Read Pinyin Lukə̀ 13 Bible Online

Lukə̀ 13 - Pinyin bible

Lukə̀ 13

¹A lə̀ pə nkwùə̀ ghu nɨ Yěsû à lə̀ mənə nshwəŋnə̀ la, pànə̀ pɨ̀tse lə̀ shwəŋə̀ ambo ze tsaʼnə Palètə̀ à lə̀ shwəŋə̀nə pɨ zhwuutə̀ pànə̀ pɨ Galìlyə̂ pɨ̀tse ngẅìrə̀kə̀ àləəmə̀ àzobə ghobə yè mɨ̀nyàamə̀ nɨ pɨ lə̀ mənə mmàʼà Nẅùə̀ ghu.

²Yěsû a pyiitə̀ ambo pobə lo, “Nɨ̀ kwàŋə̀ lo pèrə pə pànə̀ pɨ Galìlyə̂ lə̀ kwɨghə̀ la ntiinə pobə pənə ngàŋə ngɨ̀rə̀ ɨ̀nwùə̀ tɨ̀pòŋə̀ ntsàarə̀ a pɨ̀tse pànə̀ pɨ Galìlyə̂?

³Ǹshwəŋə̀ ambo pɨghə lo ka a pə e a lenə. Nɨ̀ tə ngoŋə̀ a wɨghə mɨ̀ntɨŋmə̀ ɨ̀mɨghə tɨ pə̀ŋə̀ aŋunə tɨ̀pòŋə̀ ɨwɨghə, yi nɨ̀ ghǎ kɨ kwɨghə̀ tsaʼa pobə.

⁴Kə̀ nɨ̀ kɨ nchi nkwàŋə̀ lo pànə̀ pa nɨ̀ghumə̀ ntsòbə̀ nɨ̀fàamə̂, pyə̀ nɨ mɨlyiʼə tə̀sàa ndâ nɨkaŋə nɨ pɨ lə̀ poomə̀nə ɨ̀ koʼò ndèrə̀ a nɨ̀pwuurə̀ ɨ̀ lə̀ kunə̀ nzhwuutə̀ a ghobə a nɨ̀kwurə̀ Silòmə̀ la lə̀ ghɨ̀rə̀ ànwùə̀ tɨ̀pòŋə̀ zhyə̀ nɨ a tsàarə̀nə pànə̀ pɨ̀tsùmə̀ pyə̀ nɨ pɨ pənə a Yèrusalèmə̀?

⁵Ngaŋə! Ka pə e a lenə. Nɨ̀ tɨ ngoŋə̀ a wɨghə mɨ̀ntɨŋmə̀ ɨ̀mɨghə tɨ pə̀ŋə̀ yi nɨ ghǎ kwɨghə̀ la amwuə ndwuumə̀ ẅèrə wə̀.”

⁶Yěsû a chi nshwəŋə̀ ambo pobə amwuə àshwəŋnə̀ nàanə nàanə lo, “Ŋònə̀ ɨ̀tse à lə̀ pyə̀ àtɨ̀ghə figə̀ e amwuə mbyiinə̀ mɨ̀tɨ̀ghə e, nga ntô a nɨ naŋə̀, ndzəənə̀ lo ka à zumə̀ e mɨ̀ntàamə.

⁷A shwəŋə̀ ambo mbyabə̀ nkaʼà lo, ‘Naŋə̀! Lə̌ nguʼu ɨtarə nɨ ǹtô mə a nɨ naŋə̀ àtɨ̀ghə zə la ka zəənə̀ mə̀ mɨ̀ntàamə àtwuə̀. Wàrə̀ mmàʼà a ɨ̀shyə̂; a nàanə̀ àpàbə ɨ̀shyə̂ zə̀ aŋunə àkə?’

