Read Pinyin Mark 4 Bible Online

Mark 4 - Pinyin bible

Mark 4

¹A lə̀ chi mbə amwuə yɨ̀tse nkwùə̀, Yěsû a pìʼnə̀ a nɨ nèrə̀ mɨ̀nwùə̀ a nɨ̀pwùnə atəŋə nchyə Galìlyə̂. Àpùŋə̀ pə̀ənə̀ nɨ a lə̀ shwatə̀nə nkamnə̀ e a lə̀ noʼò. A tyiʼə̀ nkwuunə̀ nnwuunə̀ amwuə àkànwuʼə amwuə atəŋə nchyə ghu, àpùŋə̀ pə̀ənə̀ a tyiʼə̀ ntəəmə̀ a mbwùnə mɨ atəŋə nchyə ghu.

²A lə̀ nèrə̀ a ghobə nɨ mɨ̀nwùə̀ mɨ̀noʼnə amwuə ɨ̀shwəŋnə̀ pɨ̀nàanə nàanə, nshwəŋə̀ lo:

³“Nɨ̀ zhwiʼtə̀! Ŋònə̀ ɨ̀tse a lə̀ pə ghu nfurə̀, ndèrə̀ a nɨ ghə̀ mmàʼà mbyə ɨ̀pwuumə̀.

⁴Tsaʼnə a lə̀ mənə mmàʼà ɨ̀pwuumə̀ amwuə ɨ̀swùumə la, pɨ̀tse lə̀ kẅìnə̀ a àlàŋə, pɨ̀sɨ̀ŋə tô ndyàa nkwurə̀.

⁵Pɨ̀tse kẅìnə̀ aŋunə ɨ̀shyə̂ nɨ àlàrə̀kə̀ nɨ̀ghòorə lə̀ pənə a ɨ̀sùmə ka àtɨ̀tsaʼa a noʼò e ghu. Mbyə ɨ̀pwuumə̀ ghu lə̀ zàŋə̀ nsaʼà ntiinə ka zèrə lə̀ mìnə̀ e a ɨ̀shyə̂.

⁶La nkwùə̀ nɨ nẅùumə̀ a lə̀ tânə, a lə̀ tòonə̀ ngẅàrə̀ ɨ̀pwuumə̀ zèrə zə ɨ zwuumə̀, ntiinə ka mɨŋaŋə ɨ̀mobə lə̀ mìnə̀ e a ɨ̀shyə̂.

⁷Pɨ̀tse lə̀ kẅìnə̀ amwuə alyiʼə ɨ̀shyə̂ àŋwàʼŋwaʼa. Àŋwàʼŋwaʼa zə a tyiʼə̀ nkoʼò ndyipə̀ aŋunə nsòpə̀ ngɨ̀rə̀ ka ɨ̀ chi ndzumə̀ e mɨ̀ntàamə.

⁸Ngẅàrə̀ ɨ̀pwuumə̀ ghu yɨ̀tse ɨ̀ lə̀ kẅìnə̀ aŋunə alyiʼə ɨ̀shyə̂ yè ɨ̀shìʼnə̀ nsaʼà, nkẅuə̀, ndzumə̀ mɨ̀ntàamə mɨ̀noʼnə. Yɨ̀tse lə̀ zumə̀ mɨ̀ntàamə mɨ̀ghumə̀ ɨtarə, yɨ̀tse zumə̀ mɨ̀ghumə̀ ntuurə̀, yɨ̀tse zumə̀ nkɨrə.”

⁹Yěsû a lə̀ lẅùutə̀ nshwəŋə̀ lo, “Ŋònə̀ nɨ à pənə nɨ mɨtugrə â zuʼù.”

¹⁰Nkwùə̀ nɨ Yěsû à lə̀ pənə ze nɨ ze, pànə̀ pɨ̀tse nɨ pobə lə̀ pənə alyiʼə ghu, pobə ɨ̀zùŋə̀ ndzùmə̀ ɨ̀pe pa ntsòbə̀ ɨpaa lə̀ pə a nɨ̀pwùnə ze mbyiitə̀ e nɨ ɨ̀sùmə ɨ̀shwəŋnə̀ pɨ̀nàanə nàanə pə.

