Read Pinyin Lukə̀ 12 Bible Online

Lukə̀ 12 - Pinyin bible

Lukə̀ 12

¹Tyìʼə̀ nkwùə̀ ghu, àpùŋə̀ pə̀ənə̀ mɨ̀nkaamə̀ a lə̀ tô nshwatə̀, pɨ̀tse tyiʼə̀ mmə ntinə̀ nnyə̀nkə̀ pɨ̀tse ndàŋə̀. Yěsû a pə̀ŋə̀ ndzàamə̀ mbìʼnə̀ a nɨ kwàtə̀ ɨ̀zùŋə̀ ndzùmə̀ ɨ̀pe, nshwəŋə̀ lo, “Nɨ̀ zhìʼtə̀ a wɨghə nɨ mbyə̌ àpaanə̀ pɨ̀Farìsî, zhyə̀ nɨ ɨ̀ pənə àpə̀grə̀ la.

²Ka àzwuumə̀ àtse nɨ a pənə yè kumnə̀nə nɨ ka pɨ̀ pə ghǎ nyaʼkə̀ e, kə̀ zhyə̀ nɨ a pənə yè lə̀əmə̀nə nɨ ka à pə ghǎ furə̀ e a sàŋə̀.

³Lenəla ɨ̀nwùə̀ ɨ̀tsùmə̀ nɨ nɨ̀ wa nshwəŋə̀ nɨ ɨ̀twuʼə̀ pɨ̌ zuʼù nɨ njyə̂, ɨ̀nwùə̀ ɨ̀tsùmə̀ nɨ nɨ̀ kɨnə mmə nchùmpə̀ a nɨ̀lə̀əmə̀ la, pɨ̌ tyiʼə̀ təəmə̀ la a mɨ̀kẅùə̀ mɨ ndâ shwəŋə̀ a pèrə.”

⁴“Pɨ̀swùə ɨ̀pâ, nɨ̀ zhwiʼtə̀! Kò nɨ kɨ mbô a wɨghə pə pànə̀ nɨ mbə̀ʼə pobə zhwuutə̀ pə ndàʼà mbòbə̀ mbɨ̀ŋmə̀ ka pə chi ghɨ̀rə̀ a ghobə a yètse ànwùə̀.

⁵La mbɨ nèrə̀ a wɨghə nɨ ŋònə̀ nɨ mbə̀ʼə nɨ̀ pô la: Nɨ̀ pô a ŋònə̀ ẅùə̀ nɨ mbə̀ʼə a zhwuutə̀ mbòbə̀ mbɨ̀ŋmə̀ nkɨ mbə nɨ ɨ̀tɨ̀ŋnə̀ a nɨ màʼà a wɨghə amwuə àkɨɨnə̀ ɨ̀mǔ; nshwəŋə̀ ambo pɨghə lo, nɨ̀ pô e.

⁶Wə̀ zhyə̂ lo pɨ shwùunə̀ ɨ̀kɨ̀zɨnkə ɨtaanə̀ la nɨ pɨ̀kapà pɨpaa? La ka Nẅùə̀ a lə̀ənə̀ e tyìʼə̀ taʼà akɨzɨnkə ẅèrə wə̀ ɨ̀tse.

⁷Nɨ̀ zəənə̀, Nẅùə̀ à zhyə̂ ndùnə̀ ɨ̀nyùŋə̀ nɨ ɨ̀ pənə àtwuə̀ pɨghə tyìʼə̀ ntsùmə̀. Kò nɨ pô, nɨ̀ tsə̂ ntsàarə̀ ɨ̀kɨ̀zɨnkə pɨ̀noʼnə.”

⁸“Ǹshwəŋə̀ ambo pɨghə lo, Ŋònə̀ nɨ ǎ pyiimə̀ mə̀ a sàŋə̀ sàŋə̀ la, Moonə̀ Ŋwùə̀ à ghǎ kɨ pyiimə̀ e a mbyə̀ pəngèrə̀ pɨ Nẅùə̀.

⁹La ŋònə̀ nɨ a twuunə̀nə mə̀ a sàŋə̀ sàŋə̀ la, Moonə̀ Ŋwùə̀ à ghǎ kɨ twuunə̀ e a mbyə̀ pəngèrə̀ pɨ Nẅùə̀.

