Read Pinyin Lukə̀ 11 Bible Online

Lukə̀ 11 - Pinyin bible

Lukə̀ 11

¹A lə̀ pə̀ njyə̂ ɨ̀tse, Yěsû a pə nchàʼtə̀ a Nẅùə̀ alyiʼə àtse. Nkwùə̀ nɨ à lə̀ myàanə̀nə, àzùŋə̀ ndzùmə̀ e yètse a shwəŋə̀ ambo ze lo, “Ndòʼnə̀mbyə̂, nèrə̀ a wəə tsaʼnə mbə̀ʼə pəə chàʼtə̀ Nẅùə̀ tyìʼə̀ tsaʼnə Jònə à lə̀ nèrə̀nə ɨ̀zùŋə̀ ndzùmə̀ ɨ̀pe la.”

²Yěsû a shwəŋə̀ ambo pobə lo, “Nɨ̀ pə nchàʼtə̀ a Nẅùə̀ nɨ̀ shwəŋə̀ lo, ‘Tǎ, ghɨ̀rə̀ pànə̀ tə nguʼtə̀ nɨ̀linə̀ ɨ̀tsô; ànwùə̀ Nɨ̀fò o â tô.

³Ŋâ mɨ̀zɨghə̀ myə̀ nɨ mɨ kùʼnə̀nə ambo pəə sìnə̀ wə̀ nɨ mɨ̀njyə̂ nɨ mɨ̌ tô.

⁴Nkɨ ndə̀ənə̀ ɨ̀fàntə̀ ɨ̀nwùə̀ ɨ̀pəə, ntiinə pəə kɨnə mmə ndə̀ənə̀ a pyə̀ nɨ pànə̀ pa nfàntə̀ ambo pəə la. Kò wə̀ pyiimə̀ pəə wɨ̀ghə̀ àkwàʼnə̀.’”

⁵A chi nshwəŋə̀ ambo pobə lo, “Mbə̀ʼə ŋwùə̀ wɨghə ɨ̀tse a ghə̀ ambo ɨ̀swùə e a ntɨ̀ŋnə̀ ɨ̀twuʼə̀, nshwəŋə̀ ambo ze lo, ‘Ɨ̀swùə mə̀, tsoʼkə̀ mə̀ nɨ ntsɨŋə̀ àpaanə̀ ɨtarə;

⁶mbəʼnə ɨ̀swùə mə̀ a furə̀nə a ndyə̌ sàa ntô a ndâ mɨ̀ŋə̀, la ka mbə mə̀ nɨ àzwuumə̀ yè zɨghə̀nə a nɨ ŋâ ambo ze.’

⁷“Ɨ̀swùə e wə̀ à tə mbəla nkẅùə̀ ambo ze lo, ‘Kò wə̀ kɨ ŋŋâ mə̀ nɨ ngəʼə̀, ǹgwùʼnə̀ mə ntswùə̀ ndâ mə̀, pəə pɨ ɨ̀poonə̀ ɨ̀pâ nwùunə̀ mə; mbə̀ʼə m̀bòŋə̀ lòo mə̀ a ɨ̀shyə̂ a nɨ ŋâ àzwuumə̀ ambo ghò apə̀.’

⁸Ǹshwəŋə̀ a wɨghə lo, à tə ka lòo e a nɨ ŋâ àzwuumə̀ ambo ze tsaʼa ɨ̀swùə e, la a làŋə̀ nɨ mbyə̀ nkɨ mbyiitə̀ e pyiitə̀nə, yi à pɨ lòo a ɨ̀shyə̂ ŋâ àzwuumə̀ àtsùmə̀ nɨ à tàʼnə.

⁹“Nɨ ndwuumə̀ wə̀ ǹshwəŋə̀ a wɨghə lo, nɨ̀ kɨ pyiitə̀ pyiitə̀nə, pɨ ghǎ ŋŋâ nɨ pɨghə; nɨ̀ kɨ tàʼà tàʼnə, nɨ̀ zəənə̀; nɨ̀ kɨ ntsòotə̀ tsòotə̀nə, pɨ̌ ẅùʼə̀ ŋŋâ nɨ pɨghə.

