Read Pinyin Mark 6 Bible Online

Mark 6 - Pinyin bible

Mark 6

¹Yěsû pobə ɨ̀zùŋə̀ ndzùmə̀ ɨ̀pe tyiʼə̀ nfurə̀ alyiʼə ghu ndèrə̀ a Nazarètə̀, a àlaʼà pobə.

²A gha mbə njyə̂ àlaʼà pɨ̀Jew, â lèrə̀ a ndâ àshwatə̀ pobə mmə nnèrə̀ mɨ̀nwùə̀ ghu. A lə̀ lanə mbə tyiʼə̀ ànwùə̀ yè yerə̀nə yerə̀nə ambo pànə̀ nɨ pɨ lə̀ pənə ghu mmə ndzuʼù mɨ̀nwùə̀ myə̀ nɨ a lə̀ mənə nnèrə̀, ntyiʼə̀ mbyiitə̀ pobə nɨ pobə lo, “Ŋònə̀ wə̀ à lòo mɨ̀nwùə̀ mə lə ɨghə? Mbuurə̀ àzhìʼtə̀ zə̀ ɨ̀ furə̀ lə ɨghə? Nɨ̀ zəənə̀ mɨ̀nwùə̀ mɨ yerə̀nə yerə̀nə nɨ à ghɨ̀rə̀nə!

³Ka lə a pə e kapɨndà wa, moonə̀ Màriyà, mbə momaa Jemə̀ nɨ Jòsebə̀ nɨ Yudà nɨ Shimùnə̀? Ka pɨ̀momaa ɨ̀pe pɨ pə̀ngyə̌ pə a ghobə a nɨ̀ghə̂ pə̀ənə̀ pɨ pobə?” Pobə shwəŋə̀ a lenə la ndzùŋə̀ mbìʼnə̀ a nɨ zaŋə̀ a loŋə pobə pɨ pobə.

⁴Yěsû a shwəŋə̀ ambo pobə lo, “Pɨ pa nguʼtə̀ a ngàŋə̀ ntwuumə̀ Nẅùə̀ alyiʼə àtsùmə̀, la ka mə ghuʼtə̀ e a ye amwuə àlaʼà àzobə, kə̀ amwuə ngẅàrə̀ pobə, kə̀ a ɨmwuə alyiʼə pobə.”

⁵Ka a lə̀ chi ngɨ̀rə̀ mɨ̀nwùə̀ mɨ yerə̀nə yerə̀nə mɨ̀tse alyiʼə ghu ndàŋə̀ e tsaʼnə a lə̀ nùŋə̀nə mbô ɨ̀me aŋunə ndùnə̀ pɨghoonə pɨ̀tse mbarə̀ a ghobə.

⁶A lə̀ lanə ntsàarə̀ a Yěsû amwuə ndwuumə̀ nɨ ka pànə̀ pə lə̀ pə a ghobə nɨ àpyiimə̀ ntɨŋmə̀. Yěsû a tyiʼə̀ nfurə̀ ngyìinə̀ nchwìitə̀ ntwuumə̀ amwuə ɨ̀laʼà nɨ pənə a nɨ̀pwùnə àlaʼà àzobə.

⁷À lə̀ fuŋə̀ ngàŋə ntwuumə̀ ɨ̀ze za ntsòbə̀ ɨpaa a alyiʼə moʼo ntsàa a ghobə a àpyìinə pɨpaa pɨpaa, ŋŋâ a ghobə nɨ ɨ̀tɨ̀ŋnə̀ lo pobə fuukə̀ ɨ̀zhwùə̀ tɨ̀pòŋə̀ amwuə pə̀ənə̀,

⁸nshwəŋə̀ ambo pobə lo, “Kò nɨ̀ lòo a wɨghə àzwuumə̀ àtse aŋunə àkwùə̀ nɨ̀yìinə̀ zə̀; ndàŋə̀ e mɨ̀mbàŋə̀ ɨ̀mɨghə. Kò nɨ̀ lòo a wɨghə àpaanə̀, kə̀ àpàamə̀, kə̀ nkɨ nchyâ nkabə̀ amwuə ɨ̀pàamə̀ ɨ̀pɨghə.

