Read Pinyin Mark 9 Bible Online

Mark 9 - Pinyin bible

Mark 9

¹Yěsû a shwəŋə̀ ambo pobə lo, “Nshwəŋə̀ tyiʼə̀ nkǔŋə nkuŋə ambo pɨghə lo, pɨ̀tse pə ntəəmə̀ a nɨ̀ghə̂ nɨ ka pobə pə ghǎ zhwiʼì a ghobə a nɨ̀wɨghə̀ zaʼà pòŋə̀ zəənə̀ ànwùə̀ Nɨ̀fò Nẅùə̀ za nɨ a tô nɨ ɨ̀tɨ̀ŋnə̀.”

²Tsaʼnə njyə̂ ntuurə̀ lə̀ làŋə̀nə, Yěsû a lòo a Pità nɨ Jemə̀ nɨ Jònə pobə pɨ pobə koʼò ndèrə̀ àtwuə̀ mbarə̀ yɨ̀ sàa alyiʼə nɨ pobə lə̀ pənə pobə nɨ pobə. Alyiʼə ghu, mbɨ̀ŋmə̀ e ɨ̀ lə̀ kẅebə̀ a mbyə̀ pobə,

³ɨtsəʼə ɨ̀pe fuə̀ tə ntsèntə̀ ntsàarə̀ ndwuumə̀ nɨ mbə̀ʼə ŋwùə̀ àtwuə̀ ɨ̀shyə̂ a sùu a pèrə.

⁴A pə nkwùə̀ ghu, ɨ̀zùŋə̀ ndzùmə̀ ɨ̀pe pa tyiʼə̀ ndzəənə̀ a Elijah pobə Mǔsî təəmə̀ mmə nshwəŋnə̀ pobə pɨ Yěsû.

⁵Lenəla, Pità a shwəŋə̀ ambo Yěsû lo, “Ɨ̀nèrə̀, a pòŋə̀ tsaʼnə pəə pə a nɨ̀ghə̂. Pəə pɨ korə̀ ɨ̀zuŋə̀ ɨtarə, taʼà a pə ambo ghò, taʼà a pə ambo Mǔsî, yètse a pə ambo Elijah.”

⁶Mbə̀ʼnə ka à lə̀ zhyə̂ e ànwùə̀ nɨ mbə̀ʼə a shwəŋə̀ ntiinə pobə lə̀ pənə nɨ àkẅàrə̀.

⁷Nkwùə̀ ghu, mbàʼà ɨ̀ lə̀ zùŋə̀ nkẅupə̀ a ghobə, ngyə̀ ɨ̀ furə̀ amwuə nshwəŋə̀ lo, “Lə̌ moonə̀ mə̀ nɨ ǹkòŋə̀nə. Nɨ̀ zuʼù ambo ze!”

⁸Pobə wùutə̀ nnaŋə̀ ɨlyiʼə ka chi zəənə̀ a ghobə a ŋònə̀ ɨ̀tse a nɨ̀pwùnə pobə ndàŋə̀ e Yěsû.

⁹Tsaʼnə pobə lə̀ furə̀nə àtwuə̀ mbarə̀ gha mmə nshwuʼə̀, Yěsû à lə̀ kwàtə̀ a ghobə nshwəŋə̀ lo, “Kò pobə shwəŋə̀ a ghobə a ŋònə̀ ɨ̀tse nɨ ànwùə̀ nɨ pobə zəənə̀nə, tə mbyàa nkwùə̀ nɨ Moonə̀ Ŋwùə̀ à ghǎ zhwuumə̀ nɨ̀wɨghə̀.”

¹⁰Pobə lə̀ nùŋə̀ ànwùə̀ ghu amwuə pobə ntyiʼə̀ mbyiitə̀ mbɨ̀ŋmə̀ ɨ̀zobə lo, “Nɨ̀zhwuumə̀ a nɨ̀wɨghə̀ a chyə̂ lə̀ lo àkə!”

¹¹Pobə lə̀ làŋə̀ nɨ mbyə̀ mbyiitə̀ ambo Yěsû lo, “A ghɨ̀rə̀ àkə pɨ̀nèrə̀ mbòomə shwəŋə̀ lo, Elijah à ghǎ pyə̀ tô?”

