Read Pinyin Mark 16 Bible Online

Mark 16 - Pinyin bible

Mark 16

¹Tsaʼnə njyə̂ àlaʼà ɨ̀ lə̀ làŋə̀nə, Màriyà nɨ à lə̀ furə̀nə a Magdalà, pobə Màriyà mǎ pɨ Jemə̀, nɨ Sàlomè à lə̀ zwuunə̀ mɨ̀ghurə̀ mɨ àzhyǎ lo ghə̀ zoʼò àkwuə̀ Yěsû ghu.

²A pə a ngẅùʼə ngẅùʼə aŋunə ntsàambyə̀ njyə̂ amwuə ngàbə̀, nkwùə̀ nɨ nẅùumə̀ à lə̀ mənə nsaʼà, pə̀ngyə̌ pa pə ndèrə̀ a ntswùə̀ nɨ̀shyə̀ gha,

³ntyiʼə̀ ngyìinə̀ mbyiitə̀ pobə nɨ pobə lo, “Nɨ̀ghòorə tsa a ntswùə̀ nɨ̀shyə̀ a pɨ tinə̀ ɨ̀wə̌ ŋŋâ nɨ pə̀ənə̀?”

⁴Nkwùə̀ nɨ pobə lə̀ tyiʼnə mmə mbyàa a ntswùə̀ nɨ̀shyə̀, pobə lə̀ pə̀ʼkə̀ ɨ̀myə̂ ɨ̀mobə ndzəənə̀ lo pɨ pɨgrə̀ mə a maa nɨ̀ghòorə wa a ntswùə̀ nɨ̀shyə̀.

⁵Pobə tyiʼə̀ nkwuunə̀ amwuə nɨ̀shyə̀ tsɨ̀ghu, ndzəənə̀ a môngwàswùumə̀ ɨ̀tse nɨ à lə̀ ẅînə ɨtsəʼə pɨ fuə a nwuunə̀ a pàa àpô yè zɨghə̀nə. Ànwùə̀ amwuə a tyiʼə̀ nkə̀ʼnə̀ a ghobə.

⁶Ŋònə̀ ghu a shwəŋə̀ ambo pobə lo, “Kò a kə̀ʼnə̀ e a wɨghə. Nzhyə̂ lo nɨ̀ wə̀ nnaŋə̀ lə a Yěsû nɨ à furə̀nə a Nazarètə̀, nɨ pɨ lə̀ kẅùumə̀nə e aŋunə àtɨ̀ghə pànkə̀nə. À zhwuumə̀ a nɨ̀wɨghə̀, ka à pə e a nɨ̀ghə̂. Nɨ̀ zəənə̀ alyiʼə nɨ pɨ lə̀ nùŋə̀nə e ghu.

⁷La nɨ̀ lèrə̀, ngə̀ nshwəŋə̀ ambo ɨ̀zùŋə̀ ndzùmə̀ ɨ̀pe pobə Pità lo, ‘Yěsû à wə̀ a mbyə̀ pɨghə mmə ndèrə̀ a Galìlyə̂; alyiʼə ghu nɨ̌ zəənə̀ e tyìʼə̀ tsaʼnə à lə̀ shwəŋə̀nə a wɨghə.’”

⁸Pobə lə̀ furə̀ amwuə nɨ̀shyə̀ tsa nkɨ̀ɨrə̀ ngyìinə̀ ngwùrə̀ ka ŋwùə̀ a shwəŋnə̀ ambo ŋwùə̀ ntiinə ànwùə̀ ghu a lə̀ kə̀ʼnə̀ a ghobə pobə pə nɨ àkẅàrə̀.

⁹Nkwùə̀ nɨ Yěsû à lə̀ zhwuumə̀nə a nɨ̀wɨghə̀ amwuə ntsàambyə̀ njyə̂ amwuə ngàbə̀, à lə̀ pyə̀ nnèrə̀ ɨ̀pɨ̀ŋmə̀ e la ambo Màriyà nɨ à lə̀ furə̀nə a Magdalà nɨ à lə̀ fuukə̀nə ɨ̀zhyə̂ sàmbaa a nɨ̀pùmə̀ ze la.

¹⁰Màriyà nɨ à lə̀ furə̀nə a Magdalà à lə̀ tyiʼə̀ ngə̀ ntiitə̀ pànə̀ nɨ pobə pɨ Yěsû lə̀ pənə alyiʼə nɨ pobə lə̀ mənə nsòmnə̀ ngyìi.