¹⁰“Ŋwùə̀ ntsùmə̀ wa nɨ à shwəŋə̀nə ànwùə̀ tɨ̀pòŋə̀ mbə̀ʼə Moonə̀ Ŋwùə̀ la, pɨ ghǎ lə̀ənə̀ ɨ̀fàntə̀ ɨ̀nwùə̀ ɨ̀pe; la ŋònə̀ wa nɨ à wa nshwəŋə̀ a tɨ̀pòŋə̀ mbə̀ʼə Àzhwùə̀ Nẅùə̀ la ka pɨ̀ pə ghǎ lə̀ənə̀ e ɨ̀fàntə̀ ɨ̀nwùə̀ ɨ̀pe.

¹¹“Nkwùə̀ nɨ pɨ̌ lòo a wɨghə tô a ndâ àshwatə̀ pɨ̀Jew a mbyə̂ pɨ̀saʼà pɨ àlaʼà pobə pɨ̀tǎ pɨ àlaʼà, kò nɨ̀ kɨ nkwàŋə̀ a wɨghə ànwùə̀ nɨ nɨ̌ shwəŋə̀ kə̀ ndwuumə̀ nɨ nɨ̌ kẅùə̀ a nɨ fuukə̀ mbɨ̀ŋmə̀ ɨ̀zɨghə amwuə ɨ̀sàʼa;

¹²ntiinə Àzhwùə̀ Nẅùə̀ ǎ nèrə̀ a wɨghə nɨ ànwùə̀ nɨ nɨ̌ shwəŋə̀ nkwùə̀ ghu.”

¹³Yɨ̀tse ŋwùə̀ amwuə àpùŋə̀ pə̀ənə̀ za a shwəŋə̀ ambo Yěsû lo, “Ɨ̀nèrə̀ ɨ̀nwùə̀, shwəŋə̀ ambo momaa mə̀ lo â ghàbə̀ ɨ̀pwuumə̀ pa nɨ tǎ à lə̀ myàʼtə̀nə la ŋŋâ ɨ̀pâ.”

¹⁴Yěsû a kẅùə̀ ambo ze lo, “Ngɨ̀ɨnə̀ mə̀, a gha tsaʼa ɨ̀sàʼa mɨ̀sàʼa kə̀ ɨ̀ngàbə̀ ɨ̀pwuumə̀ a tɨ̀tɨ̀rə̀ pɨghə la à tsoʼò ɨ̀wə̌?”

¹⁵Yěsû a làŋə̀ nɨ mbyə̀ nshwəŋə̀ ambo pobə lo, “Nɨ̀ zhìʼtə̀ a wɨghə a nɨ pə nɨ ntoŋə aŋunə àzwuumə̀ àtse; ntiinə nɨ̀chyə̂mbyə̂ ŋwùə̀ ka a pə e la ɨ̀pwuumə̀ pɨ noʼnə nɨ à pənə pèrə.”

¹⁶A chi ndàŋə̀ nɨ mbyə̀ nshwəŋə̀ àshwəŋnə̀ nàanə nàanə ambo pobə lo, “Ɨ̀swùumə ngàŋə̀ nkabə̀ ɨ̀tse ɨ lə̀ mə ŋŋâ mɨ̀zɨghə̀ tyìʼə̀ mɨ̀noʼnə.

¹⁷À lə̀ lòo àkwàŋə̀, mbyiitə̀ ambo mbɨ̀ŋmə̀ e lo, ‘Mbɨ ghɨ̀rə̀ lə ɨla tsaʼnə ka mbə mə̀ nɨ alyiʼə nɨ mbə̀ʼə ǹfùʼù mɨ̀zɨghə̀ ɨ̀mâ nnùŋə̀ ghu lə?’

¹⁸À lə̀ tyiʼə̀ nshwəŋə̀ ambo mbɨ̀ŋmə̀ e lo, ‘Ǹzhyə̀ ànwùə̀ nɨ mbɨ ghɨ̀rə̀; mbɨ shàʼtə̀ mɨntaŋə ɨ̀mâ tyìʼə̀ mɨ̀tsùmə̀ kẅirə̀ korə̀ a mɨ̀ẅùunə, myə̀ nɨ mbə̀ʼə mɨ lòo mɨ̀zɨghə̀ pobə ɨ̀pwuumə̀ ɨ̀pâ ɨ̀tsùmə̀.

¹⁹Lenəla, mbɨ tyiʼə̀ shwəŋə̀ ambo mbɨ̀ŋmə̀ mə̀ lo, “Wə̀ nùŋə̀ ɨ̀pwuumə̀ pɨ̀shìʼnə̀ ɨ̀tsùmə̀ pyə̀ nɨ mbə̀ʼə wə̀ zɨghə̀ aŋunə mɨnguʼu mɨ̀noʼnə. Kò wə̀ chi ntsòo o mbɨ̀ŋmə̀ o, nwuunə̀ o ntə ndzɨghə̀, nnô, nkɨ ntèrə̀ o.”’”