⁹Nɨ̀ ẅî ɨtabə, la kò nɨ̀ twuʼtə̀ a wɨghə a pɨ̀tse ɨtsəʼə.”

¹⁰A lə̀ chi nshwəŋə̀ ambo pobə lo, “Nɨ̀ pəla ngə̀ alyiʼə àtsùmə̀ nɨ pɨ kẅiirə̀nə a wɨghə, nɨ̀ nwuunə̀ amwuə ndâ ghu tə mbyàa nkwùə̀ nɨ nɨ̀ ghǎ myàʼtə̀ alyiʼə ghu lèrə̀.

¹¹Nɨ̀ tə mbəla nkwuunə̀ amwuə mbòmpə àlaʼà nɨ ka pɨ kẅiirə̀ e a wɨghə, kə̀ ka zuʼnə̀ e a wɨghə, nɨ̀ myàʼtə̀ alyiʼə ghu nkwùrə̀ àpùbə nɨ a pənə a mɨ̀kwùə̀ pɨghə ndèrə̀ a wɨghə. Zèrə za a pə tsaʼa àlènə̀ a nɨ nèrə̀ a ghobə lo ka pobə ghɨ̀rə̀ a ghobə ànwùə̀ yè ɨ̀shìʼnə̀.”

¹²Pobə lə̀ tyiʼə̀ nfurə̀ ndèrə̀ nchwìitə̀ ntwuumə̀ lo pànə̀ pə̀ŋə̀ mɨ̀ntɨŋmə̀ ɨ̀mobə mmyàʼtə̀ a tɨ̀pòŋə̀ ɨ̀ghobə.

¹³Pobə lə̀ fuukə̀ ɨ̀zhyə̂ pɨ̀noʼnə amwuə pobə, ndzoʼò mɨ̀ghurə̀ aŋunə pɨghoonə pɨ̀noʼnə mbarə̀ a ghobə.

¹⁴Ɨ̀fò Heròdə̀ à lə̀ zuʼù ànwùə̀ zèrə zə̀ àtsùmə̀, ntiinə a lə̀ kɨ pə la nɨ ànwùə̀ mbə̀ʼə nɨ̀linə̀ nɨ Yěsû a sìimə̀ mə a ɨlyiʼə ɨ̀tsùmə̀. Pànə̀ pɨ̀tse pə nshwəŋə̀ lo, “Jònə ngàŋə̀ àŋâ àkẅiirə̀ nchyə à kẅirə̀ nkwə̂ mbə yi ntɨ̀ŋnə̀! La ɨ̀sùmə nɨ a pənə nɨ ɨ̀tɨ̀ŋnə̀ a nɨ ghɨ̀rə̀ mɨ̀nwùə̀ mɨ yerə̀nə yerə̀nə.”

¹⁵Pɨ̀tse pə nshwəŋə̀ lo, “A Elijah.” Pɨ̀tse kɨ nchi mmə nshwəŋə̀ lo, “A ngàŋə̀ ntwuumə̀ Nẅùə̀ tsaʼa ngàŋə ntwuumə̀ Nẅùə̀ yɨ̀ ntsàambyə̀ za yɨ̀tse.”

¹⁶La nkwùə̀ nɨ Heròdə̀ à lə̀ zuʼnə zə̀, a shwəŋə̀ lo, “A Jònə ngàŋə̀ àŋâ àkẅiirə̀ nchyə wa nɨ ndə̀ lə̂nə àtwuə̀ e la nɨ à kẅirə̀nə nzhwuumə̀ a nɨ̀wɨghə̀.”

¹⁷Mbə̀ʼnə Heròdə̀ àtwuə̀ ɨ̀pɨ̀ŋmə̀ e à lə̀ shwəŋə̀ mə lo pɨ kô a Jònə nkorə̀ nchyâ a ɨ̀tsaŋə̀. Heròdə̀ à lə̀ ghɨ̀rə̀ a lenə la ntiinə à lə̀ kẅiirə̀nə Hèrodyàsə̀ ngẅùə ndyimə e Filibə̀ ndzoʼò e.

