Read Pinyin Mark 7 Bible Online

Mark 7 - Pinyin bible

Mark 7

¹Pɨ̀Farìsî pobə pɨ̀nèrə̀ mbòomə pɨ̀tse pyə̀ nɨ pɨ lə̀ furə̀nə a Yèrusalèmə̀ lə̀ tô nshwatə̀ a nɨ̀pwùnə Yěsû.

²Tsaʼnə pobə pɨ pobə lə̀ nwuunə̀nə la, pobə lə̀ zəənə̀ lo ɨ̀zùŋə̀ ndzùmə̀ Yěsû pɨ̀tse lə̀ mə ndzɨghə̀ nɨ mbô nɨ mɨ pənə nɨ ntsɨ̀ŋnə ntiinə ka pobə lə̀ sùu a ghobə a mèrə amwuə ndwuumə̀ nɨ mbòomə pɨ̀Farìsî à lə̀ tàʼnə lo pobə̂ sùu,

³mbə̀ʼnə ka pɨ̀Farìsî pobə pɨ̀Jew pɨ̀tsùmə̀ lə̀ mə ndzɨghə̀ a ghobə tɨ sùu mbô ɨ̀mobə ndzùŋə̀ a mbòomə nɨ pɨ̀tǎ pɨ̀tǎ ɨ̀pobə lə̀ nèrə̀nə.

⁴Nkwùə̀ nɨ pobə kwə̂nə a mɨ̀tàanə ka pobə lə̀ mə ndzɨghə̀ a ghobə tɨghu pobə sùu mbɨ̀ŋmə̀ ɨ̀zobə ɨ laanə̀. Pɨ̀mbòomə pɨ̀noʼnə lə̀ kɨ mbə ghu tsaʼa nɨ̀sùu pɨ̀tɨtoʼo nɨ mɨkɨŋə pobə pɨ̀tse ɨ̀pwuumə̀ nɨ pɨ lə̀ tsùŋə̀nə nɨ àtɨ̀ŋnə yè pùgrə̀nə.

⁵Lenəla, pɨ̀Farìsî ghobə pɨ̀nèrə̀ mbòomə lə̀ pyiitə̀ a Yěsû lo, “A ghɨ̀rə̀ àkə ka ɨ̀zùŋə̀ ndzùmə̀ ɨ̀pô mə ndzùŋə̀ a ghobə a mbòomə nɨ pɨ̀tǎ pɨ̀tǎ lə̀ nùŋə̀nə, la mə ndzɨghə̀ a ghobə nɨ mbô nɨ mɨ pənə nɨ ntsɨ̀ŋnə?”

⁶A kẅùə̀ lo, “Ngàŋə̀ ntwuumə̀ Nẅùə̀ Ìsayà à lə̀ zəənə̀ tyìʼə̀ ɨ̀shìʼnə̀ a nɨ ŋwàʼnə̀ mbə̀ʼə pɨghə ngàŋə àpə̀grə̀: ‘Pànə̀ pə ghuʼtə̀ mə̀ pə nɨ ɨ̀kòbə̀ ntswùə̀ la mɨ̀ntɨŋmə̀ ɨ̀mobə pə e a ndyə̌ sàa aŋunə mɨ̀ŋə̀;

⁷pobə ghuʼtə̀ mə̀ pə àfǐfǐ nnèrə̀ pə pɨ̀mbòomə pɨ pànə̀ pɨ mɨsoŋə ka pə e ɨ̀pâ.’

⁸Nɨ̀ waʼà mɨ̀ntə̌ mɨ Nẅùə̀ ntyiʼə̀ ndzùŋə̀ pə pɨ mbòomə pyə̀ nɨ pànə̀ pɨ mɨsoŋə nùŋə̀nə.”

⁹Yěsû a kẅùə̀ ambo pobə lo, “Nɨ̀ wa nɨ àlàŋə yè ɨ̀shìʼnə̀ a nɨ lòo ntwuunə̀ mɨ̀ntə̌ mɨ Nẅùə̀ mbə̀ʼə zùŋə̀ pɨ̀mbòomə pɨ àlaʼà ɨ̀pɨghə.

¹⁰Mbə̀ʼnə Mǔsî à lə̀ shwəŋə̀nə lo, ‘Zuʼnə̀ a tǎ ɨwɨghə pobə mǎ o,’ nkɨ nchi nshwəŋə̀ lo, ‘Ŋònə̀ nɨ à shwəŋə̀nə ànwùə̀ tɨ̀pòŋə̀ mbə̀ʼə mǎ e kə̀ tǎ ɨghobə à kùʼnə̀ lo pɨ̀ zhwuutə̀ e.’