¹²Yěsû a kẅùə̀ ambo pobə lo, “A nkǔŋə nkuŋə lo Elijah à ghǎ tô tsùnkə̀ ɨ̀pwuumə̀ ɨ̀tsùmə̀ pèrə kẅirə̀ mbə tsaʼnə pèrə lə̀ pənə. A ghɨ̀rə̀ àkə pɨ chi ŋŋwàʼnə̀ lo Moonə̀ Ŋwùə̀ à ghǎ zəənə̀ ngəʼə̀ aŋunə mɨ̀nwùə̀ mɨ̀noʼnə pɨ̀ chyâ ɨ̀sɨŋnə̀ àtwuə̀ ze?”

¹³La ǹshwəŋə̀ ambo pɨghə lo Elijah à tô mə, pobə kɨ ngɨ̀rə̀ ànwùə̀ nɨ pobə tə mmə ntàʼà lo ghɨ̀rə̀ tsaʼnə pɨ pyə̀nə ŋŋwàʼnə̀ mbə̀ʼə e amwuə àŋwàʼnə̀ Nẅùə̀.

¹⁴Nkwùə̀ nɨ pobə lə̀ shwuʼnə ntô ntsirə̀ a pyə̀ ɨ̀zùŋə̀ ndzùmə̀ Yěsû, pobə lə̀ zəənə̀ àpùŋə̀ pə̀ənə̀ a kamnə̀ a ghobə, pɨ̀nèrə̀ mbòomə pɨ̀tse pə ntànkə̀ pobə pɨ pobə.

¹⁵Nkwùə̀ nɨ àpùŋə̀ pànə̀ za a lə̀ zəənə̀nə a Yěsû, ànwùə̀ ghu a lə̀ kə̀ʼnə̀ a ghobə; pobə zùŋə̀ nkɨ̀ɨrə̀ ngə̀ a nɨ chàʼtə̀ e.

¹⁶Yěsû a pyiitə̀ ɨ̀zùŋə̀ ndzùmə̀ ɨ̀pe lo, “Nɨ̀ tànkə̀ lə̀ àkə pɨghə pɨ pobə?”

¹⁷Taʼà ŋwùə̀ amwuə àpùŋə̀ pànə̀ za a kẅùə̀ lo, “Ɨ̀nèrə̀, ntə ndòo a moonə̀ mə̀ ntô ambo ghò ntiinə à pənə nɨ àzhwùə̀ tɨ̀pòŋə̀ amwuə ze zhyə̀ nɨ a ghɨ̀rə̀nə a pə paapa.

¹⁸Nkwùə̀ nɨ àzhwùə̀ tɨ̀pòŋə̀ zə̀ a ẅìimə̀nə e, a màʼà e a ɨ̀shyə̂, àfùʼkə̀ a furə̀ a ntswùə̀ ze, a kwurə̀ mɨsoŋə, nshwùumə̀ ntyiʼə̀ ntɨ̀ŋnə̀. Ndə̀ shwəŋə̀ ambo ɨ̀zùŋə̀ ndzùmə̀ ɨ̀pô lo pobə̂ fuukə̀ àzhyə̂ ghu, la pobə fuukə̀ a ghobə kɨkaŋə.”

¹⁹Yěsû a shwəŋə̀ ambo ɨ̀zùŋə̀ ndzùmə̀ ɨ̀pe lo, “Pɨghə ɨ̀waanə̀ pànə̀ pɨ tɨ àpyiimə̀, ka nɨ̀ pə wɨghə nɨ àpyiimə̀ ntɨŋmə̀. Mbɨ chyə̂ pə̀ənə̀ ndùnə̀ ɨla? Mbɨ ẅìimə̀ ntɨŋmə̀ mə̀ aŋunə pɨghə lə aŋunə ndùnə̀ nkwùə̀ ɨla? Tô ŋŋâ a moonə̀ wa ambo mɨ̀ŋə̀!”

²⁰Lenəla pobə tô ŋŋâ a moonə̀ wa ambo ze. Nkwùə̀ nɨ àzhwùə̀ za a lə̀ zəənə̀nə a Yěsû, a lə̀ zùŋə̀ ngẅìimə̀ a moonə̀ wa mmàʼà a ɨ̀shyə̂ a tyiʼə̀ mmə mbɨgrə̀, àfùʼkə̀ a tyiʼə̀ nfurə̀ a ntswùə̀ ze.

²¹Yěsû à lə̀ pyiitə̀ a tǎ ɨghobə lo, “Àzhwùə̀ tɨ̀pòŋə̀ zə̀ a chyə̂ mə amwuə ze ndùnə̀ ɨla?” A kẅùə̀ lo, “A nɨ furə̀ tsaʼnə à lə̀ pirə̀nə mɨlyiʼə moonə̀.

