Read Pinyin Mark 2 Bible Online

Mark 2 - Pinyin bible

Mark 2

¹Mɨ̀njyə̂ mɨ̀tse lə̀ kɨ làŋə̀, Yěsû a kẅirə̀ nkwə̂ a Kàpenòmə̀. Ntwuumə̀ lə̀ sìimə̀ lo à kẅirə̀ nkwə̂ mbə amwuə alyiʼə.

²Pànə̀ pɨ̀noʼnə lə̀ zuʼù, ntô nshwatə̀ a ntswùə̀ ndâ gha tɨ ka ɨ̀sàanə̀ ɨ lə̀ pə e ghu a ntswùə̀ ndâ ghu a nɨ làŋə̀ nkwuunə̀ a ndâ. Yěsû a tyiʼə̀ mmə nchwìitə̀ ntwuumə̀ Nẅùə̀ ambo pobə.

³Tsaʼnə à lə̀ mənə nshwəŋnə̀ la, pànə̀ nɨ̀kwàa lə̀ ləŋə̀ a ŋònə̀ nɨ taʼà pàa mbɨ̀ŋmə̀ e à lə̀ kwɨghə̀nə ndòo ntô ambo ze.

⁴Tsaʼnə pànə̀ lə̀ noʼnə, ka ɨ̀sàanə̀ ɨ pə e ghu a nɨ zùŋə̀ ntô a mbyə̀ Yěsû la, pobə lə̀ koʼò àtwuə̀ ndâ nshwùə̀ nɨ̀fə̀ŋə a ngotə àtwuə̀ alyiʼə nɨ Yěsû à lə̀ pənə ghu. Nkwùə̀ nɨ pobə lə̀ shwùə̀ nɨ̀fə̀ŋə tsɨ̀ghu nɨ kùʼù, pobə lə̀ tyiʼə̀ ntsàa e aŋunə ɨ̀kwùunə ntə̂ e a mbyə̀ Yěsû.

⁵Nkwùə̀ nɨ Yěsû à lə̀ zəənə̀nə àpyiimə̀ ntɨŋmə̀ nɨ pobə pənə nɨ zèrə, à lə̀ shwəŋə̀ ambo ŋònə̀ nɨ taʼà pàa mbɨ̀ŋmə̀ e à lə̀ kwɨghə̀nə la lo, “Moonə̀ mə̀, pɨ lə̀ənə̀ mə ɨ̀nwùə̀ tɨ̀pòŋə̀ ɨ̀pô.”

⁶Pɨ̀nèrə̀ mbòomə pɨ̀tse lə̀ nwuunə̀ alyiʼə ghu ntyiʼə̀ nkwàŋə̀ amwuə pobə lo,

⁷“Ŋònə̀ wə̀ à làŋə̀ lə ɨla nshwəŋnə̀ nɨ ndwuumə̀ wə̀? À wə̀ ndzòomə̀ a Nẅùə̀. Ka ŋònə̀ ɨ̀tse a pə e ghu nɨ à wa ndə̀ənə̀ ɨ̀fànə̀ mɨ̀nwùə̀ pə̀ənə̀ ndàŋə̀ e Nẅùə̀.”

⁸Yěsû a lə̀ zùŋə̀ nzhyə̂ mɨ̀nwùə̀ ma mɨ̀tsùmə̀ nɨ pobə lə̀ mənə nkwàŋə̀ amwuə pobə la, mbyiitə̀ ambo pobə lo, “Nɨ̀ kwàŋə̀ mbuurə̀ mɨ̀nwùə̀ zə̀ mbə̀ʼə àkə?

⁹A zàŋə̀ a nɨ shwəŋə̀ ambo ŋònə̀ wə̀ nɨ pàa mbɨ̀ŋmə̀ e a kwɨghə̀nə la lo ‘Pɨ lə̀ənə̀ ɨ̀fànə̀ mɨ̀nwùə̀ ɨ̀pô’, kə̀ ‘Lòo a ɨ̀shyə̂ mbìʼì ɨ̀kwùunə o ndèrə̀ o’?

¹⁰Mbɨ ghɨ̀rə̀ nɨ̀ zhyə̂ lo, Moonə̀ Ŋwùə̀ à wa nɨ ɨ̀tɨ̀ŋnə̀ amwuə àtwuə̀ ɨ̀shyə̂ ghə a nɨ lə̀ənə̀ ɨ̀fànə̀ mɨ̀nwùə̀ pə̀ənə̀.” Tsaʼnə à lə̀ shwəŋə̀nə a lenə la, à lə̀ tyiʼə̀ nshwəŋə̀ ambo ŋònə̀ nɨ taʼà pàa mbɨ̀ŋmə̀ e a kwɨghə̀nə la lo,

¹¹“Nshwəŋə̀ ambo ghò lo, lòo a ɨ̀shyə̂ mbìʼì ɨ̀kwùunə o ndèrə̀ o a ndâ ghò.”