¹⁰Ntiinə ŋwùə̀ ntsùmə̀ nɨ à kɨnə mbyiitə̀ pyiitə̀nə, ǎ kẅiirə̀; ŋwùə̀ ntsùmə̀ nɨ à wa ntàʼà, ǎ zəənə̀. Ŋònə̀ nɨ à wa ntsòotə̀, pɨ̌ kɨ ẅùʼə̀ ŋŋâ nɨ ze.

¹¹A ẅèrə tǎ amwuə pɨghə nɨ mbə̀ʼə moonə̀ e a pyiitə̀ e nɨ ɨ̀swuə̀, a ka ŋâ e a ye nɨ ɨ̀swuə̀ ntyiʼə̀ ŋŋâ e pə nɨ ɨ̀nyoorə̀?

¹²Kə̀ a pyiitə̀ e nɨ nɨpwuumə nɨ ngubə̀ a tyiʼə̀ ŋŋâ e pə nɨ àngaamə ɨ̀shyə̂?

¹³Mbə̀ʼə pɨghə nɨ nɨ̀ pənə ngàŋə̀ ngɨ̀rə̀ ɨ̀nwùə̀ tɨ̀pòŋə̀ zhyə̂ a nɨ ŋâ ɨ̀pwuumə̀ pɨ̀shìʼnə̀ ambo ɨ̀poonə̀ pɨghə, tǎ ɨwɨghə a nɨ̀pwuurə̀ a tyiʼə̀ ka ŋâ e Àzhwùə̀ Nẅùə̀ ambo pànə̀ nɨ pɨ pyiitə̀nə e nɨ zèrə.”

¹⁴A lə̀ pə njyə̂ ɨ̀tse, Yěsû a fuukə̀ àzhyə̂ nɨ a lə̀ nàanə̀nə lo kò ŋwùə̀ shwəŋnə̀. Nkwùə̀ nɨ àzhyə̂ zə̀ a lə furə̀nə amwuə ŋònə̀ nɨ ka à lə̀ mə shwəŋə̀nə la, à lə̀ pìʼnə̀ a nɨ shwəŋnə̀. A lə̀ kə̀ʼnə̀ àpùŋə̀ pə̀ənə̀ nɨ pɨ lə̀ zəənə̀.

¹⁵La pobə pɨ̀tse shwəŋə̀ lo, “A fuukə̀ ɨ̀zhyə̂ pə̀ lə̀ nɨ ɨ̀tɨ̀ŋnə̀ Beelzebùbə̀ nɨ à pənə ɨ̀fò pɨ ɨ̀zhyə̂.”

¹⁶Pànə̀ pɨ̀tse lə̀ kwàʼnə̀ e mbyiitə̀ lo â nèrə̀ a ghobə nɨ àlènə̀ nɨ a furə̀nə a nɨ̀pwuurə̀.

¹⁷Yěsû à lə̀ zhyə̂ ɨ̀kwàŋə̀ ɨ̀pobə nshwəŋə̀ ambo pobə lo, “Àlaʼà za nɨ a ghàpə̀nə ndzòŋnə̀ pobə nɨ pobə la, a ghǎ pî. Ngẅàrə̀ za nɨ ɨ̀ kɨnə ka pə e ntswùə̀ moʼo la, ɨ̀ ghǎ pî.

¹⁸A tə mbə lo Satàanə̀ à kɨ ngàpə̀ ndzòŋnə̀ ɨ̀pɨ̀ŋmə̀ e, ànwùə̀ Nɨ̀fò e a tyiʼə̀ ntəəmə̀ lə ɨla ghu? Ngwə̀ nshwəŋə̀ lə ntiinə nɨ̀ shwəŋə̀nə lo ǹfuukə̀ ɨ̀zhyə̂ la nɨ ɨ̀tɨ̀ŋnə̀ Beelzebùbə̀.

¹⁹Ǹtə mə nfuukə̀ ɨ̀zhyə̂ pə̀ nɨ ɨ̀tɨ̀ŋnə̀ Beelzebùbə̀ yi ngàŋə àkwùə̀ nɨ̀yìinə̀ àzɨghə tyiʼə̀ fuukə̀ lə nɨ ɨ̀tɨ̀ŋnə̀ ɨ̀wə̌? A pə a lenə, yi pobə ghǎ nèrə̀ lo nɨ̀ wɨ̀ghə̀ ɨ̀sàʼa.

