Read Pinyin Lukə̀ 10 Bible Online

Lukə̀ 10 - Pinyin bible

Lukə̀ 10

¹Tsaʼnə Ndòʼnə̀mbyə̂ à lə̀ myàanə̀nə, à lə̀ tyiʼə̀ ntsoʼò pɨ̀tse pə̀ənə̀ mɨ̀ghumə̀ sàmbaa ntsòbə̀ ɨpaa ntsàa a ghobə lo pobə̂ lèrə̀ a mbyə̀ ze, ngyìinə̀ pɨpaa pɨpaa ndèrə̀ amwuə mɨ̀mbòmpə mɨ àlaʼà mɨ̀tsùmə̀ nɨ ɨlyiʼə pa ɨ̀tsùmə̀ nɨ ǎ pòŋə̀ tô ghu la.

²Tsaʼnə à lə̀ mənə ntwuumə̀ a ghobə la, à lə̀ nshwəŋə̀ ambo pobə lo, “Mɨ̀zɨghə̀ koʼò amwuə ɨ̀swùumə noʼò la pɨ̀fùʼù tyiʼə̀ nkɨ̂. Nɨ̀ chàʼtə̀ a Nẅùə̀ lo Ndòʼnə̀mbyə̂ ngàŋə̀ ɨ̀swùumə â tsàa ngàŋə àfàʼà amwuə ɨ̀swùumə mbə̀ʼə pɨ ghə̀ nfùʼù mɨ̀zɨghə̀ mɨ̀ghu.

³Nɨ̀ lèrə̀; la tsaʼnə nɨ̀ mənə ndèrə̀ la nɨ̀ zhyə̂ lo ǹtsàa a wɨghə àpyìinə la tsaʼa ɨ̀poonə̀ pɨ mbyə̂ ndzìrə̀ a tɨ̀tɨ̀rə̀ pəfuunə.

⁴Kò nɨ̀ lòo a wɨghə àpàamə̀ nkabə̀ kə̀ àpàamə̀ àtse kə̀ ɨtabə pɨ̀tse; kò nɨ̀ kɨ nchàʼtə̀ a wɨghə ŋwùə̀ àlàŋə ndwuumə̀.

⁵Nɨ̀ kwuunə̀ amwuə ndâ nɨ nɨ̀ kwuunə̀nə, nɨ̀ pyə̀ shwəŋə̀ lo, ‘mborə̀ ɨ pə amwuə ndâ ghə̀’.

⁶Ngàŋə̀ àporə̀porə̀ à tə pə amwuə, yi àporə̀porə̀ àzɨghə ǎ kẅìnə̀ aŋunə ze, ngàŋə̀ àporə̀porə̀ a kɨ mbə la mbuŋə̀ e; àporə̀porə̀ àzɨghə a kẅirə̀ nkwə̂ ambo pɨghə.

⁷Nɨ̀ kwuunə̀ a ndâ nɨ nɨ̀ kwuunə̀nə la, nɨ̀ ghoŋə̀ a ndâ ghu, ndzɨghə̀ nkɨ nnô àzwuumə̀ àtsùmə̀ nɨ pɨ ŋânə ambo pɨghə, ntiinə pɨ chyə̂ a nɨ twuə̀ a ngàŋə̀ àfàʼà. Kò nɨ̀ kɨ nkwuunə̀ mɨ̀ndâ nfurə̀ nkwuunə̀.

⁸Nɨ̀ kwuunə̀ amwuə mbòmpə àlaʼà nɨ pɨ kẅiirə̀nə wɨghə ɨ̀shìʼnə̀, nɨ̀ zɨghə̀ àzwuumə̀ àtsùmə̀ nɨ pɨ ŋânə ambo pɨghə.

⁹Nɨ̀ parə̀ pɨghoonə nɨ pɨ pənə ghu nshwəŋə̀ ambo pobə lo, ‘Ànwùə̀ Nɨ̀fò Nẅùə̀ a tô mbaatə̀ a wɨghə.’