⁸Mbyabə̀ nkaʼà wa a kẅùə̀ ambo ze lo, ‘Tǎ, myàʼtə̀ nguʼu wə̀ ɨ̂ chi ndàŋə̀, mbɨ tuŋə̀ ɨ̀sùmə e kamnə̀ chyâ mànyunə̀,

⁹mbə̀ʼə a ghǎ mbə amwuə ẅùə̀ nguʼu ndzumə̀, a pòŋə̀, a ka zumə̀ e wə̀ wàrə̀ mmàʼà a ɨ̀shyə̂.’”

¹⁰A lə̀ pə̀ njyə̂ àlaʼà ɨ̀tse Yěsû pə̀ amwuə ndâ àshwatə̀ pɨ̀Jew mmə nèrə̀ mɨ̀nwùə̀ ghu.

¹¹Mə̀ngyə̌ ɨ̀tse à lə̀ pə ghu nɨ àzhwùə̀ tɨ̀pòŋə̀ a lə̀ pənə amwuə ze ngɨ̀rə̀ a ghòonə̀ aŋunə nguʼu ntsòbə̀ nɨ̀fàamə̂; ŋŋuʼtə̀ ngyìinə̀, ka pə zhyə̂ pə̀ʼkə̀ təəmə̀ e.

¹²Nkwùə̀ nɨ Yěsû à lə̀ zəənə̀nə e, à lə̀ fuŋə̀ e a mbyə̀, nshwəŋə̀ ambo ze lo, “Mə̀ngyə̌, wə̀ fiitə̀ aŋunə nɨ̀ghòonə̀ o wa.”

¹³Yěsû à lə̀ tsàa àpô e nnùŋə̀ aŋunə ze, a zùŋə̀ nshyə̀ mbɨ̀ŋmə̀ e mbə̀ʼkə̀ ntəəmə̀ ntyiʼə̀ nguʼtə̀ a Nẅùə̀.

¹⁴Àtwuə̀ ndâ àshwatə̀ pɨ̀Jew a lə̀ zaŋə̀ a loŋə ntiinə Yěsû à lə̀ parə̀nə a mə̀ngyə̌ wa amwuə njyə̂ àlaʼà ntyiʼə̀ nshwəŋə̀ ambo pànə̀ nɨ pɨ lə̀ pənə ghu lo, “Mɨ̀njyə̂ mɨ àfàʼà chyə̂ la ntuurə̀; nɨ̀ mə ntô amwuə mɨ̀njyə̂ mèrə mə njiilo pɨ parə̀ a wɨghə, ka pə e njyə̂ àlaʼà.”

¹⁵Ndòʼnə̀mbyə̂ à lə̀ kẅùə̀ ambo ze lo, “Ghǒ ngàŋə̀ àpə̀grə̀! Ŋwùə̀ wɨghə ɨ̀tse à wa ghu nɨ ka a fuukə̀ e ɨ̀fòŋə̀ e kə̀ ndzàkɨshyə̀ njyə̂ àlaʼà ndèrə̀ nɨ zèrə lo ɨ̂ nô nchyə?

¹⁶La, nɨ̀ zəənə̀, lə̌ moonə̀ Abràhamə̀ ghùtse nɨ Satàanə̀ à lə̀ korə̀nə e aŋunə nguʼu ntsòbə̀ nɨ̀fàamə̂; ka a kùʼnə̀ e lo mbə̀ʼə pɨ kyàa e njyə̂ àlaʼà aŋunə àzwuumə̀ zhyə̀ nɨ a lə̀ korə̀nə e?”

¹⁷Àkẅùə̀ àshwəŋnə̀ e a lə̀ ghɨ̀rə̀ ɨ̀sɨŋnə̀ koorə̀ ngàŋə̀ kɨpaanə ɨ̀ze za; pànə̀ pɨ̀tsùmə̀ lə̀ tyiʼə̀ ngaʼà ntii mɨ̀nwùə̀ mɨ yerə̀nə yerə̀nə nɨ à lə̀ ghɨ̀rə̀nə.

¹⁸Yěsû a tyiʼə̀ nshwəŋə̀ lo, “Ànwùə̀ nɨ̀fò nɨ̀pwuurə̀ a chyə̂ la tsaʼa àkə? Kə̀ mbə̀ʼə m̀mɨ̀nkə̀ lə nɨ àkə?

