoʼò a mɨnẅuə ntsòo ndə̂ nɨtugrə nɨ ngàŋə̀ àfàʼà àtwuə̀ pɨ̀fò màʼà Nẅùə̀.

⁴⁸Yěsû a shwəŋə̀ ambo pobə lo, “Nɨ̀ tyiʼə̀ ntô nɨ pɨ̀mɨnẅuə pɨ ntsòo pobə mɨ̀pòrə̀ a nɨ kô mə̀ tsaʼa ntuŋə̀ ɨ̀shyə̂?

⁴⁹Ndə̀ mə mbə pə̀ənə̀ a Ndâ Mɨ̀shwàʼà Nẅùə̀ njyə̂ ɨ̀tsùmə̀ nnèrə̀ a wɨghə nɨ mɨ̀nwùə̀ ka nɨ̀ kô a wɨghə a gha. La ànwùə̀ zə̀ a chyə̂ a nɨ furə̀ mbə̀ʼə lẅenə̀ ànwùə̀ nɨ Àŋwàʼnə̀ Nẅùə̀ a lə̀ shwəŋə̀nə.”

⁵⁰Ɨ̀zùŋə̀ ndzùmə̀ ɨ̀pe ɨ̀tsùmə̀ lə̀ myàʼtə̀ e nkɨ̀ɨrə̀ a ghobə.

⁵¹Môngwàswùumə̀ ɨ̀tse nɨ à lə̀ lyibə̀nə pə ndàʼà atsəʼə fuə a mbɨ̀ŋmə̀ ze à lə̀ pə ndzùŋə̀ a Yěsû. Pànə̀ pa lə̀ kyiitə̀ lo kô e,

⁵²la a myàʼtə̀ atsəʼə ambo pobə nkɨ̀ɨrə̀ e ntǔmnə̀.

⁵³Pɨ lə̀ lòo a Yěsû ndèrə̀ a ndâ àtwuə̀ pɨ̀fò màʼà Nẅùə̀ alyiʼə nɨ pɨ̀fò màʼà Nẅùə̀, nɨ pɨ̀lɨ̀ŋmə̂ pobə pɨ̀nèrə̀ mbòomə lə̀ mənə nshwatə̀.

⁵⁴Pità à lə̀ mə ndzùŋə̀ e la mbə a ndyə̌ sàa ngə̀ nkwuunə̀ amwuə àpùʼù àtwuə̀ pɨ̀fò màʼà Nẅùə̀, nnwuunə̀ pobə pɨ pànə̀ nɨ pobə mənə mbyabə̀ ɨlyiʼə mmə ndzô ɨ̀mǔ e.

⁵⁵Pɨ̀fò màʼà Nẅùə̀ pobə Kansèrə̀ ntsùmə̀ lə̀ tàʼà àlàŋə àtsùmə̀ a nɨ zəənə̀ ànwùə̀ nɨ mbə̀ʼə pobə shwəŋə̀ aŋunə Yěsû mbə̀ʼə zhwuutə̀ e, la ka zəənə̀ a ghobə.

⁵⁶Pànə̀ pɨ̀noʼnə lə̀ shwəŋə̀ mɨ̀nwùə̀ mɨ fuə mbə̀ʼə Yěsû, la ɨ̀shwəŋnə̀ ɨ̀pobə furə̀ chwìi chwìi.

⁵⁷Pànə̀ pɨ̀tse lə̀ lòo a ɨ̀shyə̂ nyìi a chwìrə̀ wə̀ aŋunə ze nshwəŋə̀ lo,

⁵⁸“Pəə lə̀ zuʼù a shwəŋə̀ lo, ‘Ngǎ kùmə̀ Ndâ Mɨ̀shwàʼà Nẅùə̀ zə̀ nɨ pànə̀ poomə̀nə lə, kẅirə̀ poomə̀ a zhyə̀ nɨ ka à poomə̀ e pànə̀ pɨ mɨsoŋə aŋunə njyə̂ ɨtarə.’”

⁵⁹Mbaa pə pobə, ka pobə lə̀ zhyə̂ a ghobə ndwuumə̀ nɨ mbə̀ʼə pobə ghɨ̀rə̀ ɨ̀shwəŋnə̀ ɨ̀pobə yìinə̀ ndəŋə ndəŋə.

⁶⁰Àtwuə̀ pɨ̀fò màʼà Nẅùə̀ a təəmə̀ a mbyə̀ pobə pɨ̀tsùmə̀ mbyiitə̀ a Yěsû lo, “Ka wə̀ pə o nɨ ànwùə̀ àtse a nɨ shwəŋə̀? Ka wə̀ pə o nɨ ànwùə̀ àtse a nɨ shwəŋə̀ aŋunə mɨ̀nwùə̀ nɨ pɨ pə nshwəŋnə̀ àtwuə̀ ghò lanə?”

⁶¹La Yěsû à lə̀ zhwemnə̀ e ka shwəŋə̀ e ànwùə̀ àtse. Àtwuə̀ pɨ̀fò màʼà Nẅùə̀ a kẅirə̀ mbyiitə̀ e lo, “Ghò la Ghù Ndzoʼnə wa, mbə Moonə̀ Nẅùə̀ nɨ pɨ pa nguʼtə̀ la?”