²²Àzhwùə̀ tɨ̀pòŋə̀ zə̀ a za mmàʼà e amwuə ɨ̀mǔ kə̀ amwuə nchyə nkwùə̀ noʼnə ntàʼà a nɨ zhwuutə̀ e. La wə̀ tə pə ghɨ̀rə̀ ànwùə̀ àtse, wə̀ koorə̀ mɨ̀lɨŋə̀ ɨ̀məə ngyèmpə̀ a wəə.”

²³Yěsû a shwəŋə̀ ambo ze lo, “Wə̀ shwəŋə̀ ambo mɨ̀ŋə̀ lo, ‘Mbə̀ʼə m̀bə ghɨ̀rə̀!’ Mbə̀ʼə ànwùə̀ àtse a tsàarə̀ e a ŋònə̀ nɨ à nùŋə̀nə ntɨŋmə̀ aŋunə Nẅùə̀ apə̀.”

²⁴Tyiʼə̀ nkwùə̀ ghu, tǎ pɨ moonə̀ wa a kyiinə̀ nshwəŋə̀ lo, “M̀byiimə̀, yèmpə̀ mə̀ lo m̂bə nɨ àpyiimə̀ ntɨŋmə̀.”

²⁵Yěsû a zəənə̀ lo àpùŋə̀ pànə̀ za a zə ntinə̀ ntô a nɨ̀pwùnə ze, ndzùŋə̀ nsaʼà àzhwùə̀ tɨ̀pòŋə̀ za nshwəŋə̀ ambo zèrə lo, “Ghò àzhyə̂ za nɨ a ghɨ̀rə̀nə lo kò moonə̀ wə̀ a shwəŋnə̀, nkɨ ngɨ̀rə̀ a pə àpuʼkə̀ mɨtugrə, ǹshwəŋə̀ ambo ghò lo wə̀ furə̀ amwuə ze, kò wə̀ gha nchi nkwuunə̀ amwuə ze.”

²⁶Àzhwùə̀ za a lə̀ kyiinə̀, nnə̀ʼə̀ e nɨ ɨ̀tɨ̀ŋnə̀, nfurə̀ amwuə ze. A tyiʼə̀ nshwùumə̀ tsaʼa àkwuə̀ ŋwùə̀. Pànə̀ pɨ̀noʼnə nɨ pɨ lə̀ zəənə̀nə e lə̀ shwəŋə̀ lo, “À kwɨghə̀.”

²⁷La Yěsû à lə̀ ẅìimə̀ àpô e, mbə̀ʼkə̀ e a lòo a ɨ̀shyə̂.

²⁸Yěsû à lə̀ myàanə̀ nkwuunə̀ a ndâ, ɨ̀zùŋə̀ ndzùmə̀ ɨ̀pe pyiitə̀ e a ndzùmə̀ ndzùmə̀ lo, “La à tə ngɨ̀rə̀ àkə lo kò pəə fuukə̀ a wəə àzhwùə̀ tɨ̀pòŋə̀ zə̀?”

²⁹Yěsû a kẅùə̀ ambo pobə lo, “Mbə̀ʼə ka pɨ̀ fuukə̀ e mbuurə̀ àzhwùə̀ tɨ̀pòŋə̀ zə̀ nɨ àzwuumə̀ yè nyaanə ndàŋə̀ e àchàʼtə̀ Nẅùə̀.”

³⁰Yěsû pobə ɨ̀zùŋə̀ ndzùmə̀ ɨ̀pe myàʼtə̀ alyiʼə ghu ndèrə̀, ndàŋə̀ amwuə àlaʼà Galìlyə̂. Ka a lə̀ tàʼà e lo ŋònə̀ ɨ̀tse a zhyə̂ alyiʼə nɨ pobə pənə ghu;

³¹ntiinə à lə̀ pənə nnèrə̀ ɨ̀zùŋə̀ ndzùmə̀ ɨ̀pe. À lə̀ shwəŋə̀ ambo pobə lo, “Pɨ̌ ŋâ a Moonə̀ Ŋwùə̀ ambo pànə̀ nɨ pɨ zhwuutə̀ e. La njyə̂ làŋə̀ ɨtarə a zhwuumə̀ nɨ̀wɨghə̀.”