¹¹La nɨ̀ shwəŋə̀ àzɨghə lo mbə̀ʼə ŋwùə̀ à tə shwəŋə̀ ambo tǎ ɨghobə kə̀ mǎ e lo, ‘Àzwuumə̀ nɨ ǹtənə mbə ŋâ ambo ghò a yè Kobànə̀’ (nɨ ɨ̀sùmə pənə lo, a yè Nẅùə̀),

¹²lenəla, ka à chi mbə ghɨ̀rə̀ e ànwùə̀ àtse ambo tǎ ɨghobə kə̀ mǎ e,

¹³nɨ ndwuumə̀ wə̀, nɨ̀ tyiʼə̀ ndòo pɨ̀mbòomə pɨ àlaʼà nɨ pɨ lə̀ furə̀nə ambo pɨ̀tǎ ɨ̀pɨghə pɨ ntsàambyə̀ ndòo mbə̀ŋə̀ àshwəŋnə̀ Nẅùə̀ a tyiʼə̀ e àfǐfǐ. Nkɨ ngɨ̀rə̀ mɨ̀nwùə̀ mɨ̀noʼnə tsaʼa zèrə zə.”

¹⁴Yěsû a chi nfuŋə̀ pànə̀ pa nshwəŋə̀ ambo pobə lo, “Pɨghə pɨ̀tsùmə̀ tsùŋə̀ nzhwiʼtə̀ ànwùə̀ nɨ ngwə̀ nshwəŋə̀, ɨ̀twuə̀ ɨ̀pɨghə laanə̀.

¹⁵Ka àzwuumə̀ àtse â pə e a àpyìinə nɨ mbə̀ʼə a kwuunə̀ amwuə ŋwùə̀ ngɨ̀rə̀ lo kò a laanə̀. La a mɨ̀nwùə̀ myə̀ nɨ mɨ ma nfurə̀ amwuə ntɨŋmə̀ ŋwùə̀ nɨ mèrə ma ngɨ̀rə̀ lo kò ze laanə̀ e.”

¹⁶[“Ŋònə̀ nɨ à pənə nɨ mɨtugrə a nɨ zuʼù, â zuʼù.”]

¹⁷Nkwùə̀ nɨ à lə̀ myàʼtə̀nə pànə̀ nkwuunə̀ ndèrə̀ amwuə ndâ, ɨ̀zùŋə̀ ndzùmə̀ ɨ̀pe lə̀ pyiitə̀ e nɨ ɨ̀sùmə àshwəŋnə̀ nàanə nàanə zə.

¹⁸Yěsû a shwəŋə̀ ambo pobə lo, “Ka nɨ̀ pə a wɨghə àzɨghə nɨ àzhìʼtə̀ a nɨ zhyə̂ lo àzwuumə̀ àtsùmə̀ nɨ a furə̀nə a àpyìinə nkwuunə̀ amwuə ŋwùə̀ ka a ghɨ̀rə̀ e lo â laanə̀?

¹⁹Mbə̀ʼnə ka zèrə a kwuunə̀ e amwuə ntɨŋmə̀ e, a kwuunə̀ e la a nɨ̀pùmə̀ ze nkɨ ndàŋə̀ nfurə̀.” (Nɨ ndwuumə̀ wə̀, Yěsû à lə̀ shwəŋə̀ la lo mɨ̀zɨghə̀ mɨ̀tsùmə̀ laanə̀ nkùʼnə̀ ambo ŋwùə̀ a nɨ zɨghə̀.)

²⁰A làŋə̀ nɨ mbyə̀ nshwəŋə̀ lo, “A ŋònə̀ la a tsə̀ŋə̀ àzwuumə̀ àtsùmə̀ nɨ a za nfurə̀ a ntswùə̀ ze ngɨ̀rə̀ lo kò a laanə̀ e.

²¹Mbə̀ʼnə ànwùə̀ tɨ̀pòŋə̀ àtsùmə̀ tsaʼa ɨ̀kwàŋə̀ tɨ̀pòŋə̀, nɨ ànwùə̀ məghàbə̀, nɨ ɨ̀zə̀ərə̀, nɨ nɨ̀zhwuutə̀, nɨ ànwùə̀ àfànə̀,

²²nɨ àghə̀ʼə̀, nɨ ntɨŋmə̀ ghù shyə, nɨ àfɨ̀ghə̀, nɨ ànyònə̀, nɨ àghə̀ʼnə̀, nɨ nɨ̀tə̂ ànwùə̀ àtwuə̀ ŋwùə̀, nɨ àkoʼò mbɨ̀ŋmə̀, nɨ àkɨ̀ghə̀ a za nfurə̀ la amwuə ntɨŋmə̀ ŋwùə̀.

²³Ɨ̀nwùə̀ tɨ̀pòŋə̀ pèrə pə ɨ̀tsùmə̀ furə̀ la amwuə ŋwùə̀ ngɨ̀rə̀ lo kò a laanə̀ e.”

²⁴Yěsû a lə̀ myàʼtə̀ alyiʼə ghu nfurə̀ ndèrə̀ a pàa àlaʼà Tayə̀ ghobə Sidònə̀, nkwuunə̀ amwuə ndâ ɨ̀tse, ka mə tàʼà e lo pɨ zhyə̂, la a tɨ̀ŋnə̀ ambo ze a nɨ ghɨ̀rə̀ lo kò pɨ zhyə̂.