²⁰La, ǹtə mə nfuukə̀ ɨ̀zhyə̂ pə̀ lə nɨ ɨ̀tɨ̀ŋnə̀ Nẅùə̀, yi a nèrə̀ lo ànwùə̀ Nɨ̀fò Nẅùə̀ a tô mə ambo pɨghə.

²¹“Nkwùə̀ nɨ ngàŋə̀ mɨ̀tɨ̀ŋnə̀ à twuʼtə̀nə ɨ̀pwuumə̀ ntsòo ɨ̀pe mə mbyabə̀ ɨmwuə alyiʼə e, ɨ̀pwuumə̀ ɨ̀pe pə ɨ̀shìʼnə̀.

²²La ŋònə̀ nɨ à tɨ̀ŋnə̀nə ntsàarə̀ e à tə tô yi ǎ zòŋnə̀ tsàarə̀ e kẅiirə̀ ɨ̀pwuumə̀ ntsòo pa ɨ̀tsùmə̀ nɨ à lə̀ mənə ndòo mbyabə̀ mbɨ̀ŋmə̀ e ghu la, nkẅiirə̀ ɨ̀pwuumə̀ ŋònə̀ ntɨ̀ŋnə̀ wa ɨ̀tsùmə̀ ngàpə̀.

²³“Ŋònə̀ nɨ ka à zùŋə̀ e ndzùmə̀ mə̀, à zùŋə̀ la ndzùmə̀ ngàŋə̀ kɨpaanə mə̀. Ŋònə̀ nɨ ka à kɨ ngyèmpə̀ e a gha a nɨ shwatə̀, à shàʼtə̀ la shàʼtə̀nə.

²⁴“Nkwùə̀ nɨ àzhwùə̀ tɨ̀pòŋə̀ a furə̀nə amwuə ŋònə̀ la, a za nkarə̀ ɨlyiʼə pɨ zopə̀ ntàʼà alyiʼə nɨ mbə̀ʼə a zhwùutə̀ ghu. A ka zəənə̀ e a shwəŋə̀ ambo àtwuə̀ ɨ̀pɨ̀ŋmə̀ e lo, ‘Mbɨ kẅirə̀ lèrə̀ amwuə ndâ gha nɨ ǹtənə nfurə̀ amwuə la.’

²⁵Lenəla a kwə̂ ndzəənə̀ lo pɨ zə̀ə mə ndâ za ɨ̀ laanə̀ nkùʼnə̀.

²⁶Tsaʼnə a zəənə̀nə a lenə la, a lèrə̀ tyìʼə̀ nkwùə̀ nkẅirə̀ ntô nɨ ɨ̀zhyə̂ sàmbaa nɨ pɨ̂nə ntsàarə̀ e, nkẅìʼnə̀ e ghu, pobə pɨ pobə kwuunə̀ ntyiʼə̀ mmə nchyə̂ amwuə ŋònə̀ ghu. Lenəla, ŋònə̀ ẅèrə wə̀ ǎ lẅùutə̀ pɨ̂ tsàarə̀ tsaʼnə à lə̀ pyə̀nə mbə.”

²⁷Tsaʼnə Yěsû à lə̀ myàanə̀nə a nɨ shwəŋə̀ mɨ̀nwùə̀ mə la, mə̀ngyə̌ ɨ̀tse amwuə àpùŋə̀ pə̀ənə̀ za a shwəŋə̀ lo, “Mborə̀ ɨ̀ chyə̂ ambo mə̀ngyə̌ wa nɨ à lə̀ pyə̂nə nkɨ nnyoŋə̀ o la.”

²⁸La Yěsû a kẅùə̀ lo, “Mborə̀ ɨ̀ chyə̂ pə ambo pànə̀ pa nɨ pɨ zuʼnə àshwəŋnə̀ Nẅùə̀ kɨ nnùŋə̀!”