³²La ka pobə zhyə̂ a ghobə ɨ̀sùmə àshwəŋnə̀ ghu, ntyiʼə̀ mmə mbô a nɨ pyiitə̀ e.

³³Pobə lə̀ tô mbyàa a Kàpenòmə̀, nkwuunə̀ nnwuunə̀ a ndâ, Yěsû a pyiitə̀ a ghobə lo, “Nɨ̀ tə ngyìinə̀ ntànkə̀ la ànwùə̀ àkə a àlàŋə?”

³⁴La pobə zhwemnə̀ a ghobə ntiinə pobə tənə mmə ngyìinə̀ ntànkə̀ ànwùə̀ mbə̀ʼə ŋònə̀ nɨ à pənə ŋònə̀ ngẅùunə.

³⁵A lə̀ nwuunə̀ a ɨ̀shyə̂ nfuŋə̀ ɨ̀zùŋə̀ ndzùmə̀ ɨ̀pe pa ntsòbə̀ ɨpaa, nshwəŋə̀ ambo pobə lo, “Ŋònə̀ wa nɨ à tàʼnə a nɨ pə ntsàambyə̀, a chyə̂ a nɨ pə̀ŋə̀ ntyiʼə̀ ndẅùə̀ndzùmə̀, nkɨ mbə ngàŋə̀ àfàʼà ambo ŋwùə̀ ntsùmə̀.”

³⁶Yěsû à kɨ myàanə̀ a nɨ shwəŋə̀ a lenə la, ndòo a mɨlyiʼə mɨnkɨ̂ ntə̂ a tɨ̀tɨ̀rə̀ pobə, ntwuʼtə̀ a moonə̀ wa a mbô ze nshwəŋə̀ ambo pobə lo,

³⁷“Ŋwùə̀ wa ntsùmə̀ nɨ à kẅiirə̀nə a taʼà mɨlyiʼə mɨnkɨ̂ wə̀ yɨ̀tse aŋunə nɨ̀linə̀ ɨ̀tsâ, à kẅiirə̀ la a gha, la ŋònə̀ wa ntsùmə̀ nɨ à kẅiirə̀nə mə̀, à kẅiirə̀ la a ŋònə̀ nɨ à tsàanə mə̀, ka à kẅiirə̀ e la a gha.”

³⁸Jònə a shwəŋə̀ ambo Yěsû lo, “Ɨ̀nèrə̀, pəə zəənə̀ a ŋwùə̀ a pə nfuukə̀ ɨ̀zhyə̂ amwuə pə̀ənə̀ nɨ nɨ̀linə̀ ɨ̀tsô, la pəə zòŋə̀, ntiinə ka a lə̀ pə e taʼà ŋwùə̀ ɨ̀wə̀ənə̀ ɨ̀tse.”

³⁹La Yěsû a shwəŋə̀ ambo pobə lo, “Kò nɨ̀ zòŋə̀ a wɨghə a ye ntiinə mbə̀ʼə ka ŋwùə̀ a ghɨ̀rə̀ e ànwùə̀ yerə̀nə yerə̀nə aŋunə nɨ̀linə̀ ɨ̀tsâ, nkwùə̀ kɨ kẅìʼtə̀, a chi nshwəŋə̀ ànwùə̀ tɨ̀pòŋə̀ mbə̀ʼə mə̀.

⁴⁰Mbə̀ʼnə ŋònə̀ nɨ ka à pə mbàanə̀ e a wəənə̀ a chyə̂ la pə̀ənə̀ pɨ pobə.

⁴¹Ǹshwəŋə̀ tyìʼə̀ nkǔŋə nkuŋə ambo pɨghə lo ŋònə̀ nɨ à ŋânə ndoŋə̀ nchyə ambo pɨghə lo nɨ̀ nô ntiinə nɨ̀ pyiimə̀nə nɨ̀linə̀ nɨ Kristù, mbə̀ʼə a gha mbî e mɨ̀ntsoʼnə̀ mɨ àfàʼà ɨ̀me apə̀.

⁴²“Ŋònə̀ ɨ̀tse à tə mbəla ngɨ̀rə̀ lo mɨlyiʼə mɨnkɨ̂ wə̀ yɨ̀tse nɨ à nùŋə̀nə ntɨŋmə̀ e aŋunə mɨ̀ŋə̀ lə lo â ghɨ̀rə̀ a tɨ̀pòŋə̀, yi a pòŋə̀ lo pɨ korə̀ a maa mbɨ̀grə̀ nɨ̀ghòorə a loŋə ze mmàʼà e amwuə nchyə ghu nɨŋnə̀nə.