¹⁰La nɨ̀ pəla nkwuunə̀ amwuə mbòmpə àlaʼà pɨ ka kẅiirə̀ e a wɨghə, nɨ̀ lèrə̀ amwuə ɨ̀làŋə ndwuumə̀ nshwəŋə̀ lo,

¹¹‘Mbaa pə àpùbə àlaʼà àzɨghə nɨ a pənə a mɨ̀kwùə̀ pəə, pəə̌ kwùtə̀ a zèrə a nɨ nèrə̀ lo ngəʼə̀ ɨ̀ ghoŋə̀ ambo pɨghə, la nɨ̀ zhyə̂ lo nkwùə̀ ànwùə̀ Nɨ̀fò Nẅùə̀ ɨ̀ paatə̀.’

¹²Ǹshwəŋə̀ nkǔŋə nkuŋə ambo pɨghə lo, ngəʼə̀ nɨ ɨ̀ ghǎ pə ambo pànə̀ pɨ àlaʼà ghu amwuə njyə̂ ntsoʼtə̀ mɨ̀sàʼa ɨ̀ ghǎ tsàarə̀ zhyə̀ nɨ pɨ lə̀ ŋânə ambo pànə̀ pɨ àlaʼà Sodòmə̀”.

¹³“Ngəʼə̀ ngẅùunə ɨ̀ ghǎ pə ambo pɨghə mbǎ pànə̀ pɨ Kòrazìnə̀! Farə ambo pɨghə mbǎ pànə̀ pɨ Betsedà! Ntiinə pɨ lə̀ pənə la ngɨ̀rə̀ mɨ̀nwùə̀ mɨ yerə̀nə yerə̀nə mə nɨ pɨ lə̀ mənə ngɨ̀rə̀ àlaʼà pɨghə lə la àlaʼà Tayə̀ ghobə Sidònə̀, yi pobə kɨ kwaa mə mbə̀ŋə̀ mɨ̀ntɨŋmə̀ ɨ̀mobə, ntyiʼə̀ ngẅî ɨtsəʼə ngəʼə̀ nfùʼù ɨ̀twuə̀ ɨ̀pobə nɨ àpwuə̀.

¹⁴La a ghǎ pɨ̂ tə lẅùutə̀ ambo pɨghə amwuə njyə̂ ntsoʼtə̀ mɨ̀sàʼa tsàarə̀ ambo pànə̀ pɨ Tayə̀ ghobə Sidònə̀.

¹⁵A chyə̂ ambo pɨghə pànə̀ pɨ Kàpenòmə̀. Nɨ̀ wə̀ nkwàŋə̀ lo pɨ ŋaŋə̀ a wɨghə tsàa a nɨ̀pwuurə̀? Ngaŋə! Pɨ shwuʼkə̀ a wɨghə mmàʼà amwuə pàŋə̀ ɨ̀shyə̂.”

¹⁶Yěsû a shwəŋə̀ ambo ɨ̀zùŋə̀ ndzùmə̀ ɨ̀pe pa lo, “Ŋònə̀ wa nɨ à pyiimə̀nə ànwùə̀ nɨ nɨ̀ shwəŋə̀nə la, à pyiimə̀ la ànwùə̀ mə̀. Ŋònə̀ wa nɨ à twuunə̀nə ànwùə̀ nɨ nɨ̀ shwəŋə̀nə la, à kɨ ntwuunə̀ la gha. Ŋònə̀ wa nɨ à twuunə̀nə mə̀ la, à kɨ ntwuunə̀ la a ẅùə̀ wa nɨ à tsàanə mə̀ la.”

¹⁷Nkwùə̀ ɨ̀tse ɨ̀ lə̀ làŋə̀, pànə̀ pa mɨ̀ghumə̀ sàmbaa ntsòbə̀ ɨpaa ɨ kẅirə̀ kwə̂ nɨ nɨ̀ghaʼà, nshwəŋə̀ ambo Yěsû lo, “Ndòʼnə̀mbyə̂, mbaa pə ɨ̀zhyə̂ lə̀ zuʼnə̀ a wəə nkwùə̀ nɨ pəə lə̀ fuŋə̀nə nɨ̀linə̀ ɨ̀tsô.”