¹¹Tsaʼnə pɨ lə̀ pyiitə̀nə e la, a shwəŋə̀ ambo pobə lo, “Nẅùə̀ a ŋâ mə a wɨghə nɨ àzhìʼtə̀ lo nɨ̀ zhyə̂ mɨ̀nwùə̀ mɨ lə̀əmə̀nə nɨ mɨ pənə mbə̀ʼə ànwùə̀ Nɨ̀fò e, la ngə̀ aŋunə pànə̀ pa nɨ ka pobə pə a ghobə a tɨ̀tɨ̀rə̀ pɨghə, pobə zuʼù ɨ̀nwùə̀ ɨ̀tsùmə̀ pə amwuə ɨ̀shwəŋnə̀ pɨ̀nàanə nàanə,

¹²njiilo, ‘mbə̀ʼə pobə naŋə̀ tə nnaŋə̀ la ndzəənə̀ ghobə apə̀, nzhwiʼtə̀ tə nzhwiʼtə̀ la ndzuʼù a laanə̀ e àtwuə̀ pobə apə̀. Ntiinə pobə tə zəənə̀ nzhyə̂ pobə tô ambo Nẅùə̀ a lə̀ənə̀ ɨ̀fànə̀ ɨ̀nwùə̀ pobə.’”

¹³Yěsû a pyiitə̀ a ghobə lo, “Ka nɨ̀ zhyə̂ a wɨghə ɨ̀sùmə àshwəŋnə̀ nàanə nàanə zanə? Nɨ̀ ghǎ tyiʼə̀ zhyə̂ ɨ̀sùmə ɨ̀shwəŋnə̀ pɨ̀nàanə nàanə pə lə ɨla?

¹⁴Mbyə ɨ̀pwuumə̀ wa a pyə̀ la àshwəŋnə̀ Nẅùə̀.

¹⁵Pànə̀ pɨ̀tse pə la tsaʼa mbyə ɨ̀pwuumə̀ nɨ ɨ lə̀ kẅìnə̀nə àlàŋə ndwuumə̀ la. Ngə̀ aŋunə pànə̀ pèrə pə, pɨ pəla mbyə̀ Àshwəŋnə̀ Nẅùə̀ zèrə zə amwuə mɨ̀ntɨŋmə̀ ɨ̀mobə, pobə zuʼù, Satàanə̀ a zùŋə̀ ntô nfuukə̀ a zèrə amwuə pobə.

¹⁶Pɨ̀tse pànə̀ tyiʼə̀ mbə tsaʼa mbyə ɨ̀pwuumə̀ nɨ pɨ pyə̀nə aŋunə alyiʼə ɨ̀shyə̂ àlàrə̀kə̀ nɨ̀ghòorə, tyìʼə̀ tsaʼnə pobə zuʼnə àshwəŋnə̀ Nẅùə̀ pobə kẅiirə̀ a zèrə nɨ nɨ̀ghaʼà,

¹⁷la ka a kwuunə̀ e mmìnə̀ amwuə pobə mbə̀ʼnə pobə zuʼnə ngẅìimə̀ aŋunə àtùmə nkwùə̀; la nkwùə̀ nɨ ngəʼə̀ pobə nɨ̀nyàŋə̀ a ghobə tônə mbə̀ʼə àshwəŋnə̀ Nẅùə̀ ghu pobə zùŋə̀ mbô mmyàʼtə̀ àpyiimə̀ àzobə.

¹⁸Pɨ̀tse pànə̀ pə tsaʼa mbyə ɨ̀pwuumə̀ za nɨ ɨ lə̀ kẅìnə̀nə amwuə àŋwàʼŋwaʼa, pèrə pə la pànə̀ nɨ pɨ zuʼnə ntwuumə̀ Nẅùə̀,

¹⁹la mɨ̀nwùə̀ amwuə àtwuə̀ ɨ̀shyə̂ ghobə ɨ̀kòŋnə̀ nkabə̀ pobə mɨ̀tse mɨ̀nwùə̀ nɨ pànə̀ pɨ mɨsoŋə kòŋə̀nə mɨ kwuunə̀ amwuə pobə nkorə̀ àshwəŋnə̀ a Nẅùə̀ ngɨ̀rə̀ ka ɨ zumə̀ e mɨ̀ntàamə.

²⁰Pɨ̀tse pànə̀ tyiʼə̀ mbə tsaʼa mbyə ɨ̀pwuumə̀ za nɨ pɨ lə̀ màʼnə amwuə àpàbə a ɨ̀shyə̂ yè ɨ̀shìʼnə̀, pobə kẅiirə̀ ntwuumə̀ Nẅùə̀, mbyiimə̀ a ẅèrə ntyiʼə̀ ndzumə̀ mɨ̀ntàamə, pɨ̀tse zumə̀ mɨ̀ntàamə mɨ̀ghumə̀ mɨntarə, pɨ̀tse mɨ̀ghumə̀ ntuurə̀, pɨ̀tse nkɨrə.”