²⁵La tyìʼə̀ nkwùə̀ ghu, mə̀ngyə̌ ɨ̀tse nɨ mɨlyiʼə moonə̀ e yi mə̀ngyə̌ nɨ a lə̀ pənə nɨ àzhwùə̀ tɨ̀pòŋə̀ a lə̀ zuʼù lo Yěsû a ẅùə̀ amwuə ndâ gha, ntô nkunə̀ a mɨ̀kwùə̀ ze.

²⁶Mə̀ngyə̌ ẅèrə wə̀ à lə̀ pə mə̀ngyə̌ Greek, ẅùə̀ nɨ pɨ lə̀ pyə̂nə e a àlaʼà Fònisyà amwuə Siryà. A lə̀ puʼù mbô ambo Yěsû lo â fuukə̀ àzhyə̂ nɨ a pənə amwuə moonə̀ e.

²⁷Yěsû a shwəŋə̀ ambo ze lo, “Tyiʼə̀ pɨ̀ pyə̀ ndzə̂ àghòbə zaʼà, mbə̀ʼnə ka a kùʼnə̀ e lo pɨ̀ lòo àpaanə̀ àghòbə mmàʼà ambo mɨ̀ngwɨghə̀.”

²⁸La mə̀ngyə̌ wa a kẅùə̀ ambo ze lo, “Ee Ndòʼnə̀mbyə̂, la tyìʼə̀ mɨ̀ngwɨghə̀ nɨ mɨ ma nnwuunə̀ a ɨ̀sùmə tepèrə̀ ma ndyàa ɨ̀chepə̀ mɨ̀zɨghə̀ mɨ àghòbə ndzɨghə̀.”

²⁹Yěsû a tyiʼə̀ nshwəŋə̀ ambo ze lo, “Tsaʼnə wə̀ shwəŋə̀nə nɨ ndwuumə̀ wə̀ la, wə̀ chyə̂ lèrə̀ o; àzhyə̂ za a myàʼtə̀ mə a moonə̀ o.”

³⁰Tsaʼnə à lə̀ kẅirə̀nə nkwə̂ a ɨmwuə alyiʼə, à lə̀ zəənə̀ a moonə̀ e wa a nwuunə̀ aŋunə ɨ̀kwùunə nɨ àzhyə̂ za a furə̀ mə e amwuə ze.

³¹Yěsû a lə̀ myàʼtə̀ a pàa àlaʼà Tayə̀ ndàŋə̀ a Sidònə̀ nshwuʼə̀ ndèrə̀ a atəŋə Galìlyə̂ nkɨ ndàŋə̀ amwuə pàa àlaʼà mɨ̀mbòmpə mɨ ɨ̀laʼà ma nɨ̀ghumə̀.

³²Pànə̀ pɨ̀tse lòo a paapa ntô a alyiʼə ghu, mbuʼù mbô ambo Yěsû lo a nùŋə̀ àpô e aŋunə ze.

³³Yěsû a lə̀ lòo a paapa wə̀ nfurə̀ amwuə pə̀ənə̀, nchyâ pɨ̀shwuə̀ pɨ mbô ɨ̀pe amwuə mɨtugrə mɨ ŋònə̀ wa, ntẅùə̀ mɨ̀tẅuə̀ ndòo mbètə̀ àləəmə̀ paapa wa ghu.

³⁴Yěsû a lə̀ pə̀ʼkə̀ àtwuə̀ e nnaŋə̀ nɨ̀pwuurə̀, ntswaamə̀ a chwèrə̀, nshwəŋə̀ ambo ŋònə̀ ghu lo, “Ephphatha” nɨ ɨ̀sùmə ɨ̀ pənə lo, “Nyaʼkə̀!”

³⁵Tyiʼə̀ nkwùə̀ ghu, mɨtugrə mɨ ŋònə̀ wa lə̀ nyaʼkə̀, àləəmə̀ e a kɨ nshwèntə̀ a pìʼnə̀ a nɨ shwəŋnə̀ tyìʼə̀ ɨ̀shìʼnə̀.

³⁶Yěsû a lə̀ kwàtə̀ pànə̀ pa lo kò pobə shwəŋə̀ a ghobə ànwùə̀ ghu ambo ŋònə̀ ɨ̀tse. La tsaʼnə à lə̀ mənə nkwàtə̀ a ghobə, pobə lə chi nshwəŋə̀ ndèrə̀ pə nɨ mbyə̀.

³⁷Pànə̀ pɨ̀tsùmə̀ nɨ pɨ lə̀ zuʼnə lə̀ yerə̀, ntyiʼə̀ nshwəŋə̀ lo, “A ghɨ̀rə̀ ànwùə̀ àtsùmə̀ ɨ̀shìʼnə̀, ngɨ̀rə̀ àpuʼkə̀ mɨtugrə a zuʼù, paapa a kɨ nshwəŋnə̀.”