²⁹Nkwùə̀ nɨ ɨ̀pùŋə̀ pə̀ənə̀ pa lə̀ pìʼnə̀nə a nɨ noʼò la, Yěsû a shwəŋə̀ lo, “Ɨ̀waanə̀ pànə̀ pɨ tɨ̀tsòŋə̀ a ɨ̀waanə̀ tɨ̀pòŋə̀, pobə tàʼà a nɨ zəənə̀ àlènə̀, la ka mbə nèrə̀ mə̀ àlènə̀ àtse ambo pobə ndàŋə̀ e àlènə̀ Jonà;

³⁰ntiinə ndwuumə̀ nɨ Jonà à lə̀ pənə àlènə̀ ambo pànə̀ pɨ Ninivè la, a ndəŋə ndəŋə amwuə ndwuumə̀ nɨ Moonə̀ Ŋwùə̀ ǎ pə àlènə̀ ambo ɨ̀waanə̀ pànə̀ pɨ tɨ̀tsòŋə̀ wə̀.

³¹A ghǎ pə njyə̂ ntsoʼtə̀ ɨ̀sàʼa Nẅùə̀ la, mǎ ɨ̀fò nɨ à furə̀nə a mɨ̀tùŋə, â pə̀ʼkə̀ pobə pɨ ɨ̀waanə̀ pànə̀ pɨ tɨ̀tsòŋə̀ chyâ ɨ̀sàʼa aŋunə pobə. Ntiinə à lə̀ furə̀ a ndẅùutə àtwuə̀ ɨ̀shyə̂ ntô a nɨ zhwiʼtə̀ àshwəŋnə̀ àzhìʼtə̀ ɨ̀fò Solomònə̀; Nɨ̀ naŋə̀! Ŋònə̀ nɨ à tsàarə̀nə a ɨ̀fò Solomònə̀ à wə̀ a nɨ̀ghə̂ a tɨ̀tɨ̀rə̀ pɨghə.

³²Pànə̀ pɨ Ninivè ghǎ pə̀ʼkə̀ njyə̂ ntsoʼtə̀ ɨ̀sàʼa chyâ ɨ̀sàʼa aŋunə pobə; ntiinə pànə̀ pɨ Ninivè lə̀ pə̀ŋə̀ mɨ̀ntɨŋmə̀ ɨ̀mobə nkwùə̀ nɨ Jonà à lə̀ chwìitə̀nə ntwuumə̀ Nẅùə̀ ambo pobə la. La nɨ̀ zəənə̀! Ŋònə̀ nɨ à tsàarə̀nə a Jonà à wə̀ a ɨ̀shyə̂ nɨ̀ghə̂. La ka nɨ̀ mə mbə̀ŋə̀ a wɨghə mɨ̀ntɨŋmə̀ ɨ̀mɨghə.”

³³Yěsû à lə̀ chi nshwəŋə̀ lo, “Ka ŋònə̀ nɨ mbə̀ʼə a tswuʼə̀ nkàʼà ndòo nɨ̀kwùʼə̀ nkumnə̀ ghu, kə̀ ntsàa a nkɨ̀kwùunə. Ŋwùə̀ à wa ntswuʼə̀ nkàʼà ntə̂ pə alyiʼə ŋaŋnə̀nə mbə̀ʼə ŋwùə̀ a kwuunə̀ a ndâ a zəənə̀ ẅèrə.

³⁴Ɨ̀myə̂ ɨ̀mô chyə̂ mbə la tsaʼa nkàʼà ambo mbɨ̀ŋmə̀ o. Ɨ̀myə̂ ɨ̀mô tə mbə ɨ̀shìʼnə̀ yi mbɨ̀ŋmə̀ o ɨ̀ chyə̂ nɨ nkàʼà. La mɨ tə ka pə e ɨ̀shìʼnə̀ yi mbɨ̀ŋmə̀ o ntsùmə̀ ɨ̀ chyə̂ amwuə ndzùmə.

³⁵Njiilo, nɨ̀ zhìʼtə̀ mbə̀ʼə nkàʼà nɨ ɨ̀ pənə amwuə pɨghə ɨ̀ tyiʼə̀ ndzùmə.

³⁶Mbɨ̀ŋmə̀ o ntsùmə̀ ɨ̀ tə ndẅenə̀ nɨ nkàʼà ka pə e nɨ àpàbə ndzùmə, yi ɨ̌ tsùŋə̀ kyàʼà tsaʼa nkàʼà ɨ wa ntsìinə̀ nkyàʼà a wɨghə la.”