¹⁹A chyə̂ la tsaʼa mbyə àloonə̀ zhyə̀ nɨ ŋònə̀ ɨ̀tse à lə̀ lòonə ngə̀ mbyə̀ amwuə nkaʼà e; ɨ̀ koʼò ntyiʼə̀ mbə àtɨ̀ghə, pɨ̀sɨ̀ŋə tyiʼə̀ ntô nkorə̀ mɨ̀nkàanə̀ ɨ̀mobə aŋunə mɨ̀fàa ɨ̀me.”

²⁰Yěsû a chi nshwəŋə̀ lo, “Mbə̀ʼə m̀mɨ̀nkə̀ ànwùə̀ Nɨ̀fò Nẅùə̀ lə nɨ àkə?”

²¹A chyə̂ la tsaʼa mbyə̌ àpaanə̀ nɨ mə̀ngyə̌ a chyânə amwuə àpaanə̀ nɨ a noʼnə, ngɨ̀rə̀ àpaanə̀ yèghu a tyiʼə̀ nkoʼò ka mɨ̀zùŋə.

²²Yěsû à lə̀ chi ngə̀ ndàŋə̀ amwuə mɨ̀mbòmpə mɨ ɨ̀laʼà pobə ɨ̀laʼà ngyìinə̀ nchwìitə̀ ntwuumə̀ Nẅùə̀ nkoʼò ndèrə̀ a Yèrusalèmə̀.

²³Ŋònə̀ ɨ̀tse a pyiitə̀ ambo ze lo, “Tǎ la ghǎ chwarə̀ tyìʼə̀ ndùnə̀ pànə̀ yɨ̀ kɨ̂?” Yěsû kẅùə̀ lo,

²⁴“Nɨ̀ kyiitə̀ a nɨ kwuunə̀ amwuə ntswùə̀ ndâ yɨ̀ kɨ̂ wa; ntiinə pànə̀ pɨ̀noʼnə ghǎ pə kyiitə̀ a nɨ kwuunə̀ amwuə, la pə kwuunə̀ a ghobə apə̀.

²⁵Ngàŋə̀ ndâ à ghǎ lòo a ɨ̀shyə̂ a taʼà nkwùə̀ wùʼnə̀ ndâ, nɨ̀ ghoŋə̀ a àpyìinə ntyiʼə̀ ntə ntsòotə̀ ntswùə̀ ndâ nshwəŋə̀ lo, ‘Tǎ ẅùʼə̀ pəə kwuunə̀!’ Tǎ à ghǎ kẅùə̀ ambo pobə lo, ‘Ka nzhyə̂ mə̀ a wɨghə ka kɨ zhyə̂ mə̀ alyiʼə nɨ nɨ̀ furə̀nə.’

²⁶Nɨ̀ tyiʼə̀ mbìʼnə̀ a nɨ shwəŋə̀ lo, ‘Pəə lə̀ pə ndzɨghə̀ nkɨ mmə nnô pə̀ənə̀, wə̀ kɨ mmə nnèrə̀ ànwùə̀ Nẅùə̀ amwuə àlaʼà àzəə.’

²⁷La tǎ à ghǎ shwəŋə̀ ambo pɨghə lo, ‘Ka ǹzhyə̂ mə̀ a wɨghə ka kɨ zhyə̂ mə̀ alyiʼə nɨ nɨ̀ furə̀nə. Nɨ̀ mìntə̀ a wɨghə a nɨ̀pwùnə mɨ̀ŋə̀ ndèrə̀ mbǎ ngàŋə̀ ngɨ̀rə̀ ɨ̀nwùə̀ tɨ̀pòŋə̀.’

²⁸Nɨ̀ ghǎ tyiʼə̀ yìi kwurə̀ mɨsoŋə ɨ̀mɨghə nkwùə̀ nɨ nɨ̀ ghǎ zəənə̀ Abràhamə̀ pobə Isàkə̀ nɨ Yàkobə̀, nɨ ngàŋə̀ ntwuumə̀ Nẅùə̀ ntsùmə̀ ɨ pə̀ amwuə ànwùə̀ Nɨ̀fò Nẅùə̀. La pɨ̀ tinə̀ a wɨghə ntsàa a àpyìinə.