¹⁸Lenəla Yěsû a shwəŋə̀ ambo pobə lo, “Ǹtə ndzəənə̀ a Satàanə̀ a furə̀ a nɨ̀pwuurə̀ nkunə̀ tsaʼa mbə̀ŋə̀ ɨ̀ ŋwàŋə̀.

¹⁹Nɨ̀ zəənə̀! Ŋ̀ŋâ ɨ̀tɨ̀ŋnə̀ ambo pɨghə lo nɨ̀ nyə̀nkə̀ mɨ̀nyoorə̀ pobə pɨ̀ngaamə ɨ̀shyə̂ nkɨ mbə nɨ mɨ̀tɨ̀ŋnə̀ àtwuə̀ ngàŋə kɨpaanə ɨ̀zɨghə. Lenəla, ànwùə̀ ɨ̀tse a tòmnə̀ e a wɨghə apə̀.

²⁰La, kò nɨ̀ ghaʼà a wɨghə pə ntiinə ɨ̀zhwùə̀ tɨ̀pòŋə̀ zuʼnə̀ a wɨghə; nɨ̀ ghaʼà pə lo pɨ̀ ŋwàʼnə̀ mɨ̀linə̀ ɨ̀mɨghə amwuə àŋwàʼnə̀ a nɨ̀pwuurə̀.”

²¹A lə̀ pə nkwùə̀ ghu la Àzhwùə̀ Nẅùə̀ a lẅenə̀ a Yěsû nɨ nɨ̀ghaʼà, à tyiʼə̀ nshwəŋə̀ lo, “Tǎ, ŋ̀ŋâ a mɨyàa ambo ghò mbǎ Ndòʼnə̀mbyə̂ nɨ̀pwuurə̀ pobə ɨ̀shyə̂, ntiinə wə̀ lə̀əmə̀nə mɨ̀nwùə̀ mə ambo pànə̀ nɨ pobə kwàŋə̀nə lo pobə zhìʼtə̀ pobə pɨ pànə̀ nɨ pobə kwàŋə̀nə lo pobə zhyə̂ ɨ̀nwùə̀ la, nnèrə̀ ambo pyə̀ nɨ pɨ pənə tsaʼa ɨ̀poonə̀ pɨ porə̀. Ee; Tǎ, lə̌ tsaʼnə wə̀ lə̀ tàʼnə lo a pə la.

²²“Tǎ ɨwəə à ŋâ mə̀ nɨ ɨ̀nwùə̀ ɨ̀tsùmə̀. Ka ŋwùə̀ a zhyə̀ e a Moonə̀ nɨ m̀bənə ẅèrə ndàŋə̀ e Tǎ. Ka ŋwùə̀ a kɨ nzhyə̂ e a ŋònə̀ nɨ Tǎ à pənə ẅèrə ndàŋə̀ e Moonə̀ pobə pànə̀ pa nɨ Moonə̀ à tsoʼnə lo nèrə̀ a Tǎ ambo pobə la.”

²³Yěsû a pə̀ŋə̀ nchwùmpə̀ ambo ɨ̀zùŋə̀ ndzùmə̀ ɨ̀pe pa lo, “Mborə̀ ɨ̀ chyə̂ ambo pànə̀ pa nɨ pobə zəənə̀nə ànwùə̀ nɨ nɨ̀ wə̀ ndzəənə̀ lə.

²⁴Ǹshwəŋə̀ tyìʼə̀ nkǔŋə nkuŋə ambo pɨghə lo ngàŋə ntwuumə̀ Nẅùə̀ yɨ̀noʼnə pobə pɨ̀fò pɨ̀noʼnə lə̀ mə ngyìi a nɨ zəənə̀ mɨ̀nwùə̀ mə nɨ nɨ̀ wə̀ ndzəənə̀ lə, la ka zəənə̀ a ghobə, mmə ngyìi a nɨ zuʼù mɨ̀nwùə̀ nɨ nɨ̀ wə̀ ndzuʼù lə, la ka zuʼù a ghobə.”