³⁷Tsaʼnə Yěsû a lə̀ mənə shwəŋnə̀ la, taʼà ŋwùə̀ Farìsî fuŋə̀ e lo â tô pobə ze ndzɨghə̀ a ndâ ze. Lenəla a kwuunə̀ a ndâ nwuunə̀ a nɨ zɨghə̀.

³⁸A lə̀ tsàarə̀ ŋwùə̀ Farìsî wə̀ amwuə ndwuumə̀ nɨ a lə̀ zəənə̀ Yěsû a zɨghə̀ tə sùu mbô.

³⁹Ndòʼnə̀mbyə̂ a shwəŋə̀ ambo ze lo, “Pɨghə pɨ̀Farìsî, nɨ sùu mɨ̀ndoŋə̀ pobə ɨ̀kaŋə̀ tyìʼə̀ a ndzùmə̀ ɨsɨghə la mɨmwuə ɨ̀mɨghə lẅenə̀ nɨ àghə̀ʼnə̀ pobə ntɨŋmə̀ ghù shyə.

⁴⁰Ɨ̀puukə̀ pə̀ənə̀! Ka nɨ̀ zhyə̂ wɨghə lo ŋònə̀ nɨ à lə̀ tsùŋə̀nə ndzùmə̀ ɨsɨghə la ŋònə̀ nɨ à lə̀ kɨnə ntsùŋə̀ ɨmwuə ɨmwuə?

⁴¹La tyiʼə̀ ŋŋâ ɨ̀pwuumə̀ nɨ pənə amwuə ɨmwuə pɨ̀tɨtoʼo pobə ɨ̀kaŋə̀ ɨ̀pɨghə ambo ngàŋə àfumə̀. Zəənə̀, nɨ̀ tə ghɨ̀rə̀ a lenə, mbə̀ʼə ɨ̀pwuumə̀ ɨ̀tsùmə̀ laanə̀ ambo pɨghə.

⁴²“La ngəʼə̀ noʼnə aŋunə pɨghə mbǎ pɨ̀Farìsî! Ntiinə nɨ̀ lòonə ɨ̀pwuumə̀ àzhyǎ nɨ furə̀nə amwuə mɨ̀swùumə ɨ̀mɨghə ngàbə̀ ɨlyiʼə nɨ̀ghumə̀ ŋŋâ taʼà pàa ambo Nẅùə̀, la ka pə ghɨ̀rə̀ a wɨghə ànwùə̀ nɨ a təəmə̀nə, ka kɨ pə kòŋə̀ a wɨghə Nẅùə̀. A pòŋə̀ lo nɨ̀ ghɨ̀rə̀ ɨ̀nwùə̀ pèrə pə ɨ̀tsùmə̀ tɨ waʼà yètse.

⁴³“Ngəʼə̀ noʼnə ɨ̀ chyə̂ aŋunə pɨghə mbǎ pɨ̀Farìsî! Ntiinə nɨ̀ kòŋə̀nə a nɨ nwuunə̀ aŋunə ɨləŋə pɨ̀shìʼnə̀ amwuə mɨ̀ndâ mɨ àshwatə̀ ɨ̀mɨghə, mmə nkòŋə̀ lo pànə̀ tô nchàʼtə̀ a wɨghə amwuə pɨ mɨ̀tàanə.

⁴⁴“Ngəʼə̀ noʼnə ɨ̀ chyə̂ aŋunə pɨghə! Ntiinə mɨ̀ntɨŋmə̀ ɨ̀mɨghə mə tsaʼa mɨ̀shyə̀ nɨ ka ɨ̀lènə̀ pə e aŋunə, pànə̀ tyiʼə̀ mə ngyìinə̀ aŋunə ka mə zhyə̂ ghobə.”

⁴⁵Taʼà ŋwùə̀ a tɨ̀tɨ̀rə̀ pɨ̀nèrə̀ mbòomə pa a kẅùə̀ ambo Yěsû lo, “Ɨ̀nèrə̀ ɨ̀nwùə̀, wə̀ shwəŋə̀ lə la nkɨ ndzòomə̀ a wəə la zòomə̀nə.”