¹⁸Tsaʼnə Heròdə̀ à lə̀ zoʼnə e la, Jònə ngàŋə̀ àŋâ àkẅiirə̀ nchyə à lə̀ shwəŋə̀ ambo Heròdə̀ lo, “Ka a kùʼnə̀ e amwuə mbòomə lo wə̀ sàʼà a ngẅùə ndyimə o ndzoʼò.”

¹⁹Lenəla, Hèrodyàsə̀ à lə̀ pə nɨ àzaŋə̀ loŋə mbə̀ʼə Jònə mmə ntàʼà àlàŋə nɨ mbə̀ʼə a làŋə̀ aŋunə nzhwuutə̀ e la ka mə zəənə̀ e.

²⁰Heròdə̀ à lə̀ mə mbô a Jònə ntiinə à lə̀ zhyə̂nə lo a ŋònə̀ ɨ̀shìʼnə̀ nkɨ ndaanə̀. À lə̀ tyiʼə̀ ndòo e ngə̀ ndòʼnə̀ lo kò ànwùə̀ àtse a ghɨ̀rə̀ e a ye. À lə̀ kòŋə̀ a nɨ mə ndzuʼù àshwəŋnə̀ e nkwùə̀ ɨ̀tsùmə̀, mbaa pə tsaʼnə à lə̀ pənə nɨ ntòmnə̀ nkwùə̀ nɨ à zuʼnə àshwəŋnə̀ e.

²¹A gha mbə njyə̂ nɨ Heròdə̀ à lə̀ ghɨ̀rə̀nə nɨ̀ghaʼà njyə̂ nɨ̀pyə̂ e, nfuŋə̀ ngàŋə àfàʼà yè ẅùunə, pobə ɨ̀twuə̀ pɨ̀soyì nɨ pànə̀ pɨ ẅùunə pɨ̀tsùmə̀ nɨ pɨ lə̀ pənə a àlaʼà Galìlyə̂, Hèrodyàsə̀ à lə̀ pə nɨ ɨ̀sàanə̀ a nɨ ghɨ̀rə̀ ànwùə̀ nɨ à lə̀ tàʼnə.

²²Moonə̀ Hèrodyàsə̀ ghu mə̀ngyə̌ à lə̀ kwuunə̀ mbinə̀ àpinə̀ a pòŋə̀ a Heròdə̀ ghobə pɨ̀ghɨ̀ɨnə̀ ɨ̀pe. A shwəŋə̀ ambo moonə̀ wa lo, “Pyiitə̀ mə̀ nɨ àzwuumə̀ àtsùmə̀ nɨ wə̀ tàʼnə, mbɨ ŋâ wa.”

²³Heròdə̀ à lə̀ kàʼà ambo ze lo, “Àzwuumə̀ àtsùmə̀ nɨ wə̀ pyiitə̀nə mbɨ ŋâ ambo ghò, a tə pə pə taʼà pàa àlaʼà mə̀ wə̀ ghùtse nɨ wə̀ pyiitə̀nə ǹkɨ ŋŋâ mə̀ ŋânə!”

²⁴A shwəŋə̀ a lenə la mômə̀ngyə̌ wa a furə̀ ngə̀ mbyiitə̀ mǎ e lo, “M̂byiitə̀ àkə?” Mǎ e a kẅùə̀ lo “Pyiitə̀ àtwuə̀ Jònə ngàŋə̀ àŋâ àkẅiirə̀ nchyə.”

²⁵Moonə̀ wa a tyiʼə̀ nfurə̀ nɨ mɨ̀ndəənə̀ ntô nkwuunə̀ nshwəŋə̀ ambo ɨ̀fò lo, “Ǹtàʼà lo wə̀ ŋâ àtwuə̀ Jònə ngàŋə̀ àŋâ àkẅiirə̀ nchyə amwuə àpàpə̀ àkaŋə̀ ambo mɨ̀ŋə̀ tɨ̀tsòŋə̀ wə̀!”