⁴³Àpô o a tə mbəla ngɨ̀rə̀ lo wə̀ fàntə̀ ngɨ̀rə̀ ànwùə̀ tɨ̀pòŋə̀, a pòŋə̀ lo wə̀ lə̂ a zèrə ngwaʼà. A pòŋə̀ lo wə̀ gha nkwuunə̀ amwuə nɨ̀chyə̂mbyə̂ tɨ àpô ntsàarə̀ a nɨ pə nɨ mbô mɨmbaa nga nkwuunə̀ amwuə àkɨɨnə̀ ɨ̀mǔ, ɨ̀mǔ wa nɨ ɨ wa ka pyaatə̀ e la.

⁴⁴[Alyiʼə ghu, nterə nɨ pə zɨghə̀ a ghobə pə zhyə̀ nɨ ghǎ kwɨghə̀ e apə̀, kə̀ ɨ̀mǔ wa nɨ ɨ̌ pə tòonə̀ a ghobə ɨ pə ẅùə̀ nɨ ɨ ghǎ pyaatə̀ e apə̀.]

⁴⁵Nɨ ndwuumə̀ ẅèrə wə̀, àkwùə̀ o a tə kɨ mbəla ngɨ̀rə̀ lo wə̀ fàntə̀ ngɨ̀rə̀ ànwùə̀ tɨ̀pòŋə̀, a pòŋə̀ lo wə̀ lə̂ a zèrə ngwaʼà. A pòŋə̀ lo wə̀ gha nkwuunə̀ a nɨ̀chyə̂mbyə̂ tɨ àkwùə̀ ntsàarə̀ a nɨ pə nɨ mɨ̀kwùə̀ mɨ̀tsùmə̀ la pɨ màʼà o amwuə àkɨɨnə̀ ɨ̀mǔ.

⁴⁶[Alyiʼə ghu, nterə nɨ pə zɨghə̀ a ghobə pə zhyə̀ nɨ ghǎ kwɨghə̀ e apə̀, kə̀ ɨ̀mǔ wa nɨ ɨ̌ pə tòonə̀ a ghobə ɨ pə ẅùə̀ nɨ ɨ ghǎ pyaatə̀ e apə̀.]

⁴⁷Lenəla, nɨ̀lyə̂ ɨ̀tsô tə kɨ mbəla ngɨ̀rə̀ lo wə̀ fàntə̀ ngɨ̀rə̀ ànwùə̀ tɨ̀pòŋə̀, a pòŋə̀ lo wə̀ tsoʼò a tsèrə ngwaʼà. Ntiinə a pòŋə̀nə ambo ghò a nɨ kwuunə̀ amwuə ànwùə̀ Nɨ̀fò Nẅùə̀ nɨ taʼà nɨ̀lyə̂ ntsàarə̀ a nɨ pə nɨ ɨ̀myə̂ mɨmbaa la pɨ màʼà o amwuə àkɨɨnə̀ ɨ̀mǔ.

⁴⁸Alyiʼə ghu, nterə nɨ pə zɨghə̀ a ghobə pə zhyə̀ nɨ ghǎ kwɨghə̀ e apə̀, kə̀ ɨ̀mǔ wa nɨ ɨ̌ pə tòonə̀ a ghobə ɨ pə ẅùə̀ nɨ ɨ ghǎ pyaatə̀ e apə̀.

⁴⁹Ɨ̀mǔ ghǎ tsùŋə̀ a ŋwùə̀ ntsùmə̀ tsaʼnə ngwaŋə̀ ma ntsùŋə̀ mbòbə̀ nɨ̀shwàʼà la.

⁵⁰“Ngwaŋə̀ pòŋə̀, la mɨ tə mbəla mbî nɨ̀lɨ̀ŋmə̀ e, wə̀ tyiʼə̀ ghɨ̀rə̀ la ɨla lo mɨ pòŋə̀ lɨ̀ŋmə̀? A pòŋə̀ lo nɨ̀ ghɨ̀rə̀ ngwaŋə̀ pə amwuə pɨghə mbə̀ʼə nɨ̀ tyiʼə̀ nchyə̂ nɨ àporə̀porə̀ a tɨ̀tɨ̀rə̀ pɨghə.”