²¹Yěsû a shwəŋə̀ ambo pobə lo, “Pɨ tə mbəla ntswuʼə̀ a làamə̀, nkwuunə̀ nɨ ẅèrə amwuə ndâ pɨ tə̂ pə a ɨ̀sùmə nɨ̀kwùʼə̀ kə̀ a nkɨ̀kwùunə? Ka pɨ tə̂ a ẅèrə la aŋunə aləŋə mbə̀ʼə pànə̀ tsùŋə̀ ndzəənə̀ ɨlyiʼə?

²²Ka ànwùə̀ yè lə̀əmə̀nə àtse a pə e ghu nɨ ka a pə ghǎ furə̀ e a sàŋə̀; àzwuumə̀ àtsùmə̀ nɨ pɨ lə̀əmə̀nə zèrə a ghǎ furə̀ a ɨ̀myə̂ pə̀ənə̀.

²³Nɨ̀ zhwiʼtə̀! Ŋònə̀ nɨ à pənə nɨ mɨtugrə â zuʼù.”

²⁴Yěsû a chi nshwəŋə̀ ambo pobə lo, “Nɨ̀ zhìʼtə̀ aŋunə mɨ̀nwùə̀ nɨ nɨ̀ wa ndzuʼù; àzwuumə̀ za nɨ wə̀ mɨ̀nkə̀nə àzwuumə̀ amwuə ŋŋâ ambo ŋwùə̀ pɨ ghǎ kɨ mɨ̀nkə̀ la amwuə ŋŋâ ambo ghò chi kẅìʼnə̀.

²⁵Ŋònə̀ nɨ à pənə nɨ àzwuumə̀, pɨ chi kẅìʼnə̀ a zèrə, la ŋònə̀ nɨ ka a pə e nɨ àzwuumə̀, mbaa pə mɨlyiʼə nɨ à pənə nɨ ẅèrə, pɨ kẅiirə̀.”

²⁶Yěsû a làŋə̀ nɨ mbyə̀ nshwəŋə̀ lo, “Ànwùə̀ Nɨ̀fò Nẅùə̀ a chyə̂ la tsaʼa ŋwùə̀ à ghə̀ mbyə̀ nkẅùə̀ amwuə ɨ̀swùumə,

²⁷nkwùə̀ nɨ à lyə̂nə ndòo ndzwuə̀, nkẅùə̀ zə̀ ɨ̀ saʼà nkɨ nkoʼò la ka à zhyə̂ e tsaʼnə ɨ làŋə̀nə nkoʼò.

²⁸Ɨ̀shyə̂ za nɨ pɨ pa mbyə̀ ɨ̀pwuumə̀ amwuə la, ɨ za ngɨ̀rə̀ ɨ̀pwuumə̀ koʼò, mbyə̀ mbìʼnə̀ nfuukə̀ ntòo, mbaatə̀ nɨ mɨfuə, mɨfuə tyiʼə̀ nfuukə̀ mɨ̀nkòʼrə nɨ mɨ ma ndẅùutə̀ ndzumə̀ mɨ̀ntàamə.

²⁹Nkwùə̀ nɨ nkẅùə̀ ghu ɨ̀ tɨ̀ŋnə̀nə, a ghə̀ mbəʼə̀ a zèrə, ntiinə nkwùə̀ nɨ̀pəʼə̀ a zèrə ɨ̀ kùʼù.”

³⁰Yěsû a chi mbyiitə̀ a ghobə lo, “Pɨ lə̀nkə̀ ànwùə̀ Nɨ̀fò Nẅùə̀ la aŋunə àkə? Pə̀ənə̀ lòo lə a zèrə àshwəŋnə̀ nàanə nàanə ngɨ̀rə̀ ɨ̀twuə̀ pə̀ənə̀ laanə̀?

³¹Ànwùə̀ Nɨ̀fò a Nẅùə̀ a chyə̂ la tsaʼa mbyə̀ àloonə̀ za nɨ ɨ kɨ̂nə ntsàarə̀ mbyə̀ ntsùmə̀ nɨ mbə̀ʼə pɨ pyə̀ a ɨ̀shyə̂;

³²la pɨ pyə̀ mbyə̀ zèrə zə̀, ɨ kẅùə̀ ntyiʼə̀ mbə pə àtɨ̀ghə nɨ a faŋə̀nə ntsàarə̀ mɨ̀tɨ̀ghə mɨ̀tsùmə̀, ŋŋâ mɨ̀fàa mɨ̀ẅùunə nɨ pɨ̀sɨ̀ŋə tô korə̀ mɨ̀nkàanə̀ ɨ̀mobə nzhwùutə̀ a ghobə aŋunə.”