²⁰“La Nẅùə̀ a shwəŋə̀ ambo ze lo, ‘Àpuukə̀ ŋònə̀ wə̀! Mbɨ fuŋə̀ ntɨŋmə̀ o nɨ ɨ̀twuʼə̀ sìnə̀ wə̀, zəənə̀ lo ɨ̀pwuumə̀ pa nɨ wə̀ fùʼnə nshwatə̀ la tyiʼə̀ pə pɨ ɨ̀wə̌ lo?’”

²¹Yěsû a tyiʼə̀ ndẅùutə̀ nshwəŋə̀ lo, “Lə̌ tsaʼnə a ghǎ pə ambo ŋònə̀ nɨ à wa nshwatə̀ ɨ̀pwuumə̀ nnùŋə̀ ambo mbɨ̀ŋmə̀ e ndàʼà, la ka pə e nɨ ɨ̀pwuumə̀ amwuə ndwuumə̀ nɨ Nẅùə̀ à tàʼnə.”

²²Yěsû a tyiʼə̀ nshwəŋə̀ ambo ɨ̀zùŋə̀ ndzùmə̀ ɨ̀pe lo, “Nɨ ndwuumə̀ wə̀ ǹshwəŋə̀ ambo pɨghə lo, kò nɨ kɨ nkwàŋə̀ mbə̀ʼə nɨ̀chyə̂mbyə̂ ɨwɨghə lo nɨ̌ zɨghə̀ àkə? Kə̀ lo nɨ̌ ẅî àkə?

²³Nɨ̀chyə̂mbyə̂ à tsàarə̀ mɨ̀zɨghə̀, mbɨ̀ŋmə̀ o ɨ̀ kɨ ntsàarə̀ ɨtsəʼə.

²⁴Nɨ̀ naŋə̀! Ka pɨ̀məsaŋə pyə̀ a ghobə ka kɨ mə fùʼù a ghobə mɨ̀zɨghə̀, ka kɨ pə ghobə nɨ mɨntaŋə, kə̀ mɨkaŋə, la Nẅùə̀ a mə ndzə̂ a ghobə. Ka nɨ̀ tsàarə̀ a wɨghə pɨ̀məsaŋə panə?

²⁵Mbə̀ʼə ŋwùə̀ wɨghə ɨ̀tse a kẅìʼnə̀ a mətùmə nkwùə̀ aŋunə nɨ̀chyə̂mbyə̂ e ntiinə à wə̀ nkwàŋə̀ mbə̀ʼə ẅèrə?

²⁶Nɨ ndwuumə̀ wə̀, nɨ̀ tɨ ka zhyə̂ a wɨghə a nɨ kẅìʼnə̀ tyìʼə̀ a mɨlyiʼə àzwuumə̀ tsaʼa zèrə̀ zə̀, nɨ̀ tyiʼə̀ ntòmnə̀ mbɨ̀ŋmə̀ ɨ̀zɨghə mbə̀ʼə pɨ̀tse ɨ̀pwuumə̀ la ntii àkə?

²⁷“Nɨ̀ naŋə̀ pɨ̀tǒŋtǒŋə a mɨpaʼa ndzəənə̀ ndwuumə̀ nɨ pèrə pa nkẅuə̀. Ka pèrə mə nfàʼà a ghobə ka kɨ mə tsùŋə̀ a ghobə ɨtsəʼə. La ǹshwəŋə̀ a wɨghə lo, tyìʼə̀ ɨ̀fò Solomònə̀ nɨ ɨ̀pwuumə̀ ɨ̀pe ɨ̀tsùmə̀ ka a lə̀ ẅî e atsəʼə yè ɨ̀shìʼnə̀ tsaʼa pɨ̀tǒŋtǒŋə pèrə pə.

²⁸La Nẅùə̀ à tə mbəla mmə ngẅî ɨtsəʼə aŋunə nɨ̀yìinə nɨ à wa nkoʼò aŋunə pɨ̀kòŋə̀ sìnə̀, nɨ à ghǎ kɨ pə a ngẅùʼə pɨ̀ tòonə̀ amwuə ɨ̀mǔ, ka nɨ̀ kwàŋə̀ a wɨghə lo, mbə̀ʼə a ẅî ɨtsəʼə aŋunə pɨghə ntsàarə̀? Àpyiimə̀ ntɨŋmə̀ àzɨghə a kɨ̂ mbǎ.