¹¹Nkwùə̀ nɨ pobə lə̀ zuʼnə Màriyà nɨ à lə̀ furə̀nə a Magdalà a shwəŋə̀ ambo pobə lo Yěsû à zhwuumə̀ a nɨ̀wɨghə̀ nnèrə̀ ɨ̀pɨ̀ŋmə̀ e ambo ze, ka pobə lə̀ pyiimə̀ a ghobə.

¹²Zèrə zə̀ ànwùə̀ a lə̀ làŋə̀, a chi ntô nnèrə̀ mbɨ̀ŋmə̀ e ambo pobə pɨ̀tse pɨpaa amwuə àlàŋə yè nyaanə nɨ pobə lə̀ mənə ngyìinə̀ ndèrə̀ amwuə pàa àlaʼà àtse.

¹³Lenəla pobə lə̀ kẅirə̀ nkwə̂ ntiitə̀ a pyə̀ pə̀ənə̀ la ka pobə pyiimə̀ a ghobə.

¹⁴Nkwùə̀ ɨ̀tse ɨ̀ lə̀ làŋə̀ Yěsû a tô nnèrə̀ mbɨ̀ŋmə̀ e ambo ɨ̀zùŋə̀ ndzùmə̀ ɨ̀pe pa ntsòbə̀ moʼo nkwùə̀ nɨ pobə lə̀ mənə ndzɨghə̀. À lə̀ saʼà a ghobə ntiinə pobə lə̀ nàanə̀nə mɨ̀ntɨŋmə̀ ɨ̀mobə ka kɨ mə pyiimə̀ a ghobə ànwùə̀ nɨ pànə̀ pa nɨ pɨ lə̀ zəənə̀nə e nkwùə̀ nɨ à lə̀ zhwuumə̀nə a nɨ̀wɨghə̀ lə̀ mənə nshwəŋə̀.

¹⁵À lə̀ tyiʼə̀ nshwəŋə̀ ambo pobə lo, “Nɨ̀ lèrə̀ amwuə àtwuə̀ ɨ̀shyə̂ àtsùmə̀ nchwìitə̀ ntwuumə̀ ghù ɨ̀shìʼnə̀ wa ambo pànə̀ pɨ̀tsùmə̀.

¹⁶Ŋònə̀ nɨ à zuʼnə ntwuumə̀ ghù ɨ̀shìʼnə̀ wa mbyiimə̀ nkɨ nkẅiirə̀ nchyə, à pɨ chwarə̀. La Nẅùə̀ à ghǎ chyâ ɨ̀sàʼa a àtwuə̀ ŋònə̀ wa nɨ à twuunə̀nə e a ẅèrə la.

¹⁷Pànə̀ nɨ pobə nùŋə̀nə mɨ̀ntɨŋmə̀ ɨ̀mobə aŋunə mɨ̀ŋə̀ ghǎ pə nɨ ɨ̀lènə̀ pə̀: pobə ghǎ fuukə̀ ɨ̀zhyə̂ a mɨ̀pùmə̀ pə̀ənə̀ aŋunə nɨ̀linə̀ ɨ̀tsâ; pobə ghǎ shwəŋnə̀ ɨ̀shwəŋnə̀ pɨ shwuə̀;

¹⁸pobə ghǎ mə ẅìimə̀ mɨ̀nyoorə̀ nɨ mbô ɨ̀mobə kə̀ nô pə ndyiʼə̀, ànwùə̀ àtse â ghɨ̀rə̀ e a ghobə apə̀, pobə kɨ mmə nnùŋə̀ mbô ɨ̀mobə a àtwuə̀ pɨghoonə pobə̂ fiitə̀.”

¹⁹Tsaʼnə Ndòʼnə̀mbyə̂ Yěsû à lə̀ myàanə̀nə a nɨ nshwəŋnə̀ ambo pobə la, Nẅùə̀ à lə̀ lòo e a koʼò ndèrə̀ a nɨ̀pwuurə̀, ntyiʼə̀ nnwuunə̀ a pàa àpô ze yè zɨghə̀nə.

²⁰Lenəla ɨ̀zùŋə̀ ndzùmə̀ ɨ̀pe pa lə̀ tyiʼə̀ ndèrə̀ ngə̀ mmə nchwìitə̀ ntwuumə̀ ghù ɨ̀shìʼnə̀ wa a alyiʼə àtsùmə̀, Nẅùə̀ a kɨ ntyiʼə̀ mmə nfàʼà pobə pɨ pobə nnèrə̀ ɨ̀lènə̀ mbə̀ʼə pɨ zhyə̂ lo pobə shwəŋə̀ la a nkǔŋə nkuŋə aŋunə ɨ̀nwùə̀ pɨ̀yerə̀nə yerə̀nə nɨ pobə lə̀ mənə ngɨ̀rə̀.