²⁹Pànə̀ ghǎ furə̀ a pàa saʼà nẅùumə̀ nɨ pàa ngẅènə̀ nẅùumə̀, pàa mɨ̀kòʼnə nɨ pàa mɨ̀tùŋə, tô nwuunə̀ alyiʼə nɨ̀ghaʼà amwuə ànwùə̀ Nɨ̀fò Nẅùə̀.

³⁰Nɨ̀ zəənə̀, pànə̀ pɨ̀tse pyə̀nə pɨ pənə pɨ̀lẅùə̀ pɨ̀ndzùmə̀ tɨ̀tsòŋə̀, pɨ ghǎ pə̀ pɨ̀tsàa pɨ̀mbyə̀, ɨ pɨ̀tse nɨ pɨ pənə pɨ̀tsàa pɨ̀mbyə̀ tɨ̀tsòŋə̀ la, ntyiʼə̀ mbə pɨ̀lẅùə̀ pɨ̀ndzùmə̀.”

³¹Tyìʼə̀ nkwùə̀ ghu, pɨ̀Farìsî pɨ̀tse lə̀ tô a nɨ̀pwùnə Yěsû nshwəŋə̀ ambo ze lo, “Furə̀ a nɨ̀ghə̂ ndèrə̀ alyiʼə nyaanə ntiinə Heròdə̀ à wə̀ ntàʼà zhwuutə̀ o.”

³²Yěsû a kẅùə̀ ambo pobə lo, “Twùə̀ ngə̀ nshwəŋə̀ ambo antsobə wa lo, ‘Mbɨ fuukə̀ ɨ̀zhyə̂ a mɨ̀pùmə̀ pə̀ənə̀, kɨ parə̀ mɨghoonə ɨ̀mobə sìnə̀ ghobə ngẅùʼə, a kɨ pə njyə̂ ɨtarə m̂myàanə̀ àfàʼà mə̀.’

³³La ǹchyə̂ a nɨ lèrə̀ nɨ mbyə̀ sìnə̀ ghobə ngẅùʼə nɨ njyə̂ nɨ ɨ̀ paatə̀nə la; ka a kùʼnə̀ e lo pɨ̀ zhwuutə̀ a ngàŋə̀ ntwuumə̀ Nẅùə̀ alyiʼə nyaanə ndàŋə̀ e a Yèrusalèmə̀.

³⁴“Pànə̀ pɨ Yèrusalèmə̀, pànə̀ pɨ Yèrusalèmə̀! Nɨ̀ zhwuutə̀ ngàŋə ntwuumə̀ Nẅùə̀, ntumpə̀ pànə̀ nɨ pɨ twuumə̀nə ambo pɨghə nɨ mɨ̀ghòorə nzhwuutə̀. A nkwùə̀ noʼnə nɨ ǹtàʼà mə lo shwatə̀ ɨ̀poonə̀ ɨ̀pɨghə tsaʼa mǎ ngubə̀ à wa nkumnə̀ ɨ̀poonə̀ ɨ̀pe a ɨ̀sùmə mɨ̀pàrə̀ ɨ̀me, la ka nɨ̀ pyiimə̀ a wɨghə.

³⁵Nɨ̀ naŋə̀! Nẅùə̀ à ghǎ waʼà a wɨghə nɨ̀ pə àtwuə̀ nɨ pɨghə. Ǹshwəŋə̀ ambo pɨghə lo ka nɨ̀ pə chi zəənə̀ wɨghə a gha tə pyàa nkwùə̀ nɨ nɨ̀ ghǎ tyiʼə̀ shwəŋə̀ lo, ‘Mborə̀ ɨ̀ chyə̂ ambo ẅùə̀ wa nɨ à tônə aŋunə nɨ̀linə̀ nɨ Ndòʼnə̀mbyə̂ la.’”