¹²Ŋònə̀ ghu a lə̀ lòo a ɨ̀shyə̂ ndzùŋə̀ mbìʼì ɨ̀kwùunə e nfurə̀ a ɨ̀myə̂ pànə̀ pɨ̀tsùmə̀. A lə̀ pə ànwùə̀ yerə̀nə yerə̀nə ambo pobə, pobə tyiʼə̀ nguʼtə̀ Nẅùə̀ nshwəŋə̀ lo, “Pəə laʼa mə mbirə̀ a wəə tɨ zəənə̀ mbuurə̀ ànwùə̀ tsaʼa zə̀!”

¹³Yěsû a lə̀ kẅirə̀ ndèrə̀ a nɨ̀pwùnə atəŋə Galìlyə̂. Àpùŋə̀ pə̀ənə̀ a lə̀ kamnə̀ e, a tyiʼə̀ mbìʼnə̀ a nɨ nèrə̀ a ghobə nɨ mɨ̀nwùə̀.

¹⁴Nkwùə̀ nɨ à lə̀ myàanə̀nə, à lə̀ mə ngyìinə̀ a nɨ̀pwùnə atəŋə za, ndzəənə̀ a ɨ̀nkẅiirə̀ pɨ̀taghə̀, Levì moonə̀ Àlfeyùsə̀ a nwuunə̀ a ndâ ɨ̀nkẅiirə̀ pɨ̀taghə̀. Yěsû a shwəŋə̀ ambo ze lo, “Tô ndzùŋə̀ mə̀.” Lenəla, Levì a lòo a ɨ̀shyə̂ mbìʼnə̀ a nɨ zùŋə̀ a Yěsû.

¹⁵Nkwùə̀ ɨ̀tse ɨ lə̀ làŋə̀ Yěsû pobə ɨ̀zùŋə̀ ndzùmə̀ ɨ̀pe mə ndzɨghə̀ a ndâ Levì. Pɨ̀nkẅiirə̀ pɨ̀taghə̀ pɨ̀noʼnə pobə ngàŋə ngɨ̀rə̀ ɨ̀nwùə̀ tɨ̀pòŋə̀ pɨ̀noʼnə lə̀ pwuutə̀ a Yěsû alyiʼə mɨ̀zɨghə̀ gha, ntiinə pànə̀ pɨ̀noʼnə lə̀ pə ndzùŋə̀ a Yěsû nkwùə̀ ghu.

¹⁶Pɨ̀nèrə̀ mbòomə pɨ̀tse nɨ pobə lə̀ pənə pɨ̀Farìsî lə̀ zəənə̀ ndwuumə̀ nɨ Yěsû a lə̀ mənə ndzɨghə̀ pobə ngàŋə ngɨ̀rə̀ ɨ̀nwùə̀ tɨ̀pòŋə̀ nɨ pɨ̀nkẅiirə̀ pɨ̀taghə̀, mbyiitə̀ ambo ɨ̀zùŋə̀ ndzùmə̀ ɨ̀pe lo, “A ghɨ̀rə̀ àkə lo, tǎ ɨwɨghə a tyiʼə̀ ndzɨghə̀ pobə pɨ̀nkẅiirə̀ pɨ̀taghə̀ nɨ ngàŋə ngɨ̀rə̀ ɨ̀nwùə̀ tɨ̀pòŋə̀?”

¹⁷Yěsû a zuʼù ànwùə̀ nɨ pobə mənə nshwəŋnə̀ nshwəŋə̀ ambo pobə lo, “Ka pànə̀ pa nɨ ka pobə mə ngòonə̀ a ghobə la tàʼà a ghobə a mbarə̀ pə̀ənə̀. A mbarə̀ pə̀ənə̀ la a tàʼà pɨghoonə, ka ndə̀ tô mə̀ la a nɨ fuŋə̀ pànə̀ nɨ mɨ̀nwùə̀ ɨ̀mobə təəmə̀nə, ndə̀ tô la a nɨ fuŋə̀ ngàŋə ngɨ̀rə̀ ɨ̀nwùə̀ tɨ̀pòŋə̀.”

¹⁸A lə̀ pə nkwùə̀ ghu, ɨ̀zùŋə̀ ndzùmə̀ Jònə ngàŋə̀ àŋâ àkẅiirə̀ nchyə pobə ɨ̀zùŋə̀ ndzùmə̀ pɨ̀Farìsî lə̀ mə ndzwuə̀ tɨ zɨghə̀ amwuə àchàʼtə̀ Nẅùə̀, pànə̀ pɨ̀tse tô ambo Yěsû mbyiitə̀ e lo, “A ghɨ̀rə̀ àkə lo ɨ̀zùŋə̀ ndzùmə̀ Jònə pobə ɨ̀zùŋə̀ ndzùmə̀ pɨ̀Farìsî mə ndzwuə̀ tɨ zɨghə̀ amwuə àchàʼtə̀ Nẅùə̀ la ka ɨ̀pô mə ngɨ̀rə̀ e a lenə?”