⁶²Yěsû a kẅùə̀ lo, “A mɨ̀ŋə̀, nɨ̀ ghǎ zəənə̀ a Moonə̀ Ŋwùə̀ â nwuunə̀ a pàa àpô Nẅùə̀ yè zɨghə̀nə nɨ à twuʼtə̀nə mɨ̀tɨ̀ŋnə̀ mɨ̀tsùmə̀, â furə̀ a nɨ̀pwuurə̀ nshwuʼə̀ amwuə mbàʼà.”

⁶³Tsaʼnə à shwəŋə̀nə la, àtwuə̀ pɨ̀fò màʼà Nẅùə̀ a zùŋə̀ nsìirə̀ ɨtsəʼə ɨ̀pe nshwəŋə̀ lo, “Pə̀ənə̀ chi ntàʼà pɨ̀ndzəənə̀ zəənə̀nə aŋunə àkə?

⁶⁴Nɨ̀ zuʼù tsaʼnə à zòomə̀nə a Nẅùə̀. Nɨ̀ kùmə̀ nkwàŋə̀ àzɨghə lo pə̀ənə̀ ghɨ̀rə̀ la ghu?” Pobə pɨ̀tsùmə̀ lə̀ lə̂ ɨ̀sàʼa mbyiimə̀ lo pɨ̀ zhwuutə̀ e.

⁶⁵Pobə pɨ̀tse lə̀ pìʼnə̀ a nɨ tẅùə̀ mɨ̀tẅuə̀ aŋunə Yěsû, nkorə̀ ɨ̀myə̂ ɨ̀me nɨ àpàa atsəʼə, mmə ntsòo e nshwəŋə̀ lo, “Səʼə̀ a ŋònə̀ nɨ à tsòonə o.” Pɨ̀mbyabə̀ ɨlyiʼə lə̀ lòo e ngə̀ ntyiʼə̀ mbuʼù.

⁶⁶Pità à lə̀ pirə̀ nnwuunə̀ amwuə àpùʼù za mmə ndzô ɨ̀mǔ e, ngàŋə̀ àfàʼà àtwuə̀ pɨ̀fò màʼà Nẅùə̀ ghù mə̀ngyə̌ yɨ̀tse a tô,

⁶⁷ntsirə̀ a Pità nnaŋə̀ e amwuə ɨ̀myə̂ ɨ̀me nshwəŋə̀ lo, “Yi wə̀ tə nkɨ mbə pɨghə Yěsû ŋwùə̀ Nazarètə̀?”

⁶⁸La Pità a làʼnə̀ e ànwùə̀ ghu nshwəŋə̀ lo, “Ka ǹzhyə̂ mə̀ a ye, ka kɨ zhyə̂ mə̀ ànwùə̀ nɨ ghò wə̀ nshwəŋə̀ lə.” À lə̀ shwəŋə̀ a lenə la, nfurə̀ mbə a ntswùə̀ àpùʼù, [ankəʼə a zùŋə̀ ntoŋə̀].[3]

⁶⁹Mômə̀ngyə̌ wa à lə̀ chi ndzəənə̀ Pità mbìʼnə̀ a nɨ shwəŋə̀ ambo pànə̀ nɨ pobə təəmə̀nə alyiʼə ghu lo, “Lə̌ taʼà ŋwùə̀ ɨ̀ghobə ghùtse.”

⁷⁰La Pità a kɨ nchi ndàʼnə̀ e. Mətùmə nkwùə̀ a chi kɨ làŋə̀, pànə̀ nɨ pobə lə̀ təəmə̀nə a alyiʼə ghu nshwəŋə̀ ambo Pità lo, “A tyìʼə̀ nkǔŋə nkuŋə. Wə̀ la taʼà ŋwùə̀ ɨ̀ghobə ghùtse, ntiinə wə̀ kɨnə nfurə̀ àzô la a Galìlyə̂.”

⁷¹A pìʼnə̀ a nɨ chyâ ndòonə̀ aŋunə mbɨ̀ŋmə̀ e, ntsə̀əmə̀ nshwəŋə̀ lo, “Ka nzhyə̂ mə̀ a ŋònə̀ wə̀ nɨ nɨ̀ wə̀ nshwəŋnə̀ mbə̀ʼə e lə. Nẅùə̀ ǎ chyâ ndòonə̀ mə̀ mbə̀ʼə m̀mə nyìi la chwìrə̀.”

⁷²Tyìʼə̀ nkwùə̀ ghu, ankəʼə a kɨ nchi ntoŋə̀. Pità a kẅuumə̀ tsaʼnə Yěsû à lə̀ shwəŋə̀nə ambo ze lo, “Ankəʼə à ghǎ kɨ toŋə̀ nkwùə̀ ɨpaa, wə̌ twuunə̀ mə̀ nkwùə̀ ɨtarə.” A lə̀ kẅuumə̀ a lenə la mbirə̀ a nɨ̀yìi.