²⁶Mbɨ̀ŋmə̀ ɨ̀fò ɨ̀ lə̀ lanə nkwɨghə̀ mbə̀ʼə ànwùə̀ zèrə zə̀; la tsaʼnə à lə̀ kàʼà mə a mbyə̀ pə̀ənə̀ ɨ̀pe la, ka à lə̀ tàʼà e a nɨ pəʼə̀ nkàʼnə nɨ à kàʼnə ambo moonə̀ e wə̀.

²⁷Lenəla, ɨ̀fò à lə̀ zùŋə̀ ntsàa a taʼà ŋwùə̀ soyì e nshwəŋə̀ ambo ze lo â ghə̀ ndòo àtwuə̀ Jònə ntô nɨ zèrə. A ghə̀ a ndâ ɨ̀tsaŋə̀ ndə̂ àtwuə̀ ghu,

²⁸nchyâ amwuə àpàpə̀ àkaŋə̀ ntô ŋŋâ ambo mômə̀ngyə̌ wa, mômə̀ngyə̌ wa a tyiʼə̀ ŋŋâ a zèrə ambo mǎ e.

²⁹Nkwùə̀ nɨ ɨ̀zùŋə̀ ndzùmə̀ Jònə lə̀ zuʼnə, pobə lə̀ tô ndòo àkwuə̀ e ngə̀ ntẅəŋə̀.

³⁰Ngàŋə ntwuumə̀ Yěsû za lə̀ kẅirə̀ nkwə̂ ambo ze ntiitə̀ e nɨ ànwùə̀ àtsùmə̀ nɨ pobə lə̀ ghɨ̀rə̀nə nkɨ nnèrə̀.

³¹Ntiinə pànə̀ pɨ̀noʼnə lə̀ pənə ntô ambo ze, pyə̀ pə ntô pyə̀ pə ndèrə̀ nɨ ka nkwùə̀ ɨ̀ lə̀ chi mbə e ghu ambo pobə ɨ̀zùŋə̀ ndzùmə̀ ɨ̀pe a nɨ nwuunə̀ a ɨ̀shyə̂ ndzɨghə̀ kə̀ nzhwùutə̀. Lenəla, a shwəŋə̀ ambo ɨ̀zùŋə̀ ndzùmə̀ ɨ̀pe lo, “Nɨ̀ tô pə̀ənə̀ lèrə̀ alyiʼə nɨ ka pànə̀ pə e ghu nzhwùutə̀ aŋunə mətùmə nkwùə̀.”

³²Lenəla, pobə lə̀ tyiʼə̀ ngə̀ nkwuunə̀ amwuə àkànwuʼə ndèrə̀ alyiʼə nɨ ka pànə̀ pə e ghu.

³³La pànə̀ pɨ̀noʼnə nɨ pɨ lə̀ zəənə̀nə a ghobə nzhyə̂ a ghobə tyiʼə̀ nfurə̀ amwuə mɨ̀mbòmpə mɨ ɨ̀laʼà nkɨ̀ɨrə̀ nɨ mɨ̀kwùə̀ ngə̀ mbyàa alyiʼə ghu zaʼà pobə pòŋə̀ tô.

³⁴Nkwùə̀ nɨ Yěsû à lə̀ furə̀nə amwuə àkànwuʼə, à lə̀ zəənə̀ àpùŋə̀ pə̀ənə̀, mbə nɨ àsòmnə̀ mbə̀ʼə pobə ntiinə pobə lə̀ tyiʼnə mbə tsaʼa mɨ̀mbyə̂ mɨ̀ndzìrə̀ tɨ ɨ̀mbyabə̀, a tyiʼə̀ mbìʼnə̀ a nɨ nèrə̀ a ghobə nɨ mɨ̀nwùə̀ mɨ̀noʼnə.

³⁵Nkwùə̀ ɨ̀ lə̀ tyiʼə̀ mmə nkwɨghə̀ ndèrə̀, ɨ̀zùŋə̀ ndzùmə̀ ɨ̀pe tô nshwəŋə̀ ambo ze lo, “Lə̌ alyiʼə nɨ ka pànə̀ pə e ghu, nkwùə̀ ɨ̀ kɨ mmə ndèrə̀ ka mɨ̀zùŋə,

³⁶njiilo, tsàa pànə̀ pɨ̀ lèrə̀ amwuə ɨ̀laʼà a mbwùnə ghə mbə̀ʼə pobə zwuunə̀ àzwuumə̀ àtse ndzɨghə̀.”