²⁵Tyìʼə̀ nkwùə̀ ghu, ɨ̀nèrə̀ mbòomə ghùtse à lə̀ lòo a ɨ̀shyə̂, mmə ntàʼà a nɨ kwàʼnə̀ a Yěsû, mbyiitə̀ e lo, “Ɨ̀nèrə̀ ɨ̀nwùə̀, mbə̀ʼə ǹgɨ̀rə̀ lə ɨla mbòŋə̀ zɨghə̀ a nɨ̀chyə̂mbyə̂ nɨ à ghoŋə̀nə nɨ nkuŋə̀?”

²⁶Yěsû a pyiitə̀ e lo, “Pɨ ŋwàʼnə̀ amwuə àŋwàʼnə̀ mbòomə la lo àkə? Wə̀ fuŋə̀ àzô ndzəənə̀ pɨ ŋwàʼnə̀ amwuə la lo àkə?”

²⁷A kẅùə̀ lo, “Tyiʼə̀ nkòŋə̀ a Ndòʼnə̀mbyə̂ Nẅùə̀koʼò o nɨ ntɨŋmə̀ o ɨ̀tsùmə̀, nɨ Àzhwùə̀ o àtsùmə̀, nɨ ɨ̀tɨ̀ŋnə̀ o ɨ̀tsùmə̀, farə nɨ àzhìʼtə̀ o àtsùmə̀. Ntyiʼə̀ nkòŋə̀ a ndyimə o tsaʼa mbɨ̀ŋmə̀ o.”

²⁸Yěsû a shwəŋə̀ ambo ze lo, “Wə̀ kẅùə̀ tyìʼə̀ ɨ̀shìʼnə̀, ghɨ̀rə̀ tyìʼə̀ nɨ ndwuumə̀ wə̀ mbə̀ʼə zɨghə̀ a nɨ̀chwarə̀.”

²⁹Ɨ̀nèrə̀ mbòomə wə̀ a lə̀ mə ntàʼà nnèrə̀ lo à zhyə̂, nchi mbyiitə̀ a Yěsû lo “Ndyimə mə̀ la ɨ̀wə̌?”

³⁰Yěsû a kẅùə̀ ambo ze lo, “Ŋònə̀ ɨ̀tse à lə̀ pə ghu nfurə̀ a Yèrusalèmə̀ mmə ndèrə̀ a Jèrikò, pɨ̀zə̀ərə̀ kô e nchwaʼtə̀ ɨtsəʼə a mbɨ̀ŋmə̀ ze, mbuʼù e ɨ̀shìʼnə̀ tə a tyiʼə̀ a ntswùə̀ nɨ̀wɨghə̀, pobə myàʼtə̀ e ndèrə̀ a ghobə.

³¹Ngàŋə̀ màʼà Nẅùə̀ ɨ̀tse à lə̀ mə ndàŋə̀ amwuə àlàŋə ghu, ntô nfurə̀ aŋunə ŋònə̀ wə̀, ndàŋə̀ amwuə ẅùə̀ pàa ndèrə̀ e.

³²Ngàŋə̀ àyèmpə̀ Ndâ Nẅùə̀ ghùtse nɨ à lə̀ furə̀nə amwuə ngẅàrə̀ Levì, a tô ndzəənə̀, nkɨ ngɨ̀rə̀ tyìʼə̀ a lenə ndàŋə̀ amwuə ẅùə̀ pàa ndèrə̀ e.

³³La ŋwùə̀ Sàmariyà ɨ̀tse à lə̀ mə ndèrə̀ e a àkarə̀ ze mmə ndàŋə̀ àlàŋə ghu, ntô ndzəənə̀ e ntyiʼə̀ nkoorə̀ mɨ̀lɨŋə̀ ɨ̀me.