²⁹“Tsaʼnə a pənə lə, kò nɨ̀ kɨ ntòmnə̀ mɨ̀ntɨŋmə̀ ɨ̀mɨghə lo nɨ̌ zɨghə̀ àkə, kɨ nô àkə. Kò mɨ̀ntɨŋmə̀ ɨ̀mɨghə kɨ ntòmnə̀ aŋunə mbuurə̀ mɨ̀nwùə̀ zə̀.

³⁰Mbəʼnə pɨ̀tɨ̀zhyə̂ a Nẅùə̀ amwuə àtwuə̀ ɨ̀shyə̂ ghə̀ tàʼà la mbuurə̀ ànwùə̀ zèrə̀ zə̀, la Tǎ ɨwɨghə a nɨ̀pwuurə̀ a zhyə̂ mə lo nɨ wa ntàʼà ɨ̀pwuumə̀ pèrə pə̀.

³¹La nɨ̀ tyiʼə̀ ntàʼà pə ànwùə̀ Nɨ̀fò Nẅùə̀ â tyiʼə̀ ŋŋâ ɨ̀pwuumə̀ pèrə pə ambo pɨghə.

³²“Kò nɨ kɨ mbô mbǎ ɨ̀poonə̀ ɨ̀pâ. Ntiinə, Tǎ ɨwɨghə à wə̀ nɨ nɨ̀ghaʼà a nɨ ŋâ ànwùə̀ Nɨ̀fò nɨ̀pwuurə̀ ambo pɨghə.

³³Nɨ̀ tyiʼə̀ nshwùunə̀ ɨ̀pwuumə̀ ɨ̀pɨghə ŋŋâ nkabə̀ ambo ngàŋə àfumə̀, mbə nɨ pɨ̀məpàamə̀ pɨ nkabə̀ nɨ ka pɨ sìitə̀ e, nnùŋə̀ nkabə̀ a nɨ̀pwuurə̀ alyiʼə nɨ ka nkabə̀ ɨ̀ mə mmyə̀ e, ka ɨ̀ndzə̀ərə̀ a kɨ mmə mbyàa e ghu, ka nkɨ̀pyìinə ɨ kɨ mmə ntsə̀ŋə̀ e a zèrə.

³⁴Mbə̀ʼnə alyiʼə nɨ nkabə̀ o ɨ̀ pənə ghu, la alyiʼə nɨ ntɨŋmə̀ o ɨ kɨnə mbə ghu.

³⁵“Nɨ̀ korə̀ mɨ̀kòbə̀ ɨ̀mɨghə ntswuʼə̀ pɨ̀làamə̀ ɨ̀pɨghə a nɨ fàʼà,

³⁶mbə tsaʼa ngàŋə àfàʼà zhyə̀ nɨ zə mbyabə̀ a masàa ɨghobə nɨ à wə̀ nkwə̂ a alyiʼə nɨ̀zoʼò. Nkwùə̀ nɨ à kwə̂nə mbuʼtə̀ ntswùə̀ ndâ, pobə̌ faʼa ẅùʼə̀ â kwuunə̀.

³⁷Mborə̀ ɨ̀ chyə̂ ambo ngàŋə àfàʼà za zhyə̀ nɨ masàa ɨghobə à kwə̂nə ntsirə̀ a ghobə pobə pirə̀ a nɨ̀lyìinə̀; ǹshwəŋə̀ tyìʼə̀ nkǔŋə nkuŋə ambo pɨghə lo masàa ɨghobə wa à pɨ kẅebə̀ atsəʼə e ẅî a zhyə̀ nɨ mbə̀ʼə a ŋâ mɨ̀zɨghə̀ ambo pə̀ənə̀ ghɨ̀rə̀ pobə nwuunə̀ àtwuə̀ tepèrə̀ â tô ŋŋâ mɨ̀zɨghə̀ ambo pobə.

³⁸Ǎ pə ànwùə̀ nɨ̀ghaʼà ambo ngàŋə àfàʼà za, mbə̀ʼə a mə nkwə̂ a ntɨ̀ŋnə̀ ɨ̀twuʼə̀ kə̀ a nkòʼò njyə̂ ntsirə̀ a ghobə a nɨ̀lyìinə̀.