³⁷La Yěsû à lə̀ kẅùə̀ ambo pobə lo, “Nɨ̀ ŋâ àzwuumə̀ àtse pobə zɨghə̀.” Pobə chi mbyiitə̀ e lo, “Zə̀ chyə̂ a nɨ lòo nkabə̀ nɨ mbə̀ʼə pɨ twuə̀ a ŋwùə̀ ghu aŋunə ŋwɨgrə̀ nɨ̀fàamə̂![1] Njiilo pəə tsə̀ŋə̀ ndwùnə̀ nkabə̀ wə̀ ndzwuunə̀ àpaanə̀ ghu ŋŋâ pobə kwurə̀?”

³⁸Yěsû a chi mbyiitə̀ a ghobə lo, “Nɨ̀ wə̀ nɨ ɨ̀tùmə ɨ̀paanə̀ ɨshiʼə? Nɨ̀ naŋə̀ pə̀ənə̀ zəənə̀.” Pobə lə̀ naŋə̀ ntô nshwəŋə̀ ambo ze lo â ndàʼà ɨ̀tùmə ɨtaanə̀ nɨ ɨ̀swuə̀ ɨpaa.

³⁹Yěsû a tyiʼə̀ nshwəŋə̀ ambo ɨ̀zùŋə̀ ndzùmə̀ ɨ̀pe pa lo, pobə ghɨ̀rə̀ pànə̀ nwuunə̀ ɨ̀kẅìrə ɨ̀kẅìrə aŋunə nɨ̀yìinə ghù fiitə̀nə.

⁴⁰Pànə̀ lə̀ nontə̀ ɨ̀kẅìrə ɨ̀kẅìrə, pɨ̀tse pə pànə̀ nkɨrə, pɨ̀tse pə pànə̀ mɨ̀ghumə̀ mɨntaanə̀.

⁴¹Yěsû a tyiʼə̀ ndòo àpaanə̀ za ɨ̀tùmə ɨtaanə̀ nɨ ɨ̀swuə̀ ɨpaa mbə̀ʼkə̀ àtwuə̀ e a àtɨ̀ghə ŋŋâ a mɨyàa ambo Nẅùə̀ mbiʼtə̀ àpaanə̀ za ŋŋâ ambo ɨ̀zùŋə̀ ndzùmə̀ ɨ̀pe lo pobə ghàbə̀ ambo pànə̀ pa, a lə̀ kɨ nchi ngàbə̀ ɨ̀swuə̀ za ɨpaa ambo pobə pɨ̀tsùmə̀.

⁴²Ŋwùə̀ ntsùmə̀ à lə̀ zɨghə̀ ndzwurə̀.

⁴³Lenəla, ɨ̀zùŋə̀ ndzùmə̀ ɨ̀pe lə̀ lyàa ɨ̀chepə̀ ɨ̀pwuumə̀ pɨ̀ghu ɨ̀tsùmə̀ ndẅenə̀ mɨnkaamə ntsòbə̀ ɨpaa.

⁴⁴Pànə̀ nɨ pɨ lə̀ zɨghə̀nə àpaanə̀ ghu a lə̀ pə mbyàŋnə̀ nkaamə̀ ɨtaanə̀.

⁴⁵Yěsû à lə̀ zùŋə̀ ngɨ̀rə̀ ɨ̀zùŋə̀ ndzùmə̀ ɨ̀pe pa kẅirə̀ nkwuunə̀ amwuə àkànwuʼə mbə a mbyə̀ ntwuumə̀ ndèrə̀ a Betsedà, a ghoŋə̀ a ndzùmə̀ ntyiʼə̀ ngɨ̀rə̀ àpùŋə̀ pànə̀ za a sìimə̀.

⁴⁶Nkwùə̀ nɨ à lə̀ làʼnə̀nə pobə ɨ̀zùŋə̀ ndzùmə̀ ɨ̀pe à lə̀ koʼò ndèrə̀ àtwuə̀ mbarə̀ a nɨ chàʼtə̀ Nẅùə̀.