⁴⁶Yěsû chi shwəŋə̀ lo, “Ngəʼə̀ noʼnə ambo pɨghə mbǎ pɨ̀nèrə̀ mbòomə! Ntiinə nɨ ŋânə ɨ̀pìʼì ambo pə̀ənə̀ nɨ tsàarə̀nə a ghobə la, mbə pyə̀nə mbə̀ʼə nɨ laʼa ngyèmpə̀ wɨghə a ghobə lo pobə pìʼì apə̀.

⁴⁷Ngəʼə̀ noʼnə ɨ̀ chyə̂ àtwuə̀ pɨghə! Ntiinə nɨ̀ poomə̀ mɨ̀shyə̀ mɨ ngàŋə ntwuumə̀ Nẅùə̀ pyə̀ nɨ pɨ̀tǎ ɨ̀pɨghə lə̀ zhwuutə̀nə.

⁴⁸Lenəla nɨ̀ lə̀ pyiimə̀ nkɨ tompə̀ ngɨ̀rə̀ mɨ̀nwùə̀ pɨ̀tǎ pɨ̀tǎ ɨ̀pɨghə, ntiinə pobə lə̀ zhwuutə̀nə a ghobə, nɨ̀ kɨ mboomə̀ mɨ̀shyə̀ ɨ̀mobə.

⁴⁹Tsaʼnə a pənə lə la, Àzhìʼtə̀ Nẅùə̀ a lə̀ shwəŋə̀ lo, ‘Mbɨ tsàa ngàŋə ntwuumə̀ ɨ̀zâ pobə ngàŋə ntwuumə̀ Yěsû pyə̀ nɨ pobə pɨ zhwuutə̀ a pɨ̀tse nkɨ nnyàŋə̀ a pɨ̀tse.’

⁵⁰Mbə̀ʼə àləəmə̀ ngàŋə ntwuumə̀ Nẅùə̀ zə̀ nɨ pɨ lə̀ kẅìrə̀nə a nɨ̀pìʼnə̀nə tsaʼnə pɨ lə̀ tsùŋə̀nə àtwuə̀ ɨ̀shyə̂ a lèrə̀ àtwuə̀ ɨ̀waanə̀ pànə̀ pɨ tɨ̀tsòŋə̀ wə̀,

⁵¹a nɨ pìʼnə̀ aŋunə àləəmə̀ Abèlə̀ ngə̀ mbyàa aŋunə àləəmə̀ Tsàkàriyà ẅùə̀ nɨ pɨ lə̀ zhwuutə̀nə a tɨ̀tɨ̀rə̀ alyiʼə mɨ̀shwàʼà Nẅùə̀ pobə alyiʼə yè laanə̀nə amwuə Ndâ Mɨ̀shwàʼà Nẅùə̀. Ngwə̀ nshwəŋə̀ a wɨghə lo pɨ ghǎ pyiitə̀ àləəmə̀ àzobə la ambo ɨ̀waanə̀ pànə̀ pɨ tɨ̀tsòŋə̀.

⁵²“Ngəʼə̀ noʼnə ɨ̀ chyə̂ aŋunə pɨghə mbǎ pɨ̀nèrə̀ mbòomə, ntiinə nɨ̀ kẅiirə̀nə àkòo ndâ àzhyə̂ ànwùə̀, ntwuunə̀ a wɨghə a nɨ kwuunə̀ amwuə, nkɨ mə nàanə̀ pànə̀ nɨ pɨ tàʼnə a nɨ kwuunə̀ lo kò pobə kwuunə̀.”

⁵³Nkwùə̀ nɨ Yěsû à lə̀ mənə mmyàʼtə̀ a ghobə la, pɨ̀nèrə̀ mbòomə pobə pɨ̀Farìsî lə̀ pìʼnə̀ a nɨ twuunə̀ ɨ̀nwùə̀ nɨ Yěsû à lə̀ shwəŋə̀nə la tyìʼə̀ nɨ ɨ̀tɨ̀ŋnə̀ nkɨ mbyiitə̀ ɨ̀pyiitə̀ pɨ tobə̀nə e pɨ̀noʼnə,

⁵⁴mbə̀ʼə a shwəŋə̀ ànwùə̀ tɨ̀pòŋə̀ pɨ kô e.