³⁹La, nɨ̀ zhyə̂ lo, ngàŋə̀ ndâ a tə mbəla nzhyə̂ nkwùə̀ nɨ ɨ̀ndzə̀ərə̀ ǎ tô yi mbə̀ʼə a myàʼtə̀ e lo pɨ pəʼə̀ ndâ e apə̀.

⁴⁰Nɨ̀ kɨ mmə ndyə̂ a nɨ̀lyìinə̀, ntiinə Moonə̀ Ŋwùə̀ à ghǎ tô la amwuə nkwùə̀ nɨ ka nɨ̀ kwàŋə̀ a wɨghə lo ǎ tô.”

⁴¹Pità a pyiitə̀ ambo Yěsû lo, “Ndòʼnə̀mbyə̂ wə̀ shwəŋə̀ àshwəŋnə̀ nàanə nàanə zə̀ ambo pəə kə̀ ambo pànə̀ pɨ̀tsùmə̀?”

⁴²Ndòʼnə̀mbyə̂ a kẅùə̀ ambo ze lo, “A ɨ̀wə̌ nɨ à pənə ngàŋə̀ àfàʼà wa nɨ à wa ndzuʼnə̀ nkɨ mbə nɨ àzhìʼtə̀? A ẅùə̀ wa nɨ masàa e à ŋânə pə̀ənə̀ ɨ̀pe lo â twuʼtə̀, a twuʼtə̀ nkɨ ŋŋâ a ghobə nɨ mɨ̀zɨghə̀ amwuə ngotə nkwùə̀ mɨ̀zɨghə̀?

⁴³Ǎ pòŋə̀ ambo ngàŋə̀ àfàʼà ẅèrə wə̀ mbə̀ʼə masàa e a kwə̂ ntsirə̀ e, ndzəənə̀ lo à wə̀ nfàʼà àfàʼà zèrə zə̀.

⁴⁴Ǹshwəŋə̀ tyìʼə̀ nkǔŋə nkuŋə ambo pɨghə lo, à ghǎ nùŋə̀ a ngàŋə̀ àfàʼà ẅèrə wa lo â tyiʼə̀ mmə nnaŋə̀ ɨ̀pwuumə̀ ɨ̀pe ɨ̀tsùmə̀.

⁴⁵La mbə̀ʼə ngàŋə̀ àfàʼà wa à tə nshwəŋə̀ ambo mbɨ̀ŋmə̀ e lo, ‘Masàa ɨwəə à wə̀ ndyàrə̀ a nɨ kwə̂,’ ntyiʼə̀ mmə nkəʼə̀ a zhyə̀ ngàŋə àfàʼà yɨ̀ mbyàŋnə̀ pobə pə̀ngyə̌ ntyiʼə̀ mmə ndzɨghə̀, nnô nkɨ mbaarə̀ e,

⁴⁶yi masàa ɨghobə wa ǎ kwə̂ amwuə nkwùə̀ za nɨ ka à pyə̀ mmə nkwàŋə̀ e lo mbə̀ʼə a kwə̂. A pə la ntô yi à pɨ tsɨ̀nkə̀ ngəʼə̀ àtwuə̀ ze ghɨ̀rə̀ a kɨ ndzuʼù ngəʼə̀ nɨ ngàŋə àtɨ̀ŋnə̀ àtwuə̀ za ndzuʼù a zèrə.

⁴⁷“Ngàŋə̀ àfàʼà wa ẅùə̀ nɨ à zhyə̂nə ànwùə̀ nɨ masàa e à tàʼnə lo â ghɨ̀rə̀ la ka mə ghɨ̀rə̀ e a zèrə, pɨ ghǎ kəʼə̀ e tyìʼə̀ ɨ̀shìʼnə̀.

⁴⁸La ngàŋə̀ fàʼà ẅùə̀ nɨ ka à zhyə̂ e ànwùə̀ nɨ masàa e à tàʼnə lo â ghɨ̀rə̀ la ngɨ̀rə̀ a zhyə̀ nɨ mbə̀ʼə pɨ kəʼə̀ e, pɨ ghǎ kəʼə̀ e pɨ mɨlyiʼə. Ŋònə̀ wa nɨ pɨ ŋânə ɨ̀pwuumə̀ pɨ̀noʼnə ambo ze la pɨ ghǎ kɨ kẅiirə̀ a pɨ̀noʼnə ambo ze. Lenəla ŋònə̀ nɨ pɨ ŋânə a pyə̀ nɨ noʼnə ntsàarə̀, pɨ ghǎ kɨ pyiitə̀ a pyə̀ nɨ noʼnə ntsàarə̀.