⁴⁷Nkwùə̀ nɨ nkwə̌ ɨ̀ lə̀ kùʼnə̀, àkànwuʼə za a lə̀ pə a tɨ̀tɨ̀rə̀ atəŋə, Yěsû a tyiʼə̀ mbə a ɨsɨghə ze nɨ ze,

⁴⁸ndzəənə̀ lo a lə̀ mə ntsàarə̀ ɨ̀zùŋə̀ ndzùmə̀ ɨ̀pe a nɨ tinə̀ àkànwuʼə za, ntiinə fèrə̀ à lə̀ pənə ntinə̀ a ghobə nkẅùə̀ nɨ̀ ndzùmə̀. A tô mbə a nkòʼò njyə̂, Yěsû a mə ngyìinə̀ àtwuə̀ nchyə mmə ntô làŋə̀ a nɨ̀pwùnə pobə,

⁴⁹la nkwùə̀ nɨ pobə lə̀ zəənə̀nə e a mə ngyìinə̀ àtwuə̀ nchyə, pobə lə̀ kwàŋə̀ lo a àwuə̀, ntyiʼə̀ nkyiinə̀,

⁵⁰ntiinə pobə pɨ̀tsùmə̀ lə̀ zəənə̀ e mbə nɨ àkẅàrə̀. La Yěsû a zùŋə̀ shwəŋə̀ ambo pobə lo, “Nɨ̀ ẅìimə̀ mɨ̀ntɨŋmə̀ ɨ̀mɨghə, a mɨ̀ŋə̀, kò nɨ̀ pô.”

⁵¹Tsaʼnə à lə̀ shwəŋə̀nə a lenə la, à lə̀ koʼò nkwuunə̀ amwuə àkànwuʼə za pobə pɨ pobə, fèrə̀ wa zùŋə̀ ndəənə̀. A lanə mbə tyìʼə̀ ànwùə̀ yerə̀nə yerə̀nə ambo ɨ̀zùŋə̀ ndzùmə̀ ɨ̀pe pa.

⁵²Ntiinə ka pobə lə̀ zhyə̂ a ghobə ɨ̀sùmə ànwùə̀ mbə̀ʼə àpaanə̀, mbə̀ʼnə mɨ̀ntɨŋmə̀ ɨ̀mobə lə̀ tɨ̀ŋnə̀.

⁵³Yěsû pobə ɨ̀zùŋə̀ ndzùŋə̀ ɨ̀pe lə̀ twuumə̀ ngə̀ nkwuunə̀ a Gennesaret, ntɨ̀ŋnə̀ àkànwuʼə a nɨ̀pwùnə nɨ atəŋə.

⁵⁴Tyiʼə̀ tsaʼnə pobə lə̀ furə̀nə amwuə àkànwuʼə, pànə̀ lə̀ zùŋə̀ ndzəənə̀ a Yěsû nzhyə̂,

⁵⁵nkɨ̀ɨrə̀ ndèrə̀ amwuə mɨ̀kwurə̀ ɨ̀mobə ndòo pɨghoonə mbìʼì amwuə mɨ̀kwùunə ndzùŋə̀ e alyiʼə àtsùmə̀ nɨ pɨ lə̀ zuʼnə lo Yěsû à wə̀ ghu.

⁵⁶Lenəla, ɨlyiʼə ɨ̀tsùmə̀ nɨ Yěsû à lə̀ lèrə̀nə, amwuə ɨ̀laʼà, mɨ̀mbòmpə mɨ ɨ̀laʼà kə̀ mbwùnə mɨ àlaʼà, pànə̀ lə̀ nùŋə̀ pɨghoonə ɨ̀pobə amwuə ɨlyiʼə mɨ̀tàanə. Pobə lə̀ puʼù mbô ambo ze lo â myàʼtə̀ pɨghoonə pètə̀ àtsəŋə̀ atsəʼə e, lenəla, ŋwùə̀ wa ntsùmə̀ nɨ à lə̀ pètə̀nə e à lə̀ fiitə̀.