³³Yěsû à lə̀ chwìitə̀ mɨ̀ntwuumə̀ mɨ̀noʼnə amwuə ɨ̀shwəŋnə̀ pɨ̀nàanə nàanə tsaʼa pèrə pə amwuə ndwuumə̀ nɨ mbə̀ʼə pobə zuʼù a ghobə apə̀.

³⁴Ka à lə̀ mə nshwəŋə̀ e ànwùə̀ zə̀ ambo pànə̀ tɨghu à shwəŋə̀ pə amwuə àshwəŋnə̀ nàanə nàanə. La nkwùə̀ nɨ à nwuunə̀nə pobə ɨ̀zùŋə̀ ndzùmə̀ ɨ̀pe, a tsùŋə̀ ntiitə̀ a ghobə nɨ ɨ̀sùmə ɨ̀shwəŋnə̀ pɨ̀ghu ɨ̀tsùmə̀.

³⁵A pə a nkwə̌ njyə̂ ghu, Yěsû a shwəŋə̀ ambo ɨ̀zùŋə̀ ndzùmə̀ ɨ̀pe lo, “Nɨ̀ tô pə̀ənə̀ twuumə̀ ndèrə̀ a ndzìnə yì.”

³⁶Ɨ̀zùŋə̀ ndzùmə̀ ɨ̀pe pa tyiʼə̀ mmyàʼtə̀ àpùŋə̀ pə̀ənə̀ za nkwuunə̀ ntsirə̀ a Yěsû amwuə àkànwuʼə, pobə pɨ pobə tyiʼə̀ mmə ntwuumə̀ ndèrə̀. Pɨ̀tse ɨ̀kànwuʼə lə̀ kɨ mbə ghu.

³⁷Tsaʼnə pobə lə̀ mənə ntwuumə̀ la, àghə̀ʼtə̀ yè ɨ̀tɨ̀ŋnə̀ a pìʼnə̀ a nɨ làŋə̀ ngɨ̀rə̀ nchyə tyiʼə̀ mbə̀grə̀ nkwuunə̀ amwuə àkànwuʼə tə ntyiʼə̀ mmə ntàʼà lẅenə̀ a zèrə.

³⁸La Yěsû à lə̀ nwùunə̀ e amwuə ɨmwuə àkànwuʼə za a ndzùmə̀ mmə ndyə̂ e nnùŋə̀ àtwuə̀ e aŋunə pyənkə̀ àtwuə̀. Ɨ̀zùŋə̀ ndzùmə̀ ɨ̀pe zhwemnə̀ e nshwəŋə̀ ambo ze lo, “Ɨ̀nèrə̀! Wə̀ nwùunə̀ ka kẅâ o la, ka zəənə̀ lo pə̀ənə̌ kwɨghə̀ amwuə àkànwuʼə zanə?”

³⁹Yěsû a lòo a ɨ̀shyə̂ ntəəmə̀ nsaʼà àghə̀ʼtə̀ za, ntyiʼə̀ nshwəŋə̀ ambo nchyə ghù pə̀grə̀nə wa lo “Təəmə̀! Kò wə̀ chi mbə̀grə̀.” Fèrə̀ wa à lə̀ zùŋə̀ ntəəmə̀, ɨlyiʼə zhwemnə̀ nɨ tuʼu.

⁴⁰Yěsû a pə̀ŋə̀ mbyiitə̀ ɨ̀zùŋə̀ ndzùmə̀ ɨ̀pe pa lo, “Nɨ̀ tô mbô la àkə? Ka nɨ̀ pə a wɨghə nɨ àpyiimə̀ ntɨŋmə̀?”

⁴¹Àkẅàrə̀ a kwuunə̀ a ghobə pobə tyiʼə̀ mmə mbyiitə̀ pobə nɨ pobə lo, “Ẅèrə wə̀ ŋwùə̀ à furə̀ lə̀ ɨghə? Nɨ̀ zəənə̀ ndwuumə̀ nɨ àghə̀ʼtə̀ pobə nchyə ghù pə̀grə̀nə zuʼnə̀nə e?”