⁴⁹“Ǹtô la a nɨ tswuʼə̀ ɨ̀mǔ amwuə àtwuə̀ ɨ̀shyə̂ lo ɨ̂ kɨrə̀, ntyiʼə̀ nkòŋə̀ lo ɨ pyə̀ mə mbə mə kɨrə̀.

⁵⁰Ngwə̀ nɨ àkẅiirə̀ nchyə ngəʼə̀ nɨ mbɨ kẅiirə̀. Mbə̀ʼə m̀bə mə̀ nɨ àpotə̀ ntɨŋmə̀ apə̀, tə mbyàa nkwùə̀ nɨ ngǎ myàanə̀

⁵¹Nɨ̀ lanə nkwàŋə̀ lo ǹdaʼa nshwuʼə̀ ntô a àtwuə̀ ɨ̀shyə̂ ghə la a nɨ ŋâ àporə̀porə̀? Ngaŋə, nshwəŋə̀ ambo pɨghə lo, ntô pə a nɨ ghàbə̀.

⁵²Ntiinə a nɨ pìʼnə̀ tɨ̀tsòŋə̀ ndâ nɨ pànə̀ pənə amwuə pɨtaanə̀, pɨ̌ ghàbə̀ a zèrə, pànə̀ pɨpaa mə mbàanə̀ pɨ pɨtarə, pɨ pɨtarə mə mbàanə̀ pɨ pɨpaa.

⁵³Pànə̀ ghǎ ghàpə̀, tǎ ghobə moonə̀ e tyiʼə̀ ndzòŋnə̀, mǎ ghobə moonə̀ e yɨ̀ mə̀ngyə̌ mə ndzòŋnə̀; mǎ ndâ ghobə ngẅùə moonə̀ e mə ndzòŋnə̀.”

⁵⁴Yěsû làŋə̀ nɨ mbyə̀ nshwəŋə̀ ambo àpùŋə̀ pànə̀ wa lo, “Nɨ̀ tə ndzəənə̀ mbàʼà ɨ̀ koʼò a pàa ngẅènə̀ nẅùumə̀ nɨ̀ zùŋə̀ nshwəŋə̀ lo mbə̀ŋə̀ pɨ lô, ɨ̀ kɨ ndô.

⁵⁵Nɨ̀ zəənə̀ a fèrə̀ a furə̀ a mɨ̀tùŋə nɨ shwəŋə̀ lo, ‘ɨlyiʼə pə ndwuumə̀; a kɨ mbə lenə.

⁵⁶Ngàŋə àpə̀grə̀! Nɨ̀ zhyə̂ la a nɨ tiitə̀ mɨ̀nwùə̀ nɨ mɨ furə̀nə amwuə àtwuə̀ ɨ̀shyə̂ ghə̀ pobə nɨ̀pwuurə̀. A ghɨ̀rə̀ àkə lo kò nɨ̀ tiitə̀ mɨ̀nwùə̀ nɨ mɨ furə̀nə amwuə mɨnguʼu mə?”

⁵⁷“A ghɨ̀rə̀ àkə ka nɨ̀ zhyə̂ a wɨghə ànwùə̀ nɨ a təəmə̀nə?

⁵⁸Pɨghə ŋònə̀ nɨ à chyânə ɨ̀sàʼa aŋunə ghò tə mə ndèrə̀ a mbyə̀ ngàŋə̀ ɨ̀sàʼa mɨ̀sàʼa, wə̀ kyiitə̀ lo pɨghə ze shwàatə̀ a ẅèrə àlàŋə ndwuumə̀ mbə̀ʼə a kaŋə ghə̀ ŋâ o ambo ngàŋə̀ ɨ̀sàʼa mɨ̀sàʼa, ngàŋə̀ ɨ̀sàʼa mɨ̀sàʼa â ŋâ o ambo pɨ̀pwùrəshyə̀, pɨ̀pwùrəshyə̀ chyâ o a nkaʼà ɨ̀tsaŋə̀.

⁵⁹Ǹshwəŋə̀ tyìʼə̀ nkǔŋə nkuŋə ambo ghò lo, wə̀ tə kwuunə̀ a ɨ̀tsaŋə̀ ghə, wə̀ nwuunə̀ ghu tə mbyàa nkwùə̀ nɨ wə̀ ghǎ myàanə̀ twuə̀ àzwuumə̀ za nɨ wə̀ ẅìimə̀nə la tyìʼə̀ àtsùmə̀ tə shwuʼə̀ pyàa aŋunə ànini yè lẅùutə̀nə za.”