¹⁹Yěsû a kẅùə̀ ambo pobə lo, “Mbə̀ʼə pànə̀ nɨ pɨ fuŋə̀nə a ghobə a alyiʼə nɨ̀zoʼò nwuunə̀ tɨ zɨghə̀ amwuə àchàʼtə̀ Nẅùə̀ nɨ ndwuumə̀ ngɨ̀ɨnə̀ alyiʼə ghu lə ɨla? Ngaŋə, mbə̀ʼə a yìinə̀ e apə̀.”

²⁰La, nkwùə̀ ɨ zə ntô nɨ pɨ lòo a ndwuumə̀ ngɨ̀ɨnə̀ lèrə̀ nɨ ẅèrə. Amwuə nkwùə̀ ghu, pobə nwuunə̀ tɨ zɨghə̀ amwuə àchàʼtə̀ Nẅùə̀.

²¹“Mbə̀ʼə ŋwùə̀ a lòo e àpàa atsəʼə yè shwuə̀ nnàanə̀ nɨ̀fə̀ŋə aŋunə atsəʼə yè lwùnə̀ apə̀. Ntiinə a tə ghɨ̀rə̀ a lenə, yi àpàa atsəʼə yè shwuə̀ za a kẅìʼnə̀ sìitə̀ atsəʼə yè lwùnə̀ za alyiʼə nɨ pɨ tânə ghu.

²²A kɨ mbə tyìʼə̀ ndəŋə ndəŋə lo mbə̀ʼə ŋwùə̀ a lòo e mɨ̀lùʼù mɨ shwuə̀ nchyâ amwuə ngòbə̀ mɨ̀lùʼù yɨ̀ ndwùnə̀ apə̀. À tə ghɨ̀rə̀ a lenə, yi mɨ̀lùʼù ma saanə̀ ngòbə̀ za kẅìnə̀ e, ngòbə̀ za ɨ̂ kɨ mbɨ̂. Pɨ chyâ mɨ̀lùʼù mɨ shwuə̀ la amwuə ngòbə̀ mɨ̀lùʼù yɨ̀ shwuə̀.”

²³Yěsû pobə ɨ̀zùŋə̀ ndzùmə̀ ɨ̀pe lə̀ mə ndàŋə̀ amwuə ɨ̀swùumə mɨ̀sàŋə aŋunə njyə̂ àlaʼà. Tsaʼnə pobə lə̀ mənə ndàŋə̀ la, ɨ̀zùŋə̀ ndzùmə̀ ɨ̀pe lə̀ mə ngyìinə̀ ndiitə̀ mɨ̀sàŋə ma mɨ̀tse.

²⁴Pɨ̀Farìsî pɨ̀tse lə̀ pyiitə̀ lo, “Naŋə̀! A ghɨ̀rə̀ àkə lo ɨ̀zùŋə̀ ndzùmə̀ ɨ̀pô ghɨ̀rə̀ ànwùə̀ nɨ ka mbòomə a pyiimə̀ e lo pobə ghɨ̀rə̀ amwuə njyə̂ àlaʼà?”

²⁵Yěsû a kẅùə̀ ambo pobə lo, “Ka nɨ̀ lə̀ fuŋə̀ a wɨghə ànwùə̀ za nɨ Dàfirə̀ pobə pə̀ənə̀ ɨ̀pe lə̀ ghɨ̀rə̀nə amwuə nkwùə̀ za nɨ njyə̀ ɨ̀ lə̀ mənə ndzaŋə̀ a ghobə la?

²⁶A lə̀ pə nkwùə̀ nɨ Àbyatà à lə̀ pənə àtwuə̀ pɨ̀fò màʼà Nẅùə̀ la, Dàfirə̀ a lə̀ kwuunə̀ a Ndâ Mɨ̀shwàʼà Nẅùə̀ nkwurə̀ àpaanə̀ Nẅùə̀ nkɨ ŋŋâ yètse ambo pə̀ənə̀ ɨ̀pe. A nɨ zùŋə̀ a mbòomə ɨ̀wəənə̀, à lə̀ pə àpaanə̀ nɨ mbə̀ʼə a lə̀ kwurə̀ ngàŋə̀ màʼà Nẅùə̀.”

²⁷Yěsû a lə̀ lẅùutə̀ nshwəŋə̀ ambo pobə lo, “Njyə̂ àlaʼà ɨ̀ chyə̂ la ambo ŋwùə̀, ka ŋwùə̀ a pə e ambo njyə̂ àlaʼà.

²⁸Lenəla, Moonə̀ Ŋwùə̀ a Ndòʼnə̀mbyə̂ mmə mbuʼtə̀ njyə̂ àlaʼà.”