³⁴À lə̀ tô mbaatə̀ e, nsùu ɨ̀lǎ ɨ̀pe nchyâ afuə amwuə nkorə̀ nɨ ɨ̀pàa atsəʼə ntə̂ e àtwuə̀ ndzàkɨshyə̀ e ndòo e ndèrə̀ a ndâ pɨ̀ghɨ̀ɨnə̀ a nɨ tyiʼə̀ mmə naŋə̀ e ghu.

³⁵Pobə ze lə̀ lyə̂ ghu njyə̂ ɨ̀ laanə̀, ŋwùə̀ Sàmariyà ghu a mə ndèrə̀ e nfuukə̀ nkabə̀ ɨpaa ŋŋâ ambo ngàŋə̀ mbyabə̀ ndâ pɨ̀ghɨ̀ɨnə̀ wa nshwəŋə̀ ambo ze lo, ‘Mə nnaŋə̀ e, wə̀ tə pəla ntsə̀ŋə̀ nkabə̀ nɨ ɨ̀ tsàarə̀nə a zə aŋunə ze, yi mbɨ tô kẅuə̀ ambo ghò nkwùə̀ nɨ ǹkẅirə̀nə ntô.’”

³⁶Yěsû a pyiitə̀ ambo ɨ̀nèrə̀ mbòomə wə̀ lo, “Wə̀ kwàŋə̀ lo ndyimə ŋònə̀ ẅèrə wə̀ a tɨ̀tɨ̀rə̀ pànə̀ pə̀ pɨtarə a ɨ̀wə̌?”

³⁷A kẅùə̀ lo, “Ŋònə̀ wa nɨ à lə̀ koorə̀nə mɨ̀lɨŋə̀ ɨ̀me la.” Yěsû a shwəŋə̀ ambo ze lo, “Lèrə̀ nkɨ ntyiʼə̀ ngɨ̀rə̀ a lenə.”

³⁸Yěsû pobə ɨ̀zùŋə̀ ndzùmə̀ ɨ̀pe lə̀ ghə̀ nkwuunə̀ amwuə àlaʼà àtse, mə̀ngyə̌ ɨ̀tse nɨ nɨ̀linə̀ ɨ̀tse lə̀ pənə Marətà a kẅiirə̀ e a ndâ ze.

³⁹Momaa e nɨ nɨ̀linə̀ ɨ̀tse lə̀ pənə Màriyà a pə pobə ze. Nkwùə̀ nɨ Yěsû à lə̀ tônə, Màriyà a tô nnwuunə̀ a mbyə̀ ze mmə nzhwiʼtə̀ ànwùə̀ nɨ à lə̀ mənə nshwəŋə̀ la.

⁴⁰Marətà à lə̀ pə nɨ ntòmnə̀ amwuə ze mbə̀ʼə ndwuumə̀ nɨ ǎ ghɨ̀rə̀ mɨ̀zɨghə̀ ambo pɨ̀ghɨ̀ɨnə̀ pa, ntyiʼə̀ nshwəŋə̀ ambo Yěsû lo “Ndòʼnə̀mbyə̂, wə̀ zəənə̀ lo momaa mə à waʼà mə̀ mɨ̀ŋə̀ nɨ mɨ̀ŋə̀ lo n̂fàʼà? Tiitə̀ e â tô nkẅiirə̀ mə̀.”

⁴¹Yěsû a shwəŋə̀ ambo ze lo, “Marətà! Marətà! Mɨ̀nwùə̀ mɨ̀noʼnə mə ntòmnə̀ o.

⁴²La taʼà àzwuumə̀ a kùʼnə̀ a nɨ pə ambo ghò. Màriyà a tsoʼò mə̀ a pàa ɨ̀shìʼnə̀ nɨ mbə̀ʼə ka ŋwùə̀ kẅiirə̀ e ambo ze.”